NEʼE tohi te faʼahi ʼaeni e Alan S. Duthie ʼi tana tohi ʼo ʼuhiga mo te fakaliliu ʼo te Tohi-Tapu: “Kapau ʼe kotou tui ko te Tohi-Tapu ʼe ko te folafola ʼa te ʼAtua maʼa te hahaʼi fuli, ko tona fakaʼuhiga ʼe palalau mai te ʼAtua kia tatou. . . . Kapau ʼe malave takotou lotu ki tokotou maʼuli katoa pea ʼe tonu ke tatau te lea [ʼo te Tohi-Tapu] mo takotou palalau ʼae ʼi te ʼaho fuli.”

Ko natou ʼae ʼe natou leleiʼia ia te Folafola ʼa te ʼAtua ʼe natou fakatui katoa ki te faʼahi ʼaia. Pea ʼe natou tui papau “ko meʼa fuli ʼae ʼe tohi ʼi te ʼu Tohi Taputapu ʼe haʼu ia mai te ʼAtua. ʼE ʼaoga moʼo akoʼi te hahaʼi, moʼo fakatonutonu te hala, moʼo fakatokatoka te ʼu aluʼaga kehekehe, moʼo akonakiʼi ʼo mulimuli ki te faitotonu.” (2 Timoteo 3:16) Ko te Tohi-Tapu ʼe ko he tohi ʼafeā, kaʼe “ ʼe maʼuli pea mo malohi,” pea ʼe ina tuku mai ia he ʼu puleʼaki lelei ki te ʼu fihifihia ʼo te maʼuli ʼae ʼi te ʼaho fuli. (Hepeleo 4:12) ʼE tou fia mahino mo maʼuliʼi ia te meʼa ʼae ʼe tou ako ʼi te Tohi-Tapu. Koia ʼe tonu ai ke tohi ʼi te lea ʼae ʼe tou palalauʼi ʼi te ʼaho fuli. Ohage la ko te koga Tohi-Tapu ʼae ʼe fakahigoaʼi ko te Tauhi Foʼou neʼe tohi ʼi te Fakakeleka ʼae neʼe palalauʼi e te hahaʼi ʼi te ʼaho fuli ʼae ko te Koinè, kaʼe neʼe mole tohi ia ʼi te Fakakeleka ʼae neʼe palalauʼi e te hahaʼi popoto, ohage ko te tagata faifilosofia ko Platon. Koia neʼe tohi ia te Tohi-Tapu ke feala ke lau pea ke mahino ki ai ia te hahaʼi fuli.

Ko te tupuʼaga la ʼaia, ʼi te ʼu taʼu ʼaeni kua ʼosi, neʼe lahi te ʼu fakaliliu foʼou ʼo te Tohi-Tapu neʼe fai ʼi te ʼu lea kehekehe. Neʼe lahi te ʼu faʼahi neʼe fua lelei ai ki te hahaʼi. Tokolahi kua natou maʼu faigafua ia te Tohi-Tapu. Kaʼe ʼe lahi ia te ʼu fakaliliu foʼou ʼe mole totonu pea mo mahino gafua. Ohage la, ko ʼihi fakaliliu ʼe natou ʼave keheʼi ia te ʼu akonaki ʼo te Tohi- Tapu ʼo ʼuhiga mo te aluʼaga ʼo te kau mate pea mo te huafa ʼo te ʼAtua moʼoni.

Ko natou ʼae ʼe natou leleiʼia ia te Folafola ʼa te ʼAtua, ʼe natou fiafia ʼi tanatou maʼu ia te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano ʼi te Fakaʼuvea. Neʼe tala e te kau Fakamoʼoni ʼa Sehova ia te ha ʼo te fakaliliu foʼou ʼaia ʼi te ʼaho 7 ʼo Novepeli 2016. Neʼe mole tuku e te kau faifakaliliu ia he ʼu akonaki fakalotu ke ina fakahalaʼi ia tanatou gaue. Koia neʼe natou fai ai ia he fakaliliu ʼe totonu age ʼi te ʼu fakaliliu ʼae ki muʼa atu. ʼE feala ai ke tou mahino loloto ki te Tohi-Tapu, pea ʼe ko he faʼahi neʼe mole feala ia ki muʼa atu ʼi te lea Fakaʼuvea. Kaʼe ʼe lagi ke feuiʼaki pe ko ai ia natou ʼae neʼe natou fai ia te fakaliliu makehe ʼaia.

ʼE lagi matafoʼou ki te kau Uvea ia te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano, kaʼe neʼe kua fualoa ia tona maʼu talu mai te taʼu 1950. ʼI te temi ʼaia, neʼe ta ia te fakaliliu ʼaia ʼi te lea Fakapilitania e te Watch Tower Bible and Tract Society, ko he sosiete fakamalamanei ʼe ina ta talu mai fualoa ia te Tohi-Tapu. ʼE ui fenei ʼi Te Tule Leʼo ʼo te ʼaho 15 ʼo Sanualio 1951: “Neʼe ui e te ʼu tagata ʼae ʼe natou faʼufaʼu te komite fakaliliu ʼe mole natou loto . . . ke fakaha tonatou higoa ʼi tanatou kei maʼuli pea moka natou mamate anai. Ko te fakatuʼutuʼu ʼo te fakaliliu ʼaia ʼe ko te fakavikiviki ki te huafa ʼo te ʼAtua moʼoni mo maʼuli.”

Ko te Tohi-Tapu. Fakaliliu ʼo Te Malama Foʼou, neʼe ta katoa ʼi te taʼu 1961. Pea ʼe mole iloʼi ia te ʼu higoa ʼo te kau faifakaliliu ʼo kaku mai ki te ʼaho nei. Kaʼe ʼe tou tui papau neʼe lelei ʼanatou fakatuʼutuʼu pea neʼe natou pipiki ki te ʼAtua. ʼE ui fenei ʼi te ʼu ʼuluaki palalau ʼo te fakaliliu ʼo te taʼu 2013: “ ʼE matou iloʼi ia te maʼuhiga ʼo te logo ʼo te Tohi-Tapu, koia neʼe matou toe vakaʼi ia te ʼu fakaliliu ki muʼa atu ʼaki ia he fakaʼapaʼapa lahi. ʼE matou logoʼi ʼe ko homatou maʼua makehe te fakaha ʼo tana logo ʼo faigaʼi ke totonu. . . . Neʼe mole matou fakatuʼutuʼu pe ke matou fai ia he fakaliliu ʼe mulimuli lelei ki te ʼu tohi ʼafeā kaʼe neʼe matou faiga ke mahino mo faigafua ia tona lau.”

Ko natou ʼaia ʼo te komite faifakaliliu neʼe natou faiva koa ʼi te fakaliliu ʼo te Tohi-Tapu? Ko ʼihi kau popoto neʼe natou ui, kapau ʼe mole fakaha te ʼu higoa ʼo te kau faifakaliliu mo ʼonatou pepa, pea ʼe tonu ke tuku keheʼi ia tanatou gaue he ʼe fakaʼuhiga ia ko he gaue ʼa he hahaʼi neʼe mole ako. Kaʼe neʼe mole manatu feia te kau popoto fuli. Neʼe tohi fenei e Alan S. Duthie: “Kapau ʼe tou iloʼi pe ko ai te kau faifakaliliu, peʼe ko te hahaʼi ʼae ʼe natou ta te Tohi-Tapu, pea ʼe tokoni mai koa te faʼahi ʼaia ke tou ui pe ʼe lelei te fakaliliu peʼe kovi? Kailoa, ʼe mole feʼauga. ʼE tonu ke tou vakaʼi te ʼu agaaga ʼo te ʼu fakaliliu fuli.” *

Ia ʼaho nei, kua ta katoa peʼe fakakoga ʼi te malamanei ia Tohi-Tapu ʼe 219 712 495 ʼo te Fakaliliu ʼo Te Malama Foʼou ia lea ʼe 145. Kotea ʼae neʼe ako e te tokolahi ʼae neʼe natou lau ia te fakaliliu ʼaia?

Neʼe akoʼi e Sesu ki ʼana tisipulo ke natou faikole fenei: “Ko tamatou Tamai ʼae ʼe ʼi selo, ke tapuha tou huafa.” (Mateo 6:9) Kaʼe ʼi ʼihi fakaliliu ʼe mole he huafa ʼo te ʼAtua, ʼe foaki ki ai te ʼu higoa fakatuʼulaga “ ʼAtua” peʼe “ ʼAliki.” Neʼe mole feia ʼi te ʼu ʼuluaki tohi. ʼI te Koga Tohi-Tapu Fakahepeleo, ko te ʼAtua neʼe teitei fakahigoaʼi tuʼa 7 000 ʼaki tona huafa totonu, ʼae ko Sehova. (Ekesote 3:15; Pesalemo 83:18) ʼI te ʼu taʼu ki muli age, neʼe matataku te kau Sutea ʼi te fakaʼaogaʼi ʼo te huafa ʼo te ʼAtua, ʼo mole kei natou fakaʼaogaʼi ai. Hili te mate ʼo te kau apositolo ʼa Sesu, neʼe kamata mafola ia te manatu hala ʼaia ʼi te kokelekasio Fakakilisitiano. (Gaue 20:29, 30; 1 Timoteo 4:1) Ko natou ʼae neʼe natou hiki ia te Koga Tohi-Tapu Fakakeleka neʼe natou kamata fetogi ia te huafa totonu ʼo te ʼAtua, ʼae ko Sehova, ʼaki te ʼu kupu Fakakeleka Kurios mo Théos ʼae ko tona fakaʼuhiga “ ʼAliki” mo “ ʼAtua.”

Neʼe lototoʼa ia te Komite Faifakaliliu ʼo Te Tohi-Tapu ʼo Te Malama Foʼou ke natou toe ʼai ia te huafa  Sehova ki te Koga Tohi-Tapu Fakakeleka Fakakilisitiano (“Tauhi Foʼou”), ʼae ʼe ha tuʼa 241 ʼi ai. Neʼe fakatafito ia te faʼahi ʼaia ki he ʼu kumi neʼe fai fakaleleiʼi kaʼe mole ʼuhi pe he neʼe loto ki ai te kau faifakaliliu. Ohage la ia Luka 4:18 ʼe tou maʼu ai ia te ʼu palalau ʼae ʼe tohi ia Isaia 61:1. ʼI te ʼu ʼuluaki tohi Fakahepeleo ko te huafa Sehova ʼe ha ʼi te vaega ʼaia ʼo Isaia. * Koia ʼi te Fakaliliu ʼo Te Malama Foʼou, ʼe ui fenei ia Luka 4:18: “Ko te laumalie ʼo Sehova ʼe ia te au, koteʼuhi neʼe ina fakanofo au ke au tala te logo lelei ki te kau masisiva.”

Pea ko te faʼahi ʼaia neʼe tokoni ki te kau lautohi ke natou fakakehekeheʼi ia Sehova ʼAtua pea mo tona ʼAlo ʼulu tokotahi, ia Sesu Kilisito. Ohage la, ʼe lahi ia te ʼu Tohi-Tapu ʼe natou fakaliliu fenei ia Mateo 22:44: “Nee ui e te Aliki ki toku Aliki.” (Te Tohi Tapu i te fakauvea) Kaʼe ko ai ia te ʼu ʼAliki ʼaia ʼe toko lua? ʼE ko te ʼu palalau ʼo te vaega ʼo Pesalemo 110:1 ʼae ʼe maʼu ʼi te vaega ʼaia ʼo Mateo, pea ʼi te ʼu ʼuluaki tohi Fakahepeleo, ko te vaega ʼaia ʼo Pesalemo ʼe tuʼu ai te huafa ʼo te ʼAtua. Koia ko te Fakaliliu ʼo Te Malama Foʼou neʼe ina fakaliliu fenei ia Mateo ­22:44: “Neʼe ui e Sehova ki toku ʼAliki.” ʼE maʼuhiga koa ke tou fakakehekeheʼi ia Sehova ʼAtua pea mo tona ʼAlo? (Maleko 13:32; Soane 8:17, 18; 14:28) ʼEi ʼe maʼuhiga, ke haofaki ai tatou. ʼE ui fenei ia Gaue 2:21: “Ko ʼae ʼe fetapa ki te huafa ʼo Sehova ʼe haofaki anai.”

ʼE ʼi ai te tahi ʼu tupuʼaga, ʼe lelei ai ia te Fakaliliu ʼo Te Malama Foʼou. ʼE fakatafito tamatou fakaliliu ki te tohi iloa Fakakeleka ʼa Westcott mo Hort. Kaʼe neʼe matou toe vakaʼi ia te ʼu papilusi ʼafeā pea mo te ʼu tohi iloa ohage la ko ʼae ʼa Nestle mo Aland pea  mo te ʼu Sosiete Fakatahi ʼo Te Tohi-Tapu. Koia neʼe matou tokakaga fakalelei ai ʼo fakaliliu ia te ʼu kupu Fakakeleka ʼaki he ʼu kupu ʼe totonu mo mahino gafua pea mo ʼae ʼe fakaʼaogaʼi ʼi te temi nei. ʼE feala ai kia ia ʼae ʼe lautohi ke ina iloʼi ia te faʼahiga palalau ʼa natou ʼi te temi ʼae neʼe tohi ai ia te Tohi-Tapu pea ke toe feala hana mahino lelei ki he ʼu meʼa neʼe mole faʼa mahino ki ai ʼi muʼa atu.

Ko te Fakaliliu ʼo Te Malama Foʼou neʼe ina faigaʼi ke ina fakaliliu ia te fakaʼuhiga totonu ʼo te ʼu kupu Fakakeleka. Ke ke tokagaʼi te ʼu palalau neʼe fai e Sesu ia Mateo 6:33. Ko te kupu Fakakeleka ʼae neʼe fakaliliu ʼaki te kupu “fakamuʼamuʼa” ʼe fakaʼuhiga ki he meʼa ʼe kita haga fai. Koia ʼe totonu ia te fakaliliu ʼaeni ʼo te ʼu palalau ʼa Sesu: “Koia, kotou haga fakamuʼamuʼa ia te Puleʼaga pea mo tana faitotonu, pea ʼe toe foaki atu anai mo te ʼu meʼa fuli ʼaia kia koutou.” ʼO toe feia aipe neʼe fakaliliu fenei ia Mateo 7:7: “Kotou haga kole, pea ʼe foaki atu anai. Kotou haga kumi, pea ʼe kotou maʼu anai. Kotou haga tukituki, pea ʼe avahi atu anai.”—Loma 1:32; 6:2; Kalate 5:15. Ko Te ʼu Kupu Mo ʼOna Fakaʼuhiga ʼi Te Tohi-Tapu ʼae ʼi te pasina 558, ʼe feala ke tokoni lahi kia natou ʼae ʼe natou fia ako ia te Tohi-Tapu. Ohage la, kapau ʼe fia mahino lahi age ia he tahi ki te fakaʼuhiga ʼo he ʼu kupu ohage ko te ʼAho ʼo Te Fakamau, Alamaketone, Alekaselo, Mesia, Papitema, ʼe feala anai ke ina maʼu ʼi te pasina ʼaia. Pea ʼe ʼi ai te Lisi ʼo Te ʼu Kupu ʼo Te Tohi-Tapu ʼi te pasina 534. ʼE fakahoahoa te ʼu kupu ʼaia ʼo mulimuli ki te ʼalafapeti pea mo he ʼu vaega ʼe tuʼu ai te ʼu kupu ʼaia. Kapau ʼe manatuʼi e he tahi ia te kupu maʼuhiga ʼo he vaega pea ʼe feala anai ke ina maʼu mo kapau ʼe ina fakaʼaogaʼi ia te Lisi ʼaia.

Kua tou maʼu ʼi te temi nei ia te Koga Tohi-Tapu Fakakeleka Fakakilisitiano ʼi te Fakaʼuvea, kaʼe ʼe mole gata ai. Koia neʼe fai ai he ʼu fakatuʼutuʼu ke fakaliliu ia te Tohi-Tapu katoa ʼi tona temi totonu. He koʼe ʼe lava tui papau ia te kau lautohi ko te fakaliliu Fakaʼuvea ʼaia ʼe totonu mo mahino gafua ohage ko te fakaliliu Fakapilitania?

Koteʼuhi ʼe takitaki fakalelei ia te gaue faifakaliliu e te Kolesi Pule ʼa te kau Fakamoʼoni ʼa Sehova. Koia neʼe natou fai ai te tonu fakapotopoto ʼae, ke ʼaua naʼa fai takitokotahi e te kau faifakaliliu ia te fakaliliu ʼo te Tohi-Tapu ki te tahi ʼu lea, kaʼe ʼe lelei age ke fai e he ʼu kiʼi kutuga. Neʼe lahi te ʼu fenua neʼe fakatuʼutuʼu ai ia he ʼu kiʼi kutuga. Neʼe fakatuʼu ia te selevisi ʼe fakahigoaʼi ko te Selevisi Tokoni Ki Te Faifakaliliu ʼi te ʼu pilo lalahi ʼa te kau Fakamoʼoni ʼa Sehova ʼi Amelika. Ko te selevisi ʼaia ʼe tokoni ki te ʼu meʼa ʼae ʼe ʼaoga ki te ʼu kiʼi kutuga ʼaia, mo tali ki te ʼu fehuʼi ʼa te kau faifakaliliu ʼo te Tohi-Tapu, pea mo fakaalu tahi ia te Fakaliliu ʼo Te Malama Foʼou ʼi te ʼu lea kehekehe. ʼE fakaʼaogaʼi e te kau faifakaliliu ia te ʼu olotinatea pea mo te polokalama faifakaliliu Watchtower Translation System moʼo tokoni kia natou ki te fakaliliu ʼo te Tohi-Tapu. Kaʼe ʼe mahino ia, ʼe kei ʼaoga pe ke fai ia te gaue ʼaia e he kau faifakaliliu. Ko te ʼu olotinatea ʼe tokoni lahi ki te ʼu kutuga faifakaliliu ke natou kaku ki tanatou fakatuʼutuʼu ʼae ke totonu mo mahino gafua te Fakaliliu ʼo Te Malama Foʼou ʼi tanatou lea ohage ko te Fakapilitania. Tahi ʼae faʼahi, ko te polokalama faifakaliliu ʼaia ʼe ina fakaha pe ʼe fakaliliu feafeaʼi ia te ʼu kupu Fakahepeleo mo Fakakeleka ʼi te Fakapilitania. Pea ʼe feala ai ki te kau faifakaliliu ke natou filifili ia he ʼu kupu ʼi tanatou lea ʼe alu tahi mo te ʼu kupu Fakapilitania.

Neʼe fua lelei ia te ʼu faiga fuli ʼaia. ʼE matou fakalotomalohiʼi koe ke ke vakavakaʼi ia te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano. ʼE feala ke ke maʼu hau Tohi-Tapu mai ia natou ʼae ʼe natou ta ia te nusipepa ʼaeni. ʼE feala ke ke toe fakatokagaʼi mo te ʼu agaaga kehekehe ʼaeni: te faigafua ʼo te lau ʼo te ʼu mataʼi tohi, pea mo te ʼu manatu fakanounou, ʼe feala ke ke iloʼi ai pe kotea ʼae ʼe palalau ki ai ia te tohi ʼaia pea ʼe toe tokoni atu ke ke maʼu vave ia he ʼu vaega. ʼE feala hau toe fakaʼaogaʼi fakatahi mo te kiʼi kaupepa Tokoni Ki Te Ako ʼo Te Folafola ʼa Te ʼAtua ʼe maʼu ai he ʼu mape pea mo te tahi ʼu fakamahino maʼuhiga. Kaʼe ko te faʼahi ʼae ʼe maʼuhiga, ʼi tau lau ia te Tohi-Tapu ʼe feala hau tui papau ʼe maʼu ai ia te ʼu folafola totonu ʼa te ʼAtua ʼae neʼe fakaliliu ʼi te lea ʼae ʼe palalauʼi ʼi te ʼaho fuli.