1, 2. Koteā te fakatuʼutuʼu neʼe fai e Palaame ke tupu ai he tuʼutāmakiʼia ʼo te hahaʼi ʼa Sehova?

KO TE tagata tautai ʼe ʼalu ʼo mātaʼu ʼi te koga meʼa ʼe ina leleiʼia. ʼE ina fia fusi he faʼahiga ika. ʼE ina filifili he mounu pea ina lī tana mātaʼu ki te tai. Mole tuai, pea kaina pea ina fusi ake ia te ika. ʼE malimali ʼi tana ʼiloʼi ʼaē neʼe ko te mounu ʼaia ʼaē neʼe tonu ke ina filifili.

² Ko he ʼaluʼaga ʼe ina fakamanatuʼi mai te meʼa ʼaē neʼe hoko ʼi te temi muʼa ʼi te taʼu 1473 ʼi muʼa ʼo totatou temi, ko te tagata ko Palaame neʼe ina fakakaukauʼi he hele moʼo fakahalaʼi te hahaʼi ʼa te ʼAtua, ʼaē neʼe natou nonofo ʼi te Mafa ʼo Moape, ʼi te ʼu tuʼakoi ʼo te Kele ʼo Te Fakapapau. Neʼe ʼui e Palaame ko ia ko te polofetā ʼa Sehova, kae ʼi tona ia fakahagatonu, neʼe ko he tagata mānumānu neʼe totogi moʼo faitutuku ki Iselaele. Kae ʼaki te tokoni ʼa Sehova, ko te meʼa pē ʼaē neʼe feala ke fai e Palaame neʼe ko hana tapuakinaʼi ia Iselaele. ʼI tana holi ʼaē ke ina maʼu tona totogi, ʼi te manatu ʼa Palaame ʼe lagi feala ke ina fai he meʼa ke tupu ʼaki ai he tauteaʼi e te ʼAtua ia tana hahaʼi, mo kapau ʼe fakahalaʼi nātou ke natou fai he toe agahala mamafa. ʼAki ia te fakatuʼutuʼu ʼaia, ko te hele ʼaē neʼe fakaʼaogaʼi e Palaame moʼo fakahalaʼi ia te kau Iselaele neʼe ko te ʼu fafine finemui ʼo Moape.—Faka au 22:1-7; 31:15, 16; Fakahā 2:14.

3. Koteā te ikuʼaga ʼo te fakatuʼutuʼu kākā ʼaē neʼe fai e Palaame?

³ Neʼe iku koa tana fakatuʼutuʼu kākā ʼaia? ʼE feala ke tou ʼui neʼe fua tana kākā. Ko te ʼu toko lauʼi hogofulu afe tagata Iselaele neʼe natou tō ki te hele ʼaia ʼo natou fai “te ʼu felāveʼi fakasino heʼeʼaoga  mo te ʼu ʼofafine ʼo Moape.” Pea neʼe natou kamata tauhi ki te ʼu ʼatua ʼo Moape, neʼe kau ai ia te ʼatua fakalialia ko Paale ʼo Peole, te ʼatua ʼo te fānaunau, peʼe ʼo te ʼu felāveʼi fakasino. Pea ko te toko 24 000 Iselaele ʼaē neʼe mamate ʼi te ʼu tuʼakoi ʼo te Kele ʼo Te Fakapapau. Neʼe ko he toe tautea lahi ʼaia neʼe hoko!—Faka au 25:1-9.

4. He koʼē neʼe tō te toko lauʼi afe kau Iselaele ki te hele ʼaē ko te aga heʼeʼaoga?

⁴ He koʼē neʼe hoko ia te malaʼia ʼaia? Tokolahi ʼi te hahaʼi ʼaia neʼe natou maʼu ia he loto ʼe kovi ʼi tanatou fakamamaʼo ʼaē mai iā Sehova, te ʼAtua ʼaē neʼe ina fakaʼāteainaʼi nātou mai Esipito, mo fafaga nātou ʼi te toafa, pea mo taki haohaoa nātou ki te ʼu tuʼakoi ʼo te fenua ʼo te fakapapau. (Hepeleo 3:12) ʼI tana fakakaukauʼi ia te meʼa ʼaē neʼe hoko, neʼe tohi fēnei e te ʼapositolo ko Paulo: “ ʼAua naʼa tou fai folonikāsio, ohagē ko ʼihi iā nātou ʼaē neʼe fai folonikāsio, pea neʼe mamate te toko ʼuafulu-mā-tolu afe ʼi te ʼaho pē e tahi.” *—1 Kolonito 10:8.

5, 6. He koʼē ʼe maʼuhiga kiā tātou iā ʼaho nei ia te fakamatala ʼaē ʼo te agahala ʼa Iselaele ʼi te Mafa ʼo Moape?

⁵ ʼI te fakamatala ʼi te tohi ʼo Faka au, ʼe lahi ai te ʼu ako maʼuhiga ʼe feala ke tāʼofi e te hahaʼi ʼa te ʼAtua iā ʼaho nei, ʼaē ʼe natou ʼamanaki hū ki te fenua ʼe lahi age ʼaē neʼe fakapapauʼi age kiā nātou.  (1 Kolonito 10:11) Ohagē lā, ko te holi mālohi ʼaē ʼa te hahaʼi ʼo te mālamanei ki te ʼu felāveʼi fakasino heʼeʼaoga ʼe ina fakatā te holi ʼaē neʼe maʼu e te kau Moapite, kae ʼi te temi nei kua lahi age tona mafola. Pea ʼi te taʼu fuli, ko te ʼu toko lauʼi afe kau Kilisitiano ʼe natou tō ki te hele ʼaē ko te aga heʼeʼaoga, te fakahala pē ʼaē neʼe tō kiai te kau Iselaele. (2 Kolonito 2:11) Pea ohagē ko Simili, ʼaē neʼe aga nekenekea ʼi tana hū ki te nofoʼaga ʼo Iselaele mo te fafine Moapite ʼo nā ʼolo ki tona falelā, ko ʼihi ʼaē ʼe natou fakatahi mo te hahaʼi ʼa te ʼAtua iā ʼaho nei, ʼe natou ʼulihi ia te kōkelekāsio.—Faka au 25:6, 14; Suta 4.

⁶ ʼE kotou fakaʼuhiga koa ʼi te temi nei, ʼe kotou māʼuʼuli ʼi he ʼaluʼaga ʼe tatau mo te ʼu meʼa ʼaē neʼe hoko ʼi te Mafa ʼo Moape? ʼE kotou sisio mamaʼo koa ki tokotou fakapale ʼi te mālama foʼou ʼaē kua fualoa takotou fakatalitali kiai? Kapau koia, pea kotou faiga fakamālotoloto ke kotou nonofo ʼi te ʼofa ʼo te ʼAtua, ʼo kotou mulimuli ki te fakatotonu ʼaenī: “Kotou hola mai te fai folonikāsio.”—1 Kolonito 6:18.

7, 8. Koteā te fakaʼuhiga ʼo te “fai folonikāsio,” pea ʼe utu feafeaʼi e nātou ʼaē ʼe natou fai folonikāsio ia te meʼa ʼaē ʼe natou tō?

⁷ ʼI te Tohi-Tapu, ko te kupu “fai folonikāsio” (ʼi te Fakakeleka, pornêia) ʼe fakaʼuhiga ki te ʼu felāveʼi fakasino heʼeʼaoga ʼi tuʼa atu ʼo te nofo ʼohoana ʼaē neʼe fakatuʼu e te ʼAtua. ʼE kau kiai ia te tono, te aga fakapaomutu, te ʼu felāveʼi fakasino ʼa he toko lua mole heʼeki ʼohoana, pea mo te ʼu felāveʼi fakasino ʼaē ʼe fakaʼaogaʼi ai te gutu ki te ʼu koga tapu pea mo te fāfā ʼa he tahi ki te ʼu koga tapu ʼo he tahi. ʼE toe fakaʼuhiga ia te kupu folonikāsio ki te ʼu aga ʼaia ʼe fai e he tagata ʼe nofo mo he tagata, peʼe ko he fafine mo he fafine, pea mo te ʼu felāveʼi fakasino mo te ʼu manu. *

⁸ ʼE fakahā lelei mai ʼi te Tohi-Tapu: Ko nātou ʼaē ʼe fai folonikāsio ʼe mole feala ke natou nonofo ʼi te kōkelekāsio Fakakilisitiano pea ʼe mole natou maʼu anai ia te maʼuli heʼegata. (1 Kolonito  6:9; Fakahā 22:15) Tahi ʼaē meʼa, ʼe natou utu ʼi te temi nei te ʼu fua kovi, heʼe mole kei tāu mo nātou te falala pea kua pulinoa mo tonatou matagafua, kua tokakovi tonatou maʼuli fakataumātuʼa, ʼe mole kei natou maʼu he leʼo ʼo loto ʼe tokalelei, kua faitatama kae mole natou loto kiai, kua natou maʼu ia te ʼu mahaki, peʼe feala pē ke natou mate ai. (Kalate 6:7, 8) ʼE mole fakapotopoto te fai ʼo he aga ʼe iku pē anai ki te malaʼia. Kae meʼa fakaʼofaʼofa foki he neʼe mole fakakaukauʼi e te tokolahi te ʼu fua kovi ʼaia ʼi tanatou kamata fai ia te aga ʼaē ʼe kovi, pea ʼi te agamāhani ʼe kamata te faʼahi ʼaia ʼaki te sioʼi ʼo he ʼu pāki ʼe fai ai ni ʼu felāveʼi fakasino heʼeʼaoga.

9. ʼE moʼoni koa te ʼui ʼa ʼihi ko te sioʼi ʼo he ʼu pāki ʼe hā ai te ʼu felāveʼi fakasino heʼeʼaoga ʼe mole ko he meʼa ia ʼe kovi? Kotou fakamahino.

⁹ ʼE lahi te ʼu fenua, ʼe fakahāhā lelei pē te ʼu pāki ʼo te ʼu felāveʼi fakasino heʼeʼaoga ʼi te ʼu tufaʼaga tohi, ʼi te musika, pea ʼi te televisio, pea ʼe lahi tona fakahā ʼi te Internet. * ʼE moʼoni koa te ʼui ʼa ʼihi ʼe mole ko he meʼa ia ʼe kovi? Kailoa ia! Ko nātou ʼaē ʼe natou sioʼi ni ʼu pāki ʼe fai ai ni ʼu felāveʼi fakasino heʼeʼaoga ʼe feala hanatou liliu ko ni hahaʼi ʼe natou fai tuʼumaʼu te aga ʼaē ko te mulu pea mo natou taupau “he ʼu holi fakasino fakaufiufi,” ʼaē ʼe tupu ai te holi tuʼumaʼu pē ki te ʼu felāveʼi fakasino, mo ni ʼu holi heʼeʼaoga, he tokakovi ʼo te felōgoi fakataumātuʼa, pea mo feala aipē ke nā māvete. * (Loma 1:24-27; Efesi 4:19) Ko te tōketā ʼe ina fakatatau ki he kōsea ia te holi tuʼumaʼu ʼaē ki te ʼu felāveʼi fakasino. ʼE ina ʼui fēnei: “ ʼE haga tuputupu pea mo mafola. ʼE tahitahiga tona hifo, pea ʼe toe faigataʼa foki tona faitoʼo pea mo tona puli.”

10. Ko te ʼu ʼaluʼaga fea ʼaē ʼe feala ke tou maʼuliʼi ai ia te pelesepeto ʼaē ʼe tou maʼu iā Sake 1:14, 15? (Vakaʼi ia te  fakamatala ʼaē ʼe ʼātakai ʼi lalo nei.)

 ¹⁰ Tou vakaʼi ia te ʼu palalau ʼaē ʼe tuʼu iā Sake 1:14, 15, ʼaē ʼe tou lau fēnei ai: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tona holi ʼo ia totonu. Pea ko te holi, kā kua tupu, pea ʼe ina fānauʼi te agahala, pea ko te agahala, kā kua ʼosi fai, pea ʼe ina fakatupu te mate.” Koia kapau ʼe hū he manatu kovi ki tokotou ʼatamai, kotou foimo pulihi ia te manatu ʼaia! Ohagē lā, kapau ʼe fakafokifā pē ʼe kotou sio ki he ʼu pāki ʼo he hahaʼi ʼe telefua, kotou foimo sio kehe, peʼe kotou matehi te olotinatea, peʼe kotou fetogi te polokalama ʼi te televisio. Kotou fai ia meʼa fuli ʼe ʼaoga ke ʼaua naʼa kotou tō ai ki he holi heʼeʼaoga ʼi muʼa ʼo hana tuputupu fakavilivili, ʼo mole kei kotou lava matatāʼofi ia te aga ʼaia!—Mateo 5:29, 30.

11. Kā tou tauʼi he ʼu holi ʼe kovi, ʼe tou lava fakahā feafeaʼi ʼe tou falala kiā Sehova?

 ¹¹ Koia lā ʼaē ʼe tokoniʼi mai ai tātou e Ia ʼaē ʼe ina ʼiloʼi lelei age ia tātou totonu: “Koia, kotou fakamate te ʼu koga ʼo tokotou sino ʼaē ʼi te kele, ʼo ʼuhiga mo te fai folonikāsio, mo te aga heʼemaʼa, mo te holi ki te ʼu felāveʼi fakasino, mo te holi ki te meʼa ʼaē ʼe kovi, mo te mānumānu, ʼaē ʼe ko he tauhi tamapua.” (Kolose 3:5) ʼE moʼoni, ko he faʼahi ʼe lagi feala ke mata faigataʼa tona fai. Kae kotou manatuʼi, ʼe ʼi ai tatatou Tamai ʼofa pea mo faʼa kātaki ʼe feala ke tou kolekole ki ai. (Pesalemo 68:19) Koia kotou foimo faikole kiā te ia mokā hū he ʼu manatu heʼemaʼa ki tokotou ʼatamai. Kotou kole “te mālohi ʼaē ʼe fakalaka ʼi te mālohi māhani,” pea mo kotou faigaʼi mālohi ʼo fakahaga tokotou ʼatamai ki he tahi age ʼu manatu.—2 Kolonito 4:7; 1 Kolonito 9:27; vakaʼi ʼi te pāsina 104, ia te fakamatala ʼaē ʼe ʼātakai ko tona kupu tāfito  “Koteā ʼAē Kā Tokoni Mai Ke Au Tuku He Agamāhani ʼe Kovi?”

12. Koteā totatou “loto,” pea he koʼē ʼe tonu ke tou haofaki?

¹² Ko te tagata poto ko Salomone neʼe ina tohi fēnei: “Ko te meʼa tāfito ʼaē ʼe tonu ke ke haofaki, haofaki tou loto, heʼe haʼu mai ai te ʼu matapuna ʼo te maʼuli.” (Tāʼaga Lea 4:23) Ko totatou “loto” ʼe ko totatou ʼuhiga ʼaē ʼi loto, totatou ʼuhiga moʼoni ʼaē iā mata ʼo te ʼAtua. Tahi ʼaē meʼa, ko te sio ʼaē ʼa Sehova ki totatou “loto,” ʼe fakalogo kiai peʼe tou maʼu peʼe kailoa ia te maʼuli heʼegata, kae mole fakalogo te faʼahi ia ʼaia ki te manatu ʼa te hahaʼi ʼo ʼuhiga mo tātou. ʼE tonu pē ke fēia pea ko he faʼahi ʼe fakalogo kiai totatou maʼuli. Ke ʼaua naʼa ina sioʼi he fafine ʼaki he holi ʼe kovi, neʼe fai e te tagata agatonu ko Sopo ia he fuakava mo tona ʼu mata. (Sopo 31:1) ʼE ko he faʼifaʼitaki lelei kiā tātou! Neʼe manatu fēia ia te tagata fai pesalemo, ʼaē neʼe faikole fēnei: “Leʼei kehe ʼoku mata ke ʼaua naʼa sio ki te meʼa ʼaē ʼe vaʼiganoa.”—Pesalemo 119:37.

13. Neʼe ko ai ia Tina, pea he koʼē neʼe mole fakapotopoto tana fili ia tona ʼu kaumeʼa?

¹³ Ohagē ko tatatou vakaʼi ʼi te kāpite 3, ʼe feala ki totatou ʼu kaumeʼa ke mālohi ia tanatou fakaneke ʼo tātou ki te meʼa ʼaē ʼe lelei peʼe ki te meʼa ʼaē ʼe kovi. (Tāʼaga Lea 13:20; 1 Kolonito 15:33) Tou vakaʼi ia te meʼa ʼaē neʼe hoko kiā Tina, te ʼofafine ʼo te pāteliaka  ko Sakopo. (Senesi 34:1) Logolā neʼe lelei ia tona akoʼi ʼi tana kei veliveli, kae neʼe mole fakapotopoto leva Tina ʼi tana fakakaumeʼa ki te ʼu taʼahine ʼo Kanaane. Ohagē ko te kau Moapite, ko te hahaʼi ʼo Kanaane neʼe natou aga heʼeʼaoga. (Levitike 18:6-25) ʼI te manatu ʼa te hahaʼi tagata Kanaane, ʼo kau ai mo Sekemi, ʼaē “neʼe lahi tona fakamaʼuhigaʼi” ʼi te ʼapi ʼo tana tamai, ko Tina neʼe ko he taʼahine ʼe ina tali pē anai he ʼu fakaneke ki he ʼu felāveʼi fakasino.—Senesi 34:18, 19.

14. He koʼē neʼe tupu te malaʼia ʼi te fili ʼaē e Tina ʼo tona ʼu kaumeʼa?

¹⁴ ʼE lagi ʼi te manatu ʼa Tina ʼe mole ina fai anai he ʼu felāveʼi fakasino ʼi tana sio ʼaē kiā Sekemi. Kae neʼe fai pē e Sekemi te meʼa ʼaē neʼe fai e te kau Kanaane tokolahi mokā tupu honatou ʼu holi ki he ʼu felāveʼi fakasino. Tatau aipē pe neʼe fakafisi mālohi ia Tina kiai, kae ko Sekemi neʼe ina “ ʼave ia ia” pea “neʼe ina fakaʼalikiʼi ia ia.” ʼE hā mai ki muli age neʼe “manako” Sekemi iā Tina, kae neʼe mole pulihi ai te meʼa ʼaē neʼe ina fai kiā ia. (Senesi 34:1-4) Pea neʼe mole ko Tina tokotahi pē ʼaē neʼe mamahi ʼi te meʼa ʼaē neʼe hoko kiā ia. Neʼe toe ʼulihi ai mo tona fāmili kātoa pea  mo fakaufiufi kiā nātou, ʼuhi ko tana fili ʼaē ʼo tona ʼu kaumeʼa.—Senesi 34:7, 25-31; Kalate 6:7, 8.

15, 16. ʼE tou lava maʼu feafeaʼi ia te poto moʼoni? (Vakaʼi ʼi te  pāsina 109, ia te fakamatala ʼaē ʼe ʼātakai.)

¹⁵ Kapau neʼe tāʼofi e Tina he ako maʼuhiga ʼi te meʼa ʼaē neʼe hoko kiā ia, kae neʼe lagi hoki mahino kiai ʼi te kua ʼosi hoko ʼaē kiā ia te ʼaluʼaga fakamamahi ʼaia. Ko nātou ʼaē ʼe ʼofa pea mo fakalogo  kiā Sehova, ʼe mole ʼaoga ke natou mamahi ke natou mahino ai neʼe kovi te aga ʼaē neʼe natou fai. ʼUhi heʼe natou fakalogo ki te ʼAtua, ʼe natou fili ke natou ‘haʼele mo te hahaʼi ʼaē ʼe popoto.’ (Tāʼaga Lea 13:20a) Neʼe mahino ai kiā nātou “te ʼu ala fuli ʼo te meʼa ʼaē ʼe lelei” pea mo natou tekeʼi ai he ʼu fihifihia pea mo he ʼu mamahi neʼe feala ke hoko.—Tāʼaga Lea 2:6-9; Pesalemo 1:1-3.

¹⁶ ʼE feala ke maʼu ia te poto fakaʼatua e te hahaʼi fuli ʼaē ʼe natou loto kiai pea mo natou fakahā ʼe natou loto kiai ʼaki tanatou kole liuliuga pea mo ako tuʼumaʼu ia te Folafola ʼa te ʼAtua pea mo te ʼu tohi ʼaē ʼe foaki mai e te kalasi ʼo te tagata kaugana agatonu. (Mateo 24:45; Sake 1:5) ʼE toe maʼuhiga mo te agavaivai, heʼe hā ai te lotolelei ʼaē ke kita mulimuli ki te tokoni Fakatohi-tapu. (2 Hau 22:18, 19) Ohagē lā, ʼe feala ki he Kilisitiano ke ina ʼiloʼi lelei pē ko tona loto ʼe feala ke kākā pea mo kovi ʼaupitō. (Selemia 17:9) Kae kā hoko kiā ia he faigataʼaʼia he neʼe mole aga fakapotopoto, ʼe agavaivai anai koa ʼo tali te tokoni ʼofa ʼaē kā fai age kiā ia?

17. Fakamatala he ʼaluʼaga ʼe feala ke hoko ʼi he fāmili, pea kotou fakahā peʼe feafeaʼi ki he tamai hana felōgoi mo hona ʼofafine ki te faʼahi ʼaia.

¹⁷ Kotou fakakaukauʼi age muʼa ia te ʼaluʼaga ʼaenī. ʼE mole tali e te tamai ke ʼalu tona ʼofafine mo he tehina tūpulaga kae mole he tahi ke ina leʼoleʼo ia nāua. ʼE tali fēnei age e tona ʼofafine: “Papa ʼe mole ke falala koe kiā au? ʼE mole mā fai anai ia he meʼa ʼe kovi!” ʼE lagi ʼofa te taʼahine kiā Sehova pea ʼe mole ʼi ai hana ʼu manatu ʼe kovi, kae “ ʼe haʼele [koa ia] ʼi te poto [ʼaē ʼe haʼu mai te ʼAtua]”? ʼE ‘hola koa ia mai te fai folonikāsio’? Peʼe agavale koa ia ʼo “falala [pē] ki tona loto”? (Tāʼaga Lea 28:26) ʼE lagi kotou manatuʼi he tahi ʼu pelesepeto ʼe tokoni anai ki he tamai pea mo hona ʼofafine ke nā fakakaukauʼi ia te faʼahi ʼaia.—Vakaʼi ia Tāʼaga Lea 22:3; Mateo 6:13; 26:41.

18, 19. Koteā te fakahala ʼaē neʼe hoko ʼi te maʼuli ʼo Sosefo, pea neʼe koteā ʼaē neʼe ina fai ʼi te ʼaluʼaga ʼaia?

¹⁸ Ko te tūpulaga neʼe ʼofa ki te ʼAtua pea mo hola mai te fai folonikāsio neʼe ko Sosefo, te tokolua ʼo Tina. (Senesi 30:20-24) Neʼe kua sio mata ia Sosefo ki te ʼu fua kovi ʼo te agavale ʼo tona tokolua. ʼE mahino ia, neʼe ko tana manatuʼi ia te faʼahi ʼaia pea mo tana fia nofo ʼi te ʼofa ʼo te ʼAtua, ʼaē neʼe ina puipui ia ia ʼi ni ʼu  taʼu ki muli age ʼi Esipito, ʼi te temi ʼaē neʼe fakahalaʼi ai ia ia “ ʼi te ʼaho fuli pē” e te ʼohoana ʼo tona pule. ʼE mahino ia, ʼuhi he neʼe kaugana ia Sosefo kiā Potifale, neʼe mole feala hana mavae ʼi tana gāue! Neʼe tonu ʼi te ʼaluʼaga ʼaia ke agapoto pea mo lototoʼa. Koia neʼe tuʼa lahi tana tekeʼi te ʼohoana ʼo Potifale, ʼo fakamulimuli age neʼe hola ʼosi mai te fafine ʼaia.—Senesi 39:7-12.

¹⁹ Kotou fakakaukauʼi age muʼa te faʼahi ʼaenī: Kanapaulā neʼe holi Sosefo ki te fafine pe neʼe ko hana agamāhani te holi ki he ʼu felāveʼi fakasino, neʼe feala anai koa ke ina taupau tana agatonu? Kailoa ia. Neʼe mole nofo ia Sosefo mo ni ʼu manatu agahala, neʼe maʼuhiga age kiā ia tana ʼu felōgoi mo Sehova, ʼaē neʼe hā lelei ʼi tana ʼu palalau ʼaē neʼe ina fai ki te fafine ʼohoana ʼo Potifale. Neʼe ina ʼui fēnei: “Ko toku pule . . . [neʼe] mole he meʼa neʼe ina tapuʼi mai, gata pē ko koe, heʼe ko koe ko tona ʼohoana. ʼE lava feafeaʼi anai haku fai te toe meʼa kovi ʼaia pea mo au agahala moʼoni ki te ʼAtua?”—Senesi 39:8, 9.

20. ʼAki te takitaki ʼa Sehova, koteā ʼaē neʼe hoko kiā Sosefo?

²⁰ Kotou fakakaukauʼi age muʼa ia te fiafia ʼaē neʼe maʼu e Sehova ʼi tana sio ʼaē ki te tūpulaga ʼaia ko Sosefo, logolā tana maʼuli mamaʼo mai tona fāmili, kae neʼe nofo agatonu ʼi te ʼaho fuli pē. (Tāʼaga Lea 27:11) Ki muli age, ʼaki te takitaki ʼa Sehova, neʼe fakaʼāteaina Sosefo mai te fale pilisoni pea mo fakanofo ia ia ko te ʼuluaki minisi ʼo Esipito pea ko ia ʼaē neʼe tokaga ki te tufa ʼaē ʼo te meʼa kai! (Senesi 41:39-49) Neʼe hoko moʼoni ia te ʼu palalau ʼaē ʼe tohi iā Pesalemo 97:10: “Koutou ʼaē ʼe ʼoʼofa kiā Sehova, kotou fehiʼa ki te meʼa ʼaē ʼe kovi. ʼE ina taupau te ʼu nefesi ʼo tana kau agatonu; mai te nima ʼo te kau agakovi, ʼe ina haofaki ia nātou”!

21. Neʼe fakahā feafeaʼi e te tehina tūpulaga ʼi Afelika ia tana lototoʼa ʼo ʼuhiga mo te aga ʼaē ʼe tonu ke fai?

 ²¹ ʼO toe fēia iā ʼaho nei, tokolahi te ʼu kaugana ʼa te ʼAtua ʼe natou fakahā ʼe natou “fehiʼa ki te meʼa ʼaē ʼe kovi, pea [mo] manako ki te meʼa ʼaē ʼe lelei.” (Amosi 5:15) ʼE manatuʼi e te tehina tūpulaga ʼi Afelika, ko te finemui neʼe kaugā ako mo ia, neʼe ina ʼui age fakahagatonu kapau ʼe tokoni age kiā ia ʼi te sivi ʼo te fai nūmelo, pea ʼe ina totogi anai ia ia ʼaki ni ʼu felāveʼi fakasino. ʼE ina ʼui fēnei: “Neʼe au foimo fakafisi atu aipē kiai.” ʼIo, ʼe lagi feala ki te agahala ke ina foaki he “fakafiafia fakatemi,” kae ʼi te agamāhani ko te ʼu taʼi fakafiafia ʼaia ʼe fakatupu lotomamahi ki muli age. (Hepeleo 11:25) Tahi ʼaē meʼa, ʼe vaʼiganoa te ʼu fakafiafia ʼaia mo kapau ʼe fakatatau ki te fiafia heʼegata ʼaē kā tou maʼu anai ʼi tatatou fakalogo ʼaē kiā Sehova.—Tāʼaga Lea 10:22.

22, 23. (a) Kapau ʼe fai e he Kilisitiano hana agahala mamafa, he koʼē ko he ʼaluʼaga ʼe feala pē hona fakamolemole? (b) Ko te tokoni fea ʼaē ʼe feala ke maʼu e ia ʼaē neʼe agahala?

²² ʼI totatou ʼuhiga agahala, ʼe tou faiga lahi ke tou tekeʼi te ʼu holi ʼo te kakano pea mo fai te meʼa ʼaē ʼe totonu kiā mata ʼo te ʼAtua. (Loma 7:21-25) ʼE ʼiloʼi e Sehova ia te faʼahi ʼaia, “ ʼo ina manatuʼi ko tātou ʼe tou efu.” (Pesalemo 103:14) Kae ʼi ʼihi temi, ʼe feala ki he Kilisitiano ke ina fai he agahala mamafa. ʼI te temi ʼaia kua agahala ai, ʼe mole kei feala koa hona fakamolemole? Kailoa ia! ʼE lagi ina utu pē anai ia te ʼu fua kovi ʼo tana agahala, ohagē ko te Hau ko Tavite. Kae ko te ʼAtua ʼe “fakamolemole gafua” tuʼumaʼu pē kiā nātou ʼaē ʼe loto fakahemala pea mo natou ‘vete’ tanatou ʼu agahala.—Pesalemo 86:5; Sake 5:16; Tāʼaga Lea 28:13.

²³ Tahi ʼaē meʼa, neʼe agalelei te ʼAtua ʼo ina foaki ki te kōkelekāsio “he ʼu meʼa ʼofa ko he ʼu tagata,” ko he ʼu tagata ʼāfea kua fotufotuʼa ʼi te faʼahi fakalaumālie, ʼe popoto pea mo natou fia tokoni moʼoni. (Efesi 4:8, 12; Sake 5:14, 15) Ko tanatou fakatuʼutuʼu ke natou tokoni kiā ia ʼaē neʼe agahala ke toe felōgoi mo te ʼAtua, pea ohagē ko tona ʼui e te tagata poto, ke ina “maʼu hona loto” ke mole ina toe fai ia te agahala ʼaia.—Tāʼaga Lea 15:32.

24, 25. (a) Neʼe fakahā feafeaʼi e te talavou ʼaē ʼe talanoa ki ai iā Tāʼaga Lea 7:6-23 neʼe “mole he meʼa ʼi tona loto”? (b) ʼE feafeaʼi hatatou ‘maʼu hotatou loto’?

²⁴ ʼE palalau ʼi te Tohi-Tapu ʼo ʼuhiga mo te hahaʼi ‘ ʼe mole he meʼa ʼi ʼonatou loto’ pea mo nātou ʼaē ʼe natou ‘maʼu honatou loto.’ (Tāʼaga Lea 7:7) ʼI te heʼeki fotufotuʼa ʼa he tahi ʼi te faʼahi fakalaumālie pea mo foʼofoʼou ʼi te tauhi ki te ʼAtua, ʼe feala kiā ia ʼaē “ ʼe mole he meʼa ʼi tona loto” ke mole ina maʼu ia te fakasiosio tonu pea mo fakapotopoto. Ohagē ko te talavou ʼaē ʼe fakamatala iā Tāʼaga Lea 7:6-23, ʼe faigafua pē hana tō ki he agahala mamafa. Kae “ko ʼaē ʼe ina maʼu tona loto” ʼe ina vakavakaʼi tona ʼuhiga ʼo ia totonu, ʼo ina ako tuʼumaʼu te Folafola ʼa te ʼAtua ʼaki te ʼu faikole. Pea ʼo mulimuli pē ki tona ʼu fealagia ʼi tona ʼuhiga heʼe haohaoa, ʼe ina fakaʼalutahi mo te meʼa ʼaē ʼe leleiʼia e te ʼAtua ia tana ʼu manatu, tona ʼu holi, te ʼu meʼa ʼaē ʼi tona loto pea mo tana ʼu fakatuʼutuʼu. Kapau ʼe ina fai te faʼahi ʼaia, pea ʼe “ ʼofa [anai ia] ki tona nefesi,” peʼe ina maʼu ai ni ʼu tapuakina, pea mo “ina maʼu ia te lelei.”—Tāʼaga Lea 19:8.

²⁵ Kotou fai ia te ʼu fehuʼi ʼaenī kiā koutou totonu: ‘ ʼE au falala kātoa koa ʼe totonu ia te ʼu lēkula ʼa te ʼAtua? ʼE mālohi anai koa taku tui mo kapau ʼe au mulimuli ki te ʼu lēkula ʼaia pea ʼe au maʼu ai anai koa he toe fiafia lahi?’ (Pesalemo 19:7-10; Isaia 48:17, 18) Kapau ʼe ʼi ai pē he kiʼi faʼahi ʼe kotou lotolotolua ai, kotou foimo fai he puleʼaki kiai. Kotou metitāsioʼi ia te ʼu fua kovi ʼaē ʼe feala ke hoko ʼi te mole fakalogo ki te ʼu lao ʼa te ʼAtua. Tahi ʼaē meʼa, “kotou ʼahiʼahi pea mo kotou sio ko Sehova ʼe lelei” ʼaki takotou maʼuliʼi ia te moʼoni pea mo fafaga tokotou ʼatamai ʼaki he ʼu manatu ʼe lelei, he ʼu meʼa ʼe moʼoni, mo faitotonu, mo maʼa, mo ʼofainaʼi, pea mo maʼu ai he faʼahiga vilitūtē. (Pesalemo 34:8; Filipe 4:8, 9) ʼE mahino ia, kapau ʼe lahi takotou fai ia te faʼahi ʼaia, pea ʼe toe lahi age anai te tuputupu ʼo tokotou ʼofa ʼaē ki te ʼAtua, mo takotou manako ki te meʼa ʼaē ʼe manako kiai te ʼAtua pea mo kotou fehiʼa ki te meʼa ʼaē ʼe fehiʼa kiai. Ko Sosefo neʼe mole ko he tagata haohaoa. Kae neʼe feala ke “hola mai te fai folonikāsio” he neʼe ina fakafealagia ke gāueʼi ia ia e Sehova lolotoga ni ʼu taʼu, pea neʼe  ina fia fakafiafia ia te ʼAtua. ʼOfa pē ke tou toe fēia mo tātou.—Isaia 64:8.

26. Koteā te kupu tāfito maʼuhiga kā tou vakaʼi anai ʼi te ʼalatike kā hoa mai?

²⁶ Ko totatou Tupuʼaga neʼe ina fakatupu tātou ʼaki totatou ʼu koga tapu ke feala ai hatatou fānaunau pea mo fakafiafia ʼi te maʼuli fakataumātuʼa, kae neʼe mole ina foaki mai te ʼu faʼahi ʼaia ke gaohi ohagē ko he ʼu meʼa gaoʼi moʼo fakahoko ni ʼu holi kovi. (Tāʼaga Lea 5:18) ʼE tou vakaʼi anai ʼi te ʼu kāpite e lua ʼaē kā hoa mai ia te manatu ʼa te ʼAtua ʼo ʼuhiga mo te ʼohoana.