ʼE Kotou Falala Anai Koa Ki Te ʼAtua?

KOTOU fakakaukauʼi age ʼe ʼi ai hokotou kaumeʼa ʼe kotou fakamaʼuhigaʼi, kaʼe neʼe ina fakahoko ia he faʼahi ʼe faigataʼa takotou mahino ki ai. ʼE laukoviʼi pea mo fakamauʼi ʼana gaue e ʼihi, ʼo natou ui ko he tahi ʼe agakovi. ʼE kotou manatu tahi anai koa mo natou, peʼe kotou fakaʼatalitali muʼa ke fai atu e tokotou kaumeʼa ia he ʼu fakamahino? Kapau ʼe mole feala ke ina fakamahino atu ia te faʼahi ʼaia koteʼuhi heʼe puli, ʼe kotou loto fakaatalitali anai koa pea mo taupau ia takotou falala ʼae ki ai?

ʼI muʼa ʼo takotou tali, ʼe kotou fia mahino lahi anai. ʼE tonu ke kotou fai ia te fehuʼi ʼaeni: “ ʼE au iloʼi lelei koa toku kaumeʼa, pea he ko ʼe koa ʼe au fakamaʼuhigaʼi ia ia?” ʼE mole koa la ko ia ʼaia? Kaʼe kotou fakakaukauʼi age muʼa: ʼE mole koa la tonu ke tou fai ia te ʼu fehuʼi ʼaia ʼo ʼuhiga mo te ʼAtua?

ʼE lagi mata faigataʼa kia tatou ʼihi gaue neʼe fakahoko e te ʼAtua, peʼe lagi mole tou mahino peʼe ko ʼe ʼe ina fakagafua ke hoko ʼihi aluʼaga. Tokolahi ʼe natou ui anai ʼe agakovi ia te ʼAtua pea ʼe ina uga kotou ke kotou maʼu tanatou faʼahiga manatu. ʼE kotou haga falala anai koa ki ai? ʼE fakalogo takotou tali ki takotou iloʼi lelei ia te ʼAtua. Kotou fai ia te fehuʼi ʼaeni: “Neʼe tokoni feafeaʼi mai te ʼAtua kia au?”

Kapau neʼe faigataʼa totatou maʼuli, ʼe feala ke tou manatu neʼe mole kaumeʼa ia te ʼAtua mo tatou. Kaʼe kotou fakakaukauʼi age muʼa. Ko te ʼAtua koa ia te tupuʼaga ʼo ʼotatou mamahi peʼe ko ʼotatou tapuakina? Ohage ko tatatou vakaʼi, ʼe tupu ʼuhi ko Satana ia “te pule o te malama aeni,” kaʼe mole ʼuhi ko Sehova. (Soane 12:31) Neʼe ko Satana ʼae neʼe tupu mai ai te ʼu malaʼia pea mo te heʼe faitotonu ʼi te malamanei. Pea ko te tahi ʼu tupuʼaga ʼe lua ʼe tou mamahi ai, ʼuhi ko totatou ʼuhiga agahala peʼe ʼuhi ko te ʼu aluʼaga ʼae ʼe hoko fakafokifa.

Kaʼe kotea ʼae neʼe fai e te ʼAtua? ʼE ui fenei ʼi te Tohi-Tapu ko te ʼAtua “ae nee ina fai te atu lagi mo te kele,” pea mo totatou sino ʼe “matalelei aupito.” Pea ʼe ina toe ui ko Sehova ʼae ʼe nofo mo totatou maʼuli. (Pesalemo 124:8; 139:14; Taniela 5:23) Kotea tona fakaʼuhiga?

Ko tona fakaʼuhiga ʼe fakalogo totatou maʼuli ki totatou Tupuʼaga. (Gaue 17:28) Ko tona fakaʼuhiga ko te meʼa ʼofa ʼae ko te maʼuli, te malama ʼae ʼe tou maʼuʼuli ai, te fiafia ʼi te ʼofa pea mo te fakakaumeʼa, pea mo ʼihi atu fealagia ke tou leleiʼia te maʼuli, ko te ʼu meʼa ʼofa fuli mai te ʼAtua. (Sakopo 1:17) ʼE mole koa la kotou fakamoʼoni ʼaki te ʼu tapuakina ʼaeni, ʼe ko totatou kaumeʼa ia te ʼAtua, ʼe tuha ke ʼofainaʼi pea mo tou falala ki ai?

ʼE lagi faigataʼa anai hakotou falala ki te ʼAtua. ʼE lagi kotou ui anai ʼe mole kotou iloʼi lelei ia ia ke tupu ai hakotou falala ki ai. ʼE mole fai he fakaaga ki te faʼahi ʼaia. ʼI te ʼu alatike ʼaeni, ʼe mole feala ke tou palalau ki te ʼu tupuʼaga fuli ʼe feala ke ui ai e te hahaʼi ʼe agakovi ia te ʼAtua. Kaʼe, ʼe mole koa la lelei ke tou fakahoko he ʼu faiga ke tou iloʼi lelei ia te ʼAtua? * ʼE matou iloʼi ʼe kotou ako anai ke kotou iloʼi ia te moʼoni ʼo ʼuhiga mo te ʼAtua. ʼE agakovi koa? Kailoa ia: “E ofa te Atua.”—1 Soane 4:8.

[Nota]

[Paki ʼo te pasina 7]

Ko te ʼAtua koa ia te tupuʼaga ʼo ʼotatou mamahi peʼe ko ʼotatou tapuakina?