Te Tokalelei Iā Taʼu e Afe ʼo Talu Ai!
Te Tokalelei Iā Taʼu e Afe ʼo Talu Ai!
“Ke katoa [peʼe ke ʼafio kātoa] te Atua i te u mea fuli.”—1 KO. 15:28.
ʼE FEALA KOA HAKOTOU FAKAMAHINO?
Koteā tona fakaʼuhiga kiā koutou mokā hoko te ʼu lea fakapolofetā ʼaē ʼe tuʼu ʼi te ʼu vaega ʼaenī?
1. Koteā te ʼu meʼa fakafiafia ʼaē kā maʼu anai e te “hahai kaugamalie osi” peʼe ko te toe hahaʼi tokolahi?
KOTOU fakakaukauʼi age muʼa te ʼu lelei fuli ʼe feala ke fakahoko maʼa te hahaʼi e he puleʼaga mālohi, ʼe takitaki e he pule agalelei mo faitotonu lolotoga taʼu e afe. Ko te “hahai kaugamalie osi,” peʼe ko te toe hahaʼi tokolahi, ʼe natou fiafia anai ʼi te ʼu lelei ʼaia. Ko nātou ʼaia, ʼe natou hao anai mai “te mamahi lahi,” ʼaē kā fakaʼauha kātoa ai anai te tuʼu ʼo te ʼu faʼahiga meʼa kovi ʼaenī.—Apk. 7:9, 14.
2. Neʼe feafeaʼi te maʼuli ʼo te tagata lolotoga te ʼu taʼu ʼaenī e 6 000 kua hili?
2 Lolotoga te ʼu taʼu ʼaenī e 6 000 kua hili, neʼe faigaʼi pē e te tagata ke ina takitaki ia ia totonu. ʼO tupu mai ai te lotomamahi pea mo te maʼuli mamahi ʼo te mālamanei. Talu mai fualoa, neʼe ʼui fēnei ʼi te Tohi-Tapu: “E pule . . . te tagata ki te tagata ke fakamamahii ia ia.” (Ekl. 8:9) Koteā ʼaē ʼe lolotoga hoko ʼi te temi nei? Te ʼu tau pea mo te agatuʼu. ʼE toe ʼi ai ʼihi fihifihia ohagē ko te maʼuli masiva, te mahaki, te maumauʼi ʼo te ʼulu fenua, te fetogi ʼo te agaaga ʼo te kele, pea mo ʼihi atu. Neʼe kua fakatokaga e te ʼu puleʼaga, kapau ʼe mole tou fai he ʼu fetogi lalahi pea mo fakagata te maumauʼi ʼo te kele, ʼe fua kovi anai.
3. Koteā ʼaē kā hoko anai lolotoga te ʼAfio Iā Taʼu e Afe?
3 ʼAki te takitaki ʼa Sesu, te Hau Mesianike ʼa te ʼAtua, pea mo te toko 144 000 ʼaē kā pule mo ia, ko te Puleʼaga ʼo te ʼAtua ʼe ina molehi anai te ʼu meʼa ʼaē ʼe kovi neʼe fai ki te hahaʼi pea mo te kele. Lolotoga te ʼAfio Iā Taʼu e Afe, ʼe hoko moʼoni anai te fakapapau fakafiafia ʼaenī ʼa Sehova ʼAtua: “E au fakatupu anai he lagi foou e mole toe manatu anai ki te u mea kua hili; e mole natou toe manatu anai ki ai.” (Esa. 65:17) Koteā te ʼu ʼaluʼaga taulekaleka ʼe hoko anai ʼi te kā haʼu? ʼAki te lea fakapolofetā Fakatohi-tapu, ʼe feala ke tou mahino ai pe koteā te ʼu ʼaluʼaga fakaofoofo ʼaia, logolā “e mole sio ki ai te u mata,” peʼe mole heʼeki hoko.—2 Ko. 4:18.
ʼE NATOU FAKATUʼU ANAI NI FALE PEA MO TŌ ANAI NI GĀUEʼAGA VITE
4. ʼE māʼuʼuli ʼifea te hahaʼi tokolahi iā ʼaho nei?
4 ʼE tou fia maʼu fuli hotatou ʼapi, ʼe feala ke tou māʼuʼuli fīmālie ai mo totatou fāmili. Kae ʼi te mālama ʼaenī, ʼe faigataʼa he maʼu ʼo he nofoʼaga. Tokolahi te hahaʼi ʼe natou ʼolo ʼo fakapupu ʼi he kolo ʼe kua hahaʼi ʼaupitō. ʼE lagi natou māʼuʼuli ʼi he ʼu kolo masiva, peʼe ko he ʼu falefata ʼāfea mo ʼuli. ʼE natou fakaʼamuʼamu pē ke natou maʼu honatou ʼapi.
5, 6. (1) ʼE hoko moʼoni feafeaʼi anai ia Esaia 65:21 pea mo Mikea 4:4? (2) ʼE tou lava maʼu feafeaʼi anai te ʼu tapuakina ʼaia?
5 ʼI te temi ʼaē ʼe takitaki anai e te Puleʼaga te kele, ʼe tahi maʼu anai e te hahaʼi tona ʼapi. Neʼe fakakikite fēnei e Esaia: “E natou fakatuu anai ni fale, pea e natou nonofo anai i ai; e natou to anai ni gaueaga vite, pea e natou kai anai onatou fua.” (Esa. 65:21) Kae ʼe mole gata ʼaki pē anai te maʼu ʼo honatou ʼapi. Iā ʼaho nei, ko ʼihi ʼe ʼi ai tonatou ʼapi pea ʼe maʼu pē lā e ʼihi tonatou fuaʼi ʼapi. Kae ʼe natou tuʼania naʼa mole natou lava taupau ʼonatou ʼapi. Peʼe natou tuʼania naʼa kaihaʼa ʼonatou loto fale. ʼI te temi ʼaē kā takitaki anai te Puleʼaga ʼo te ʼAtua, ʼe mole tuʼania anai he tahi ki he meʼa. Neʼe tohi fēnei e te polofetā ko Mikea: “E natou nonofo anai te tagata i lalo o tona fuu vite mo tona fuu fiki, pea e mole toe fakamamahii anai natou e he tahi.”—Mik. 4:4.
6 Koteā ʼaē ʼe tonu ke tou fai mo kapau ʼe tou fia maʼuli ʼi te takitaki ʼo te Puleʼaga? ʼE mahino ia, ʼe ʼaoga kiā tātou fuli ke tou maʼu hotatou nofoʼaga. Kae ʼe mole tonu ke tou faigaʼi ʼi te temi ʼaenī ke tou maʼu te fale ʼaē ʼe tou fakaʼamuʼamu kiai pea ke lahi ai totatou toʼo maʼua kiai. ʼE tou fakapotopoto anai mo kapau ʼe tou fakahā ʼi totatou maʼuli ʼe tou tokaga tāfito ki te ʼu fakapapau ʼa Sehova. Neʼe ʼui fēnei e Sesu ʼo ʼuhiga mo ia totonu: “E mau e te u lenato ni nofoaga i te kele, pea e mau e te u manulele o te lagi ni fatai, kae e mole mau e te Foha o te tagata he kogamea e feala ai tana fakamalolo tona ulu.” (Luka 9:58) Neʼe feala pē kiā Sesu ke ina laga peʼe ke ina totogi ia he ʼapi ʼe mole feala ke maʼu e he tahi age. He koʼē neʼe mole ina fai te faʼahi ʼaia? Neʼe mole tuku e Sesu he meʼa ke ina tāʼofi ia ia mai tana fakamuʼamuʼa te Puleʼaga ʼi tona maʼuli. ʼE feala koa ke tou mulimuli ki tana faifaitaki ʼo mole tou tuku te ʼu koloa ke liliu ʼo maʼuhiga age ʼi totatou maʼuli pea mo fakatupu hoha ai kiā tātou?—Mat. 6:33, 34.
ʼE MĀʼUʼULI FAKATAHI ANAI TE TAGATA MO TE ʼU MANU ʼI TE TOKALELEI
7. Koteā ʼaē neʼe fakatotonu e Sehova ʼo ʼuhiga mo te ʼu felōgoi ʼa te tagata mo te ʼu manu?
7 Neʼe fakaʼosi e Sehova tana fakatupu te ʼu meʼa ʼi te kele ʼaki tana fakatupu te tagata. Neʼe ina fakahā ia te tupuʼaga ʼo tana fakatupu te tagata ki tana Tufuga Faiva, ia Sesu, ʼo ina ʼui fēnei: “Ke [tā] fakatupu te tagata o fakatatau kia [tāua], pea ke pule ia ia ki te u ika o te tai, mo te u manulele o te lagi, mo te u manu lalata, pea mo te u manu totolo o te kele.” (Sen. 1:26) Koia neʼe fakatotonu e te ʼAtua kiā Atama mo Eva ke nā tōkakaga pea mo puleʼi te ʼu manu. Pea neʼe tonu leva ki muli age ke puleʼi e te tagata fuapē te ʼu manu.
8. ʼE feafeaʼi te agaaga ʼo te ʼu manu iā ʼaho nei?
8 ʼE feala koa ke pule te tagata ki te ʼu manu fuli pea mo māʼuʼuli fakatahi ʼi te tokalelei? Tokolahi ʼe ʼoʼofa ʼi ʼanatou manu lalata, ohagē lā ko te ʼu kulī pea mo te ʼu pusi. Kae ʼe feafeaʼi ʼo ʼuhiga mo te ʼu manu fekai? ʼE tou ʼiloʼi ko te ʼu manu ʼe mātataku pea mo ʼiʼita mo kapau ʼe gaohi koviʼi. Kae neʼe sivisivi e te kau poto lalahi te maʼuli ʼo te ʼu manu fekai, ʼo natou tokagaʼi ai ʼe natou toe maʼu ia te fiafia mo te ʼofa. Neʼe natou ʼui ko te ʼu manu mokā natou tauhi ʼonatou kiʼi ʼuhi, ʼe natou fakahā ai ia he ʼofa lahi.
9. ʼE feafeaʼi anai te ʼu manu ʼi te kā haʼu?
9 Koia ʼe mole tonu ke tou punamaʼuli mokā ʼe ʼui ʼi te Tohi-Tapu ʼe maʼuli fakatahi anai te tagata mo te ʼu manu ʼi te tokalelei. (Lau ia Esaia 11:6-9; 65:25.) Koteā tona tupuʼaga? Kotou manatuʼi te temi ʼaē neʼe hū ai ki tuʼa ia Noe pea mo tona fāmili ʼi te ʼaleka, ʼi te hili ʼo te Tulivio, neʼe ʼui fēnei Sehova kiā nātou: “E matataku anai te u manu fuli o te kele kia koutou.” ʼI te temi nei, ʼe lahi te ʼu manu ʼe feholaki ke natou hao mai te tagata. (Sen. 9:2, 3) Kae ʼe feala kiā Sehova ke ina pulihi te ʼu taʼi mataku ʼaia, ke toe liliu te ʼu felōgoi ʼa te tagata mo te ʼu manu ohagē ko tana fakatotonu ʼi te kamata. (Oseo 2:20) ʼE ko he temi fiafia maʼa te hahaʼi fuli ʼaē kā māʼuʼuli anai ʼi te kele!
“E INA HOLOHOLOI ANAI TE U LOIMATA FULI”
10. He koʼē ʼe fetāgihi te hahaʼi?
10 Neʼe sio Salomone ki te ʼu meʼa ʼe kovi neʼe hoko ʼi te kele pea mo te ʼu hahaʼi ʼaē neʼe mole honatou tokoni. Koia ʼaki he loto fakaʼofaʼofa, neʼe ina ʼui fēnei: “Koeni, kua taomia te hahai, mo fetagihi, pea e mole he tahi ke ina fakapelepelei natou.” (Ekl. 4:1) ʼE toe fēia pē iā ʼaho nei, peʼe kovi age lā ia. Ko ai iā tātou heʼeki tagi? ʼI ʼihi temi ʼe tou fetāgihi heʼe tou fiafia. Kae ʼi te agamāhani, ʼe tou fetāgihi heʼe tou lotomamahi.
11. Ko te fakamatala fea ʼi te Tohi-Tapu ʼaē ʼe malave tāfito ki tokotou loto?
11 Kotou fakakaukauʼi te ʼu fakamatala ʼi te Tohi-Tapu ʼo ʼuhiga mo te ʼu hahaʼi neʼe fetāgihi. ʼI te temi ʼaē neʼe mate ai ia Sala ʼi tona taʼu 127, “nee fai leva e Apalahamo te putu o Sala, pea nee tagi leva ia ia kia ia.” (Sen. 23:1, 2) ʼI te temi ʼaē neʼe tauʼinē ai Naomi pea mo ʼana taʼahine, “nee hiki leva ki oluga ona leo,” pea neʼe nā toe “hiki ake leva ki oluga ona leo, o na toe fetagihi leo lahi.” (Lute 1:9, 14) ʼI te temi ʼaē neʼe mahaki kovi pea mo meihiʼi mate ai te Hau ko Esekiasi, neʼe faikole ki te ʼAtua pea “nee tagi mamahi leva ia.” Neʼe sio ia Sehova ki ʼona loʼimata pea neʼe ina fakamālōlō ia ia. (2 Hau 20:1-5) Pea ʼe tou lotomamahi fuli ʼi te temi ʼaē neʼe fakafisi ai Petelo kiā Sesu. ʼI tana logo ʼaē ki te ʼuʼua ʼo te moa, neʼe “ulu leva ia ia ki fafo, o tagi mamahi.”—Mat. 26:75.
12. ʼE fakafīmālie feafeaʼi anai ia te mālamanei ʼi te ʼAfio Iā Taʼu e Afe?
12 Mai tona ʼaluʼaga ʼaē ʼe lahi te ʼu meʼa fakaʼofaʼofa ʼe hoko ki te hahaʼi, ʼe ʼaoga kiā nātou he fakalotofīmālie pea mo he tokoni. Lolotoga te ʼAfio ʼa Kilisito Iā Taʼu e Afe, ko te ʼAtua “e ina holoholoi anai te u loimata fuli mai onatou mata, pea e mole toe mau anai te mate: e mole toe mau anai he tagi, mo he lauga, mo he mamahi.” (Apk. 21:4) ʼE tou fiafia ʼi tatatou manatu ʼaē ʼe mole toe ʼi ai anai te lotomamahi pea mo te maʼuli mamahi. ʼE toe lahi age tatatou fiafia ʼi te fakapapau ʼa te ʼAtua ke ina pulihi te mate. ʼE hoko feafeaʼi anai te ʼu ʼaluʼaga ʼaia?
ʼE FAKATUʼUAKE ANAI IA “NATOU FULI E NONOFO I TE U TANUMA”
13. Talu mai te agahala ʼo Atama, neʼe mamahi feafeaʼi te tagata ʼuhi ko te mate?
13 Talu te agahala ʼo Atama, mo te pule ʼo te mate ki te hahaʼi fuli ohagē ko he hau. ʼE mole he tahi neʼe lava mālo ʼi te fili ʼaia. ʼE mole he tagata agahala ʼe feala ke hao mai ai, pea ʼe ina fakatupu he lotomamahi lahi. (Loma 5:12, 14) Ko te toko lauʼi miliona hahaʼi ʼe mātataku ʼi te mate, koia ʼe natou “popula i te mataku ki te mate, i tonatou mauli katoa.”—Hep. 2:15.
14. Koteā ʼaē kā hoko anai ʼi te temi ʼaē ʼe mole toe ʼi ai anai te mate?
14 ʼE talanoa ʼi te Tohi-Tapu ki te temi ʼaē kā “maumaui anai, . . . te mate,” peʼe mole toe ʼi ai anai. (1 Ko. 15:26) ʼE fua lelei anai te fakapapau ʼaia kiā kūtuga e lua. Ko te “hahai kaugamalie osi,” peʼe ko te toe hahaʼi tokolahi ʼa Sehova ʼaē ʼe māʼuʼuli ʼi te temi ʼaenī, ʼe feala anai ke natou fakalaka maʼuli ki te mālama foʼou. Pea ʼe fakafealagia anai kiā nātou ke natou māʼuʼuli ʼo heʼegata. ʼE toe fakafealagia anai ki te toko lauʼi miliale hahaʼi kua mamate ke toe fakatuʼuake. ʼE kotou lava fakakaukauʼi age muʼa te fiafia ʼaē kā maʼu anai e te toe hahaʼi tokolahi, ʼi tanatou fakatalitali ia nātou ʼaē kā fakatuʼuake? Kapau ʼe tou lau fakalelei te ʼu fakamatala Fakatohi-tapu ʼo ʼuhiga mo nātou ʼaē neʼe fakatuʼuake, ʼe tou mahino ai pe feafeaʼi anai te fakatuʼuake ʼi te kā haʼu.—Lau ia Maleko 5:38-42; Luka 7:11-17.
15. Koteā ʼaē ʼe kotou logoʼi mo kapau neʼe kotou sio ki te fakatuʼuake ʼo he tahi neʼe kotou ʼofa mamahi ai?
15 Kotou fakakaukauʼi age muʼa te ʼu palalau ʼaenī: “Nee natou ofolele aupito” pea “nee natou fakakololia leva ki te Atua.” Kapau neʼe kotou sio mata ki te ʼu fakatuʼuake ʼaia, neʼe lagi kotou toe logoʼi mo koutou te ʼu faʼahi ʼaia. ʼE tou fiafia lahi anai ʼi te sio ki te fakatuʼuake ʼo nātou ʼaē neʼe tou ʼofa mamahi ai. ʼE ko he ʼaluʼaga fakaofoofo anai ia! Neʼe ʼui fēnei e Sesu: “E hau te hola ae e logo ai anai natou fuli e nonofo i te u tanuma ki tona leo, pea e natou feulufi anai ki tua.” (Soa. 5:28, 29) Neʼe mole he tahi iā tātou neʼe heʼeki sio ki he ʼaluʼaga fēia. Pea ʼe kau ia ki te ʼu ʼaluʼaga maʼuhiga ʼaē “e mole sio ki ai te u mata,” peʼe heʼeki tou sio kiai.
ʼE ʼAFIO KĀTOA ANAI TE ʼATUA ʼI TE ʼU MEʼA FULI
16. (1) He koʼē koa ʼe tonu ke tou palalau fakafiafia ʼo ʼuhiga mo te ʼu tapuakina ʼaē ʼi te kā haʼu? (2) Koteā ʼaē neʼe ʼui e Paulo moʼo fakalotomālohi te kau Kilisitiano ʼo Kolinito?
16 Ko nātou ʼaē ʼe nofo agatonu kiā Sehova ʼi te ʼu temi faigataʼa ʼaenī, ʼe natou maʼu he ʼamanaki taulekaleka! Logolā heʼeki tou maʼu te ʼu tapuakina ʼaē ʼi te kā haʼu, kae ʼe ʼaoga ke tou fakakaukau kiai. ʼE tokoni mai anai ke tou tokaga tāfito ki te ʼu meʼa ʼaē ʼe maʼuhiga moʼoni. Koia ʼe tou haga tauhi anai kiā Sehova pea mo faiga ke ʼaua naʼa tou tuku te ʼu koloa ʼo te mālama ke ina fakaleluʼi tātou. (Luka 21:34; 1 Tim. 6:17-19) Tou palalau fakafiafia ʼo ʼuhiga mo totatou ʼamanaki ki te kā haʼu, ʼi te ako fakafāmili, ʼi tatatou fai palalau mo ʼotatou tehina mo tuagaʼane, mo ʼatatou kau ako Tohi-Tapu pea mo te hahaʼi ʼaē ʼe fia logo ki te logo lelei. Ko te fai ʼo te faʼahi ʼaia ʼe ina taupau anai ke mālohi tatatou ʼamanaki. Neʼe toe fēia te fakalotomālohi ʼaē neʼe fai e te ʼapositolo ko Paulo ki ʼona tehina Kilisitiano. ʼAki ʼana palalau neʼe tokoni kiā nātou ke natou fakakaukauʼi te ʼu ʼaluʼaga ʼaē kā hoko anai ʼi te fakaʼosi ʼo te ʼAfio ʼa Kilisito Iā Taʼu e Afe. Kotou faigaʼi ke kotou mahino ki te fakaʼuhiga kātoa ʼo te ʼu palalau ʼa Paulo iā 1 Kolinito 15:24, 25, 28.—Lau.
17, 18. (1) Neʼe feafeaʼi te ʼafio kātoa ʼa “te Atua i te u mea fuli” ʼi te kamata ʼo te hisitolia ʼa te tagata? (2) Koteā ʼaē kā fai anai e Sesu moʼo toe ʼaumai te tokalelei mo te logotahi?
17 ʼE mole he tahi fakamatala ʼo te maʼuli ʼi te hili ʼo te ʼu taʼu e afe, ʼe lelei age ʼi te ʼu palalau ʼaenī: “Ke katoa [peʼe ke ʼafio kātoa] te Atua i te u mea fuli.” Koteā tona fakaʼuhiga? Kotou manatuʼi, ʼi Eteni, ʼi te temi ʼaē neʼe kau ai ia Atama mo Eva ki te fāmili tokalelei ʼo Sehova, neʼe ko Sehova totonu, te Tuʼi ʼo te ʼAtulaulau, ʼaē neʼe ina puleʼi ʼana fakatupu, ʼi te lagi pea mo te kele. Neʼe feala ke natou felōgoi mo Sehova, mo tauhi kiā te ia pea mo maʼu te ʼu tapuakina mai iā ia. Neʼe “katoa [peʼe ʼafio kātoa] te Atua i te u mea fuli.”
18 Neʼe maumauʼi e Satana te ʼu felōgoi tokalelei ʼaia, ʼi te temi ʼaē neʼe ina ʼekenaki ai te tagata ke talagataʼa kiā Sehova. Talu te taʼu 1914, mo te ʼauʼaumai māmālie e te Puleʼaga ia te tokalelei pea mo te logotahi. (Efe. 1:9, 10) Ko te ʼu ʼaluʼaga taulekaleka ʼaē “e mole sio ki ai te u mata” koteʼuhi ʼe mole heʼeki hoko ʼi te temi nei, ʼe hoko moʼoni anai lolotoga te ʼAfio Iā Taʼu e Afe. ʼOsi ʼaia pea hoko leva “te fakaosi,” ko tona fakaʼuhiga, ko te fakaʼosi ʼo te ʼAfio ʼa Kilisito Iā Taʼu e Afe. Pea koteā ʼaē kā hoko anai? Logolā kua foaki age kiā Sesu te “pule fuli” ʼi te lagi pea mo te kele, kae ʼe mole fia tatau mo Sehova. ʼAki he agavaivai “e ina tuku anai te puleaga ki ae e Atua mo Tamai.” ʼE ina fakaʼaogaʼi tuʼumaʼu tona tuʼulaga makehe pea mo tana pule “ki te kololia o te Atua te Tamai.”—Mat. 28:18; Filp. 2:9-11.
19, 20. (1) ʼE fakahā feafeaʼi anai e nātou fuli ʼaē ʼe māʼuʼuli ʼi te pule ʼo te Puleʼaga, peʼe natou tali te pule faʼitaliha ʼa Sehova? (2) Koteā te ʼu ʼaluʼaga taulekaleka ʼe tou maʼu anai ʼi te kā haʼu?
19 ʼOsi ʼaia, ko nātou fuli ʼaē ʼe māʼuʼuli ʼi te kele ʼi te pule ʼo te Puleʼaga, ʼe natou haohaoa anai. ʼE natou faifaitakiʼi anai ia Sesu. Pea ʼe natou tali fakafiafia anai ke pule ia Sehova kiā nātou, heʼe natou agavaivai. ʼE natou mālo anai ʼi te ʼahiʼahi fakaʼosi mo kapau ʼe natou fakahā ʼe natou loto ke pule ia Sehova kiā nātou. (Apk. 20:7-10) Hili ʼaia, ko nātou fuli ʼaē kā fakafeagai, te ʼu ʼāselo pea mo te ʼu tagata, ʼe fakaʼauha anai ʼo talu ai. ʼE ko he temi fakafiafia anai ia! Ko te fāmili kātoa ʼo Sehova, ʼi te lagi pea mo te kele, ʼe natou fakavikiviki anai ia ia. Pea ʼe ʼafio kātoa anai ia Sehova ʼi te meʼa fuapē.—Lau ia Pesalemo 99:1-3.
20 Ko te ʼu ʼaluʼaga taulekaleka ʼaē kā fakahoko anai e te Puleʼaga ʼo te ʼAtua, ʼe ina uga koa koutou ke kotou tokaga tāfito pea mo faiga ʼo fakahoko te finegalo ʼo Sehova? ʼE feala koa hakotou tōkakaga naʼa fakahalaʼi koutou e te ʼu fakapapau loi pea mo te ʼu lelei ʼo te mālama ʼo Satana? ʼE kei mālohi koa te tonu ʼaē neʼe kotou fai ke kotou lagolago ki te pule ʼa Sehova? Ke hā ʼi ʼakotou gāue ʼe kotou fia fai te faʼahi ʼaia ʼo talu ai. Pea ʼe kotou maʼu anai te tokalelei pea mo te maʼuli fiafia, ʼo mole gata pē ki te ʼu taʼu e afe kae ʼo talu ai!
[ʼU fehuʼi ʼo te ako]
[Paki ʼo te pāsina 16]
Kā fakaʼosi anai e Sesu tana gāue ʼi tona ʼuhiga Hau, ʼe ina foaki anai ʼaki he agavaivai ia te Puleʼaga ki tana Tamai
