Kotou Tokaga Ki Te ʼu Hele ʼa Te Tiapolo!

“Mavae . . . mai te u puleaki kaka a te tiapolo.”—2 TIM. 2:26.

ʼE KOTOU TALI FEAFEAʼI ANAI?

Kapau ko hakotou agamāhani te fatufatuʼi ʼo ʼihi, koteā ʼaē ʼe tonu ke kotou fai?

Koteā ʼaē ʼe feala ke tou ako mai iā Pilato mo Petelo ke mole tou tō ki te fakaneke mo te mataku ki te tagata?

ʼE feafeaʼi hakotou tekeʼi takotou tukugākoviʼi fau ia koutou?

1, 2. Koteā te ʼu hele ʼa te Tiapolo ʼe tou vakaʼi anai ʼi te ʼalatike ʼaenī?

 ʼE FAIGA e te Tiapolo ke ina puke te ʼu kaugana ʼa Sehova. Kae ʼi ʼihi temi, ʼe mole hagē ko ʼihi tagata kapu manu ʼe natou matehi te ʼu manu ʼaē ʼe natou puke. Ko te meʼa ʼaē ʼe loto moʼoni kiai te Tiapolo ʼe ko te puke maʼuli ʼo he tahi ke ina fai tona finegalo.—Lau ia 2 Timoteo 2:24-26.

² Ko he tahi ʼe kapu manu ʼe lagi ina fakaʼaogaʼi he ʼu faʼahiga hele moʼo puke he manu. ʼE lagi ina tutu he afi ke mavae te manu mai te faʼahi ʼaē ʼe nono ai pea faigafua ai hona puke. Peʼe lagi ina fakaʼaogaʼi he maea moʼo puke ʼaki te manu. ʼE lagi feala ke ina toe fakaʼaogaʼi he hele neʼe ina fufū ke mole tokagaʼi e te manu. Mokā lave leva te vaʼe ʼo te manu kiai, pea maʼua ai. ʼE toe fakaʼaogaʼi e te Tiapolo he ʼu hele moʼo puke maʼuli te ʼu kaugana ʼa te ʼAtua. Koia, tou nofo ʼalaʼala pea mo tōkakaga ki te ʼu fakatokaga ʼaē ʼe tokoni mai ke tou ʼiloʼi ai te ʼu hele ʼa Satana. ʼI te ʼalatike ʼaenī, ʼe tou vakaʼi anai peʼe feafeaʼi hatatou tekeʼi te ʼu hele e tolu ʼe fakaʼaogaʼi e te Tiapolo moʼo puke he ʼu hahaʼi ʼa te ʼAtua. ʼE ko te ʼu hele ʼaenī: (1) he ʼu palalau fakatupu lavea, (2) te tō ki te mataku mo te fakaneke, pea (3) tatatou tukugākoviʼi fau ia tātou. Pea ʼi te ʼalatike kā hoa mai, ʼe tou vakaʼi anai te tahi ʼu hele e lua ʼa Satana.

TOU MATEHI TE AFI ʼAĒ KO TE ʼU PALALAU FAKATUPU LAVEA

3, 4. Koteā ʼaē ʼe feala ke hoko mo kapau ʼe mole tou tokaga ki tatatou faʼahiga palalau? Kotou tuku mai he faifaitaki.

³ ʼE puipui te ʼu manu ʼi tanatou nonofo ʼi te ʼu vao matuʼa. Ke mavae te ʼu manu mai te ʼu faʼahi ʼaē ʼe nonofo ai, ʼe lagi tutu anai e te tagata kapu manu he faʼahi ʼo te vao matuʼa. Pea ʼe feala ai leva ki te tagata kapu manu hana puke te ʼu manu. ʼE puipui te ʼu tehina mo tuagaʼane ʼi te loto kōkelekāsio. ʼI hona ʼaluʼaga fakatā, ʼe tutu e te Tiapolo he faʼahi ʼo te kōkelekāsio ke mavae te ʼu tehina mo tuagaʼane mai ai. Pea ʼe feala ai leva hana puke nātou. ʼE lava feafeaʼi hatatou lagolago ki tana fai ʼaia, kae lagi mole tou mahino kiai, ko tona fakaʼuhiga ke ina puke ai tātou?

 ⁴ Neʼe ʼui e te tisipulo ko Sakopo ko te ʼalelo ʼe ko he afi. (Lau ia Sakopo 3:6-8.) Kapau ʼe mole tou tokaga ki ʼatatou palalau, peʼe ki tatatou faʼahiga palalau, pea ʼe feala, ʼi hona ʼaluʼaga fakatā, ke tou kamata tutu he afi ʼi te kōkelekāsio. ʼE lava hoko feafeaʼi te faʼahi ʼaia? Kotou fakakaukauʼi ia te faʼahi ʼaenī: ʼI he fono, ʼe tala ifo e te tehina te kua liliu ʼa he tuagaʼane ʼo pioniē kātoa. Hili te fono, ʼe fai palalau te ʼu kaugā fai fakamafola e toko lua ʼo ʼuhiga mo te faʼahi ʼaē neʼe tala ifo. ʼE ʼui e te tahi ʼe lelei te kua pioniē ʼa te tuagaʼane pea mo fakaʼamu ʼe fua lelei anai tana selevisi. Kae ʼe ʼui e te tahi age, ʼe lagi fia pioniē lā te tuagaʼane heʼe fia maʼu tuʼulaga ʼi te kōkelekāsio. Ko ai ʼi te foʼi toko lua ʼaia ʼe kotou fia kaumeʼa anai mo ia? ʼE faigafua hatatou ʼiloʼi pe ko ai iā nāua ʼaē ʼe ina fakatupu he ʼu fihifihia ʼi te kōkelekāsio ʼaki tana faʼahiga palalau.

5. Kapau ʼe tou fia matehi te afi ʼaē ko te ʼu palalau fakatupu lavea, koteā ʼaē ʼe tonu ke tou fai?

⁵ ʼE lava feafeaʼi hatatou matehi te afi ʼaē ko te ʼu palalau fakatupu lavea? Neʼe ʼui fēnei e Sesu: “E palalau te gutu mai te mahu o te loto.” (Mat. 12:34) Koia, ʼe tonu muʼa ke tou vakavakaʼi te ʼu meʼa ʼaē ʼi totatou loto. ʼE mole tonu ke tou logoʼi ʼi totatou loto he ʼu meʼa ʼe lagi tupu ai anai hatatou fai he ʼu palalau ʼe fakatupu lavea. Ohagē lā, kā tou logo ʼe gāue lahi he tehina ʼi te kōkelekāsio, ʼe tou manatu ai koa ʼe ina fai te ʼu faʼahi ʼaia moʼo fakafiafiaʼi te loto ʼo Sehova? Peʼe tou manatu koa ʼe ina fai lā te ʼu gāue ʼaia heʼe loto ke foaki age hona pilivilēsio? Kapau ko hatatou agamāhani te manatu ʼaē ʼe gāue ʼotatou tehina ʼi te kōkelekāsio kehe pē ke natou maʼu he pilivilēsio, pea ʼe tonu ke tou manatuʼi neʼe toe fēia te ʼu palalau ʼa te Tiapolo ʼo ʼuhiga mo te kaugana agatonu ʼa te ʼAtua ko Sopo. (Sopo 1:9-11) ʼE mole tonu ke tou loto mahalohalo ʼo ʼuhiga mo totatou tehina, kae ʼe tonu ke tou vakavakaʼi pe koʼē ʼe tou haga ʼo fatufatuʼi ia ia. ʼE ʼi ai moʼoni koa hona tupuʼaga lelei ke tou manatu fēia ʼo ʼuhiga mo ia? Peʼe kua pikisia koa iā tātou te heʼe ʼofa ʼo te mālama, ʼi te ʼu ʼaho fakamuli ʼaenī?—2 Tim. 3:1-4.

6, 7. (1) Koteā ʼihi tupuʼaga ʼaē ʼe lagi tou fatufatuʼi ai ʼihi? (2) Koteā ʼaē ʼe tonu ke tou fai mokā lea koviʼi tātou e ʼihi?

⁶ Tou fakakaukauʼi age muʼa ʼihi tupuʼaga ʼaē ʼe lagi tou fatufatuʼi ai ʼihi. ʼE lagi tou loto ke tokagaʼi pea mo vikiʼi age e ʼihi ʼatatou gāue. ʼI tatatou fatufatuʼi ʼaia ʼihi, ʼe lagi tou fia fakahā ʼe tou lelei age tātou iā nātou. Peʼe lagi tou fia fakatonuhia tatatou mole fai he ʼu gāue ʼe tonu ke tou fai. ʼE hoko pē anai he ʼu fihifihia mo kapau ʼe tou fatufatuʼi ʼihi heʼe tou fia meʼa lahi, peʼe tou maheka, peʼe tou manatu ʼe mole tou lava fai te ʼu gāue ʼaē ʼe natou fai.

⁷ ʼE lagi tou manatu ʼe ʼi ai he tupuʼaga lelei ke tou fatufatuʼi ai ʼihi. Neʼe lagi tou mamahi ʼi he ʼu palalau neʼe natou fai mai. Tatau aipē pe neʼe natou fai mai he ʼu palalau fakatupu lavea, kae ʼe mole lelei hatatou liufaki age tanatou aga ʼaia. Heʼe toe ʼāʼāsili kovi ai te ʼaluʼaga. ʼE tou fai ai te finegalo ʼo te Tiapolo, kae mole ko ʼaē ʼa te ʼAtua. (2 Tim. 2:26) Kae ʼe tonu ke tou faifaitakiʼi ia Sesu. ʼI tona lea koviʼi  e te hahaʼi, “nee mole ina tali” ʼaki he lea kovi. Kae “nee fakalogo pe ia ia ki ae e fakamaaui i te faitotonu.” (1 Pet. 2:21-23) Neʼe falala Sesu ʼe fakatokatoka anai e Sehova te faʼahi ʼaia, ʼi tona temi totonu. ʼE tonu ke tou toe falala mo tātou ki te ʼAtua. Kā tou fai he ʼu palalau lelei, ʼaē ʼe fakalotomālohi, pea ʼe tou taupau ai te tokalelei mo te logotahi ʼi totatou kōkelekāsio.—Lau ia Efeso 4:1-3.

ʼAUA NAʼA TOU TŌ KI TE HELE ʼO TE FAKANEKE MO TE MATAKU

8, 9. He koʼē neʼe tuku e Pilato ke matehi ia Sesu?

⁸ Kā tō he manu ki he hele, pea ʼe mole kei feala hana gaugaue. Ko he tahi ʼe tō ki te hele ʼo te fakaneke mo te mataku, pea ʼe mole kei feala hana puleʼi tona maʼuli. (Lau ia Taaga Lea 29:25.) Tou vakaʼi pe koʼē neʼe tō te ʼu tagata e toko lua, ia Pilato pea mo Petelo, ki te hele ʼo te fakaneke mo te mataku. Pea ʼe tou tāʼofi anai he ʼu ako mai te ʼu meʼa ʼaē neʼe hoko kiā nāua.

⁹ Neʼe ʼiloʼi e te Kovana Loma ko Posio Pilato neʼe mole fai e Sesu he aga ʼe kovi pea neʼe mole ina fia gaohi koviʼi ia ia. Neʼe toe ʼui e Pilato neʼe mole fai e Sesu he hala ʼe “tuha mo te mate.” Kae neʼe tuku pē e Pilato ke matehi ia Sesu. He koʼē neʼe ina fai te faʼahi ʼaia? Koteʼuhi neʼe mulimuli ki tona fakaneke e te hahaʼi. (Luka 23:15, 21-25) Neʼe natou fakakinauʼi ia Pilato ke ina fai te meʼa ʼaē neʼe natou loto kiai, ʼo natou kalaga fēnei: “Kapau e ke fakaateaina ia, pea e mole ke kaumea mo Sesale”! (Soa. 19:12) Neʼe lagi mataku Pilato naʼa fakahifo ia ia ʼi tona tuʼulaga Kovana peʼe matehi ia ia mo kapau ʼe ina fakaʼāteainaʼi ia Kilisito. Neʼe tō ia ki te hele ʼo te fakaneke pea mo ina fai te finegalo ʼo te Tiapolo.

10. He koʼē neʼe fakafisi Petelo ʼe mole ina ʼiloʼi ia Kilisito?

¹⁰ Neʼe kau te ʼapositolo ko Petelo iā nātou ʼaē neʼe kaumeʼa lelei mo Sesu. Neʼe mole mataku ia ʼi te tala ki ʼihi ko Sesu neʼe ko te Mēsia. (Mat. 16:16) Neʼe agatonu pē ia Petelo kiā Sesu ʼi te temi ʼaē neʼe liʼakina ai ia ia e ʼihi tisipulo, he neʼe mole natou mahino ki ʼana folafola. (Soa. 6:66-69) Pea ʼi te temi ʼaē neʼe ʼomai ai te ʼu fili ʼo puke Sesu, neʼe fakaʼaogaʼi e Petelo te heletā moʼo puipui ia Sesu. (Soa. 18:10, 11) Kae ki muli age ʼi te pō pē ʼaia, neʼe tō Petelo ki te mataku ʼaē ki te tagata, ʼo fakafisi ʼe mole ina ʼiloʼi ia Sesu Kilisito. Ko te mataku ki te tagata ʼe ko he hele, pea neʼe higa ai te ʼapositolo ʼi he kiʼi temi pē. Neʼe mole kei lototoʼa moʼo fai te meʼa ʼaē ʼe totonu pea mo nofo agatonu kiā Sesu.—Mat. 26:74, 75.

11. Koteā te ʼu fakaneke ʼaē ʼe lagi tonu ke tou tauʼi?

¹¹ ʼE tonu ke tauʼi e te kau Kilisitiano fuli tonatou fakaneke ʼaē ke natou fai he ʼu meʼa ʼe mole leleiʼia e te ʼAtua. Ko he pātolō peʼe ko ʼihi atu, ʼe lagi natou fakaneke tātou ke tou aga kākā ʼi tatatou gāue peʼe ke tou fai he aga heʼeʼaoga. Ko te kau Kilisitiano ʼaē ʼe ʼolo ʼo ako, ʼe lagi fakaneke mālohi nātou e ʼihi kau tūpulaga ke natou siosio ʼi te ʼu sivi, mo sioʼi he ʼu pāki peʼe ko he ʼu ʼata ʼe hā ai te ʼu felāveʼi fakasino heʼeʼaoga, mo suluka, mo toloke, mo ʼinu kava, peʼe ke natou fai he ʼu felāveʼi fakasino. Ko te mataku ki te tagata mo te fakaneke ʼo tātou ke tou fai he ʼu meʼa ʼe mole leleiʼia e Sehova, ʼe ko he hele ʼe feala ke tou tō kiai. Koteā ʼaē kā tokoni mai anai ke ʼaua naʼa tou tō kiai?

12. He koʼē neʼe tō ia Pilato mo Petelo ki te mataku mo te fakaneke?

¹² Tou vakaʼi pe koʼē neʼe tō ia Pilato mo Petelo ki te mataku mo te fakaneke. Neʼe mole faʼa ʼiloʼi e Pilato pe neʼe ko ai ia Kilisito. Kae ko te faʼahi pē ʼaē neʼe ina ʼiloʼi neʼe mole fai e Sesu he meʼa ʼe kovi pea neʼe mole hagē ia ko te tagata fuli. Neʼe mole agavaivai ia Pilato pea neʼe mole ʼofa ki te ʼAtua moʼoni. Koia lā ʼaē neʼe faigafua ai ki te Tiapolo hana puke ia Pilato ke ina fai tona finegalo. Neʼe ʼofa ia Petelo ki te ʼAtua pea neʼe ina ʼiloʼi te moʼoni ʼo ʼuhiga mo te ʼAtua pea mo Kilisito Sesu. Kae neʼe ʼi ai te ʼu lakaga neʼe fakalaka ai Petelo ʼi ʼona fealagia, mo mataku ki te tagata pea mo tō ki te fakaneke. ʼI muʼa ʼo te puke ʼo Sesu, neʼe fiameʼameʼa ia Petelo ʼo ina ʼui fēnei: “E natou higa fuli anai, kae ko au, e mole au higa anai.” (Mko. 14:29) Kapau neʼe falala ia Petelo ki te ʼAtua ohagē ko te tagata fai pesalemo, kanaʼaua lā neʼe ina lava tauʼi tona ʼahiʼahi ʼaē ki ʼamuli. Neʼe hiva fēnei e te tagata fai pesalemo: “E kau [Sehova] mo au, e mole au mataku ki he mea: Kotea ae e feala ke fai mai e te tagata kia au?” (Pes. 118:6) ʼI te pō  fakaʼosi ʼa Sesu ʼi te kele, neʼe ina ʼave ia Petelo mo te tahi ʼu ʼapositolo e toko lua ki te ʼōloto ʼo Setesemane. Neʼe kole age e Sesu ke natou nonofo ʼalaʼala, kae neʼe natou tūlemomoe. ʼI te fakaʼala ake ʼo nātou e Sesu, neʼe ina ʼui fēnei: “Kotou alaala, pea kotou faikole, ke aua naa koutou higa ki te fakahala.” (Mko. 14:38) Kae neʼe toe tulemoe Petelo pea ki muli age neʼe tō ki te fakaneke mo te mataku ki te tagata.

13. ʼE tou lava tauʼi feafeaʼi te fakaneke ʼaē ke tou fai te meʼa ʼaē ʼe kovi?

¹³ Koteā ʼaē ʼe feala ke tou ako mai iā Pilato mo Petelo? Ke mole tou tō ki te fakaneke mo te mataku ki te tagata, ʼe tonu ke tou maʼu ia te ʼatamai mālama, mo te agavaivai, mo ʼaua naʼa tou fakalaka ʼi ʼotatou fealagia, mo tou ʼofa ki te ʼAtua pea mo tou manavasiʼi kiā te ia. Kapau ʼe fakatafito tatatou tui ki te ʼatamai mālama totonu, pea ʼe tou palalau anai ʼaki he lototoʼa ʼo ʼuhiga mo te ʼu akonaki ʼaē ʼe tou tui kiai. ʼE tokoni mai anai ke mole tou tō ki te fakaneke mo te mataku ki te tagata. ʼAua naʼa tou manatu ʼi he temi ʼe tou mālohi tātou. Kae ʼe tonu ke tou agavaivai pea mo mahino ʼe ʼaoga te mālohi ʼa te ʼAtua ke mole tou tō ai ki te fakaneke. ʼE tonu ke tou kole kiā Sehova tona laumālie. Pea ko totatou ʼofa kiā te ia ʼe ina uga anai tātou ke tou mulimuli ki te ʼu lēkula ʼa te ʼAtua, pea ke mole tou fai he ʼu meʼa ʼe feala ai ki te hahaʼi ke natou valokiʼi ia Sehova. ʼE toe ʼaoga foki ke tou nofo teuteu mokā ʼahiʼahiʼi tātou. Ohagē lā, ʼe ʼaoga anai ke tou faikole mo ʼatatou fānau pea mo teuteuʼi nātou, ke natou ʼiloʼi te meʼa ʼaē kā natou fai mokā fakaneke nātou e ʼihi tamaliki ke natou fai te meʼa ʼaē ʼe kovi.—2 Ko. 13:7. a

TOU TEKEʼI TE HELE ʼAĒ KO TATATOU TUKUGĀKOVIʼI FAU IA TĀTOU

14. ʼO ʼuhiga mo he hala neʼe tou fai ʼi muʼa atu, koteā ʼaē ʼe loto e Satana ke tou tui kiai?

¹⁴ ʼI ʼihi temi, ko te hele ʼe ko he foʼi kupuʼi ʼakau peʼe ko he foʼi maka ʼe tautau ʼi te ala ʼaē ʼe haʼele māhani ai te ʼu manu. ʼE haʼi e te tagata kapu manu he kiʼi filo ʼi te ala, pea kā lave te vaʼe ʼo te manu kiai pea tō te foʼi kupuʼi ʼakau peʼe ko te foʼi maka ʼo tataʼo ai te manu. Koia kā tou tukugākoviʼi fau ia tātou, pea ʼe hagē ʼe tataʼo tātou e he foʼi kupuʼi ʼakau peʼe ko he foʼi maka. Ohagē lā, kā tou manatuʼi he hala neʼe tou fai ʼi muʼa atu, pea ʼe lagi tou lotomamahi ʼaupitō, peʼe tou “fasifasi katoa.” (Lau ia Pesalemo 38:4-6, 9.) ʼE loto e Satana ke tou tui ʼe mole feala ke manavaʼofa ia Sehova kiā tātou heʼe tou agahala fau, pea ʼe mole feala hatatou mulimuli ki ʼana lēkula.

15, 16. ʼE feafeaʼi hakotou tekeʼi te hele ʼaē ko takotou tukugākoviʼi fau ia koutou?

¹⁵ ʼE feafeaʼi hakotou tekeʼi te hele ʼaē ko takotou tukugākoviʼi fau ia koutou? Kapau neʼe kotou agahala, ʼe tonu ke kotou foimo fakatokatoka ʼakotou felōgoi mo Sehova. Koia kotou ʼolo ki te ʼu tagata ʼāfea ʼo kole tokoni kiā nātou. (Sakp. 5:14-16) Kotou fai ia meʼa fuli ʼe kotou lavaʼi moʼona fakatokatoka. (2 Ko. 7:11) Kapau ʼe fakatonutonuʼi koutou, ʼaua naʼa kotou lotovaivai. Koteʼuhi ʼe fakahā atu e Sehova tona ʼofa ʼi te fakatonutonuʼi ʼaia ʼo koutou. (Hep. 12:6) Kotou fakatotonu ke mole kotou toe fai te agahala ʼaia, pea mo tokaga ke ʼaua naʼa kotou fai te ʼu meʼa ʼaē neʼe taki ai koutou ke kotou agahala. ʼI takotou ʼosi fakahemala pea mo lītuʼa ki takotou agahala, ʼe tonu ke kotou falala ʼe feala ke fakamolemole e te ʼAtua ʼakotou agahala ʼaki te sākilifisio faitotogi ʼa Sesu Kilisito.—1 Soa. 4:9, 14.

¹⁶ Ko ʼihi, logolā kua fakamolemole ʼanatou agahala, kae ʼe kei natou tukugākoviʼi pē ia nātou. Kapau ʼe kotou kau iā nātou ʼaia, kotou manatuʼi neʼe fakamolemole e Sehova ia Petelo pea mo te tahi ʼu ʼapositolo, logolā tanatou liʼaki ia Sesu ʼi te temi ʼaē neʼe ʼaoga lahi ai kiā ia he tokoni. Neʼe toe fakamolemole e Sehova te tagata neʼe fakamavae he neʼe ina fai he toe aga heʼeʼaoga kae ki muli age neʼe fakahemala. (1 Ko. 5:1-5; 2 Ko. 2:6-8) ʼE tou maʼu ʼi te Tohi-Tapu he ʼu fakamatala ʼo ʼihi neʼe agahala mamafa kae neʼe fakamolemole e te  ʼAtua kiā nātou he neʼe natou fakahemala.—2 Klk. 33:2, 10-13; 1 Ko. 6:9-11.

17. Koteā ʼaē ʼe feala ke fai e te sākilifisio faitotogi ʼa Sesu maʼa koutou?

¹⁷ ʼE fakamolemole pea mo galoʼi anai e Sehova te ʼu agahala ʼaē neʼe kotou fai, mo kapau ʼe kotou fakahemala pea mo falala moʼoni ʼe manavaʼofa anai kiā koutou. ʼE kotou manatu koa ʼe mole feʼauga te sākilifisio faitotogi ʼa Sesu ke fakamolemole ai e Sehova ʼakotou agahala? Kapau ko takotou manatu ʼaia, pea kua kotou tō ki he hele ʼa Satana. ʼE loto e te Tiapolo ke kotou manatu ʼe mole feʼauga te sākilifisio faitotogi ke fakamolemole ai e Sehova te ʼu agahala fuli. Kae ko nātou ʼaē neʼe agahala, ʼe feala ke fakamolemole kātoa nātou mo kapau ʼe natou fakahemala. (Taag. 24:16) ʼE feala hakotou fakagata takotou tukugākoviʼi fau ia koutou mo kapau ʼe kotou tui ki te sākilifisio faitotogi, pea ʼe kotou maʼu ai te mālohi moʼo tauhi ki te ʼAtua ʼaki tokotou loto kātoa, mo takotou manatu kātoa, pea mo tokotou maʼuli kātoa.—Mat. 22:37.

ʼE MOLE PULIPULI KIĀ TĀTOU TE ʼU HELE ʼA SATANA

18. ʼE feafeaʼi hatatou tekeʼi te ʼu hele ʼa te Tiapolo?

¹⁸ Ko te faʼahi ʼaē ʼe tokaga tāfito kiai Satana, ʼe mole ko te ʼu hele ʼaē kā ina fakaʼaogaʼi, kae ʼe ko tana puke tātou ke tou fai tona finegalo. ʼE feala hatatou tekeʼi te ʼu hele ʼaē ʼe ina fakaʼaogaʼi heʼe mole pulipuli ia kiā tātou ʼana fakatuʼutuʼu. (2 Ko. 2:10, 11) ʼE mole ina puke anai tātou mo kapau ʼe tou kole te poto moʼo tauʼi te ʼu ʼahiʼahi. Neʼe tohi fēnei e te tisipulo ko Sakopo: “Kapau e masiva he tahi ia koutou i te poto, ke ina kole ia ki te Atua, ae e foaki lahi ki te u tagata fuli, hala valoki, pea e foaki anai ia kia ia.” (Sakp. 1:5) Kapau ʼe tou loto ke foaki mai e Sehova te poto moʼo tauʼi te ʼu ʼahiʼahi, ʼe tonu ke tou ako takitokotahi mo tuʼumaʼu ia te Tohi-Tapu pea mo maʼuliʼi te ʼu pelesepeto ʼaē ʼe tuʼu ai. ʼI te ʼu tohi ʼo te kalasi ʼa te tagata kaugana agatonu mo poto, ʼe akoʼi ai tātou ke tou ʼiloʼi te ʼu hele ʼa te Tiapolo pea mo tokoni mai ke tou tekeʼi te ʼu hele ʼaia.

19, 20. He koʼē ʼe tonu ke tou fehiʼa ki te meʼa ʼaē ʼe kovi?

¹⁹ Ko te faikole pea mo te ako ʼo te Tohi-Tapu ʼe tokoni mai anai ke lahi age tatatou ʼofa ki te meʼa ʼaē ʼe lelei. Kae ʼe toe maʼuhiga foki ke tou fehiʼa ki te meʼa ʼaē ʼe kovi. (Pes. 97:10) ʼE feala hatatou tekeʼi te ʼu holi ʼo te kakano, mo kapau ʼe tou manatuʼi te ʼu fua kovi ʼaē ki ʼamuli. (Sakp. 1:14, 15) ʼE ʼaoga ke tou ako ke tou fehiʼa ki te meʼa ʼaē ʼe kovi pea mo ʼofa ki te meʼa ʼaē ʼe lelei. Pea ʼe mole tou tō anai ki te ʼu hele ʼaē ʼe fakaʼaogaʼi e Satana moʼo puke ʼo tātou, heʼe tou fehiʼa ai.

²⁰ ʼE tou loto fakafetaʼi lahi ki te tokoni mai ʼa te ʼAtua ke mole puke ai tātou e Satana ʼi ʼana hele. ʼE fakaʼaogaʼi e Sehova tona laumālie, mo tana Folafola pea mo tana kautahi moʼo haofaki tātou “mai te pule kovi.” (Mat. 6:13) ʼI te ʼalatike ʼaē kā hoa mai, ʼe tou ako anai peʼe feafeaʼi hatatou tekeʼi te tahi ʼu hele e lua ʼe fakaʼaogaʼi e te Tiapolo moʼo puke te ʼu kaugana ʼa te ʼAtua.

[Nota]

[ʼU fehuʼi ʼo te ako]

[Paki ʼo te pāsina 24]

ʼE feala ke hoko he ʼu fihifihia ʼi te kōkelekāsio mo kapau ʼe tou fai he ʼu palalau ʼe fakatupu lavea

[Paki ʼo te pāsina 27]

He koʼē ʼe mole ʼaoga ke kotou tukugākoviʼi fau ia koutou?