Ke feala ke maʼu he ʼu felogoʼi lelei e he ʼu kaumeʼa, ʼe tonu ke natou felogoʼi fakatahi. ʼO toe feia pe, ʼe fakaafe tatou e te ʼAtua ke tou palalau age kia te ia ke feala hatatou kaumeʼa mo ia. ʼE ina ui fenei: “E koutou kalaga mai anai kia au, pea e koutou olo anai; e koutou faikole mai anai kia au, pea e au fakalogo atu anai kia koutou.” (Selemia 29:12) Ka kotou palalau ki te ʼAtua, ʼe “kotou fakaoviovi [kia te ia] pea e fakaoviovi atu anai ia kia koutou.” (Sakopo 4:8) ʼE ui ʼi te Tohi-Tapu: “E ovi [Sehova] kia natou fuli ae e fetapa kia ia.” (Pesalemo 145:18) Ka lahi age tatatou faikole kia te ia pea ʼe toe malohi age anai tatatou fakakaumeʼa mo te ʼAtua.

Neʼe ui e Sesu: “Pe ko ai ia koutou e ina foaki anai he foi maka ki tona foha, moka ina kole age kia ia he moi pane? Pee, kapau e ina kole age he moi ika, pe e ina foaki age anai kia ia he gata? Koia kapau ko koutou . . . e kotou iloi te foaki o ni mea lelei ki akotou fanau, pe e mole toe lahi age te fia foaki e takotou Tamai i selo o ni mea lelei kia natou ae e kole age kia ia?” (Mateo 7:9-11) ʼEi, ʼe fakaafe kotou e te ʼAtua ke kotou faikole koteʼuhi “e tokaga ia kia koutou” pea ʼe fia tokoni kia koutou. (1 Petelo 5:7) ʼE ina toe fakaafe koutou ke kotou palalau age kia te ia ʼo ʼuhiga mo ʼokotou fihifihia. ʼE ui fenei ʼi te Tohi-Tapu: “Aua naa koutou tuania o uhiga mo he mea e tahi, kae koutou fakaha ki te Atua te u mea ae e aoga kia koutou aki ni kole, mo ni kolekole, pea mo ni fakafetai.”—Filipe 4:6.

Ko te kau poto sivi ʼo te ʼuluagaaga ʼo te tagata, neʼe natou tokagaʼi ko te toko lauʼi teau miliona hahaʼi ʼe natou logoʼi te ʼaoga ʼae ke natou faikole. ʼE toe kau ki te hahaʼi ʼaia ia natou ʼe mole tui ʼe ʼi ai he ʼAtua. * Koia, ʼe ha mai ai neʼe fakatupu te tagata mo te ʼaoga ʼae ke natou tauhi ki te ʼAtua. Neʼe ui fenei e Sesu: “E mole mauli anai te tagata ki te pane pe, kae ki te u folafola fuli ae e hau mai te gutu o te Atua.” (Mateo 4:4) Koia ʼae ʼe ʼaoga ai ke tou felogoʼi tuʼumaʼu mo te ʼAtua.

Kapau ʼe tou tali te fakaafe ʼa te ʼAtua ʼae ke tou faikole age kia te ia, kotea te ʼu lelei ka tou maʼu anai?