ʼE tuku anai pe koa e te ʼAtua ke haga te tagata ʼo puleʼi te tagata pea mo ina fakatuʼutamakiʼi ia te ka haʼu ʼo te malamanei? Kailoa, ohage ko tatatou vakaʼi, ʼe ina fakagata anai ia te maʼuli fakaʼofaʼofa mo te mamahi ʼae neʼe hoko talu mai ni ʼu lauʼi taʼu ʼe teau. Pea ko te Tupuʼaga ʼae neʼe ina fakatupu ia meʼa fuli ʼe loto ia ke kotou iloʼi kua ovi mai ia te temi ʼae ka ina fakahoko anai ia te faʼahi ʼaia. Kaʼe ʼe ina fakaha feafeaʼi mai ia te moʼoni maʼuhiga ʼaia?

Tou vakaʼi ia te faʼifaʼitaki ʼaeni: Ka kotou faifagona ʼi he motoka, ʼe lagi kotou vakaʼi muʼa ʼi te Neti ia te ʼu mape pea mo te ʼu ala ʼae ʼe tonu ke kotou olo ai. Pea ʼi takotou sisio ʼae ʼe kotou mulimuli lelei ki te ʼu mape lolotoga takotou faifagona, ʼe kotou lotofalala ai koteʼuhi kua kotou vave kaku ki te koga meʼa ʼae ʼe kotou olo ki ai. ʼO toe feia pe, ʼe foaki mai e te ʼAtua ia tana Folafola, ʼae ʼe fakamatala ai ia te ʼu aluʼaga fakamanavahe ʼo te malamanei. Pea ʼi tatatou sisio ki te kua hoko ʼo te ʼu fakaʼiloga ʼaia, ʼe tou tui papau ai kua tou nonofo nei ʼi te ʼu temi fakaʼosi.

ʼE fakamahino ʼi te Tohi-Tapu, ko te temi ʼaeni ʼe tou maʼuʼuli ai ʼe makehe, mo maʼuhiga pea ʼe iku anai ki te fakaʼosi. ʼE kau ki ai te ʼu aluʼaga fakamalamanei ʼe mole hona fakatatau ʼi te hisitolia ʼo te tagata. Tou fakatokagaʼi ʼihi aluʼaga ʼe talanoa ki ai ia te Folafola ʼa te ʼAtua.

1. TE ʼU MAUMAU FAKAMALAMANEI ʼI te lea fakapolofeta ʼae ʼe tuʼu ʼi te kapite 24 ʼo Mateo, ʼe talanoa ki he ʼu aluʼaga ʼe hoko ʼi te kele ʼe ina faʼufaʼu ia te ʼu koga kehekehe ʼo he fakaʼiloga. ʼE ko te fakaʼiloga ʼaia ʼo “te fakaosi o te malamanei” pea ʼe iku anai ki te temi ʼae ʼe “hau [ai] anai te fakaosi.” (Vaega 3, 14) Pea ʼe kau ki ai he ʼu tau lalahi, mo te hoge, mo te ʼu mafuike ʼi te potu kehekehe, mo te tuputupu ʼo te meʼa noaʼi ʼo te lao, mo te mole maʼu ʼo te ʼofa pea mo te ʼu faiga kakā ʼa te ʼu takitaki lotu ke natou fakahalaʼi te hahaʼi. (Vaega 6-26) ʼE moʼoni, neʼe kua hoko ia te ʼu aluʼaga ʼaia talu mai taʼu ʼe lauʼi teau. Kaʼe ʼi te kua ovi mai ʼo te fakaʼosi, ko te ʼu aluʼaga ʼaia ʼe hoko nei ʼi totatou temi. Pea ʼe hoa atu anai ki ai ia te ʼu fakaʼiloga ʼaeni ʼe tolu.

2. TE FAʼAHIGA AGA ʼA TE HAHAʼI ʼE ui ʼi te Tohi-Tapu ko “te u aho fakamuli,” ia te temi ʼae ʼe tou maʼuʼuli ai, ʼe ʼasilisili kovi ai ia te aga ʼa te hahaʼi. ʼE tou lau fenei: “E liliu anai te u tagata o tahi ofa pe kia ia, o kaumea mo te paaga, o fiatuu, o lotolahi, o fasituu, o talagataa ki te u matua, o manavatemonio, o hee lotu, o hee ofa, o loto fefeka, o laukovi, o holi-kovi, o kanivao, o fehia ki te lelei, o kaka, o loto oho, o fiamealahi, o ofa ki te u fiafia fakamalama o lahi age i te Atua.” (2 Timoteo 3:1-4) ʼE moʼoni, ko te mole fefakaʼapaʼapaʼaki ʼa te hahaʼi ʼe mole ko he aluʼaga foʼou. Kaʼe ʼe toe kovi age ia te aga ʼaia ʼi “te u aho fakamuli,” pea koia ʼae ʼe feala ai ke fakahigoa ia te temi ʼaia ʼae ʼe tou maʼuʼuli ai ko “he u temi faigataa.” Neʼe kua kotou tokagaʼi koa ia te ʼasilisili fakalialia ʼo te aga ʼa te hahaʼi?

3. ʼE LOLOTOGA MAUMAUʼI NEI TE KELE ʼE ui ʼi te Tohi-Tapu ʼe ‘maumauʼi anai e te ʼAtua ia natou ʼae ʼe natou maumauʼi ia te kele.’ (Apokalipisi 11:18) ʼE maumauʼi feafeaʼi e te hahaʼi ia te kele? ʼI te temi ʼo Noe, “nee fakalialia te kele ia mua o te Atua, pea nee fonu te kele i te agamalohi. Nee sio leva te Atua ki te kele, pea koeni, kua kovi osi ia.” Koia ʼae neʼe ui fenei ai e te ʼAtua ʼo ʼuhiga mo te hahaʼi agafakakaka ʼaia: “E au maumaui anai te u tagata.” (Senesi 6:11-13) ʼE mole kotou sisio koa ki te kua ʼasilisili fonu ʼo te kele ʼi te agamalohi? Pea tahi, kua kaku mai ia te tagata ki te temi makehe ʼo te hisitolia: ʼE natou lava maumauʼi ia te kele ʼaki tanatou pulihi te hahaʼi fuli. ʼE natou maʼu ia te ʼu mahafu tau moʼo fakahoko ia te faʼahi ʼaia. Pea ko te kele ʼe lolotoga maumauʼi nei ʼi hona tahi age aluʼaga. ʼUhi ko te mole tokaga lelei ʼa te tagata ki te kele, kua ʼasilisili kovi ia te ʼu faʼahi ʼae ʼe ʼaoga ki totatou maʼuli. Ohage la ko te ʼaele ʼae ʼe tou manavā ki ai, mo te ʼu manu, mo te ʼulu ʼakau kehekehe pea mo te ʼu moana.

 Kotou fakakaukauʼi age muʼa, ‘ ʼI te ʼu taʼu pe ʼaeni ʼe teau tupu kua hili, neʼe feala koa ki te tagata ke ina pulihi katoa ia te kele?’ Kailoa. Kaʼe ʼi te temi nei kua fealagia ki te tagata ʼaki tana faʼu ia he ʼu mahafu tau ʼe malohi ʼaupito pea mo maumauʼi ia te ʼulufenua. ʼAki te lakalaka ki muʼa ʼo te tekenolosia, ʼe hage mai ʼe feala ki te tagata ke ina iloʼi peʼe ke ina puleʼi te ʼu fua kovi ʼo ʼana gaue. Kaʼe ʼe mole ʼa te tagata ia te filifili peʼe ina puleʼi te ka haʼu ʼo te kele. Ko te ʼAtua ʼe ina pulihi anai ia natou ʼae ʼe natou maumauʼi te kele, ʼi muʼa ʼo tanatou pulihi katoa ia te maʼuli ʼi te kele. ʼE ko tana fakapapau ʼaia.

4. TE GAUE FAIFAKAMAFOLA ʼI TE MALAMANEI Neʼe fakakikite fenei e te tahi koga ʼo te fakaʼiloga ʼo te fakaʼosi ia te gaue ʼe mole hona fakatatau ʼe lolotoga hoko nei: “E fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli. Pea e hau anai te fakaosi.” (Mateo 24:14) Talu mai ni taʼu ʼe lauʼi teau, ko te gaue faifakamafola ʼaia, ʼe kehekehe pe ia mo te ʼu faifakamafola ʼo te tahi ʼu lotu. ʼI te ʼu ʼaho fakamuli, ʼe fakamaʼuhigaʼi ai ia te logo ʼaeni: “Te logo lelei . . . o te puleaga.” ʼE kotou iloʼi koa he ʼu kautahi fakalotu ʼe natou fakamaʼuhigaʼi ia te logo ʼaia? Tatau aipe pe ʼe fakamafola e ʼihi ia he logo feia, kaʼe ʼe natou faifakamafola koa ʼi te potu pe ʼae ʼe natou maʼuʼuli ai peʼe ki “te malamanei katoa, ke fakamooni ki te u puleaga fuli”?

ʼE toe fakamaʼuhigaʼi ʼi tatatou tuʼasila ʼi te Neti www.jw.org, ia ‘te logo lelei ʼo te puleʼaga.’ Pea ʼe maʼu ʼi te tuʼasila ʼaia ia te ʼu tohi ʼe ina fakamahino ia te logo ʼaia ia lea ʼe 700 tupu. ʼE kotou iloʼi koa he tahi age fakatuʼutuʼu ʼe ina fakamaʼuhigaʼi te logo ʼo te Puleʼaga ʼi te malamanei katoa? Fualoa ʼi muʼa ʼo te maʼu ʼo tatatou tuʼasila ʼi te Neti, neʼe kua iloa te kau Fakamoʼoni ʼa Sehova ʼuhi ko tanatou fakamafola te logo lelei ʼo te Puleʼaga ʼo Te ʼAtua. Talu mai te taʼu 1939, ʼe tuʼu ʼi te takafi ʼo te nusipepa Te Tule Leʼo ia te ʼu kupu ʼaeni “ ʼE Ina Kalagaʼi Te Puleʼaga ʼo Sehova.” ʼE ui ʼi te tohi ʼo ʼuhiga mo te ʼu lotu, ko te gaue faifakamafola ʼa te kau Fakamoʼoni ʼa Sehova ʼe ‘mole hona fakatatau ʼi te ʼu faʼahi fuli.’ ʼE fakaha lelei ʼi te faifakamafola ʼaia ia te maʼuhiga ʼo te logo lelei ʼae kua vave hoko mai “te fakaosi” ʼaki te gaue ʼa te Puleʼaga ʼo Te ʼAtua.

Neʼe kotou fakatokagaʼi koa ʼi tokotou maʼuli ia te ʼu fakaʼiloga Fakatohi-tapu ʼe fa ʼae ʼe fakamatala ʼi te alatike ʼaeni? Lolotoga ni taʼu ʼe teau tupu, neʼe maʼu e ʼana kau lautohi he ʼu logo ʼo ʼuhiga mo te ʼu aluʼaga ʼae ʼe hoko ʼi te malamanei pea neʼe tokoni kia natou ke natou vakavakaʼi pe ʼe kua ovi mai te fakaʼosi. Kaʼe  ʼe ui e te hahaʼi lotolotolua ʼe ko te ʼu loi te ʼu manatu ʼaia. Kia natou, ʼi te lahi ʼo te ʼu logo fakamalamanei ʼae ʼe tou maʼu, koia ʼae ʼe hage ai kua ʼasilisili kovi ai ia te ʼu aluʼaga fakamalamanei. Kaʼe ʼe ʼi ai te ʼu fakamoʼoni ʼe ha ai ʼe tou maʼuʼuli nei ʼi te ʼu ʼaho fakamuli. Pea ʼe ko he temi makehe ʼaia ʼi te hisitolia ʼo te tagata.

Ko ʼihi hahaʼi popoto ʼe natou ui kua vave hoko mai pe ia te ʼu fetogi lalahi ki te kele. ʼI te taʼu 2014, neʼe ui fenei e ʼihi kau popoto ʼo ʼuhiga mo he ʼu aluʼaga fakamataku ʼe feala ke iku ki te pulihi ʼo te malamanei katoa: “ ʼE feala ke tou ui ʼaki te sivi fakalelei ʼo te ʼu aluʼaga fakamataku ʼaia, ko te tuʼutamaki fakanukeleʼea ʼe feala ke hoko moʼoni.” Tokolahi ʼe natou tui papau kua tou kaku mai ki te temi maʼuhiga ʼi te hisitolia ʼo te malamanei. Ko natou ʼae neʼe natou ta ia te nusipepa ʼaeni pea mo ʼana kau lautohi, ʼe natou tui papau ko te temi makehe ʼaeni, ʼe ko te ʼu ʼaho fakamuli pea kua tau ovi mai pe ia te fakaʼosi. Kaʼe ʼaua takotou tuʼania ki te ka haʼu, koteʼuhi ʼe feala hakotou fiafia ki tona ikuʼaga. Kotea tona tupuʼaga? Koteʼuhi ʼe feala hakotou hao ʼi te fakaʼosi.