ʼE KOUTOU sisio ki te kau Iselaelite ʼaē ʼe lolotoga fakalaka ʼi te Vaitafe ko Solotane! Kae kua ʼalu koa kifea te ʼu vai? Mai tona ʼaluʼaga ʼaē neʼe ʼua lalahi ʼi te temi ʼaia ʼo te taʼu, neʼe tafe mālohi te vaitafe. Kae ʼi te temi nei kua puli fuli tona vai! Pea ʼe fakalaka te kau Iselaelite ʼi te vaitafe ʼaia ʼaē kua maha, ohage pe ko te meʼa ʼaē neʼe hoko ʼi te Tai Kula! Kua ʼalu koa kifea te vai ʼaia? Tou vakaʼi te meʼa ʼaē neʼe hoko.

ʼI te temi ʼaē neʼe tonu ai ke fakalaka te kau Iselaelite ʼi te Vaitafe ko Solotane, koʼeni te meʼa neʼe ʼui e Sehova kia Sosue ke ina ʼui age ki te hahaʼi: ‘ ʼE tonu ke ʼamo e te ʼu pelepitelo te aleka ʼo te fuakava pea ke nātou haʼele ʼi ʼotatou muʼa. ʼI te temi ʼaē ka tuʼu ai ʼonatou vaʼe ki te vai ʼo te Vaitafe ko Solotane, pea ʼe gata ai anai te tafe ʼo te vai.’

Pea neʼe toʼo e te ʼu pelepitelo te aleka ʼo te fuakava, pea nātou ʼamo ʼo nātou haʼele ʼi muʼa ʼo te hahaʼi. ʼI tanatou kaku atu ki Solotane, neʼe ʼai e te ʼu pelepitelo tonatou ʼu vaʼe ki te vai. Neʼe tafe mālohi te vai pea mo loloto. Kae ʼi tanatou ʼai tonatou ʼu vaʼe kiai, neʼe kamata maha ai te vai! Neʼe ko he milakulo ia! Neʼe tāʼofi e Sehova te vai ʼaia. Koia ʼe mole tuai pea maha katoa te vaitafe!

Neʼe tutuʼu te ʼu pelepitelo ʼaē neʼe nātou ʼamo te aleka ʼo te fuakava ʼi te lotomalie ʼo te vaitafe. ʼE koutou sio kia nātou ʼi te paki? Neʼe nātou tutuʼu ai, kae fakalaka te kau Iselaelite ʼi te Vaitafe ko Solotane ʼaē kua maha!

ʼI te ʼosi fakalaka ʼa te hahaʼi fuli, neʼe fekau e Sehova kia Sosue ke ina ʼui fēnei ki he ʼu tagata mālolohi e toko 12: ‘Koutou ʼolo ki te potu ʼo te vaitafe ʼaē ʼe tutuʼu ai te ʼu pelepitelo mo te aleka ʼo te fuakava. Koutou toʼo ai he ʼu foʼi maka e 12, pea koutou ʼave ʼo fakatuʼuga ʼi te potu ʼaē ka koutou mālōlō ai ʼi te pōʼuli. Pea ʼi te ka haʼu, mokā fehuʼi atu anai e takotou ʼu fānau te faka ʼuhiga ʼo te ʼu maka ʼaia, pea ʼe tonu anai ke koutou ʼui age neʼe maha te vai ʼi te temi tonu ʼaē neʼe fakalaka ai te aleka ʼo te fuakava ʼi Solotane. ʼE fakamanatuʼi atu anai e te ʼu foʼi maka te milakulo ʼaia!’ Neʼe toe fakatuʼu e Sosue te ʼu foʼi maka e 12 ʼi te potu ʼaē neʼe tutuʼu ai te ʼu pelepitelo.

Pea neʼe ʼui fēnei e Sosue ki te ʼu pelepitelo ʼaē neʼe nātou ʼamo te aleka ʼo te fuakava: ‘Koutou mavae ʼi Solotane.’ Pea ʼi te temi pe ʼaē neʼe nātou fai ai te faʼahi ʼaia, neʼe toe kamata tafe ai te vaitafe.