NEʼE nonofo fakatahi te famili ʼo Lote pea mo te famili ʼo Apalahamo ʼi te fenua ʼo Kanaane. ʼI te tahi ʼaho neʼe ʼui age e Apalahamo kia Lote: ‘ ʼE mole feʼauga te fenua ʼaenī ki tatā ʼu faga manu fuli. ʼE lelei ke tā mavete. Kapau ʼe ke ʼalu ʼi te faʼahi ʼaē, pea ʼe ʼau ʼalu anai ʼau ki he tahi faʼahi.’

Neʼe sio ia Lote ki te fenua. Neʼe sio ia ki te potu ʼe lelei ʼaupito ʼo te fenua, neʼe ʼi ai te vai pea ʼe lahi ai te vao lelei maʼa tana faga manu. Neʼe ko te tisitilike ʼaia ʼo Solotane. Koia neʼe ʼalu ai ia Lote mo tona famili pea mo tana faga manu ki te faʼahi ʼaia. Neʼe nātou fakatuʼu tonatou nofoʼaga ʼi te kolo ʼo Sotoma.

Neʼe agakovi ʼaupito te hahaʼi ʼo Sotoma, ʼo tupu ai te lotomamahi ʼo Lote, koteʼuhi neʼe ko he tagata agalelei. Neʼe toe lotomamahi foki mo te ʼAtua. Pea neʼe ina fekauʼi te ʼu ʼaselo e lua ke nā ʼolo ʼo fakatokagaʼi ia Lote, ʼe ina fakaʼauha anai ia Sotoma pea mo te kolo ʼaē ʼe ōvi mai ko Komola ʼuhi ko tanatou agakovi.

Neʼe ʼui age e te ʼu ʼaselo kia Lote: ‘Fakavilivili! Toʼo tou ʼohoana pea mo tou ʼu ʼofafine e lua pea ke koutou mavae ʼi henī!’ ʼI te tuai ʼaē ʼo te mavae ʼa Lote pea mo tona famili, neʼe fā te ʼu ʼaselo ki tonatou ʼu nima ʼo taki ia nātou ki te tuʼa kolo. Pea neʼe ʼui age e te tahi ʼaselo: ‘Koutou feholaki moʼo hāofaki tokotou maʼuli! Vakaʼi naʼa koutou haga ki muli. Koutou feholaki ki te ʼu moʼuga, naʼa koutou mamate.’

Neʼe fakalogo ia Lote pea mo tona ʼu ʼofafine ʼo nātou feholaki ʼi Sotoma. Neʼe mole he temi neʼe nātou tutuʼu ai, pea neʼe mole nātou toe haga ki muli. Kae neʼe talagataʼa te ʼohoana ʼo Lote. ʼI tanatou kua mamaʼo ʼi Sotoma, neʼe tuʼu ia pea neʼe sio ki muli. Pea neʼe liliu ai te ʼohoana ʼo Lote ko te maka māsima. ʼE koutou sio koa ki ai ʼi te paki?

ʼE ʼi ai te ʼaoga lelei ʼo te hisitolia ʼaia kia tatou. ʼE fakahā mai kia tatou ko te ʼAtua ʼe ina hāofaki ia nātou ʼaē ʼe fakalogo kia te ia, kae ʼe mamate anai ia nātou ʼaē ʼe talagataʼa kia te ia.