Kapau ʼe koutou fia kaumeʼa mo te ʼAtua, pea ʼe tonu ke koutou mulimuli ki te lotu ʼaē ʼe leleiʼia e te ʼAtua. Neʼe ʼui e Sesu ko “te kau atolasio mooni” ʼe nātou atolasio anai ki te ʼAtua ʼo mulimuli ki “te mooni.” (Soane 4:23, 24) ʼE ko te faʼahiga tauhi pe e tahi ʼaē ʼe tali e te ʼAtua. (Efeso 4:4-6) Ko te lotu moʼoni ʼe ina taki ki te maʼuli heʼegata, kae ko te lotu hala ʼe ina taki ki te fakaʼauha.—Mateo 7:13, 14.

ʼE feala hakotou ʼiloʼi te lotu moʼoni mokā koutou sioʼi te hahaʼi ʼaē ʼe nātou maʼuliʼi. Mai tona ʼuhiga ʼaē ko Sehova ʼe agalelei, koia ko nātou ʼaē ko tana kau atolasio moʼoni, ʼe tonu ke nātou agalelei. Ohage pe ko he fuʼu moli lelei ʼe ina fakatupu he ʼu fuaʼi moli lelei, ʼo toe feiā pe ko te lotu moʼoni ʼe ina fakatupu he ʼu hahaʼi lelei.—Mateo 7:15-20.

Ko te ʼu kaumeʼa ʼo Sehova, ʼe nātou fakaʼapaʼapa ʼaupito ki te Tohi-Tapu. ʼE nātou ʼiloʼi ʼe haʼu te Tohi-Tapu mai te ʼAtua. ʼE nātou tuku tana ʼu folafola ke takitaki ki tonatou maʼuli, mo fakatokatoka tonatou ʼu fihifihia, pea mo tokoni age kia nātou ke nātou ako pe ko ai te ʼAtua. (2 Timoteo 3:16) ʼE nātou faiga ke nātou maʼuliʼi te ʼu meʼa ʼaē ʼe nātou faka mafola.

 Ko te ʼu kaumeʼa ʼo Sehova ʼe nātou feʼofani. Neʼe fakahā e Sesu tana ʼofa ki te hahaʼi, ʼo ina akoʼi age kia nātou pe ko ai te ʼAtua, pea mo ina fakamālōlō te hahaʼi mahaki. Pea ko te hahaʼi ʼaē ʼe nātou maʼuliʼi te lotu moʼoni, ʼe nātou ʼofa ki te hahaʼi. Ohage ko Sesu, ʼe mole nātou fehiʼa ki te kau masiva, pe ko te hahaʼi ʼo he tahi lanu. Neʼe ʼui e Sesu ʼe ʼiloʼi anai e te hahaʼi tana ʼu tisipulo, heʼe nātou feʼofani.—Soane 13:35.

Ko te ʼu kaumeʼa ʼo te ʼAtua ʼe nātou fakaʼapaʼapa ki tona huafa, ko Sehova. Kapau ʼe mole fia fakaʼaogaʼi e he tahi tokotou higoa, ʼe koutou kaumeʼa lelei anai koa mo ia? Kailoa! Kapau ʼe ʼi ai hokita kaumeʼa, pea ʼe kita fakaʼaogaʼi tona higoa, pea ʼe kita palalau ki te hahaʼi ʼo ʼuhiga mo te ʼu gāue lelei ʼo tokita kaumeʼa ʼaia. Koia, ko nātou ʼaē ʼe fia kaumeʼa mo te ʼAtua, ʼe tonu ke nātou fakaʼaogaʼi tona huafa pea mo palalau ki te hahaʼi ʼo ʼuhiga mo ia. ʼE loto e Sehova ke tou fai te meʼa ʼaia.—Mateo 6:9; Loma 10:13, 14.

Ohage ko Sesu, ko te ʼu kaumeʼa ʼo te ʼAtua ʼe nātou akoʼi ki te hahaʼi ia te Puleʼaga ʼo te ʼAtua. Ko te Puleʼaga ʼo te ʼAtua ʼe ko te puleʼaga ʼo selo ʼaē ka ina fakaliliu anai te kele ko he palatiso. Ko te ʼu kaumeʼa ʼo te ʼAtua ʼe nātou tala ki te hahaʼi, te logo lelei ʼaia ʼo te Puleʼaga ʼo te ʼAtua.—Mateo 24:14.

Ko te kau Fakamoʼoni ʼa Sehova ʼe nātou faiga ke nātou kaumeʼa mo te ʼAtua. ʼE nātou fakaʼapaʼapa ki te Tohi-Tapu pea ʼe nātou feʼofaʼofani. Tahi ʼaē meʼa, ʼe nātou fakaʼaogaʼi te huafa ʼo te ʼAtua pea mo fakaʼapaʼapa kiai, pea ʼe nātou akoʼi ki te hahaʼi te Puleʼaga ʼo te ʼAtua. Ia ʼaho nei, ko te kau Fakamoʼoni ʼa Sehova ʼe nātou maʼuliʼi te lotu moʼoni.