KO TE tohi ʼaenī ʼe ko te tohi ʼo te ʼu hisitolia moʼoni. ʼE toʼo mai te Tohi-Tapu, ko te tohi ʼaē ʼe lahi tokotahi ʼi te malamanei. ʼE talanoa te tohi ʼaenī ki te ʼu meʼa ʼaē neʼe hoko talu mai te temi ʼaē neʼe fakatupu ai e te ʼAtua te malamanei ʼo aʼu mai ki totatou temi. ʼE nātou fakahā mai te ʼu fakapapau ʼaē neʼe fai e te ʼAtua ʼo ʼuhiga mo te temi ka haʼu.

Ko te tohi ʼaenī ʼe tuʼu ai te ʼu meʼa ʼe talanoa tāfito kiai te Tohi-Tapu. ʼE talanoa ki te ʼu hahaʼi ʼo te Tohi-Tapu pea mo te ʼu meʼa ʼaē neʼe nātou fai. Tahi ʼaē meʼa, ʼe ina fakahā mai ia te ʼamanaki lahi ʼo ʼuhiga mo te maʼuli heʼegata ʼi te palatiso fakakelekele ʼaē neʼe foaki e te ʼAtua ki te hahaʼi.

Ko te ʼu hisitolia e 116 ʼi te tohi ʼaenī. ʼE fakatahi ko tona ʼu faʼahi e valu. Ko te pasina ʼaē ʼi te kamata ʼo te ʼu faʼahi ʼaia e valu, ʼe talanoa fakanounou ki te ʼu meʼa ʼaē ka palalau kiai te ʼu hisitolia ʼaia. ʼE fefakahoahoaʼaki te ʼu hisitolia ohage ko tona hoko ʼi te hisitolia faka Tohi-Tapu. Ko te faʼahi ʼaia ʼe tokoni anai kia koutou ke koutou ʼiloʼi pe neʼe hoko ʼanafea te ʼu meʼa ʼaia ʼi te hisitolia.

Neʼe tohi te ʼu hisitolia ʼi he lea ʼe faigafua he mahino kiai. Tokolahi ʼi takotou ʼu tamaliki ʼe feala anai tanatou lau atu te ʼu hisitolia maʼa koutou. ʼU mātuʼa ʼe koutou tokagaʼi anai te fiafia ʼo takotou ʼu kihiʼi tamaliki mo kapau ʼe koutou lau liuliuga age te ʼu hisitolia ʼaia kia nātou. ʼE koutou tokagaʼi anai ko te tohi ʼaenī ʼe ʼaoga ki te tamaliki liliki pea mo te hahaʼi lalahi.

Ko te ʼu vaega faka Tohi-Tapu ʼe tuʼu fuli ʼi te fakaʼosi ʼo te ʼu hisitolia. ʼE fakaloto mālohiʼi koutou ke koutou lau te ʼu vaega ʼaia ʼo te Tohi-Tapu ʼaē ʼe toʼo mai ai te ʼu hisitolia ʼaia.