1, 2. (a) ʼO ʼuhiga mo he ʼu taumātuʼa foʼou, koteā te ʼu fehuʼi ʼe lagi tou fai ʼi ʼihi temi, pea koteā tona tupuʼaga? (b) Koteā te ʼu fehuʼi ʼaē kā tou vakaʼi anai ʼi te kāpite ʼaenī?

ʼE KOTOU leleiʼia koa mokā kotou ʼolo ki he ʼu fai ʼohoana? Tokolahi ʼe natou leleiʼia te ʼu taʼi lakaga ʼaia heʼe feala ai ke hoko he toe fiafia lahi. ʼE kotou sio ai ki te taumātuʼa ʼe nā teu matalelei, pea ʼe hā lelei tanā fiafia ʼi tonā ʼu fofoga! ʼI te ʼaho ʼaia, kua nā fakafiafia pē pea ʼe tou fakaʼamu ʼe fua manūʼia anai tonā kā haʼu ʼo fēia ki tanā ʼu fakatuʼutuʼu ki ʼamuli.

² Kae iā ʼaho nei, ʼe tou tokagaʼi ʼe mole kei mahino te hahaʼi ki te ʼuhiga moʼoni ʼo te ʼohoana. Logolā tatatou fakaʼamu ʼaē ke maʼuli manūʼia ia te ʼu taumātuʼa foʼou ʼaia, kae ʼe lagi ʼi ʼihi temi ʼe tou fai te ʼu fehuʼi ʼaenī: ‘ ʼE maʼuli fiafia anai koa ia te taumātuʼa ʼaenī? ʼE tologa anai koa tonā ʼohoana?’ Ko te ʼu tali ki te ʼu fehuʼi ʼaia ʼe fakalogo pē anai ki te falala ʼa te taumātuʼa pea mo tanā maʼuliʼi ia te ʼu tokoni ʼa te ʼAtua ʼo ʼuhiga mo te nofo ʼohoana. (Tāʼaga Lea 3:5, 6) ʼE tonu ke nā fai te faʼahi ʼaia ke feala ai hanā nonofo ʼi te ʼofa ʼo te ʼAtua. Tou vakaʼi age muʼa ʼi te temi nei ia te tali ʼa te Tohi-Tapu ki te ʼu fehuʼi ʼaenī e fā: Koteā ʼaē ʼe tonu ke tupu ai he fia ʼohoana ʼa he tahi? Kapau ʼe kotou fia ʼohoana, ko ai anai ʼaē kā kotou filifili ke kotou ʼohoana mo ia? ʼE feafeaʼi hakotou teuteu ke kotou lava fakahoko te ʼu maʼua ʼo te nofo ʼohoana? Pea koteā ʼaē kā tokoni anai ki he taumātuʼa ke tologa ia tonā maʼuli fiafia?

3. He koʼē ʼe mole aga fakapotopoto anai he tahi mo kapau ʼe fia ʼohoana kae mole tupu mai he ʼu tupuʼaga ʼe lelei?

³ ʼI te manatu ʼa ʼihi, ʼe tonu ke tou ʼohoana ke tou maʼuli fiafia  ai, heʼe mole feala ke tou maʼuli fīmālie peʼe tou maʼuli fiafia mo kapau ʼe mole maʼu hokita ʼohoana. ʼE hala ia te manatu ʼaia! Ko Sesu neʼe selipatea, pea neʼe ina fakatatau te nofo selipatea ki he meʼa ʼofa, pea neʼe ina fakalotomālohiʼi ia nātou ʼaē ʼe natou lavaʼi ia te ʼaluʼaga ʼaia. (Mateo 19:11, 12) Neʼe toe talanoa pē foki ia te ʼapositolo ko Paulo ki te ʼu lelei ʼo te nofo selipatea. (1 Kolonito 7:32-38) Neʼe mole fai e Sesu peʼe ko Paulo he lao ʼo ʼuhiga mo te nofo selipatea; ʼi tona fakahagatonu, ko te “tapuʼi [ʼo] te ʼohoana” ʼe ko he fakatotonu ia ʼe tuʼu ʼi “te ʼu akonaki ʼa te kau temonio.” (1 Timoteo 4:1-3) Kiā nātou ʼaē ʼe fia tauhi kiā Sehova kae mole natou loto ke fakaleluʼi ia nātou, ʼe lahi anai te ʼu lelei kā natou maʼu mokā natou nonofo selipatea. Koia ʼe mole fakapotopoto anai he tahi mo kapau ʼe fia ʼohoana kae mole tupu mai he ʼu tupuʼaga ʼe lelei, ohagē lā mokā ʼe fakaneke ia ia e hona ʼu kaumeʼa.

4. Koteā te tafitoʼaga lelei ʼaē ʼe foaki e he maʼuli fakataumātuʼa ʼe lelei moʼo taupau ʼo he fānau?

⁴ ʼI te tahi age faʼahi, ʼe ʼi ai koa he ʼu tupuʼaga ʼe lelei ke fia ʼohoana ai he tahi? ʼEī. Ko te ʼohoana ʼe ko he tahi meʼa ʼofa ʼaia mai te ʼAtua ʼofa. (Senesi 2:18) ʼE maʼu mai ai he ʼu lelei pea mo he ʼu tapuakina ki ʼamuli. Ohagē lā, ko he maʼuli fakataumātuʼa ʼe fua lelei, ʼe ko he tafitoʼaga lelei pē ʼaia ʼe tahi ki he maʼuli fakafāmili. ʼE ʼaoga ki te fānau ke natou maʼuli ʼi he loto fale ʼe tokalelei mo hanatou ʼu mātuʼa ʼe nā pusiaki ia nātou, mo ʼofa kiā nātou, mo fakatonutonuʼi ia nātou, pea mo takitaki ia nātou. (Pesalemo 127:3; Efesi 6:1-4) Kae ko te taupau ʼo he fānau ʼe mole ko te tupuʼaga pē ʼaia ke fia ʼohoana ai he tahi.

5, 6. (a) Ohagē ko tona ʼui iā Tagata Tānaki 4:9-12, koteā he ʼu lelei ʼe maʼu mai he fakakaumeʼa lelei? (b) Koteā ʼaē ʼe feala ai ke fakatatau ia te maʼuli fakataumātuʼa ki he maea kau tolu?

⁵ Tou vakaʼi ia te vaega tāfito ʼo te kāpite ʼaenī, mo tona ʼu vaega ki muʼa atu: “ ʼE lelei age he toko lua ʼi he tokotahi, heʼe lelei tonā totogi ʼi tanā gāue kinakina. Heʼe kapau ʼe tō he tahi iā nāua, ʼe feala ki ʼaē ke ina fakatuʼuake tona hoa. Kae ʼe feafeaʼi anai kiā ia ʼaē e tokotahi mokā ʼe tō, kā mole he tahi moʼona fakatuʼuake? Tahi ʼaē, kapau ʼe momoe fakatahi he toko lua, ʼe mahino papau ia ʼe nā māfana anai, kae ko ia ʼaē ʼe tokotahi, ʼe feafeaʼi anai hana māfana? Pea kapau ʼe lavaʼi e he tahi he tokotahi, ko he toko lua fakatahi ʼe nā lava fakafeagai anai ki ai. Pea ko he maea ʼe kau tolu, ʼe mole motu vave anai.”—Tagata Tānaki 4:9-12.

 ⁶ ʼUluaki, ʼe fakahā ʼi te vaega ʼaia te maʼuhiga ʼo te fakakaumeʼa. ʼE mahino ia, kā ʼohoana he tokolua pea ʼe nā fekaumeʼa leleiʼaki. Ohagē ko tona fakahā ʼi te vaega ʼaia, ʼe maʼu ʼi te fakatahi ʼaia te tokoni, te fakalotofīmālie, pea mo te puipui. ʼE mālohi tāfito he ʼohoana mokā ʼe ʼi ai he tahi age meʼa ʼe hilifaki ki te logotahi ʼa he tokolua. Ohagē ko tona fakahā ʼi te vaega, ʼe feala ke motu vave he maea ʼe kau lua, kae ko he maea neʼe fī kau tolu ʼe faigataʼa age anai tona motu. Kapau ʼe tōkakaga tāfito ia te tagata ʼohoana pea mo te fafine ʼohoana ke nā fakafiafia ia Sehova, pea ko tonā maʼuli fakataumātuʼa ʼe hagē pē anai ko te maea kau tolu ʼaia. ʼI tanā tauhi fakamālotoloto kiā Sehova, ʼe liliu ai tonā maʼuli fakataumātuʼa ʼo mālohi ʼaupitō.

7, 8. (a) Koteā te tokoni neʼe tohi e Paulo ki te kau Kilisitiano selipatea ʼaē ʼe natou tauʼi ia te ʼu holi ki te ʼu felāveʼi fakasino? (b) Koteā te manatu ʼe foaki mai ʼi te Tohi-Tapu ki te ʼuhiga moʼoni ʼo te maʼuli fakataumātuʼa?

⁷ Ko te ʼu felāveʼi fakasino ʼe fakagafua pē ke fai e he taumātuʼa kua ʼohoana. ʼE ko te ʼaluʼaga pē ʼaia e tahi ʼaē ʼe liliu ai te ʼu felāveʼi fakasino ko he matapuna ʼo te fiafia. (Tāʼaga Lea 5:18) Ko he selipatea kua fakalaka ʼi te faʼahi ʼaē ʼe higoaʼi ʼi te Tohi-Tapu ko “te mātala ʼo tona temi tūpulaga”—te temi ʼaē ʼe mālohi ai te ʼu holi ki te ʼu felāveʼi fakasino—ʼe lagi kei ina tauʼi pē ia te ʼu holi ki te ʼu felāveʼi fakasino. Kapau ʼe mole ina lolomi ia te ʼu holi ʼaia, pea ʼe feala anai ke ina fai he aga heʼeʼaoga. ʼAki te takitaki ʼa te ʼAtua, neʼe tohi e Paulo ia te tokoni ʼaenī ki te kau selipatea: “Kapau ʼe mole natou lavaʼi te lolomi ʼo nātou totonu, pea ke natou ʼohoana, heʼe lelei age hakita ʼohoana ʼi hakita vela ʼi te holi.”—1 Kolonito 7:9, 36; Sake 1:15.

⁸ Tatau aipē pē koteā ʼaē ʼe tupu ai he fia ʼohoana ʼa he tahi, kae ʼe tonu ke mahino kiā ia te ʼuhiga moʼoni ʼo te maʼuli fakataumātuʼa. Ohagē ko tona tohi e Paulo, ko nātou ʼaē ʼe ʼohoana ʼe natou “maʼu anai te ʼu mamahi ʼi tonatou kakano.” (1 Kolonito 7:28) ʼE hoko ki te hahaʼi ʼohoana te ʼu faigataʼaʼia ʼe mole hoko anai kiā nātou ʼaē ʼe kei selipatea. Kae kapau ʼe kotou fakatuʼutuʼu ke kotou ʼohoana, koteā ʼaē ʼe feala ke kotou fai moʼo fakasiʼisiʼi te ʼu faigataʼaʼia kae ke lahi age te ʼu tapuakina? Ko te puleʼaki kiai, ʼe ko hakotou fili fakapotopoto ia tokotou hoa.

9, 10. (a) Koteā te fakatā neʼe fai e Paulo moʼo fakahā te tuʼutāmaki ʼo te fakatahi mo te hahaʼi ʼaē ʼe mole tui? (b) ʼI te agamāhani, koteā ʼaē ʼe hoko mokā ʼe mole mulimuli he tahi ki te tokoni ʼa te ʼAtua ke mole ʼohoana mo he tahi ʼe mole tui?

⁹ Neʼe takitaki e te ʼAtua ia Paulo ke ina tohi te pelesepeto maʼuhiga, pea ʼe feala ke kotou mulimuli kiai mokā kotou fili he tahi ke kotou ʼohoanaʼi: “ ʼAua naʼa kotou kaugā ʼamo fakatahi mo te hahaʼi ʼaē ʼe mole tui.” (2 Kolonito 6:14) Neʼe fakatafito tana fakatātā ʼaia ki te gāue kele. Kapau ko he ʼu manu e lua ʼe kehekehe tonā lahi pea mo tonā mālohi kae ʼe nā kaugā ʼamo, ʼe nā mamahi anai toko lua. ʼO toe fēia pē mo kapau ko he tahi ʼe tui ʼe ʼohoana mo he tahi ʼe mole tui, ʼe mahino ia ʼe hoko anai he ʼu faigataʼaʼia. Kapau ko he tokotahi pē ʼi te taumātuʼa ʼaē ʼe fia nofo ʼi te ʼofa ʼo Sehova kae ko tona ia hoa ʼe mole tokaga ia kiai pea mo fehiʼa ki te tauhi ʼaia, ʼe mole tatau anai te ʼu faʼahi ʼaē kā nā fakamuʼamuʼa ʼi tonā maʼuli, pea ʼe mahino ia ʼe lahi anai te ʼu tokakovi kā hoko. Koia neʼe uga ai e Paulo ia te kau Kilisitiano ke natou ʼohoana “ ʼi te ʼAliki pē.”—1 Kolonito 7:39.

¹⁰ Ko ʼihi Kilisitiano selipatea ʼi tanatou manatu neʼe lelei age hanatou ʼohoana mo he tahi ʼe mole tui ʼi hanatou nonofo tokotahi. Ko ʼihi ʼe natou filifili ke mole natou mulimuli ki te tokoni Fakatohi-tapu, ʼo natou ʼohoana mo he tahi ʼe mole tauhi kiā Sehova. ʼI te agamāhani, ʼe natou māʼuʼuli mamahi. Ko nātou ʼaia kua natou ʼohoana mo he tahi ʼe mole feala hanatou palalau mo ia ki te ʼu meʼa ʼaē ʼe maʼuhiga tāfito ʼo te maʼuli. ʼI te temi ʼaē kua natou ʼohoana ai, kua lahi age tanatou logoʼi ia tanatou nonofo tokotahi ʼi te temi ʼaē neʼe kei natou selipatea ai. Kae meʼa fakafiafia, heʼe tokolahi te kau Kilisitiano selipatea ʼe natou falala ki te tokoni fakaʼatua ʼi te faʼahi ʼaia pea mo natou mulimuli agatonu kiai. (Pesalemo 32:8) Logolā ʼe natou fakaʼamu ke natou ʼohoana ʼi he ʼaho, kae ʼe natou nonofo selipatea ʼo aʼu ki te temi ʼaē kā natou maʼu ai anai honatou ʼohoana iā nātou ʼaē ʼe tauhi kiā Sehova ʼAtua.

11. Koteā ʼaē ʼe feala ke tokoni atu ke kotou fili fakapotopoto hokotou ʼohoana? (Vakaʼi mo te  pāsina 114, ia te fakamatala ʼaē ʼe ʼātakai.)

¹¹ ʼE moʼoni, ʼe mole ko te ʼu kaugana fuli ʼa Sehova ʼaē ʼe  feala ke liliu ko he hoa ʼe aga fakapotopoto. Kapau ʼe kotou fakatuʼutuʼu ke kotou ʼohoana, kotou kumi he tahi ʼe tatau mo kotou tona ʼulugaaga, tana ʼu fakatuʼutuʼu fakalaumālie, pea mo tona ʼofa ʼaē ki te ʼAtua. Ko te kalasi ʼo te kaugana agatonu neʼe ina tā te ʼu tuʼuga ʼalatike pea mo te ʼu tohi ʼo ʼuhiga mo te faʼahi ʼaia, pea ʼe lelei ke kotou vakaʼi ʼi te faikole ia te ʼu tokoni Fakatohi-tapu ʼaia, ʼo kotou fakafealagia ke natou takitaki ia koutou ʼo ʼuhiga mo te tonu maʼuhiga ʼaē kā kotou fai ki te faʼahi ʼaia. *—Pesalemo 119:105.

12. Koteā te agaʼi fenua ʼe lahi tona maʼu ʼi te ʼu fenua, pea koteā te faʼifaʼitaki ʼi te Tohi-Tapu ʼe lelei ke tou mulimuli kiai?

¹² ʼE lahi te ʼu agaʼi fenua e ko te ʼu mātuʼa ʼaē ʼe natou fili te ʼohoana ʼo tanatou fānau. ʼI te ʼu agaʼi fenua ʼaia, ʼe ʼui ko te ʼu mātuʼa ʼe natou popoto age pea mo māhani age ʼi te maʼuli, ʼo feala ai ke natou fai ia te tonu maʼuhiga ʼaia. Ko ʼihi ʼohoana neʼe kua fakatuʼutuʼu fakatomuʼa ʼe iku lelei, ohagē ko te ʼu ʼohoana neʼe fai ʼi te temi muʼa. Ko te faʼifaʼitaki ʼa Apalahamo ʼi tana fekauʼi tana tagata kaugana ke ina kumi he ʼohoana maʼa Isaake, ʼe ʼaoga ki te ʼu mātuʼa iā ʼaho nei ʼaē ʼe hoko kiā nātou ia te ʼaluʼaga ʼaia. Neʼe mole kumi e Apalahamo he taʼahine ʼe maʼu koloa pea mo maʼu tuʼulaga. Kae neʼe faiga ia ke ina maʼu he ʼohoana ʼo Isaake ʼi te hahaʼi ʼaē ʼe tauhi kiā Sehova. *—Senesi 24:3, 67.

13-15. (a) ʼE lava tokoni feafeaʼi ia te pelesepeto ʼaē ʼe tou maʼu iā Tāʼaga Lea 24:27 ki he tama ʼe ina fakakaukauʼi ke ʼohoana? (b) Koteā ʼaē ʼe lava fai e he taʼahine moʼo teuteu ke ina lava fakahoko te ʼu maʼua ʼo te nofo ʼohoana?

¹³ Kapau ʼe kotou fakakaukau ke kotou ʼohoana, ʼe tonu ke kotou  fai te fehuʼi ʼaenī kiā koutou totonu: ‘Kua feala moʼoni koa ke au ʼohoana?’ ʼE mole kotou tali pē anai ʼo mulimuli ki takotou manako ʼaē ki he tahi, peʼe ko te ʼu felāveʼi fakasino ʼaē ʼe fai ʼi te nofo ʼohoana, peʼe ko hakotou fia kaumeʼa mo he tahi, peʼe ko takotou fia taupau hakotou fānau. ʼE ʼi ai te ʼu maʼua tāfito ʼe tonu ke fakakaukau kiai ia te tama peʼe ko te taʼahine ʼaē ʼe fia ʼohoana.

¹⁴ Ko he tama ʼe ina kumi hona ʼohoana ʼe tonu ke ina fakakaukauʼi lelei te pelesepeto ʼaenī: “Teuteuʼi tau gāue ʼi tuʼa, pea ke ke teuteuʼi maʼa koe ʼi te gāueʼaga. Hili ʼaia pea ʼe tonu anai ke ke laga mo tou loto fale.” (Tāʼaga Lea 24:27) Koteā te manatu ʼaē ʼe fakamaʼuhigaʼi ʼi henī? ʼI te temi ʼaia, ko he tagata kā ina fia “laga . . . [hona] loto fale,” peʼe fia ʼohoana moʼo maʼu hona fāmili, neʼe tonu ke ina fai te fehuʼi ʼaenī kiā ia totonu: ‘Kua feala koa ke au tokaga pea mo tokoni ki hoku ʼohoana pea mo hamā ʼu fānau ʼe tutupu ake anai ʼi tomā maʼuli ʼaia?’ Neʼe tonu muʼa ke gāue, ke tokaga ki tana gāueʼaga. ʼE toe tatau te pelesepeto ʼaia iā ʼaho nei. Ko he tama ʼe fia ʼohoana ʼe tonu ke teuteu ki tona ʼu maʼua ʼaē kā ina fakahoko ki ʼamuli. ʼI tona temi ʼaē kei maʼu ai tona mālohi, ʼe tonu anai ki te tagata ke gāue. ʼE fakahā ʼi te Folafola ʼa te ʼAtua, ko he tagata ʼe mole tokaga ki tona fāmili ʼi te faʼahi fakasino, mo te ʼu meʼa ʼaē ʼi ʼonatou loto pea ʼi te faʼahi fakalaumālie, ʼe kovi age ia ʼi he tahi ʼe mole tui!—1 Timoteo 5:8.

¹⁵ Ko he taʼahine ʼe fia ʼohoana ʼe toe loto mo ia ke ina fakahoko he ʼu maʼua lahi. ʼE vikiʼi ʼi te Tohi-Tapu te ʼu fealagia mo te ʼu kalitātē ʼo te fafine ʼohoana, ʼaē ʼe ʼaoga moʼo tokoni ki tona ʼohoana pea mo taupau tona loto fale. (Tāʼaga Lea 31:10-31) Ko te hahaʼi tagata pea mo te hahaʼi fafine ʼaē ʼe natou ʼohoana fakavilivili kae neʼe mole natou fakakaukauʼi te ʼu maʼua ʼaē ʼe tonu ke natou fakahoko mokā natou ʼosi ʼohoana anai, ʼe natou manatu pē kiā nātou totonu, ʼo mole natou fakakaukauʼi pe koteā anai ia te tokoni ʼaē kā natou foaki kiā ia ʼaē kā natou ʼohoanaʼi. Kae ko te faʼahi ʼaē ʼe maʼuhiga age kiā nātou ʼaē ʼe fia ʼohoana, ko tanatou lava maʼuliʼi te ʼu pelesepeto ʼi tonatou maʼuli fakataumātuʼa.

16, 17. Ko nātou ʼaē ʼe teuteu ke natou fakahoko tonatou ʼu maʼua ʼi te nofo ʼohoana ʼe tonu anai ke natou fakakaukauʼi te ʼu pelesepeto Fakatohi-tapu fea?

¹⁶ Ko he tahi ʼe teuteu ke ina fakahoko tona ʼu maʼua ʼi te nofo  ʼohoana, ʼe tonu anai ke ina fakakaukauʼi te fakatuʼutuʼu ʼa te ʼAtua ʼo ʼuhiga mo te tuʼulaga ʼo te tagata pea mo te fafine ʼohoana. ʼE tonu ke mahino ki te tagata ia te fakaʼuhiga ʼaē ʼo te tuʼulaga pule ʼi he loto fale Kilisitiano. ʼE mole ko he tuʼulaga ʼaia ke ina maʼu ai he faigamālie moʼo pule fefeka ki tona loto fale. Kae ʼe tonu ke ina faʼifaʼitakiʼi te faʼahiga pule ʼaē neʼe maʼu e Sesu. (Efesi 5:23) ʼO toe fēia pē, ko he fafine Kilisitiano ʼe tonu ke mahino ki te tuʼulaga maʼuhiga ʼaē ʼo te fafine ʼohoana. ʼE ina tali anai koa ke fakalogo ki “te lao ʼo tona ʼohoana”? (Loma 7:2) ʼI tona ʼuhiga kaugana ʼa Sehova, kua fakalogo ia ki te lao ʼa Sehova pea mo Kilisito. (Kalate 6:2) Ko te pule ʼo tona ʼohoana ʼi te loto fale ʼe ko te tahi lao ʼaia. ʼE feala koa hana lagolago pea mo talagafua ki te pule ʼo he tagata heʼe haohaoa? Kapau ʼe mole ina faʼa leleiʼia ia te faʼahi ʼaia, pea ʼe lelei age hana mole ʼohoana.

¹⁷ Tahi ʼaē meʼa, ʼe tonu kiā nāua takitokotahi ke nā tali ke nā fetokagaʼaki ki te ʼu meʼa ʼaē ʼe ʼaoga kiā nāua. (Filipe 2:4) Neʼe tohi fēnei e Paulo: “Ke kotou tahi ʼofa fēia ki tona ʼohoana, ohagē pē ko kita totonu; pea ki tona faʼahi, ko te fafine ʼe tonu ke ina maʼu he fakaʼapaʼapa loloto ki tona ʼohoana.” ʼAki te takitaki ʼa te ʼAtua, neʼe mahino kiā Paulo ʼe ʼaoga ki te tagata ke ina logoʼi ia te fakaʼapaʼapa ʼaē ʼo tona ʼohoana kiā te ia. Pea ʼe ʼaoga ke logoʼi e te fafine ia te ʼofa ʼaē ʼo tona ʼohoana kiā te ia.—Efesi 5:21-33.

18. He koʼē ʼe tonu ke loto lolomi he toko lua ʼi te temi ʼaē ʼe nā fakatahi ai?

¹⁸ Koia kā kamata fakatahi he tama mo he taʼahine, ʼe mole ko he temi pē ke nā fakafiafia fakatahi. ʼE ko he temi ʼaia ke akoako ai e te tama pea mo te taʼahine, peʼe feafeaʼi hanā felōgoi leleiʼaki pea mo nā vakavakaʼi ai peʼe tonu ke nā ʼohoana. ʼE ko he temi ke nā toe maʼu ai ia te loto lolomi! Ko te holi ʼaē ke fetāpikiʼaki moʼo fefakahāʼaki ia tonā ʼofa ʼe feala ke mālohi, heʼe kua nā femanakoʼaki. Kae ko nātou ʼaē ʼe feʼofaʼaki moʼoni ʼe mole natou fai anai he meʼa ʼe feala ke fakatupu kovi ʼi te faʼahi fakalaumālie kiā ia ʼaē ʼe natou ʼoʼofa ai. (1 Tesalonika 4:6) Koia kapau ʼe kotou fakatahi mo he tahi, kotou loto lolomi, heʼe feala ki te kalitātē ʼaia ke ʼaoga kiā koutou ʼi tokotou maʼuli kātoa, peʼe kotou ʼohoana peʼe kailoa.

19, 20. Koteā ʼaē ʼe kehekehe ai te manatu ʼa he Kilisitiano ʼo ʼuhiga mo te ʼohoana pea mo te manatu ʼa te hahaʼi tokolahi iā ʼaho nei? Kotou tuku mai he faʼifaʼitaki.

¹⁹ Kapau ʼe loto e he taumātuʼa ke tologa tonā ʼohoana, pea ʼe tonu ke nā maʼu ia te manatu ʼaē ʼe lelei ʼo ʼuhiga mo te fakapapau ʼaē neʼe nā fai. ʼI te ʼu tohi pea mo te ʼu ʼata, ʼi te agamāhani ko te ʼohoana ʼe ko he ikuʼaga fakaʼosi fakafiafia ʼaē ʼe loto kiai te hahaʼi. Kae ʼi te maʼuli māhani, ko te ʼohoana ʼe mole ko te ikuʼaga fakaʼosi ʼaia, kae ʼe ko te kamataʼaga ʼo te maʼuli fakatahi ʼa he taumātuʼa neʼe fakatuʼu e Sehova ke tologa. (Senesi 2:24) Kae fakaʼofaʼofa foki heʼe mole ko te manatu ʼaia ʼa te hahaʼi iā ʼaho nei. ʼI ʼihi agaʼi fenua, ko te ʼohoana ʼe hagē ko he noʼo ʼo he ʼu kauʼi maea e lua ʼe haʼi fakatahi. ʼE mole natou mahino ki te tāu mo feʼauga ʼo te fakatā ʼaia pea mo te manatu ʼa te hahaʼi fuli ʼo ʼuhiga mo te ʼohoana. Koteā tona tupuʼaga? Koteʼuhi ki te manatu ʼa ʼihi, ko he noʼo ʼe lelei mo kapau ʼe maʼu lelei ʼo fakalogo pē tona fualoa ki tona ʼaoga, pea ko te tahi manatu leva ʼo ʼuhiga mo he noʼo ʼe lelei, ʼe tonu ke faigafua tona haʼi pea mo tona veteki.

²⁰ Tokolahi iā ʼaho nei ʼe natou fakaʼuhiga ia te ʼohoana ohagē ko he fakatuʼutuʼu ʼe fakatemi pē ia. ʼE ʼohoana ʼihi heʼe ʼi tanatou manatu ʼe ʼalutahi mo te ʼu meʼa ʼaē ʼe ʼaoga kiā nātou, kae ʼe natou toe fakaʼamu pē foki ke natou māvete mo tonatou hoa mo kapau ʼe faigataʼaʼia tonatou maʼuli fakataumātuʼa. Kae kotou manatuʼi te fakatā ʼaē ʼe fakaʼaogaʼi ʼi te Tohi-Tapu ʼo ʼuhiga mo te noʼo ʼo te ʼohoana, ʼe ko te maea. Neʼe tologa ia te ʼu maea ʼaē neʼe fakaʼaogaʼi ʼi te ʼu vakalā, pea neʼe mole mavetevete ʼi he temi māʼiapē lā mokā neʼe hoko he toe ʼafā lahi. ʼO toe fēia mo te ʼohoana, neʼe fakatuʼu ke tologa ia. Kotou manatuʼi, neʼe ʼui fēnei e Sesu: “Ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.” (Mateo 19:6) Kapau ʼe kotou teuteu ʼohoana, ʼe tonu ke kotou maʼu ia te manatu ʼaia ʼo ʼuhiga mo te ʼohoana. Ko te taʼi fakapapau ʼaia, ʼe ina fakaliliu ai koa te ʼohoana ko he kavega? Kailoa ia.

21. Koteā te manatu ʼe tonu ke femaʼuʼaki e he taumātuʼa, pea koteā ʼaē kā tokoni kiā nāua ke nā manatu fēia?

²¹ ʼE tonu ki te taumātuʼa ke nā maʼu ia he manatu ʼe lelei ʼo  ʼuhiga mo nāua takitokotahi. Kapau ʼe nā tahi faiga ke nā tokagaʼi tonā ʼu kalitātē pea mo tanā ʼu faiga, pea ʼe liliu anai tonā maʼuli fakataumātuʼa ko he ʼaluʼaga ke nā fiafia ai pea mo nā lotomālohi ai. ʼE fakapotopoto koa ia te tokoni ʼaia ʼo ʼuhiga mo he tahi ʼe heʼe haohaoa? ʼE fakapotopoto tuʼumaʼu pē ia Sehova, koia ʼe tou falala ai kiā te ia ke ina taupau he manatu lelei ʼo ʼuhiga mo tātou. Neʼe fehuʼi fēnei e te tagata fai pesalemo: “Kanapaulā neʼe ke lamalama te ʼu hala, Ê Sah, Ê Sehova, ko ai anai koa ʼe feala ke tuʼu?” (Pesalemo 130:3) ʼE tonu ki te taumātuʼa ke nā maʼu ia te taʼi manatu lelei ʼaia pea mo nā fefakamolemoleʼaki.—Kolose 3:13.

22, 23. Koteā te faʼifaʼitaki lelei neʼe tuku mai e Apalahamo pea mo Sala ki te ʼu taumātuʼa iā ʼaho nei?

 ²² Ko te ʼohoana ʼe feala ke liliu ko he toe tapuakina lahi ʼi te fakalaka ʼo te temi. ʼE fakahā mai ʼi te Tohi-Tapu ia te maʼuli fakataumātuʼa ʼo Apalahamo pea mo Sala ʼi tanā kua mātutuʼa. Neʼe hoko te ʼu faigataʼaʼia ʼi tonā maʼuli. Kotou fakakaukauʼi age muʼa pe neʼe feafeaʼi kiā Sala, ʼi tona lagi taʼu 60 hana mavae ʼi tona ʼapi matalelei ʼi te kolo koloaʼia ko Ule, pea mo maʼuli leva ʼi te ʼu falelā. Kae neʼe fakalogo ki te takitaki ʼo tona ʼohoana. Neʼe liliu ia Sala ko he fakakātoa moʼoni pea mo he tokoni kiā Apalahamo, ʼo tokoni ʼaki he aga fakaʼapaʼapa ke iku te ʼu tonu ʼa Apalahamo. Pea neʼe mole mālualoi tana fakalogo ʼaia, heʼe māʼiapē lā “ ʼi tona loto” neʼe ina fakahigoaʼi tona ʼohoana ko tona ʼaliki. (Senesi 18:12; 1 Petelo 3:6) Ko tana fakaʼapaʼapa ʼaē kiā Apalahamo neʼe haʼu ia mai tona loto.

²³ ʼE mole fakaʼuhiga leva neʼe manatu tahi tuʼumaʼu pē ia Apalahamo pea mo Sala. ʼI te tahi ʼaho, neʼe ina fai te ʼu palalau neʼe “mamahi” ai te loto ʼo Apalahamo. Kae ʼaki te takitaki ʼa Sehova, neʼe agavaivai ia Apalahamo ʼo fakalogo ki te leʼo ʼo tona ʼohoana, ʼo liliu te tonu ʼaia ki muli age ko he tapuakina ki te fāmili. (Senesi 21:9-13) Ko te ʼu taumātuʼa iā ʼaho nei, māʼia mo nātou ʼaē kua fualoa tanatou ʼohoana, ʼe lahi te ʼu ako ʼe feala ke natou tāʼofi mai te taumātuʼa ʼaia neʼe pipiki ki te ʼAtua.

24. Ko te maʼuli fakataumātuʼa fea ʼaē ʼe fakakolōliaʼi ia Sehova ʼAtua, pea koteā tona tupuʼaga?

²⁴ ʼI te kōkelekāsio, ʼe tokolahi te ʼu taumātuʼa ʼe natou māʼuʼuli fiafia, heʼe ko te fafine ʼe fakaʼapaʼapa lahi ki tona ʼohoana, pea ko te tagata ʼe ʼofa pea mo ina fakamaʼuhigaʼi tona ʼohoana, pea ʼe nā faiga tokolua ke nā fakamuʼamuʼa ʼi tonā maʼuli te finegalo ʼo Sehova. Kapau ʼe kotou fakatuʼutuʼu ke kotou ʼohoana, ʼofa pē ke kotou fili fakapotopoto tokotou ʼohoana, ʼo kotou teuteu fakalelei ke feala hakotou fakahoko ia te ʼu maʼua ʼo te nofo ʼohoana, pea mo kotou faiga ke kotou maʼu he maʼuli fakataumātuʼa ʼe tokalelei pea mo ʼofa ʼe ina fakakolōliaʼi ia Sehova ʼAtua. Kapau ʼe fēia tokotou maʼuli fakataumātuʼa, pea ʼe mahino papau ia ʼe tokoni moʼoni atu anai ke kotou nonofo ʼi te ʼofa ʼo te ʼAtua.