KUA koutou fakatokaga’i koa ia te fa’ahiga fai fehu’i ’aē ’a te ’u kihi’i tamaliki? Tokolahi ’o nātou ’e nātou kamata fai fehu’i mokā nātou popoto ’i te palalau. ’E nātou sio’i lelei koutou, pea mo nātou fehu’i atu: He ko’e ’e lanu ’u’ui te lagi? He ko’e ’e gigila te ’u fetu’u? Ko ai ’aē ne’e ina ako’i age ki te ’u manu lele tanatou fa’ahiga tagi? E lagi koutou faiga anai ke koutou tali kiai, kae ’e mole faigafua tu’uma’u. Logola kua koutou tali lelei age kiā nātou, kae ’e nātou toe laga’i atu pe anai he tahi ’u fehu’i: He ko’e koa ’e feiā mo feiā?

² ’E mole ko te ’u tamaliki pe ’aē ’e fai fehu’i. He’e ka tou lahilahi ake, ’e kei ’i ai pe tatatou ’u fehu’i. Ohage la ’e tou fia ’ilo’i te ala ’aē ’e tonu ke tou ’olo ai, ’e tou fia ’ilo’i te ’u tu’utāmaki ’aē ’e mole tonu ke tou tō kiai, pe’e ko he tahi ’u fa’ahi ’e tou fia ’ilo’i. Kae ko te tokolahi ’e mole kei nātou fai fehu’i, pe’e mole nātou fia ’ilo’i tona ’u tali, tāfito ’o ’uhiga mo te ’u fa’ahi ’aē ’e ma’uhiga tāfito.

³ Koutou fakakaukau’i age mu’a te fehu’i ’aē ’e tu’u ’i te takafi ’o te tohi ’aenī, mo te ’u fehu’i ’aē ’e laga’i ’i te ’u ’uluaki pasina, pe’e ko te ’u fehu’i ’aē ’e laga’i ’i te kamata ’o te kapite ’aenī. ’E ko he ’u fehu’i ’e ma’uhiga ’aupito ke koutou fai. Kae tokolahi te haha’i ’e mole kei nātou faiga’i ke nātou ’ilo’i tona ’u tali. Koteā tona tupu’aga? ’E ma’u koa tona ’u tali ’i te Tohi-Tapu? Ko ’ihi ’e nātou ’ui ’e faigata’a fau hanatou mahino ki te ’u tali ’aē ’e tuku mai ’i te Tohi-Tapu. Ko ’ihi ’e nātou tu’ania na’a nātou fai he ’u fehu’i ’e nātou mata lainoa ai. Pea ko ’ihi ’e nātou ’ui ’e lelei age ke vaka’i te ’u fehu’i ’aia e te kau takitaki lotu pea mo te haha’i faiako lotu. Kaeā koutou?

⁴ ’E mahino ia ’e koutou fia ’ilo’i te ’u tali ki te ’u fehu’i ma’uhiga ’o ’uhiga mo te ma’uli. ’I ’ihi temi, ne’e lagi koutou fai te ’u fehu’i ’aenī: ‘Koteā koa te tupu’aga ’o te ma’uli? ’E tonu pe koa ke feiā te ma’uli? E feafea’i mo’oni koa te ’Atua?’ ’E lelei ke koutou fai te ta’i ’u fehu’i ’aia, pea ke koutou faiga fakamalotoloto ke koutou ma’u tona ’u tali mo’oni. Ne’e ’ui fēnei e te tagata faiakonaki ’iloa ko Sesu Kilisito: “Koutou haga kole, pea ’e foaki atu anai kiā koutou; koutou haga kumi, pea ’e koutou ma’u anai; koutou haga fisifisi, pea ’e avahi atu anai kiā koutou.”—Mateo 7:7, MN.

⁵ Kapau ’e “koutou haga kumi” te ’u tali ki te ’u fehu’i ma’uhiga ’aia, ’e koutou ma’u ai anai he ’u fua lelei kiā koutou. (Tā’aga Lea 2:1-5) Tatau aipe pe’e koteā te ’u me’a kua ’ui atu e ’ihi, kae ’i te Tohi-Tapu ’e ’i ai tona ’u tali, pea ’e feala hakotou ma’u ai. ’E mole faigata’a fau tatatou mahino ki tona ’u tali. Pea ’e toe lelei tāfito te ’u tali ’aia, kote’uhi ’e tou ma’u ai he ’amanaki pea mo he fiafia. ’E nātou lava tokoni atu ke koutou ma’uli fiafia ’i te temi nei. Mo’o kamata, ’e tou vaka’i anai te fehu’i ’e fia ma’u e te tokolahi tona tali kiai.

’E LĪTU’A PEA MO AGAKOVI KOA TE ’ATUA KIĀ TATOU?

⁶ Ko te tokolahi ’e nātou manatu feiā. He’e nātou ’ui fēnei: ‘Kapau ne’e tokaga te ’Atua kiā tatou, pea ’e mole feiā anai te malamanei.’ ’I te malamanei, ’e tou sio ki te tau, te fehi’a pea mo te ma’uli faka’ofa’ofa ’a te haha’i. Pea ’e tou tau mo te mahaki, ’e tou ma’uli mamahi, pea ’e mamate te ’u haha’i ’aē ’e tou ’o’ofa ki ai. Koia ’e ’ui ai e te tokolahi: ‘Kapau ’e tokaga te ’Atua kiā tatou pea mo totatou ’u fihifihia,’e mole ina tuku anai ke hoko te ’u me’a ’aia.’

⁷ Ko te me’a ’aē ’e kovi age, he’e ’i ’ihi temi ’e tupu te ’ui ’a te haha’i ko te ’Atua ’e agakovi, ’uhi ko te kau faiako lotu. ’Uhi koteā? He’e ka hoko he tu’utāmaki, ’e nātou ’ui ’e ko te finegalo ’o te ’Atua. Ei, ko te kau faiako ’aia ’e nātou tukugakovi’i te ’Atua ’o ’uhiga mo te ’u me’a kovi ’aē ’e hoko. Kae ’e mo’oni koa te fa’ahi ’aia ’o ’uhiga mo te ’Atua? Koteā ’aē ’e ako’i mo’oni mai e te Tohi-Tapu? ’E tali fēnei iā Sakopo 1:13 (MN): “Ke ’aua na’a ’ui e he tahi ’i te ’ahi’ahi: ‘’e ’ahi’ahi’i au e te ’Atua.’ Kote’uhi ’e mole feala ke ’ahi’ahi’i te ’Atua ’aki he ’u me’a ’e kovi, pea ko ia totonu ’e mole ina ’ahi’ahi’i [feiā] he tahi.” Koia ’e mole ko te ’Atua te tupu’aga ’o te agakovi ’aē ’e tou sio kiai ’i te malamanei. (Sopo 34: 10-12) ’E mo’oni, ’e ina fakagafua ke hoko te ’u me’a kovi. Kae ’e kehekehe ’aupito te ’ui ’aē ’e ina fakagafua te agakovi pea mo te ’ui ’aē ’e ko ia te tupu’aga ’o te agakovi.

⁸ Tou to’o te fa’ifa’itaki ’a he tāmai poto pea mo ’ofa, ’e ’i ai tona foha kua lahi, kae ’e kei nofo iā nāua, ’aē ko ’ana mātu’a. Ka fiatu’u tona foha pea mo fia mavae ’i tonā ’api, ’e mole tā’ofi anai ia ia e tana tāmai. ’E fai anai e te tama he ’u aga ’e kovi ’o tupu ai tona ’u fihifihia. Kae ’e ko te tāmai koa te tupu’aga ’o te ’u fihifihia ’o tona foha? Kailoa. (Luka 15: 11-13) ’O toe feiā pe, ne’e mole tā’ofi e te ’Atua te tagata ’i tana fia fai te aga ’aē ’e kovi, kae ’e mole ko te ’Atua te tupu’aga ’o te ’u fihifihia ’o tana aga ’aia. Koia ’e mole tonu ke tukugakovi’i te ’Atua ’o ’uhiga mo te ’u mamahi fuli ’aē ’e tau mo te malamanei.

⁹ ’E ’i ai te ’u tupu’aga lelei ’o te fakagafua e te ’Atua ke fai e te malamanei te aga ’aē ’e kovi. ’Uhi ko ia ko te Matapuna ’o te poto pea mo te mālohi, ’e mole ma’ua ke ina fakamahino mai kiā tatou tona ’u tupu’aga. Kae ’aki tana ’ofa, ’e foaki mai e te ’Atua te ’u fakamahino. ’E koutou mahino lelei anai ki te ’u tupu’aga ’aia ’i te Kapite 11 ’o te tohi ’aenī. Kae ’e tonu ke tou ’ilo’i papau ’e mole ko te ’Atua te tupu’aga ’o te ’u fihifihia ’aē ’e felāve’i mo tatou, he’e ’i tona fakahagatonu ’e ina foaki mai te pule’aki ’aē ’e lelei tokotahi.—Isaia 33:2.

¹⁰ Tahi ’aē me’a, ko te ’Atua ’e ma’oni’oni. (Isaia 6:3) Ko tona faka ’uhiga ko he ’Atua ’e ma’a pea mo haohaoa. ’E mole he agakovi iā te ia. Koia ’e feala hatatou falala kātoa kiā te ia. ’E mole hage ia ko te tagata, ’aē ’ihi temi ’e aga fakakākā. Mā’ia pe la mo te tagata ma’u tu’ulaga ’aē ’e agatonu ’osi, ’i te agamāhani ’e mole feala hana fakatokatoka te ’u me’a kovi ’aē ’e fai e te haha’i agakovi. Kae ko te ’Atua ’e Māfimāfi, koia ’e feala kiā te ia ke ina fakagata anai te ’u fua kovi ’o te agakovi ki te malamanei. Ka fai pule’aki anai te ’Atua, ’e ina fai anai mo’o fakagata te agakovi ’o talu ai.—Pesalemo 37:9-11.

’E MALAVE FEAFEA’I KI TE ’ATUA TE ’U AGA KOVI ’AĒ ’E HOKO KIĀ TATOU?

¹¹ ’I te temi ’aenī, ’e malave feafea’i ki te ’Atua te ’u me’a ’aē ’e hoko ’i tokotou ma’uli? ’E ako’i mai ’i te Tohi-Tapu, ko te ’Atua “’e ’ofa ki te faitotonu.” (Pesalemo 37:28) Koia ’e mole mata noa kiā ia te me’a ’aē ’e lelei pea mo te me’a ’aē ’e kovi. ’E fehi’a ki te ’u aga kovi fuli. ’E ’ui ’i te Tohi-Tapu ne’e ‘mamahi te loto’ ’o te ’Atua ’i te ’u aga kovi ’aē ne’e hoko ’i te malamanei ’i te ’u temi mu’a. (Senesi 6:5, 6) ’E mole he’eki fetogi te ’Atua. (Malakia 3:6) ’E ko he me’a fakaloto mamahi kiā ia tana sio ki te ’u mamahi ’aē ’e hoko ’i te malamanei kātoa. Pea ’e mole loto e te ’Atua ke ma’uli mamahi te haha’i, ohage ko tona ’ui ’i te Tohi-Tapu: “’E tokaga ia kiā koutou.”—1 Petelo 5:7, MN.

¹² E feafea’i hatatou ’ilo’i papau, ’e mole loto e te ’Atua ke tou ma’uli mamahi? Ko’eni te tahi fakamo’oni. ’E ako’i mai ’i te Tohi-Tapu ko te tagata ne’e fakatupu ’o mulimuli ki te pāki ’o te ’Atua. (Senesi 1:26) Koia ’e tou ma’u te ’u kalitātē lelei, kote’uhi ’e ma’u e te ’Atua te ’u kalitātē lelei. Ohage la, ’e koutou mamahi koa mokā koutou sio ’e ma’uli mamahi he ’u haha’i ne’e mole nātou fai he ’u me’a ’e kovi? Kapau ’e malave feiā kiā koutou te ’u aga kovi ’aia, pea koutou tui papau ’e toe malave mālohi age ki te ’Atua.

¹³ Ko te kalitātē ’e ma’u e te tagata, ko te ’ofa. Ko te tahi agaaga ’aia ’o te ’Atua, kote’uhi ’e ako’i mai ’i te Tohi-Tapu ko “te ’Atua ’e ’ofa.” (1 Soane 4:8, MN) ’E tou ’ofa kote’uhi ’e ’ofa te ’Atua. Ko te ’ofa ’e ina uga anai koa koutou ke koutou fakagata te ’u mamahi pea mo te ’u aga kovi ’aē ’e koutou sio kiai ’i te malamanei? Kanapaula ne’e koutou lava fai ia te fa’ahi aia, ’e mahino ia ’e koutou fai anai. ’O toe feiā pe, ’e feala hakotou tui papau ’e fakagata anai e te ’Atua te ’u mamahi pea mo te ’u aga kovi. Ko te ’u fakapapau ’aē ’e tu’u ’i te kamata ’o te tohi ’aenī ’e mole ko he ’u moemisi pe’e ko he ’u ’amanaki ’e mole hoko anai. ’E hoko mo’oni anai te ’u fakapapau ’a te ’Atua! Kae ke feala hakotou tui ki te ’u fakapapau ’aia, ’e tonu ke koutou ’ilo’i lelei age ia te ’Atua ’aē ne’e ina fai te ’u fakapapau ’aia.

’E LOTO E TE ’ATUA KE KOUTOU ’ILO’I PE’E KO AI IA IA

¹⁴ Kapau ’e koutou loto ke ’ilo’i koutou e he tahi, koteā ’aē ’e tonu ke koutou fai? ’E koutou fakahā age anai tokotou higoa kiā ia. ’E ’i ai koa he huafa ’o te ’Atua? ’E lahi te ’u lotu ’e nātou ’ui ko tona huafa ’e ko “’Atua” pe’e “’Aliki,” kae ’e mole ko he ’u higoa ’aia. ’E ko he ’u tu’ulaga, ohage ko te ’u tu’ulaga ’aē ko “te hau” pea mo “te pelesita.” ’E ako’i mai ’i te Tohi-Tapu, ’e lahi te ’u tu’ulaga ’o te ’Atua, pea ’e kau kiai tona ’u tu’ulaga “’Atua” pea mo “’Aliki.” Kae ’e toe ako’i mai foki ’i te Tohi-Tapu, ’e ’i ai te huafa totonu ’o te ’Atua: ko Sehova. ’E ’ui fēnei ’i te Pesalemo 83:18: “Ko koe, ’aē ko tou huafa ko Sehova, ko koe tokotahi pe, te Mā’oluga ’Aupito ’i te kele kātoa.” Kapau ’e mole tu’u ’i takotou Tohi-Tapu te huafa ’aia, pea ’e feala hakotou vaka’i Te Tahi ’u Fakamahino, ’o te tohi ’aenī. ’I tona fakahagatonu, ’i te ’u tohi ’āfea ’o te Tohi-Tapu, ’e lau’i afe te ’u vaega ’aē ’e tu’u ai te huafa ’o te ’Atua. Koia, ’e loto e Sehova ke koutou ’ilo’i tona huafa pea mo koutou faka’aoga’i. ’E feala ke tou ’ui, ’e ina faka’aoga’i te Tohi-Tapu mo’o fakahā mai pe’e ko ai ia ia.

¹⁵ ’E ’i ai te faka ’uhiga ’o te huafa ’o te ’Atua. Ko tona huafa, ko Sehova, ’e ina faka ’uhiga ko te ’Atua ’e feala ke ina fakahoko tana ’u fakapapau fuli pea mo tana ’u fakatu’utu’u fuli.* Ko te huafa ’o te ’Atua ’e makehe, pea ’e ’a’ana tokotahi pe. ’E lahi te ’u ’alu’aga ’e makehe ai ia Sehova. Koteā te ’u ’alu’aga ’aia?

¹⁶ ’O ’uhiga mo Sehova, ne’e tou lau iā Pesalemo 83:18: “Ko koe tokotahi pe, te Mā’oluga ’Aupito.” ’E toe ’ui foki ko Sehova tokotahi “te Māfimāfi.” ’E ’ui fēnei iā Apokalipesi 15:3 (MN): “’E lahi pea mo fakaofoofo tau ’u gāue, Sehova ’Atua, te Māfimāfi. ’E faitotonu pea mo mo’oni tou ’u ala, Hau ’o te he’egata.” Ko te tu’ulaga “te Māfimāfi,” ’e ako’i mai ai ’e mole he tahi ’e mālohi ’aupito age iā Sehova. ’E mole he fakatatau ’o tona mālohi, pea ’e nofo mo te tu’ulaga ’aē ’e mā’oluga tokotahi pe. Pea ko te tu’ulaga “Hau ’o te he’egata” ’e ina fakamanatu’i mai ko Sehova ’e makehe ’i tona tahi ’alu’aga. Ko ia tokotahi pe ne’e mole hona kamata’aga. ’E ’ui fēnei ’i te Pesalemo 90:2: “Mai te ’u temi he’egata ’o a’u ki he ’u temi he’egata [pe’e ’o talu ai] ’e ke ’Atua.” Ko te manatu ’aia ’e ina fakatupu ia tatou he loto manavasi’i kiā te ia.

¹⁷ ’E toe makehe te ’Atua he’e ko ia tokotahi pe te Tupu’aga. ’E tou lau fēnei iā Apokalipesi 4:11 (MN): “’E tāu mo koe, Sehova, ’io tomatou ’Atua, ke ke tali te kolōlia, pea mo te faka’apa’apa, pea mo te mālohi, he’e ko koe ’aē ne’e ke fakatupu ia me’a fuli, pea ’uhi ko tou finegalo ne’e nātou mā’u’uli ai pea mo fakatupu ai ia nātou.” Ko me’a fuli ’aē ’e feala ke koutou manatu kiai—te ’u ’āselo ’aē ’i selo, te ’u fetu’u, te ’u fisi’i teu, pea mo te ’u ika ’o te tai pea mo te ’u vaitafe—’e ko te ’u fa’u ’aia ’a Sehova te Tupu’aga.

’E FEALA KOA HAKOTOU FAKAŌVI KIĀ SEHOVA?

¹⁸ Ko ’ihi ’e nātou tu’ania, mokā nātou lau te ’u fakamatala ’o ’uhiga mo te ’u kalitātē fakamanavahe ’o Sehova. ’E nātou matataku, he’ema’a nātou ’e mā’oluga fau te ’Atua, pea ’e mole feala anai ’i he temi hanatou fakaōvi kiā te ia, pe’e nātou manatu ’e mole tokaga’i anai nātou e he ’Atua mā’oluga feiā. Kae ’e tonu koa te manatu ’aia? ’E mole ako’i mai te fa’ahi ’aia ’i te Tohi-Tapu. ’E ina ’ui ’o ’uhiga mo Sehova: “’I tona fakahagatonu, ’e mole mama’o ia tatou takitokotahi.” (Gaue 17:27, MN) ’E fai mai te fakaloto mālohi ’aenī ’i te Tohi-Tapu: “Koutou fakaōvi ki te ’Atua pea ’e fakaōvi atu anai kiā koutou.” —Sakopo 4:8, MN.

¹⁹ ’E tou lava fakaōvi feafea’i ki te ’Atua? ’Uluaki, koutou haga fai te me’a ’aē ’e koutou fai ’i te temi nei: koutou ako ke koutou ’ilo’i te ’Atua. Ne’e ’ui fēnei e Sesu: “Ko te faka ’uhiga ’aenī ’o te ma’uli he’egata, ke nātou ako ke nātou ’ilo’i ia koe, te ’Atua mo’oni pe ’aē e tahi, pea mo ia ’aē ne’e ke fekau’i mai, ia Sesu Kilisito.” (Soane 17:3, MN) ’Ei, ’e ako’i mai e te Tohi-Tapu ’e tou ma’u anai “te ma’uli he’egata” mo kapau ’e tou ’ilo’i ia Sehova pea mo Sesu. Ohage ko te me’a ’aē ne’e tou vaka’i, “ko te ’Atua ’e ’ofa.” (1 Soane 4:16, MN) ’E toe ’i ai foki mo te tahi ’u tu’uga kalitātē taulekaleka pea mo lelei ’o Sehova. Ohage la, ’e ’ui ’i te Tohi-Tapu ko Sehova ’e ko he “’Atua manava’ofa pea mo aga’ofa, tuai ’i te ’ita pea mo mohu ’i te loto’ofa pea mo te mo’oni.” (Ekesote 34:6; 1 Soane 4:8, 16) ’E “agalelei pea mo fakamolemole gafua.” (Pesalemo 86:5) ’E ko he ’Atua ’e fa’a kātaki. (2 Petelo 3:9) ’E agatonu. (Apokalipesi 15:4) ’I takotou haga lau ia te Tohi-Tapu, ’e koutou sio ai anai ko Sehova ’e ina ma’u te ’u kalitātē ’aia pea mo te tahi atu ’u kalitātē.

²⁰ ’E mo’oni, ’e mole feala ke koutou sio ki te ’Atua, kote’uhi ’e ko he laumālie fakapulipuli. (Soane 1:18; 4:24; 1 Timoteo 1:17) Kae kapau ’e koutou ako te Tohi-Tapu ke koutou ’ilo’i ia ia, ’e koutou faka tui anai ’e ma’uli mo’oni. Ohage ko tana ’ui e te tagata fai pesalemo, ’e feala ai anai ke koutou “sio ki te matalelei ’o Sehova.” (Pesalemo 27:4; Loma 1:20) Ka lahi anai te ’u me’a ’aē ’e koutou ako ’o ’uhiga mo Sehova, pea ’e toe lahi age anai mo takotou tui mo’oni kiā te ia, mo ’ofa kiā te ia pea mo koutou ōvi kiā te ia.

²¹ ’Aki te temi, ’e koutou mahino lelei anai pe ko’e ’e ako’i mai ’i te Tohi-Tapu ke tou ’ui ko Sehova ko tatatou Tāmai. (Mateo 6:9) Ko ia te Matapuna ’o te ma’uli, pea ’e ina loto tāfito ke tou ma’uli fiafia, ohage pe ko te faka’amu ’a te tāmai fuli ’o ’uhiga mo tana fānau. (Pesalemo 36:9) ’E toe ako’i mai ’i te Tohi-Tapu, ko te tagata ’e lava liliu ko he kaume’a ’o te ’Atua. (Sakopo 2:23) ’I toe pilivilesio makehe hatatou liliu ko he ’u kaume’a ’o te Tupu’aga ’o te ’atulaulau!

²² ’I te hoko atu ’o takotou ako ia te Tohi-Tapu, ’e ’i ai te ’u haha’i, ’i tanatou mole mahino, ’e nātou ’ui atu anai ke koutou tuku takotou ako. ’E lagi nātou tu’ania na’a koutou fetogi lotu. Kae ’aua na’a koutou tuku ki he tahi ke ina tā’ofi takotou fia liliu ko he kaume’a ’o te ’Atua.

²³’E mo’oni ’i te kamata ’e ’i ai te ’u me’a ’e mole koutou mahino anai kiai. Kae ’e tonu anai ke koutou fia agavaivai ’o kole age ki he tahi ke tokoni atu, kae ’aua na’a koutou nofo ’aki takotou umiuminoa. Ne’e ’ui e Sesu ’e lelei hakita fia agavaivai, ohage ko nātou liliki. (Mateo 18:2-4) Pea ’e tou ’ilo’i ko te ’u kihi’i tamaliki ’e lahi tanatou ’u fehu’i. Koia ’e loto e te ’Atua ke koutou ma’u tona ’u tali. ’E ’i ai te ’u haha’i ’e viki’i e te Tohi-Tapu, he ne’e nātou fia ’ilo’i lelei te ’Atua. Ne’e nātou vakavaka’i lelei te Tohi-Tapu ke nātou ’ilo’i papau pe’e mo’oni te ’u me’a ’aē ne’e nātou ako.—Gaue 17:11.

²⁴ Kapau ’e koutou fia ’ilo’i lelei ia Sehova, ’e tonu ke koutou ako te Tohi-Tapu. ’E ko he tohi ia ’e kehe mo te ’u tohi fuli ’aē. Koteā tona kehekehe? ’E tou vaka’i anai te fa’ahi ’aia ’i te kapite ’aē ka hoa mai.

*  ’I Te Tahi ’u Fakamahino, ’e ’i ai te tahi ’u fakamahino ’o ’uhiga mo te faka ’uhiga pea mo te pu’aki ’o te huafa ’o te ’Atua.