“Kotea e Au Tuania Anai Ki Ai?”
“Kapau e lagai mai he tau kia au e au fonu anai i te falala i te mea aia.”—PES. 27:3.
ʼE TOKONI FEAFEAʼI ATU TE ʼU VAEGA ʼAENĪ KE KOTOU LOTOMĀLOHI?
1. Ko te ʼu fehuʼi fea ʼaē e tou maʼu anai ʼona tali ʼi te Pesalemo 27?
HE KO’Ē ʼe lahi tatatou fai fakamafola logolā te ʼāʼāsili kovi ʼo te ʼu ʼaluʼaga ʼi te mālamanei? He koʼē ʼe tou fiafia ʼi te fakaʼaogaʼi lahi ʼo totatou temi pea mo totatou mālohi ʼi te fai fakamafola, logolā kua kovi te ʼaluʼaga fakaekonomika ʼi te mālamanei? ʼE feafeaʼi hatatou taupau he lotomālohi logo aipē te tuʼania ʼa te hahaʼi tokolahi ki te kā haʼu? ʼE tou maʼu anai te ʼu tali ki te ʼu fehuʼi ʼaia ʼi te hiva ʼo te Hau ko Tavite ʼaē ʼe tuʼu ʼi te Pesalemo 27.
2. ʼE feafeaʼi ia ia ʼaē ʼe mataku? Kae koteā ʼaē ʼe feala ke tou tui papau kiai?
2 ʼE kamata fēnei e Tavite tana hiva: “Ko toku malama mo toku fakamauli ko [Sehova]: Ko ai e au mataku anai ki ai? Ko te tokoni o toku mauli ko [Sehova]: Kotea e au tuania anai ki ai?” (Pes. 27:1) Ko he tahi ʼe mataku ʼe feala ke vaivai ʼaupitō, ʼo mole kei feala hana gaugaue. Kae ko ia ʼaē ʼe falala kiā Sehova, ʼe lotomālohi ia pea ʼe mole mataku ia. (1 Pet. 3:14) Kapau ko Sehova ko totatou tule mālohi pea mo tou falala kiā te ia, ʼe feala hatatou tui papau ʼe tou “malolo anai i te tokalelei,” mo tou maʼuli anai “i te fimalie” pea ʼe mole tou “toe tuania anai he mea kovi.” (Taag. 1:33; 3:25) Koteā tona tupuʼaga?
“KO TOKU MALAMA MO TOKU FAKAMAULI KO [SEHOVA]”
3. Koteā te fakaʼuhiga ʼo te ʼui ʼaē ko Sehova ko totatou mālama? Kae koteā ʼaē ʼe tonu ke tou fai?
3 Mokā ʼui ʼi te Tohi-Tapu ko Sehova “ko toku malama,” ko tona fakaʼuhiga ʼe akoʼi mai e Sehova te moʼoni. (Pes. 27:1) Ko he mālama ʼe ina fakahā fakatomuʼa mai he tuʼutāmaki peʼe ko he meʼa ʼi totatou ala, kae ʼe mole feala ia ke ina toʼo kehe te tuʼutāmaki ʼaia. ʼE ʼā tātou pē te fakatafa mai te tuʼutāmaki ʼaia. ʼO toe fēia pē, ʼe fakamahino mai e Sehova te fakaʼuhiga ʼo te ʼu meʼa ʼaē ʼe hoko ʼi te mālamanei. ʼE ina fakatokaga mai te ʼu tuʼutāmaki ʼaē ʼi te mālama agakovi ʼaenī. Pea ʼi te Tohi-Tapu, ʼe ina tuku mai te ʼu tokoni lelei ʼaē ʼe ʼaoga tuʼumaʼu kiā tātou. Neʼe ʼui fēnei e te tagata fai pesalemo: “E fakaliliu au e au folafola o poto age i oku fili,” pea “e au poto age i oku pule fuli.” Koia kā tou maʼuliʼi te ʼu pelesepeto ʼi te Tohi-Tapu, pea ʼe tou toe liliu mo tātou ʼo popoto.—Pes. 119:98, 99, 130.
4. (1) He koʼē neʼe ʼui e Tavite ko Sehova ko tona fakamaʼuli? (2) Ko ʼāfea ʼaē kā haofaki anai e Sehova ʼana kaugana?
4 Ko te ʼu palalau ʼaē neʼe fai e Tavite iā Pesalemo 27:1, ʼe ina fakahā mai neʼe mole ina galoʼi te ʼu lakaga ʼaē neʼe haofaki ai ia ia e Sehova ʼi muʼa atu. Ohagē lā neʼe haofaki ia ia e Sehova mai te laione pea mo te uluso. Neʼe toe tokoni Sehova kiā ia ke mālo ʼi te tagata lahi ko Koliate. Ki muli age, neʼe haofaki e Sehova ia Tavite ʼi te temi fuli ʼaē neʼe faiga ai e te Hau ko Saulo ke ina matehi ia ia ʼaki he tao. (1 Sam. 17:37, 49, 50; 18:11, 12; 19:10) Koia neʼe ʼui ai e Tavite ko Sehova ko tona fakamaʼuli. ʼE toe haofaki pē anai e Sehova ʼana kaugana ohagē ko tana haofaki ia Tavite. Ko ʼāfea ʼaē kā ina haofaki anai nātou? ʼI te temi ʼaē kā hoko mai ai “te mamahi lahi.”—Apk. 7:14; 2 Pet. 2:9.
KOTOU MANATUʼI TE ʼU LAKAGA FULI ʼAĒ NEʼE TOKONI ATU AI IA SEHOVA
5, 6. (1) ʼE tuputupu feafeaʼi tatatou lotomālohi mokā tou manatuʼi te ʼu lakaga ʼaē neʼe tokoni mai ai Sehova? (2) He koʼē ʼe lelei ke tou manatuʼi pe neʼe tokoni feafeaʼi ia Sehova ki tana hahaʼi ʼi te temi muʼa?
5 Iā Pesalemo 27:2, 3 ʼe tou lau ai te faʼahi maʼuhiga ʼe feala ke tou fai ke tuputupu ai tatatou lotomālohi. (Lau.) Neʼe manatuʼi e Tavite te ʼu lakaga ʼaē neʼe haofaki ai ia ia e Sehova. (1 Sam. 17:34-37) Neʼe lotomālohi ai Tavite pea neʼe feala ai ke ina kātakiʼi te ʼu ʼaluʼaga ʼaē neʼe faigataʼa ʼaupitō. ʼE kotou manatuʼi koa pe neʼe tokoni feafeaʼi ia Sehova kiā koutou ʼi muʼa atu? ʼE kotou lotomālohi ai koa? Ohagē lā, neʼe lahi koa takotou faikoleʼi he fihifihia neʼe tupu ai te puli ʼo takotou fiafia? Neʼe kotou mahino koa ki muli age pe neʼe foaki feafeaʼi atu e Sehova te poto mo te mālohi ke kotou lava kātakiʼi te fihifihia ʼaia? ʼE kotou manatuʼi koa pe neʼe tokoni feafeaʼi atu ia Sehova ke kotou fakatokatoka he ʼu fihifihia neʼe faigataʼa ai kiā koutou hakotou tauhi kiā te ia ʼaki te fiafia? Peʼe kotou manatuʼi koa te ʼu faigamālie neʼe ina foaki atu ke kotou tauhi kiā te ia? (1 Ko. 16:9) ʼE malave feafeaʼi kiā koutou mokā kotou manatuʼi te ʼu lakaga ʼaia? ʼI takotou manatuʼi te ʼu faʼahi ʼaia, ʼe kotou haga tui papau ai ʼe feala ke tokoni atu Sehova ke kotou fakatokatoka peʼe ke kotou kātakiʼi te ʼu fihifihia pea mo te ʼu ʼaluʼaga faigataʼa ʼaupitō.—Loma 5:3-5.
6 Koteā ʼaē kā tou fai anai mo kapau ʼe faiga e he puleʼaga mālohi ke ina pulihi te kautahi ʼa te kau Fakamoʼoni ʼa Sehova? Mole faʼa fualoa, neʼe faiga e ʼihi ke natou fai te faʼahi ʼaia, kae neʼe mole hona fua. Kapau ʼe tou manatuʼi pe neʼe tokoni feafeaʼi ia Sehova ki tana hahaʼi ʼi te temi muʼa, pea ʼe tou lotomālohi anai ʼo kātakiʼi he ʼu ʼaluʼaga pē ʼe feala ke hoko ʼi te kā haʼu.—Tan. 3:28.
TOTATOU ʼOFA KI TE TAUHI MOʼONI
7, 8. (1) Ohagē ko tatatou lau iā Pesalemo 27:4, koteā ʼaē neʼe kole e Tavite kiā Sehova? (2) Koteā te fale lotu lahi fakalaumālie ʼa Sehova? ʼE feafeaʼi hatatou tauhi ʼi te fale lotu ʼaia iā ʼaho nei?
7 Ko totatou ʼofa ki te tauhi moʼoni ʼe toe tokoni mai ke tou lotomālohi. (Lau ia Pesalemo 27:4.) ʼI te temi ʼo Tavite, ko “te fale o [Sehova]” neʼe mole ko te fale lotu, kae neʼe ko te tapenakulo, ʼaē neʼe ko he falelā. Neʼe tokaga ia Tavite ke maʼu e Salomone, tona foha ia meʼa fuli ʼaē neʼe ʼaoga moʼo laga he fale lotu taulekaleka maʼa Sehova. Hili kiai ni taʼu e lauʼi teau, neʼe fakamahino e Sesu ʼe hoko anai he temi ʼe mole toe tauhi anai te hahaʼi kiā Sehova ʼi te fale lotu. (Soa. 4:21-23) Neʼe fai e Sehova he fakatuʼutuʼu ke feala ai, ʼaki tatatou tui ki te sākilifisio faitotogi ʼa Sesu, ke ina tali tatatou tauhi. Iā Hepeleo kāpite 8 ki te 10, neʼe ʼui ai e te ʼapositolo ko Paulo ko te fakatuʼutuʼu ʼaia ʼaē ʼe feala ke tou tauhi ai ki te ʼAtua, ʼe ko te fale lotu lahi fakalaumālie, ʼaē “nee mole fau e te u nima o te tagata.” Neʼe fakamahino e Paulo neʼe tuʼu te fale lotu ʼaia ʼi te temi ʼaē neʼe papitema ai Sesu pea mo ina momoli tona maʼuli moʼo fai te finegalo ʼo Sehova. Neʼe hoko te faʼahi ʼaia ʼi te taʼu 29. (Hep. 10:10) ʼE feafeaʼi hatatou tauhi ʼi te fale lotu ʼaia? ʼAki tatatou faikole kiā Sehova “i he loto mooni, mo he amanaki malohi o te tui,” pea mo tatatou fakamahino ʼaki he lototoʼa ki te hahaʼi pe ko ai te ʼAtua. ʼE tou toe tauhi ʼi te fale lotu ʼaia mokā tou kau ki te ʼu fono pea mo lolotoga tatatou tauhi fakafāmili. (Hep. 10:22-25) Ko totatou ʼofa ki te tauhi moʼoni ʼe tokoni mai anai ke tou haga fai te ʼu faʼahi ʼaia ʼi te ʼu ʼaho fakamuli ʼaenī mo faigataʼa.
8 ʼI te mālamanei kātoa, ʼe fakaʼaogaʼi lahi e te ʼu kaugana agatonu ʼa Sehova tonatou temi ki te fai fakamafola, mo ako he ʼu lea foʼou, pea mo ʼolo ki te ʼu koga meʼa ʼaē ʼe tokosiʼi ai te kau fai fakamafola ʼo te Puleʼaga. ʼE natou fakahā ai ʼe natou hagē ko te tagata fai pesalemo. Neʼe ko te meʼa pē e tahi neʼe ina kole kiā Sehova, ke “sio ki te lelei o [Sehova] pea mo kumi tona finegalo i tona fale tapu,” peʼe fale lotu. ʼE loto e te ʼu kaugana ʼa Sehova iā ʼaho nei ke ina tapuakinaʼi nātou, pea ke natou tauhi kiā te ia tatau aipē pe koteā ʼaē kā hoko.—Lau ia Pesalemo 27:6.
TOU FALALA KI TE TOKONI ʼA TE ʼATUA
9, 10. Koteā ʼaē ʼe fakapapau mai iā Pesalemo 27:10?
9 ʼE hā mai ʼi te ʼu palalau ʼa Tavite tana falala lahi ʼaē ki te tokoni ʼa Sehova. Neʼe ina ʼui kapau ʼe liʼaki ia ia e tana faʼē mo tana tamai, “e too anai” ia ia e Sehova. (Pes. 27:10) ʼI tatatou lau ia 1 Samuele kāpite 22, ʼe tou ʼiloʼi ai neʼe mole liʼakina ia Tavite e ʼana mātuʼa. Kae iā ʼaho nei kua tokolahi nātou ʼaē ʼe liʼakina e tonatou fāmili. Tokolahi iā nātou ʼaia neʼe natou maʼu he tokoni ʼofa mo he puipui ʼi te kōkelekāsio Fakakilisitiano.
10 ʼE tokaga Sehova ki ʼana kaugana, tatau aipē peʼe liʼakina nātou e ʼihi. Koia, ʼe tou tui papau ai ʼe toe tokaga anai Sehova kiā nātou ʼaia mokā natou tau mo he tahi age ʼu faigataʼaʼia. Ohagē lā, kapau ʼe tou tuʼania peʼe feafeaʼi anai hatatou foaki te ʼu meʼa ʼaē ʼe ʼaoga ki totatou fāmili, ʼe tonu ke tou manatuʼi ko Sehova ʼe tokoni mai anai. (Hep. 13:5, 6) ʼE mahino ia Sehova ki totatou ʼaluʼaga pea mo ina toe ʼiloʼi te ʼu meʼa ʼaē ʼe ʼaoga kiā tātou.
11. ʼI tatatou falala ʼaē kiā Sehova, koteā te manatu ʼa te hahaʼi ʼo ʼuhiga mo tātou kau Fakamoʼoni ʼa Sehova? Kotou tuku mai he faʼifaʼitaki.
11 Tou vakaʼi te faʼifaʼitaki ʼo Victoria, ʼaē neʼe ina ako te Tohi-Tapu ʼi te fenua ʼo Lipelia. Ko te tagata ʼaē neʼe nā maʼuli tahi, neʼe ina liʼaki ia ia mo ʼana tamaliki e toko tolu. Logolā te mole kei ʼi ai hona ʼapi mo hana gāue, kae neʼe mole ina tuku tana ako te Tohi-Tapu pea ki muli age neʼe papitema. ʼI te tahi ʼaho, neʼe maʼu e tana taʼahine ʼaē neʼe taʼu 13 te kato paʼaga. Neʼe mole fia lau e nāua taufāʼē te paʼaga, naʼa fokifā kua nā fia taupau te paʼaga ʼaia. Kae neʼe nā foimo kumi te tagata sōlia ʼa ia te kato. ʼI tanā maʼu ia ia, neʼe ʼui e te tagata kapau ʼe aga fakahagatonu te hahaʼi fuli ohagē ko te kau Fakamoʼoni ʼa Sehova, ʼe mahino ia ʼe lelei age anai te mālamanei pea mo tokalelei. Neʼe fakahā e Victoria ki te tagata sōlia te fakapapau ʼa Sehova ʼi te Tohi-Tapu ʼo ʼuhiga mo he mālama foʼou. Neʼe punamaʼuli te tagata ʼi te tui pea mo te aga fakahagatonu ʼa Victoria, pea neʼe ina foaki age leva he vahe lahi ʼo te falā ʼaē neʼe liufaki age e Victoria. ʼE ʼiloʼi e te hahaʼi ʼi te mālamanei ko te kau Fakamoʼoni ʼa Sehova ʼe natou aga fakahagatonu tuʼumaʼu. ʼE falala kātoa te kau Fakamoʼoni ʼe tokaga Sehova kiā nātou, koia lā ʼaē ʼe natou aga fakahagatonu ai.
12. He koʼē ʼe tou haga tauhi aipē kiā Sehova, logolā ʼe mole kei ʼi ai hatatou gāue peʼe ko hatatou falā? Kotou tuku mai he faʼifaʼitaki.
12 Kotou fakakaukauʼi age muʼa te meʼa neʼe hoko kiā Thomas, ko he kaugā fagona ʼi te fenua ko Siela Leone. Neʼe kamata gāue ohagē ko he tagata faiako kae teitei taʼu kātoa, neʼe mole lī age tona totogi. Neʼe tonu ke felōgoi ia Thomas mo te tagata pule ʼo te faleako ke lī age lā tona totogi. Ko te tagata pule ʼaia neʼe ko te pātele, pea neʼe ina ʼui age kiā Thomas ʼe mole tali te ʼu akonaki ʼa te kau Fakamoʼoni ʼa Sehova ʼi te faleako. Neʼe ʼui age e te pātele ʼe tonu ke mavae ia ia ʼi te kau Fakamoʼoni ʼa Sehova mo kapau ʼe ina fia taupau tana gāue. Logolā te mole lī age ʼo tona totogi, kae neʼe mavae Thomas ʼi tana gāue. Ki muli age, neʼe maʼu e Thomas te tahi gāue, ʼaē ko te faʼu ʼo te ʼu lātio pea mo te ʼu telefoni feʼaveʼaki. ʼE lahi te ʼu faʼifaʼitaki ʼe hā ai, kapau ʼe tou falala kiā Sehova, pea ʼe mole tonu ke tou tuʼania naʼa mole tou maʼu anai te ʼu meʼa ʼaē ʼe ʼaoga kiā tātou. ʼE tou tui papau ʼe tokaga anai Sehova kiā tātou heʼe ko ia ʼaē neʼe ina fakatupu ia meʼa fuli pea neʼe ina puipui tuʼumaʼu pē tana hahaʼi.
13. He koʼē ko te ʼu tehina mo tuagaʼane ʼi te ʼu fenua masiva ʼe natou maʼumaʼua ʼi te fai fakamafola?
13 Ko te ʼu tehina mo tuagaʼane ʼi te ʼu fenua masiva ʼe natou maʼumaʼua ʼi te fai fakamafola. Koteā tona tupuʼaga? Neʼe ʼui e te filiale ʼe tokolahi te hahaʼi ʼe mole gāue, ʼe natou tali ke fai hanatou ako Tohi-Tapu, koia ʼe maʼu ai tonatou temi ke fai hanatou ako. ʼE toe lahi te temi ʼaē ʼe maʼu e te ʼu tehina mo tuagaʼane moʼo fai fakamafola. ʼE fakamoʼoni e te hahaʼi ʼe tou māʼuʼuli nei ʼi te ʼu ʼaho fakamuli ʼuhi ko te ʼu ʼaluʼaga kovi ʼaē ʼe hoko ʼi te mālamanei. Koia ʼi te tahi age fenua, ʼe tahi maʼu e te kau fai fakamafola ʼanatou ako Tohi-Tapu e tolu peʼe laka atu. Ko te tehina neʼe misionea ʼi te fenua ʼaia iā taʼu e 12, neʼe ina tohi ʼe tokolahi te ʼu tehina mo tuagaʼane ʼe lahi age tonatou temi moʼo fai fakamafola pea mo fai he ʼu ako, heʼe mole puli tonatou temi ki he ʼu gāue ʼe mole hona ʼaoga.
14. ʼE puipui feafeaʼi anai e te ʼAtua te toe hahaʼi tokolahi?
14 Neʼe fakapapau e Sehova ʼe tokoni, mo puipui, pea mo haofaki anai tana hahaʼi kātoa, pea ʼe tou tui ʼe ina fakahoko anai tana fakapapau ʼaia. (Pes. 37:28; 91:1-3) ʼE hao anai ʼi “te mamahi lahi” ia te toe hahaʼi tokolahi. (Apk. 7:9, 14) Koia ʼe puipui anai e te ʼAtua ia te toe hahaʼi tokolahi ʼaia heʼe mole ina fakagafua anai ki he tahi ke ina molehi tana hahaʼi kātoa lolotoga te ʼu ʼaho fakamuli ʼo te tuʼu ʼaenī. Pea ʼe toe puipui anai nātou e Sehova heʼe ina foaki anai te ʼu meʼa fuli ʼaē ʼe ʼaoga kiā nātou ke natou kātakiʼi te ʼu faigataʼaʼia pea mo taupau ʼanatou felōgoi lelei mo ia. Pea ʼi Halamaketone, ʼe puipui anai e Sehova ʼana kaugana ʼo ina haofaki nātou.
“[SEHOVA], AKO MAI KIA AU TOU ALA”
15, 16. ʼE fua lelei feafeaʼi kiā tātou mokā tou maʼuliʼi te ʼu meʼa ʼaē ʼe akoʼi mai e te ʼAtua? Kotou tuku mai he faʼifaʼitaki.
15 Kapau ʼe tou loto ke tou lotomālohi tuʼumaʼu, pea ʼe tonu ke haga akoʼi tātou e te ʼAtua. Neʼe ʼui fēnei e Tavite: “[Sehova], ako mai kia au tou ala, taki au i te ala o te mooni.” (Pes. 27:11) Ke feala ke akoʼi tātou e te ʼAtua, ʼe tonu ke tou fakalogo fakalelei ki te ʼu folafola ʼaē ʼi te Tohi-Tapu pea mo te ʼu fakatotonu ʼaē ʼe tou maʼu mai te kautahi ʼa Sehova. ʼE tonu ke tou toe maʼuliʼi atu aipē te ʼu meʼa ʼaē ʼe tou ako. Ohagē lā, tokolahi neʼe natou maʼuliʼi te tokoni fakapotopoto ʼaē ke natou fakafaigafua tonatou maʼuli. Neʼe natou huʼi ʼonatou maʼua pea mo fakatau te ʼu meʼa ʼaē neʼe mole hona ʼaoga. Pea ʼi te hoko ʼo te fihifihia fakaekonomika, neʼe mole natou tuʼania ʼo ʼuhiga mo te faʼahi fakapaʼaga. Koia ʼaē neʼe mole ʼaoga ai ke natou toe gāue kinakina moʼo huʼi he ʼu meʼa neʼe mole hona ʼaoga. Pea ʼe feala ai ke lahi age tanatou kau ki te minisitelio. ʼE tonu ke tou fai te fehuʼi ʼaenī: ʼE au maʼuliʼi atu aipē koa ia meʼa fuli ʼe au lau ʼi te Tohi-Tapu pea ʼi te ʼu tohi ʼo te tagata kaugana agatonu mo poto, tatau aipē peʼe faigataʼa kiā au?—Mat. 24:45.
16 Mokā tou tuku ia Sehova ke ina akoʼi tātou pea mo fakahā mai peʼe tonu ke feafeaʼi totatou maʼuli, pea ʼe mole tonu ke tou tuʼania ki he meʼa. Neʼe faiga e te tehina pioniē kātoa ʼi Amelika ʼi tana fale gāue ke ina fai he tahi gāue ʼe tokoni anai kiā ia mo tona fāmili kātoa ke hoko atu tanatou pioniē. Kae neʼe ʼui age e tona pule ʼe mole feafeala anai ke ina maʼu te gāue ʼaia he neʼe mole maʼu pepa māʼoluga. Kapau neʼe hoko te faʼahi ʼaia kiā koutou, ʼe kotou fakahemala anai koa he neʼe kotou toʼo te selevisi pioniē kātoa kae neʼe mole hoko atu takotou ako ʼi te ʼu faleako lalahi? Hili kiai vāhaʼa e lua, neʼe fakamavae tona pule pea neʼe fetogi leva e te tahi age tagata pule. Neʼe ina fehuʼi age ki te tehina pe koteā ʼana fakatuʼutuʼu. Neʼe ʼui age e te tehina, ko ia mo tona ʼohoana, ko he ʼu Fakamoʼoni ʼa Sehova ʼe nā fai fakamafola temi kātoa pea ʼe nā ʼamusia age ke hoko atu tanā gāue ʼaia. Heʼeki ʼosi lelei tana palalau, kae neʼe ʼui fēnei age e te tagata pule ʼaia: “Neʼe au ʼiloʼi ʼe mole ke hagē ko ʼihi! ʼI te temi ʼaē neʼe ʼamanaki ai ke mate taku tamai, neʼe ʼomai te ʼu tuagaʼane e toko lua ʼo koutou, ʼo lau te Tohi-Tapu kiā ia ʼi te ʼaho fuli. Neʼe au fakapapau ai kapau ʼe feala ʼi he ʼaho ke au tokoni ki he Fakamoʼoni ʼa Sehova, pea ʼe au fai anai.” ʼI te ʼaho ake, neʼe foaki age ki te tehina te gāue ʼaē neʼe mole fia foaki age e tona ʼuluaki pule. Koia kapau ʼe tou fakamuʼamuʼa te Puleʼaga ʼi totatou maʼuli, pea ʼe fakahoko anai e Sehova tana fakapapau ʼaē ke ina foaki mai te ʼu meʼa fuli ʼaē ʼe ʼaoga kiā tātou.—Mat. 6:33.
ʼE TONU KE TOU MAʼU TE TUI MO TE ʼAMANAKI
17. Koteā anai kā tokoni mai ke mole tou tuʼaniaʼi te kā haʼu?
17 ʼE tokoni mai Tavite ke tou mahino ki te maʼuhiga ʼaē ke tou maʼu te tui pea mo te ʼamanaki. Kiā ia, neʼe mole feala ia ke ina maʼu te ʼamanaki mo kanapau neʼe mole ina maʼu te tui ʼi tana “sio . . . ki te agalelei o [Sehova].” (Pes. 27:13) ʼE feafeaʼi anai totatou maʼuli mo kanapaulā neʼe mole foaki mai e te ʼAtua he ʼamanaki pea mo tou mole ʼiloʼi te ʼu manatu ʼaē ʼe talanoa kiai ia Pesalemo 27? Koia ʼi te ʼu ʼaho fakamuli ʼaenī, ʼe ʼaoga ke tou haga kole kiā Sehova ke ina foaki mai te mālohi pea ke ina haofaki tātou ʼi Halamaketone.—Lau ia Pesalemo 27:14.
[ʼU fehuʼi ʼo te ako]
[Paki ʼo te pāsina 23]
Neʼe lotomālohi Tavite ʼi tana manatuʼi te ʼu lakaga ʼaē neʼe haofaki ai ia ia e Sehova
[Paki ʼo te pāsina 25]
Kā tou faigataʼaʼia ʼi te faʼahi ʼo te paʼaga, ʼe ko he faigamālie koa ʼaia kiā tātou ke lahi age tatatou fai fakamafola?
