ʼE mole faigafua te maʼu ʼo hokita kaumeʼa, pea ʼe faigataʼa te taupau ʼo hokita kaumeʼa. ʼE tapuakina lahi anai takotou ʼu faiga ʼaē ke koutou liliu ko he ʼu kaumeʼa ʼo te ʼAtua, pea mo takotou taupau maʼu te vāhaʼa fakakaumeʼa ʼaia. Neʼe ʼui fēnei e Sesu kia nātou ʼaē neʼe tui kia te ia: “E koutou iloi anai te mooni, pea e fakaateaina anai koutou e te mooni.” (Soane 8:32) Koteā tona faka ʼuhiga?

ʼE koutou lava ʼāteaina ʼi te temi nei. ʼE koutou lava ʼāteaina mai te ʼu akonaki hala pea mo te ʼu loi ʼaē neʼe faka mafola e Satana. ʼE feala hakotou ʼāteaina mai te heʼe ʼamanaki ʼaē ʼe tau mo te lauʼi miliona hahaʼi ʼaē ʼe mole nātou ʼiloʼi ia Sehova. (Loma 8:22) Tahi ʼaē meʼa, ko te ʼu kaumeʼa ʼo te ʼAtua ʼe nātou ʼāteaina mai te “mataku ki te mate.”—Hepeleo 2:14, 15.

ʼE feala hakotou maʼu te ʼāteaina ʼi te mālama foʼou ʼa te ʼAtua. ʼI ʼāteaina taulekaleka leva ʼaē ʼe feala ke koutou maʼu ʼi te ka haʼu! ʼI te Palatiso fakakelekele, ʼe tou ʼāteaina anai mai te tau, te mahaki, pea mo te fakapō. ʼE tou ʼāteaina anai mai te maʼuli masiva pea mo te pakupaku. ʼE tou ʼāteaina anai mai te matutuʼa pea mo te mate. ʼE tou ʼāteaina anai mai te mataku, mo te maʼuli taʼomia, pea mo te heʼe faitotonu. ʼE ʼui fēnei e te Tohi-Tapu ʼo ʼuhiga mo te ʼAtua: “ ʼE ke folahi tou nima pea ʼe ke fafaga te loto ʼo te meʼa maʼuli fuli pe.”—Pesalemo 145:16.

 Ko te ʼu kaumeʼa ʼo te ʼAtua ʼe nātou maʼuʼuli anai ʼo heʼegata. Ko te maʼuli heʼegata, ʼe ko he meʼa ʼofa maʼuhiga, ʼe foaki anai e te ʼAtua ki te hahaʼi ʼaē ʼe fia kaumeʼa mo ia. (Loma 6:23) Koutou fakakaukauʼi age muʼa te ʼu meʼa ʼaē ka koutou lava fai mokā koutou maʼu anai te maʼuli heʼegata!

ʼE maʼu anai hokotou temi ke koutou fai he tuʼuga meʼa. ʼE lagi koutou fia ako anai he faʼahiga meʼa fai mahōlō. Peʼe lagi koutou fia ako anai te pena paki pe ko te gāue tufuga ʼakau. ʼE lagi koutou fia ako anai te maʼuli ʼo te ʼu manu, pe ko te ʼu ʼulu ʼakau. Peʼe lagi koutou fia folau anai, moʼo mamata he tahi ʼu fenua pea mo he tahi ʼu hahaʼi. Kapau ʼe koutou maʼuli ʼo heʼegata, pea ʼe feala anai hakotou fai te ʼu meʼa fuli ʼaia!

ʼE koutou maʼu anai he temi ke koutou maʼu hokotou ʼu kaumeʼa. Kapau ʼe koutou maʼuli ʼo heʼegata, pea ʼe feala anai hakotou feʼiloʼiʼaki mo he hahaʼi tokolahi, kua liliu ko he ʼu kaumeʼa ʼo te ʼAtua. ʼE koutou ʼiloʼi anai tonatou ʼu faiva mo tonatou ʼu kalitate lelei, pea ʼe nātou kaumeʼa anai mo koutou. ʼE koutou ʼofa anai kia nātou, pea ʼe nātou ʼoʼofa anai kia koutou. (1 Kolonito 13:8) Kapau ʼe koutou maʼuli ʼo heʼegata, pea ʼe koutou maʼu anai hokotou temi ke koutou kaumeʼa mo te hahaʼi fuli ʼi te kele! Ko te meʼa ʼaē ʼe maʼuhiga tāfito, heʼe ʼaki te ʼu sēkulō, ko tokotou vāhaʼa fakakaumeʼa mo Sehova, ʼe toe ʼāsili mālohi anai. ʼOfa pe ke koutou kaumeʼa mo te ʼAtua ʼo talu ai!