1, 2. ʼE lava feafeaʼi ki he kuli ke ina puipui tātou, pea koteā ʼaē ʼe feala ai ke fakatatau ki he leʼo ʼo loto?

KO TE pōʼuli pea kua matemoe te tagata ʼi tona moeʼaga. Fokifā pē kua kō tana kuli he neʼe logo ki te logoaʼa, ʼo tupu ai te hola ʼa te tagata kaihaʼa. Pea ʼoho ake te tagata ʼi tona moeʼaga, ʼo sio ki tuʼa, kua gona ia meʼa fuli. Kua puli te tagata kaihaʼa, pea kua tokalelei te loto ʼo te tagata. Koteā ʼaē neʼe feala ke hoko mo kanapau lā neʼe mole logoʼi e te kuli te logoaʼa pea mo ina kōʼi? Neʼe feala pē ke kaihaʼa ia te ʼapi ʼo te tagata, peʼe lavea peʼe matehi ia ia.

² ʼE lahi te ʼu ʼapi ʼe ʼi ai te ʼu kuli moʼo leʼoleʼo te loto fale. Kapau ʼe kō te kuli moʼo fakatokaga ʼe ʼi ai he tahi peʼe ko he meʼa, pea ʼe feala ke ina haofaki te ʼu maʼuli ʼo nātou ʼo te ʼapi. ʼE feala ke fakatatau ia te faʼahi ʼaia mo te meʼa ʼofa maʼuhiga ʼaē neʼe foaki mai e Sehova—ʼaē ko te leʼo ʼo loto. (Sake 1:17) Kapau ʼe mole hotatou leʼo ʼo loto, pea ʼe mahino ia ʼe mole ʼi ai anai hotatou takitaki ʼi totatou maʼuli. Kapau ʼe tou fakaʼaogaʼi lelei, pea ʼe tokoni mai anai ke tou ʼiloʼi totatou ala pea mo fai tuʼumaʼu ia te meʼa ʼaē ʼe lelei ʼi totatou maʼuli. Koia tou vakaʼi age muʼa pe koteā ia te leʼo ʼo loto pea koteā te gāue ʼaē ʼe ina fai. Pea ʼe tou palalau anai ki te ʼu puani ʼaenī: (1) ʼE tou lava akoʼi feafeaʼi totatou leʼo ʼo loto, (2) he koʼē ʼe tonu ke tou tokagaʼi ia te leʼo ʼo loto ʼo ʼihi; pea (3) ʼe tou lava maʼu feafeaʼi he ʼu lelei mai he leʼo ʼo loto ʼe lelei.

3. Koteā te fakaʼuhiga ʼo te kupu Fakakeleka ʼaē neʼe fakaliliu ʼaki te kupu “leʼo ʼo loto,” pea ko te fealagia fea ʼaē ʼe maʼu pē e te hahaʼi?

³ ʼI te Tohi-Tapu, ko te kupu Fakakeleka ʼaē neʼe fakaliliu ʼaki te kupu “leʼo ʼo loto” ko tona fakaʼuhiga “te ʼiloʼi ʼo kita totonu.” ʼO tou kehekehe mo te ʼu meʼa maʼuli fuli ʼaē neʼe fakatupu ʼi te kele, he neʼe foaki mai e te ʼAtua ʼi tana fakatupu ʼaē ia tātou, te fealagia ʼaē ke tou ʼiloʼi ia tātou totonu. ʼE hagē pē ʼe feala hatatou tuʼu pea tou sivisivi ia tātou totonu. Ko te leʼo ʼo loto ʼe hagē ko he fakamoʼoni peʼe ko he tuʼi fakamāu, heʼe feala ke ina sivisivi tatatou ʼu gāue, tatatou ʼu aga pea mo te ʼu tonu ʼaē ʼe tou fai. ʼE feala ke ina takitaki tātou ke tou fai he tonu ʼe lelei peʼe ina fakatokagaʼi mai ia he aga ʼe kovi. Pea ʼe feala ke ina fakalotofīmālieʼi tātou ʼi tatatou fai he tonu ʼe lelei, peʼe ina fakatūʼā anai tātou he neʼe kovi te tonu ʼaē neʼe tou fai.

4, 5. (a) ʼE tou ʼiloʼi feafeaʼi neʼe maʼu e Atama mo Eva takitokotahi tonā leʼo ʼo loto, pea koteā ʼaē neʼe hoko ʼi tanā mole fakalogo ki te lao ʼa te ʼAtua? (b) Ko te ʼu faʼifaʼitaki fea neʼe hā ai ia te gāue ʼo te leʼo ʼo loto ʼo te ʼu tagata agatonu ʼi muʼa ʼo te temi ʼo te kau Kilisitiano?

⁴ Ko te fealagia ʼaia neʼe foaki talu mai te kamata ki te tagata pea mo te fafine. Pea neʼe fakahā e Atama mo Eva tanā maʼu ʼe nāua tokolua he leʼo ʼo loto. ʼE tou fakatokagaʼi te faʼahi ʼaia ʼi te temi ʼaē neʼe nā ufiufi ai ʼi tanā kua ʼosi fai tanā agahala. (Senesi 3:7, 8) ʼI meʼa fakaʼofaʼofa foki, heʼe ko he leʼo ʼo loto ʼe mole lelei neʼe mole feala ke fua lelei ai kiā nāua. ʼI tanā maʼu ʼaē te loto faʼitaliha, neʼe mole nā fakalogo ki te lao ʼa te ʼAtua. Koia, ʼi tanā mole fia fakalogo ki te lao ʼa te ʼAtua pea mo tonā leʼo ʼo loto, neʼe nā fakafeagai ai kiā Sehova ʼAtua, ʼo nā liliu ai ko tona ʼu fili. ʼI tonā ʼuhiga haohaoa, neʼe nā ʼiloʼi lelei pē te meʼa ʼaē neʼe nā fai, pea neʼe mole kei feala hanā toe felogoi lelei mo te ʼAtua.

⁵ ʼO mole hagē ko Atama pea mo Eva, tokolahi te hahaʼi heʼe haohaoa neʼe natou fakalogo ki tonatou leʼo ʼo loto. Ohagē lā, neʼe ʼui fēnei e te tagata agatonu ko Sopo: “Neʼe au puke maʼu taku faitotonu pea ʼe mole au tuku anai; ʼe mole fakahalaʼi  anai au e toku loto ʼi toku maʼuli.” * (Sopo 27:6) Ko Sopo neʼe fakalogo lelei ki tona leʼo ʼo loto, ʼo ina fakafealagia ke ina takitaki tana ʼu gāue pea mo tana ʼu tonu. Koia neʼe feala ai ke ina ʼui ʼaki he fiafia lahi, ko tona leʼo ʼo loto neʼe mole hoha peʼe mamahi, ʼuhi heʼe ufiufi pea mo ina tukugākoviʼi ia ia. Kotou fakatokagaʼi te kehekehe ʼo Sopo pea mo Tavite. ʼI te mole fakaʼapaʼapa ʼa Tavite kiā Saulo, te hau ʼaē neʼe fakanofo e Sehova, ‘neʼe vevele.’ (1 Samuele 24:5) ʼE mahino ia neʼe fua lelei kiā Tavite ia te vevele ʼaia ʼo tona leʼo ʼo loto, he neʼe ko he ako kiā ia ki muli age ke ʼaua naʼa ina fai he toe aga heʼe fakaʼapaʼapa fēia.

6. Koteā ʼaē ʼe hā ai ko te leʼo ʼo loto ʼe ko he meʼa ʼofa maʼa te hahaʼi fuli pē?

⁶ ʼE ko te ʼu kaugana pē koa ʼa Sehova ʼaē ʼe natou maʼu ia te meʼa ʼofa ʼaia ko te leʼo ʼo loto? Kotou tokagaʼi ia te ʼu palalau ʼaenī neʼe fai e te ʼapositolo ko Paulo ʼaki te takitaki ʼa te ʼAtua: “Kā fai e te hahaʼi ʼo te ʼu puleʼaga ʼaē ʼe mole natou maʼu te lao ia te ʼu meʼa ʼo te lao, ko te hahaʼi ʼaia, logopē lā ʼe mole natou maʼu te lao, ʼe natou liliu ko he lao kiā nātou totonu. ʼE ko nātou totonu ʼaia ʼe natou fakahā ko te meʼa ʼaē ʼi te lao ʼe tohi ʼi tonatou loto, kae ko tonatou leʼo ʼo loto ʼe fakamoʼoni mo nātou, ʼi tanatou ʼu manatu, ʼe fakalakahalaʼi ia nātou peʼe fakalakatonuʼi ia nātou.” (Loma 2:14, 15) Māʼiapē lā mo nātou ʼaē ʼe mole natou ʼiloʼi ia te ʼu lao ʼa Sehova, ʼe feala ʼi ʼihi temi ke uga nātou e tonatou leʼo ʼo loto ke natou fai he meʼa ʼe ʼalutahi mo te ʼu pelesepeto ʼa te ʼAtua.

7. He koʼē ʼe feala ʼi ʼihi temi ke uga tātou e totatou leʼo ʼo loto ke tou fai he aga ʼe kovi?

⁷ Kae ʼe feala ʼi ʼihi temi ke mole lelei ia te gāue ʼa te te leʼo ʼo loto. Koteā tona tupuʼaga? Kanapau lā neʼe mole kō ia te kuli, pea ʼe mole hona ia ʼaoga ki te tagata. Pea kanapau lā neʼe mole tokagaʼi e te tagata ia te kō ʼa te kuli, neʼe feala pē ke tuʼutāmaki  ai. ʼO toe fēia pē, kapau ʼe tou fakamuʼamuʼa ia te ʼu holi ʼo totatou loto, pea ʼe feala anai ki totatou leʼo ʼo loto ke ina uga tātou ke tou fai he aga ʼe kovi. Pea kapau ʼe gāue totatou leʼo ʼo loto kae mole takitaki ia e te Folafola ʼa te ʼAtua, pea ʼe lagi mole feala anai ʼi he ʼu ʼaluʼaga maʼuhiga ʼo tokita maʼuli ke tou ʼiloʼi te fakakehekeheʼi ʼo te meʼa ʼaē ʼe lelei pea mo te meʼa ʼaē ʼe kovi. Pea ke takitaki fakalelei tātou e tokita leʼo ʼo loto, ʼe tonu foki ke taki tātou e te laumālie māʼoniʼoni ʼo Sehova. Neʼe tohi fēnei e Paulo: “ ʼE fakamoʼoni toku leʼo ʼo loto pea mo au ʼi te laumālie māʼoniʼoni.” (Loma 9:1) Kae ʼe tou lava ʼiloʼi papau feafeaʼi ʼe ʼalutahi totatou leʼo ʼo loto mo te laumālie māʼoniʼoni ʼo Sehova? ʼE tonu ke akoʼi totatou leʼo ʼo loto.

8. (a) ʼE feala ke malave feafeaʼi ia te loto ki totatou leʼo ʼo loto, pea koteā ʼaē kā tou fakamaʼuhigaʼi tāfito anai mokā ʼe tou fai he tonu? (b) He koʼē ʼe mole tonu ke falala fau he Kilisitiano ki tona leʼo ʼo loto mo kapau ʼe mole hoha ki he meʼa neʼe ina fai? (Vakaʼi te kiʼi nota ʼi te lalo pāsina.)

⁸ ʼE feafeaʼi hakotou fai he tonu ʼe fakatafito ki tokotou leʼo ʼo loto? Ko ʼihi ʼe hā mai kā nātou fai he tonu, pea ʼe natou mulimuli pē ki te ʼu meʼa ʼaē ʼe holi kiai tonatou loto, ʼo natou fai ai he puleʼaki ʼo ʼuhiga mo te meʼa kā natou fai. ʼE lagi natou ʼui fēnei: “ ʼE mole hoha toku leʼo ʼo loto ki te tonu ʼaenī neʼe au fai.” ʼE feala ke mālohi te ʼu holi ʼo te loto, ʼo tupu ai te hehē ʼo te leʼo ʼo loto. ʼE ʼui fēnei ʼi te Tohi-Tapu: “ ʼE kākā te loto, ʼo laka age iā meʼa fuli pē, pea ʼe kovi ʼaupitō ia. Ko ai ʼaē ʼe ina lava ʼiloʼi?” (Selemia 17:9) Koia ʼe mole tonu anai ke tou fakamaʼuhigaʼi fau te ʼu holi ʼo totatou loto. Kae ʼe tou fia fakamuʼamuʼa anai ia te ʼu meʼa ʼaē ʼe leleiʼia e Sehova ʼAtua. *

9. Koteā ia te fakaʼuhiga ʼo tata manavasiʼi ʼaē ki te ʼAtua, pea ʼe tonu anai ke malave feafeaʼi ki totatou leʼo ʼo loto?

 ⁹ Kapau ko te tonu ʼaē ʼe tou fai, ʼe fakatafito ki he leʼo ʼo loto neʼe akoʼi, pea ʼe hā ai anai tatatou manavasiʼi ʼaē ki te ʼAtua, kae ʼe mole ko totatou ʼu holi ʼaē ʼe tou fakamuʼamuʼa. Tou vakaʼi age muʼa ia te faʼifaʼitaki ʼaenī: Ko te kōvanā agatonu ko Nehemia neʼe feala ke ina fakamaʼua ki te hahaʼi ʼi Selusalemi he ʼu tukuhau. Kae neʼe mole ina fai ia te faʼahi ʼaia. Koteā tona tupuʼaga? Neʼe mole loto ke ʼita ia Sehova ʼi tana haga ʼaē ʼo fakamafasia ia tana hahaʼi. Neʼe ina ʼui fēnei: “Neʼe mole au fai te faʼahi ʼaia, ʼuhi ko te manavasiʼi ki te ʼAtua.” (Nehemia 5:15) ʼE tonu ke tou manavasiʼi moʼoni ki te ʼAtua, ke tou tōkakaga naʼa tou fai he meʼa ʼe mole leleiʼia e tatatou Tamai ʼaē ʼe ʼi selō. Ko te taʼi manavasiʼi ʼaia, ʼe ina uga anai tātou ke tou kumi ia te takitaki ʼa te Folafola ʼa te ʼAtua mokā tou fai he ʼu tonu.

10, 11. Ko te ʼu pelesepeto Fakatohi-tapu fea ʼaē ʼe pikipiki ki te ʼinu kava, pea ʼe takitaki feafeaʼi anai tātou e te ʼAtua mokā ʼe tou maʼuliʼi ia te ʼu pelesepeto ʼaia?

¹⁰ Tou vakaʼi age muʼa ia te faʼahi ʼaē ʼo te ʼinu kava. ʼE ko he faʼahi ʼe tonu anai ki te tokolahi iā tātou ke tou fakakaukauʼi mokā tou fakafiafia mo niʼihi: “ ʼE au ʼinu anai koa peʼe kailoa?” ʼUluaki, ʼe tonu ke tou akoʼi ia tātou totonu. Ko te ʼu pelesepeto Fakatohi-tapu fea ʼaē ʼe pipiki ki te faʼahi ʼaia? ʼE mole tapuʼi mai ʼi te Tohi-Tapu ia te fakaʼaogaʼi fakapotopoto ʼo te kava. ʼE vikiʼi ʼi te Tohi-Tapu ia Sehova ʼo ʼuhiga mo tona meʼa ʼofa ʼaē ko te vino. (Pesalemo 104:14, 15) Kae ʼe tauteaʼi ʼi te Tohi-Tapu ia te ʼinu fakavalevale pea mo te ʼu fakafiafia fakavalevale. (Luka 21:34; Loma 13:13) Tahi ʼaē meʼa, ʼe kau ia te ʼinu kava fakavalevale ki te ʼu agahala mamafa, ohagē ko te fai folonikāsio pea mo te tono. *—1 Kolonito 6:9, 10.

¹¹ ʼAki te ʼu taʼi pelesepeto ʼaia, ʼe akoʼi ai e he Kilisitiano ia tona leʼo ʼo loto pea ʼe ʼiloʼi ai e tona leʼo ʼo loto ia te meʼa ʼaē ʼe tonu ke ina fai. Koia kā tonu ke tou fai he tonu, peʼe tou ʼinu peʼe kailoa ʼi he fakatahi, ʼe tou fai anai kiā tātou totonu ia te ʼu fehuʼi ʼaenī: ‘Ko te faʼahiga fakafiafia feafeaʼi ʼaē ʼe au fakatuʼutuʼu ke au  ʼalu kiai? ʼE faigataʼa anai koa hona leʼoleʼo, ʼo feala ke hoko ai he ʼu aga fakavalevale? Ko te ʼu faʼahi fea ʼaē ʼe au vaivai ai? ʼE au fia ʼinu kava koa? ʼE au ʼinu koa ke tupu ʼaki ai haku lolomi ia taku aga? ʼE au ʼiloʼi anai koa ia te temi ʼaē kua feʼauga ai taku ʼinu?’ Kā tou fakakaukauʼi ia te ʼu pelesepeto ʼi te Tohi-Tapu pea mo te ʼu fehuʼi ʼaē ʼe pipiki kiai, ʼe lelei ke tou faikole kiā Sehova ke ina takitaki tātou. (Pesalemo 139:23, 24) Kapau ʼe tou fai fēia, pea ʼe tou lolotoga kole ʼi te temi ʼaia kiā Sehova ke ina takitaki tātou ʼaki tona laumālie māʼoniʼoni. ʼE tou toe akoʼi totatou leʼo ʼo loto ke gāue fakatahi mo te ʼu pelesepeto fakaʼatua. Kae ʼe ʼi ai te tahi faʼahi ʼe tonu ke tou fakakaukauʼi mokā ʼe tou fai he ʼu tonu.

12, 13. Koteā he ʼu tupuʼaga ʼo te kehekehe ʼaē ʼo te ʼu leʼo ʼo loto ʼo te kau Kilisitiano, pea koteā anai kā tou fai ʼo ʼuhiga mo te ʼu leʼo ʼo loto kehekehe ʼaia?

¹² ʼE lagi kotou punamaʼuli anai ʼi ʼihi temi ki te kehekehe ʼaē ʼo te ʼu leʼo ʼo loto ʼo te kau Kilisitiano. ʼE manatu anai ia he tahi ʼe kovi ia he agaʼi fenua; kae ʼe leleiʼia anai ia e he tahi te agaʼi fenua ʼaia pea ʼe mole ina koviʼia. Ohagē lā i te ʼu kiʼi temi fakafiafia, ʼe mole koviʼia anai e he tahi hana ʼinu ʼo hana moʼi kava mo hona ʼu kaumeʼa ʼi hanatou fakatahitahi ʼi he afiafi; kae ʼe hoha anai te leʼo ʼo loto ʼo he tahi ki te taʼi aga ʼaia. He koʼē ʼe kehekehe te ʼu leʼo ʼo loto, pea ʼe tonu ke malave feafeaʼi te ʼu ʼaluʼaga kehekehe ʼaia ki te ʼu tonu ʼaē kā tou fai?

¹³ ʼE lahi te ʼu tupuʼaga ʼo te kehekehe ʼaē ʼo te ʼu leʼo ʼo loto ʼo te hahaʼi. ʼE kehekehe ʼaupitō ia te ʼu ʼaluʼaga ʼaē neʼe lahilahi ake ai te hahaʼi. Ohagē lā, ko ʼihi ʼe natou nonofo tōkakaga ʼo ʼuhiga mo he vaivaiʼaga neʼe natou tauʼi ki muʼa atu—pea lagi ʼi ʼihi temi neʼe natou tōtō ai. (1 Hau 8:38, 39) ʼO ʼuhiga mo te kava, ʼe lagi logoʼi anai e nātou ʼaia ʼe tonu ke natou fakatokaga ki te faʼahi ʼaia. Kapau ʼe haʼu he tahi fēia ki tokotou ʼapi, pea ko tona leʼo ʼo loto ʼe feala ke ina uga ia ia ke ina fakafisi ia he ʼipu kava ʼe kotou ʼavage ke ina ʼinu. ʼE kotou ʼiʼita anai koa ki ai? ʼE kotou fakakinauʼi anai koa ia ia ke ʼinu? Kailoa. Peʼe kotou ʼiloʼi peʼe kailoa ia te tupuʼaga ʼo tana fakafisi atu, pea ʼe lagi mole ina fia fakahā  atu anai tona tupuʼaga, kae ko te ʼofa fakatautēhina ʼe ina uga anai koutou ke ʼaua naʼa kotou fakakinauʼi ia ia ke ʼinu.

14, 15. Ko te ʼaluʼaga fea ʼaē neʼe kehekehe ai te leʼo ʼo loto ʼo te kau Kilisitiano ʼo te ʼuluaki sēkulō, pea koteā te tokoni ʼaē neʼe fai e Paulo ʼo ʼuhiga mo nātou ʼaia?

¹⁴ Neʼe tokagaʼi e te ʼapositolo ko Paulo ʼi te agamāhani neʼe mole tatau ia te leʼo ʼo loto ʼo ʼihi Kilisitiano ʼi te ʼuluaki sēkulō. ʼI te temi ʼaia, neʼe hoha te leʼo ʼo loto ʼo ʼihi Kilisitiano ʼo ʼuhiga mo te ʼu meʼa kai ʼaē neʼe sākilifisioʼi ki te ʼu tamapua. (1 Kolonito 10:25) Ko te leʼo ʼo loto ʼo Paulo neʼe mole hoha ia ʼo ʼuhiga mo te ʼu meʼa kai ʼaia ʼaē neʼe fakatau ki muli age ʼi te fakatauʼaga meʼa kai. Kiā ia, ko te ʼu tamapua neʼe ko he ʼu fakatātā mate, pea neʼe mole ʼa nātou te meʼa kai heʼe ko Sehova ia te tupuʼaga ʼo meʼa fuli pea ʼa ʼAʼana ia te meʼa kai ʼaia. Kae neʼe mahino kiā Paulo, ʼe mole manatu fēia ʼihi ʼo ʼuhiga mo te faʼahi ʼaia. Ko ʼihi neʼe lahi tanatou kau ki te tauhi tamapua ʼi muʼa ʼo tanatou liliu ko ni ʼu Kilisitiano. Kiā nātou ʼaia, ko meʼa fuli pē ʼe pipiki ki te tauhi tamapua neʼe ko he meʼa ia ʼe kovi, tatau aipē peʼe ko he ʼu kiʼi meʼa noa. Neʼe fakatokatoka feafeaʼi te faʼahi ʼaia?

¹⁵ Neʼe ʼui fēnei e Paulo: “Kae ko tātou ʼaenī ʼe mālolohi ʼe maʼua ke tou fua ia te ʼu vaivai ʼo nātou ʼaē ʼe mole mālolohi, kae ʼaua naʼa tou kumi pē ia te meʼa ʼaē ʼe tou leleiʼia. Heʼe māʼia mo Kilisito neʼe mole ina kumi ia te meʼa ʼaē ʼe ina leleiʼia.” (Loma 15:1, 3) Neʼe ʼui e Paulo ʼe tonu ke tou hagē ko Kilisito, ke tou fakamuʼamuʼa ia te ʼu meʼa ʼaē ʼe ʼaoga ki ʼototatou ʼu tehina ʼi te ʼu meʼa ʼaē ʼe ʼaoga kiā tātou. ʼI te tahi fai palalau ʼo ʼuhiga pē mo te meʼa kai, neʼe ʼui e Paulo ʼe mole toe kai anai ki he kanoʼi manu ʼe feala ai ke fakatupu tūkia ki he tahi ʼe maʼuhiga tona maʼuli, ʼaē neʼe mate Kilisito maʼa ia.—1 Kolonito 8:13; 10:23, 24, 31-33.

16. He koʼē ko nātou ʼaē ʼe natou maʼu ia he leʼo ʼo loto ʼe ina fakatuʼakoi age te ʼu meʼa ʼaē ke natou fai, ʼe mole tonu anai ke natou valokiʼi te ʼu meʼa ʼaē ʼe fai e ʼihi?

¹⁶ Pea ʼo ʼuhiga mo nātou ʼaē ʼe natou maʼu ia he leʼo ʼo loto ʼe ina fakatuʼakoi age te ʼu meʼa ʼaē ke natou fai, ʼe mole tonu anai ke natou valokiʼi te ʼu meʼa ʼaē ʼe fai e ʼihi, ʼo natou fakamaʼua ke maʼu e te hahaʼi fuli tonatou leʼo ʼo loto ʼo ʼuhiga mo he ʼu meʼa. (Loma 14:10) ʼE moʼoni, ʼe tonu ke tou fakaʼaogaʼi totatou leʼo ʼo loto moʼo sivisivi ia tātou totonu, kae ʼaua naʼa tou fakaʼaogaʼi  moʼo fakamāuʼi niʼihi. Tou manatuʼi ia te ʼu palalau ʼaenī neʼe fai e Sesu: “Tuku takotou fakamāu, koteʼuhi ke ʼaua naʼa fakamāuʼi koutou.” (Mateo 7:1) Ko nātou fuli ʼaē ʼi te kōkelekāsio ʼe mole natou fia fakatupu he fihifihia ʼo ʼuhiga mo he faʼahi ʼe fakalogo pē ki te leʼo ʼo loto takitokotahi. Kae ʼe tou kumi he ʼu ʼaluʼaga moʼo fakatuputupu ia te ʼofa pea mo te logotahi, ʼo tou fefakalotomālohiʼaki, kae ʼaua naʼa tou fefakalotovaivaiʼaki.—Loma 14:19.

17. Koteā ʼaē kua hoko ki te leʼo ʼo loto ʼo te tokolahi iā ʼaho nei?

¹⁷ Neʼe tohi fēnei e te ʼapositolo ko Petelo: “Ke kotou taupau he leʼo ʼo loto ʼe lelei.” (1 Petelo 3:16) Ko he leʼo ʼo loto ʼe maʼa kiā mata ʼo Sehova ʼAtua ʼe ko he toe tapuakina lahi ia. ʼE mole tatau ia mo te leʼo ʼo loto ʼo te tokolahi iā ʼaho nei. Neʼe talanoa ia Paulo ʼo ʼuhiga mo nātou ʼaē kua “fakaʼiloga ʼonatou leʼo ʼo loto ʼaki  te ukamea kakaha.” (1 Timoteo 4:2) Ko te ukamea kakaha ʼe ina tutu ia te kili, ʼo fakatupu ai he kili patupatu mokā kua mole ia te mataʼi lavea pea kua mate ia te kakano. Tokolahi kua hagē tonatou leʼo ʼo loto kua mate noa—kua mole te mataʼi lavea pea ʼe mole kei ina logoʼi he meʼa, ʼo mole kei ina fai he ʼu fakatokaga, peʼe fakafeagai, peʼe hoha, peʼe ufiufi peʼe ina tukugākoviʼi ki he agahala neʼe fai. Tokolahi iā ʼaho nei ʼe natou fiafia ʼi te mole tukugākoviʼi ʼo nātou ʼe tonatou leʼo ʼo loto ʼo ʼuhiga mo he meʼa kovi neʼe natou fai.

18, 19. (a) Koteā te fua lelei mo kapau ʼe tou logoʼi ko totatou leʼo ʼo loto ʼe ina tukugākoviʼi tātou peʼe tou ufiufi? (b) Koteā ʼaē ʼe tou lava fai mo kapau ʼe haga pē ia totatou leʼo ʼo loto ʼo tauteaʼi ia tātou totonu ʼo ʼuhiga mo hata ʼu agahala neʼe tou fai ki muʼa atu pea kua tou ʼosi fakahemala kiai?

¹⁸ ʼI tona fakahagatonu, kapau ʼe tou hoha, pea ʼe ko totatou leʼo ʼo loto ʼe ina fakahā mai neʼe tou fai he meʼa ʼe kovi. Kapau ʼe  tupu ʼaki ai he fakahemala ʼa he tahi neʼe agahala, logolā te mamafa ʼo he agahala, kae ʼe feala anai hona fakamolemole. Ohagē ko te Hau ko Tavite, neʼe ina fai te toe agahala mamafa kae neʼe ina maʼu ia te fakamolemole lahi he neʼe fakahemala fakamālotoloto. Ko tana fehiʼa ki te agahala ʼaē neʼe ina fai pea mo tana fakatotonu ʼaē ke fakalogo leva ki te lao ʼa Sehova, neʼe mahino lelei ai ko Sehova ʼe “agalelei pea mo fakamolemole gafua.” (Pesalemo 51:1-19; 86:5) Kae ʼe feafeaʼi anai mo kapau kei tou hoha pē pea mo tou ufiufi tuʼumaʼu pē, kae kua tou fakahemala pea kua tou maʼu ia te fakamolemole ki takita agahala ʼaē neʼe fai?

¹⁹ ʼI ʼihi temi, ʼe feala ki te leʼo ʼo loto ʼo he tahi ke ina tauteaʼi lahi ia ia totonu, ʼo ina tukugākoviʼi fualoa ia ia ʼo ʼuhiga mo tana agahala kae kua ʼosi fakahemala kiai. Kapau ʼe hoko he ʼu ʼaluʼaga fēia, ʼe lagi ʼaoga anai ke tou fakafīmālieʼi totatou loto ʼaē ʼe ina tauteaʼi tātou, ʼaki te manatu ʼaē ko Sehova ʼe lahi age ia ʼi te ʼu meʼa ʼaē ʼe logoʼi e te tagata fuli pē. ʼE tonu ke tou tui kiai pea mo tali tona ʼofa pea mo tana fakamolemole, ohagē pē ko tatatou fakalotomālohiʼi ʼihi ke natou maʼu mo nātou ia te manatu ʼaia. (1 Soane 3:19, 20) ʼI te tahi age faʼahi, ʼaki he leʼo ʼo loto ʼe maʼa, ʼe maʼu ai te loto tokalelei pea mo te fīmālie, pea mo he toe fiafia lahi ʼaē ʼe tahitahiga tona maʼu ʼi te mālamanei. Tokolahi neʼe natou fai ki muʼa atu he agahala mamafa kua natou maʼu ia te logo fīmālie ʼaia pea kua feala iā ʼaho nei ke natou tauhi kiā Sehova ʼAtua ʼaki he leʼo ʼo loto ʼe lelei.—1 Kolonito 6:11.

20, 21. (a) Ko te tohi ʼaenī neʼe fai moʼo tokoni atu ke kotou fai teā? (b) ʼI totatou ʼuhiga Kilisitiano, koteā te ʼāteaina ʼaē ʼe tou maʼu, kae ʼe tonu ke tou fakaʼaogaʼi feafeaʼi ia te ʼāteaina ʼaia?

²⁰ Neʼe fai ia te tohi ʼaenī moʼo tokoni atu ke kotou maʼu ia te fiafia ʼaia, ke kotou maʼu he leʼo ʼo loto ʼe lelei ʼi te temi ʼaenī kei toe ʼo te ʼu ʼaho fakamuli maveuveu ʼaenī ʼo te tuʼu ʼa Satana. ʼE mahino ia ko te tohi ʼaenī ʼe mole feala anai hana talanoa ki te ʼu lao pea mo te ʼu pelesepeto fuli ʼo te Tohi-Tapu, ʼaē ʼe ʼaoga ke kotou fakakaukauʼi pea mo mulimuli kiai ʼi te ʼu ʼaluʼaga ʼaē ʼe hoko kiā koutou ʼi te ʼaho fuli. Tahi ʼaē meʼa, ʼaua naʼa kotou kumi he ʼu lēkula ʼo ʼuhiga mo he ʼu faʼahi ʼe tahi fakalogo pē ia ki te leʼo ʼo loto takitokotahi. Ko te tohi ʼaenī neʼe fakatuʼutuʼu moʼo tokoni atu ke kotou akoʼi pea ke ʼiloʼi e tokotou leʼo ʼo loto te meʼa ʼaē ke ina fai, ʼaki takotou ako ʼaē peʼe feafeaʼi te maʼuliʼi ʼo te Folafola ʼa  te ʼAtua ʼi tokotou maʼuli ʼi te ʼaho fuli. ʼO mole hagē ko te Lao ʼa Moisese, ko “te lao ʼa Kilisito” ʼe tokoni ia kiā nātou ʼaē ʼe fakalogo kiai ke lahi age tanatou fakaʼaogaʼi ia tonatou leʼo ʼo loto pea mo te ʼu pelesepeto kae ʼaua tanatou fakalogo pē ki ni ʼu lēkula. (Kalate 6:2) Koia, neʼe foaki e Sehova ki te kau Kilisitiano ia he toe ʼāteaina lahi. Kae ʼe fakamanatuʼi mai ʼi tana Folafola ke ʼaua naʼa tou fakaʼaogaʼi ia te ʼāteaina ʼaia ohagē ko “he meʼa moʼo ʼuʼufi ʼo te aga ʼaē ʼe kovi.” (1 Petelo 2:16) Kae ko te ʼāteaina ʼaia ʼe ina foaki mai he faigamālie fakaofoofo ke tou fakahā ai totatou ʼofa ʼaē kiā Sehova.

²¹ Kapau ʼi te faikole ʼe kotou fakakaukauʼi ia tokotou maʼuli lelei ʼi takotou mulimuli ki te ʼu pelesepeto Fakatohi-tapu pea mo fakahoko ia te ʼu tonu ʼaē ʼe kotou fai, ʼe kotou fai hoholo aipē anai te faʼahi neʼe kua kotou kamata fai ʼi te temi ʼaē neʼe kotou ʼiloʼi ai ia Sehova. Ko tokotou “ ʼu fealagia fakakaukau” ʼe akoʼi anai “ ʼaki tonatou fakaʼaogaʼi.” (Hepeleo 5:14) Ko tokotou leʼo ʼo loto ʼaē ʼe akoʼi ʼaki te Tohi-Tapu ʼe liliu anai ko he tapuakina kiā koutou ʼi te ʼaho fuli pē ʼo tokotou maʼuli. Ohagē ko te kō ʼa te kuli ʼi te pōʼuli moʼo fakatokaga atu ia he tuʼutāmaki ʼe feala ke hoko, ʼe tokoni atu anai ia tokotou leʼo ʼo loto ke kotou fai he ʼu tonu ʼe fiafia ai takotou Tamai ʼaē ʼe ʼi selō. ʼE ko te faʼahiga fai ʼaia ʼaē ka tokoni atu ke kotou haga nonofo ʼi te ʼofa ʼo te ʼAtua.