ʼE takitahi ia natou ʼo totatou famili mo tona higoa. Maʼia mo te ʼu manu ʼe ʼi ai ʼonatou higoa. Kaʼe feafeaʼi te ʼAtua? ʼE mole tonu koa la ke toe ʼi ai mo hona huafa? ʼI te Tohi-Tapu, ʼe maʼu e te ʼAtua ʼona higoa fakatuʼulaga, ohage la ko ʼAtua Mafimafi, Tuʼi ʼAliki, pea mo Tupuʼaga, kaʼe toe ʼi ai foki mo tona huafa totonu.—Lau ia Esaia 42:8.

ʼE lahi te ʼu fakaliliu ʼo te Tohi-Tapu ʼe maʼu ai ʼi te Pesalemo 83:18 ia te huafa totonu ʼo te ʼAtua. Ohage la, ʼi te Tohi-Tapu Les Saintes Écritures — Traduction du monde nouveau ʼe ui ai: “Ke natou iloʼi ko koe, ʼae ko tou huafa ko Sehova, ko koe tokotahi pe, te Maʼoluga ʼAupito ʼi te kele katoa.”

ʼE loto e te ʼAtua ke tou fakaʼaogaʼi tona huafa. ʼE tou toʼo te ʼu higoa totonu ʼo natou ʼae ʼe tou ʼoʼofa ai, ohage la ko ʼotatou kaumeʼa lelei, tafitō la moka ʼe natou loto ke tou toʼo age tonatou higoa. Kaʼe tonu koa ke kehe age ia mo te ʼAtua ʼi te temi ʼae ʼe tou felogoi ai mo ia? Pea tahi, neʼe fakalotomalohiʼi tatou e Sesu Kilisito ke tou fakaʼaogaʼi te huafa ʼo te ʼAtua.—Lau ia Mateo 6:9; Soane 17:26.

Ke tou felogoi lelei mo te ʼAtua, ʼe mole gata ʼaki pe tatatou iloʼi tona huafa, kaʼe toe ʼaoga foki ke tou mahino ki tona ʼuhiga ʼAtua. Ohage la, ʼe feafeaʼi te ʼulugaaga ʼo te ʼAtua? ʼE feala moʼoni koa ke tou fakaovi ki te ʼAtua? ʼE feala hakotou maʼu te ʼu tali ʼo te ʼu fehuʼi ʼaia ʼi te Tohi-Tapu.