ʼE TONU ke tou fakaha he lotofakafetaʼi ʼe lahi ʼo ʼuhiga mo he meʼa ʼofa taulekaleka. Neʼe fakamahino e Sesu te faʼahi ʼaia ʼi tana ʼosi fakamalolo te ʼu tagata ʼe toko hogofulu mai he mahaki ʼe kovi. Pea neʼe mole feala hona fakamalolo ʼi te temi ʼaia. Ko te foʼi toko tahi pe ʼi te ʼu tagata ʼaia ʼe hogofulu “neʼe toe liliu ia ʼo fakakololiaʼi leʼo lahi te ʼAtua.” Neʼe ui fenei e Sesu: “Neʼe mole koa la ko te toko hogofulu ʼae neʼe fakamaʼa? Koia kofea te toko hiva ʼae?” (Luka 17:12-17) Kotea te ako ʼe tou taʼofi mai ai? ʼE feala ke tou galoʼi vave ia te agalelei ʼae neʼe fai mai e niʼihi kia tatou.

Ko te sakilifisio ʼo Sesu ʼe mole ʼi ai hona ia fakatatau. ʼE ko he meʼa ʼofa ʼe lahi tokotahi ʼae neʼe foaki mai. Pea ʼe tonu anai ke feafeaʼi tau lotofakafetaʼi ki te meʼa ʼofa ʼaia neʼe foaki e te ʼAtua maʼa koe?

• Ke ke ako ke ke iloʼi Ia Ia ʼAe Neʼe Ina Foaki te meʼa ʼofa. ʼE mole hoʼi maʼu feia pe e te tagata ia te maʼuli heʼe gata ʼaki te sakilifisio ʼo Sesu. Kaʼe, neʼe ui fenei e Sesu ʼi tana faikole ki te ʼAtua: “Koʼeni ia te fakaʼuhiga ʼo te maʼuli heʼe gata, ke natou ako ke natou iloʼi ia koe, te ʼAtua moʼoni pe ʼe tahi pea mo ia ʼae neʼe ke fekauʼi mai, ia Sesu Kilisito.” (Soane 17:3) Ke ke fakakaukauʼi age muʼa te aluʼaga ʼaeni: ʼE ui atu e he tahi neʼe haofaki koe e he tagata ʼi tau kei veliveli. ʼE mole koa la ke fia iloʼi lelei age te tagata ʼaia pea mo te tupuʼaga ʼo tana haofaki koe? ʼO toe feia pe, ko Sehova ʼAtua ʼae neʼe  ina foaki te sakilifisio ʼo Sesu moʼo haofaki te maʼuli ʼo te hahaʼi. Pea ʼe mole ina loto pe ke ke iloʼi ia ia, kaʼe ʼe ina loto ke ke toe maʼu he ʼu felogoʼi lelei mo ia. ʼE fakalotomalohiʼi fenei tatou ʼi te Tohi-Tapu: “Kotou fakaovi ki te ʼAtua, pea ʼe fakaovi atu anai kia koutou.”—Sakopo 4:8.

• Ke ke tui ki te sakilifisio ʼo Sesu. “Ko ʼae ʼe tui ki te ʼAlo ʼe ina maʼu ia te maʼuli heʼe gata.” (Soane 3:36) Kotea tona fakaʼuhiga? Ko tona fakaʼuhiga ke tou fai he ʼu gaue. Pea ʼaki he ʼu gaue ʼe tou fakaha ai tatatou tui ki te sakilifisio ʼo Sesu. (Sakopo 2:17) Kotea te ʼu gaue ʼaia? ʼE hoki ke maʼu he meʼa ʼofa moka kua ke tali pea mo toʼo te meʼa ʼofa ʼaia. ʼO toe feia pe mo te sakilifisio ʼo Sesu. ʼO feafeaʼi? ʼAki tau ako te faʼahiga maʼuli ʼae ʼe loto ki ai te ʼAtua pea mo maʼuliʼi ʼi tou maʼuli. * Ke ke faikole ki te ʼAtua ke ina fakamolemole ʼau agahala pea ke ke maʼu ia he leʼo ʼo loto ʼe maʼa. Ke ke fakaovi ki te ʼAtua pea mo ke tuku katoa tau falala kia te ia. Kotea tona tupuʼaga? Koteʼuhi ʼaki te sakilifisio ʼo Sesu ʼe ina fakafealagia anai kia natou fuli ʼe tui ki ai ke natou maʼu he ka haʼu ʼe maʼu ai te tokalelei, mo te fimalie pea ʼe mahu anai ia meʼa fuli.—Hepeleo 11:1.

• Ke ke kau ki te ʼAho Fakamanatu ʼo te mate ʼo Sesu. Neʼe fakatuʼu e Sesu ia he toʼotoʼoga ʼe tonu ke fai ʼi te taʼu fuli ke tou fakamanatu ai tona sakilifisio. Neʼe ina ui fenei ʼo ʼuhiga mo te toʼotoʼoga ʼaia: “Kotou haga fai te faʼahi ʼaeni moʼoku fakamanatu.” (Luka 22:19) ʼE fakamanatu anai e te kau Fakamoʼoni ʼa Sehova te mate ʼo Sesu ʼi te Feliatolu ʼaho 11 ʼo Apelili 2017, ʼi te ʼosi to ʼo te laʼa. ʼE teitei hola katoa te toʼotoʼoga ʼaia. Pea ʼe fai anai he akonaki ʼe fakamahino ai te fakaʼuhiga ʼo te mate ʼo Sesu pea mo te ʼu lelei ʼe ke maʼu ai anai ʼi te temi nei mo te ka haʼu. ʼI te taʼu ʼaeni kua ʼosi, neʼe ko te teitei toko 20 miliona hahaʼi ʼi te malamanei katoa neʼe natou kau ki te ʼAho Fakamanatu. ʼE matou fakaafe atu koe ke ke kau mo matou ki te toʼotoʼoga ʼaia ke ke fakaha ai tau lotofakafetaʼi ki te meʼa ʼofa lahi tokotahi ʼa te ʼAtua.