Kotou Fakaovi Kiā Ia ʼAē ʼe Fakalogo Ki Te ʼu Faikole

IĀ NĀTOU ʼaē ʼe natou ʼui ʼe tui ki te ʼAtua, tokolahi ʼe mole feala hanatou fakamahino pe koʼē ʼe natou tui. Pea ʼe mole feala hanatou fakamahino pe koʼē ʼe fakatupu e te ʼu lotu te ʼu mamahi pea mo fakagafua e te ʼAtua te ʼu mamahi. Ko te meʼa pē ʼaē ʼe feala ke natou fai ko te faikole ki he ʼAtua ʼe mole natou mahino ki ai.

Kae ʼe feala kiā koutou ke kotou fakaovi lelei age ki te ʼAtua. ʼE feala hakotou fakatafito takotou tui ki takotou kua mahino ʼaē pe ko ai te ʼAtua, pea kotou liliu ai ʼo ʼoʼofa pea mo fakafetaʼi kiā te ia. Ko te tui moʼoni ʼe fakatafito ki he ʼu fakamoʼoni. (Hepeleo 11:1) Kapau ʼe kotou ako ia te moʼoni ʼo ʼuhiga mo te ʼAtua, pea ʼe feala anai hakotou ʼiloʼi lelei ia ia pea mo palalau kiā te ia ohagē ko hokotou kaumeʼa. Kotou vakaʼi te ʼu meʼa ʼaē neʼe hoko kiā nātou ʼaenī neʼe faikole kae neʼe faigataʼa hanatou tui ʼe ʼi ai he ʼAtua:

◼ Patricia, ʼaē neʼe tou talanoa ki ai ʼi te ʼuluaki ʼalatike. “ ʼI te tahi ʼaho, neʼe au fakatahi mo ʼoku kaumeʼa neʼe teitei toko hogofulu ʼi te temi ʼaē neʼe natou kamata palalau lotu ai. Neʼe au fakahā kiā nātou neʼe au mavae ʼi toku ʼapi he neʼe mole au fia kau ki te fai palalau ʼo taku tamai, ʼaē neʼe mole tui ki te ʼAtua, pea mo te fafine ʼi te kau Fakamoʼoni ʼa Sehova ʼaē neʼe ʼomai kiō mātou. Neʼe ʼui e te tahi ʼi ʼoku kaumeʼa ʼe lagi moʼoni te kau Fakamoʼoni ʼa Sehova.

Neʼe ʼui fēnei e te tahi age: “He koʼē koa e mole tou ʼolo ki hanatou fono ke tou ʼiloʼi peʼe koia koa?” Pea neʼe matou ʼolo ai. Logolā neʼe mole matou faʼa tui ki te ʼu meʼa neʼe matou logo kiai, kae neʼe hoko atu pē te ʼolo ʼa ʼihi ki te ʼu fono ʼaia ʼuhi pē he neʼe agalelei te kau Fakamoʼoni.

Kae ʼi te tahi ʼAhotapu, neʼe au logo ki te ʼu palalau neʼe fetogi ai taku manatu. Neʼe fakamahino e te tagata faiakonaki te tupuʼaga ʼo te maʼuli mamahi ʼa te hahaʼi. ʼI muʼa atu, neʼe mole au mahino ko te tagata neʼe fakatupu haohaoa ʼi te kamata, pea neʼe tupu te agahala mo te mate mai te tagata e tahi ʼo mafola ai ki te hahaʼi fuli pē. Neʼe toe fakamahino e te tagata faiakonaki pe koʼē neʼe tonu ke mate Sesu ke toe maʼu e te mālamanei te ʼaluʼaga ʼaē neʼe pulihi e te ʼuluaki tagata. a (Loma 5:12, 18, 19) Pea neʼe au mahino ai leva kiā meʼa fuli. Neʼe au manatu ai ʼe ʼi ai moʼoni te ʼAtua ʼe tokaga mai kiā tātou. Neʼe hoko atu taku ako te Tohi-Tapu, pea mole tuai, pea hoki au mahino ai ʼi toku maʼuli, e feala ke au faikole ki he tahi ʼe maʼuli moʼoni.”

◼ Allan, ʼaē neʼe tou talanoa ki ai ʼi te ʼuluaki ʼalatike. “ ʼI te tahi ʼaho, neʼe ʼomai te ʼu Fakamoʼoni ʼa Sehova kiō māua, pea neʼe fakahū nāua ki fale e toku ʼohoana, he neʼe fia logo ki tanatou palalau ʼaē ʼo ʼuhiga mo te maʼuli heʼegata ʼi te kele. Neʼe kovi ʼosi toku ʼita. Koia neʼe  au tuku nāua ʼi te salō, kae au ʼalu mo toku ʼohoana ki te fale kuka, pea neʼe au ʼui age fēnei: ʼE ke vale koa? ʼE mole ke tui anai ki te ʼu meʼa ʼaia!

Neʼe ina tali fēnei mai: “ ʼIo, pea kapau koia, pea ʼalu lā koe ʼo fakahā kiā nāua ʼe nā faihala.”

“ ʼE mahino ia neʼe mole feala haku fakahā age neʼe nā faihala. Kae neʼe nā agalelei ʼosi pea neʼe nā tuku mai te tohi ʼe talanoa ai pe neʼe fakatupu koa te tagata pe neʼe tupu ia mai te manu. Neʼe fakamahino lelei ai te ʼu manatu pea neʼe fakatafito ki he ʼu fakamoʼoni, koia neʼe au manatu ai ʼe tonu ke au ʼiloʼi lelei age te ʼAtua. Neʼe au kamata ako te Tohi-Tapu mo te kau Fakamoʼoni, pea mole tuai, pea neʼe au mahino ai ko te ʼu manatu ʼaē ʼe tuʼu ai ʼe kehe ʼaupitō ia mo taku manatu ʼo ʼuhiga mo te ʼu lotu. ʼI taku ʼiloʼi lelei age ia Sehova, neʼe au faikole leva ki he ʼu faʼahi tāfito. Neʼe ʼi ai ʼaku aga neʼe mole lelei, koia neʼe au faikole ai ke tokoni mai. ʼE au ʼiloʼi papau neʼe tali e Sehova ʼaku faikole.”

Andrew, ʼe maʼuli ʼi Pilitānia. “Logolā neʼe au tui papau ki ʼaku manatu pea mo au leleiʼia ʼaupitō te poto fakatagata, kae neʼe au hoko tui pē au ki te akonaki ʼaē ko te tagata neʼe tupu mai te manu, he neʼe ʼui e te hahaʼi neʼe tupu fēia pē te maʼuli. Neʼe mole au fia tui ki te ʼAtua ʼuhi ko te ʼu meʼa kovi fuli ʼaē ʼe hoko.

 Kae neʼe au manatu fēnei ʼi ʼihi temi: Kapau ʼe ʼi ai he ʼAtua ʼi ʼoluga, pea ʼe au fia mahino pe koteā te tupuʼaga ʼo te fēia ʼo te maʼuli. He koʼē kua ʼāʼāsili age te ʼu fai fakapō pea mo te ʼu tau? ʼI te temi ʼaē neʼe au tau ai mo te ʼu faigataʼaʼia, neʼe au faikole ʼi ʼihi temi ke tokoni mai kae neʼe mole au ʼiloʼi pe au palalau kiā ai.

“Pea neʼe foaki age leva e he tahi ki toku ʼohoana te kiʼi pepa lotu neʼe tā e te kau Fakamoʼoni ʼa Sehova, ʼaē ko tona kupu tāfito Ko Te Malamanei ʼo Te Temi ʼAenī ʼe Hāo Anai Koa? Neʼe tō tonu he neʼe ko te fehuʼi pē ʼaia neʼe au tau fai. ʼAki te kiʼi pepa lotu ʼaia, neʼe au fakakaukau ai ʼo ʼuhiga mo te Tohi-Tapu, ʼe lagi tonu ke au vakavakaʼi te ʼu tali ʼaē ʼe tuʼu ai. Ki muli age, lolotoga taku mālōlō neʼe foaki mai e he tahi te tohi La Bible : Parole de Dieu ou des hommes ? (Te Tohi-Tapu ʼe ko te Folafola koa ʼa te ʼAtua peʼe ʼa te tagata ?) b ʼI taku mahino leva ʼaē ʼe ʼalutahi te Tohi-Tapu mo te poto lahi fakatagata, neʼe au manatu ai neʼe tonu ke loloto age taku mālama ki te Tohi-Tapu. Koia ʼi te kole mai e te Fakamoʼoni ʼa Sehova ke ina kamata haku ako Tohi-Tapu, neʼe au tali. ʼI taku kua mahino ki te fakatuʼutuʼu ʼa Sehova, neʼe liliu ia ko he tahi ʼe maʼuli moʼoni kiā au pea mo feala haku palalau faʼifaʼitaliha mo ia ʼi te faikole.”

Jan, neʼe lahilahi ake ʼi te lotu Polotesitā ʼi Lonitoni. “Neʼe au liʼaki te lotu ʼaia ʼuhi ko te mālualoi pea mo te ʼu mamahi ʼi te mālamanei. Neʼe au toe mavae ʼi te ako, pea neʼe au kamata fai hiva leva mo tā ʼukalele ke au maʼu haku foʼi falā. Neʼe au felāveʼi ai mo Pat. Neʼe lahilahi ake ia ʼi te lotu Katolika kae neʼe mole kei tui ia ki te ʼAtua, ohagē pē ko au.

“Neʼe mā māʼuʼuli ʼi he ʼapi neʼe mole kei nofoʼi, fakatahi mo ʼihi neʼe natou liʼaki tautonu tanatou ako pea mo fia ʼiloʼi te ʼu lotu ʼi te ʼu fenua ʼEsitē. ʼI te pōʼuli, neʼe matou fai palalau fualoa ʼo ʼuhiga mo te fakaʼuhiga ʼo te maʼuli. Logolā neʼe mole mā tui ki te ʼAtua, kae neʼe hagē pē kiā māua ʼe ʼi ai he mālohi neʼe ina fakatupu te maʼuli.

“Neʼe mā hiki ki te potu Noleto ʼo Pilitānia ʼo kumi gāue ʼi te fai māholo, pea neʼe tupu ai leva tamā toe tagata. ʼI te tahi pō, neʼe mahaki pea neʼe au faikole ai ki te ʼAtua ʼaē neʼe mole au tui ki ai. Mole fualoa ki muli age, neʼe mole kei lelei taku felōgoi ʼaē mo Pat pea neʼe au toʼo tamā tamasiʼi pea mo au ʼalu. Neʼe au toe faikole, naʼa meʼa age pē ʼe fakalogo he tahi ki taku faikole ke tokoni mai. Neʼe toe fai fēia mo Pat, kae neʼe mole au ʼiloʼi.

“ ʼI te ʼaho ʼaia, neʼe fisifisi te ʼu Fakamoʼoni ʼa Sehova e toko lua kiō Pat, pea nā fakahā age kiā ia he ʼu tokoni ʼaoga ʼe tuʼu ʼi te Tohi-Tapu. Neʼe telefoni mai Pat ʼo kole mai peʼe au loto ke mā kaugā ako te Tohi-Tapu mo te kau Fakamoʼoni. Mole tuai, pea mā mahino ai kapau neʼe mā fia fakafiafiaʼi te loto ʼo te ʼAtua pea neʼe tonu ke mā ʼolo ʼo ʼohoana. Neʼe faigataʼa ʼosi te faʼahi ʼaia ʼuhi he neʼe mole kei mā felōgoi lelei.

“Neʼe mā loto ke loloto age tamā mahino ki te fakahoko ʼo te ʼu lea fakapolofetā ʼi te Tohi-Tapu, mo te tupuʼaga ʼo te mamahi, pea mo te fakaʼuhiga ʼo te Puleʼaga ʼo te ʼAtua. ʼAki te temi, neʼe mā mahino ai ʼe tokaga mai te ʼAtua kiā māua pea neʼe mā fia fakalogo kiā te ia ʼo mā ʼolo ai ʼo ʼohoana. Ko te poto ʼa te ʼAtua ʼaē ʼe maʼu ʼi te Tohi-Tapu neʼe tokoni mai ke mā pusiaki ʼamā toe e toko tolu. ʼE mā tui papau neʼe fakalogo Sehova ki ʼamā faikole.”

Kotou Vakavakaʼi Muʼa e Koutou Totonu Te ʼu Fakamoʼoni

Ohagē ko te toko lauʼi miliona hahaʼi, ko nātou ʼaē neʼe tou talanoa ki ai ʼi te ʼalatike ʼaenī, neʼe natou mahino ki te ʼu kākā ʼo te ʼu lotu hala pea mo te tupuʼaga ʼo te fakagafua e te ʼAtua te mamahi. Neʼe kotou tokagaʼi neʼe natou tui papau leva ko te ʼAtua ʼe fakalogo ki te ʼu faikole, ʼi tanatou kua ʼosi mahino lelei ki te Tohi-Tapu.

ʼE kotou fia vakavakaʼi koa te ʼu fakamoʼoni ʼaē ʼe maʼuli moʼoni te ʼAtua? ʼE fiafia anai te kau Fakamoʼoni ʼa Sehova ʼi te tokoni atu ke kotou ʼiloʼi te moʼoni ʼo ʼuhiga mo Sehova pea mo kotou fakaovi kiā ia “ae e fakalogo ki te kole.”—Pesalemo 65:3.

[ʼU nota]

[Fakamatala ʼo te pāsina 10]

“ ʼI taku kua mahino ki te fakatuʼutuʼu ʼa Sehova, neʼe liliu ia ko he tahi ʼe maʼuli moʼoni kiā au pea mo feala haku palalau faʼifaʼitaliha mo ia ʼi te faikole”

[Paki ʼo te pāsina 9]

Ko te tui moʼoni ʼaē ʼe maʼu e he tahi ʼe fakatafito ki he ʼu fakamoʼoni pea mo tana ʼiloʼi ia te moʼoni ʼo ʼuhiga mo te ʼAtua