Tou Ako Mai Te Folafola ʼa Te ʼAtua

Koteā Kā Hoko Anai Ki Te ʼu Lotu?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai ʼona tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. ʼE lelei koa ia te ʼu lotu fuli?

ʼE mahino ia, ʼe maʼu ʼi te ʼu lotu fuli ia te ʼu hahaʼi ʼe tauhi fakamālotoloto, pea ʼe mole galoʼi nātou e te ʼAtua. Kae meʼa fakaʼofaʼofa foki heʼe fakaʼaogaʼi e ʼihi ia te lotu ki he ʼu fakatuʼutuʼu kovi. ʼI te temi muʼa, neʼe gaohi koviʼi e te kau takitaki lotu ia tanatou hahaʼi. (2 Kolonito 4:3, 4; 11:13-15) Iā ʼaho nei, ohagē ko tatatou sisio ʼi te tala logo, ʼe fakaneke e ʼihi kau takitaki lotu ia te fakahoko agatuʼu, peʼe ko te lagolago ʼaē ki te tau, peʼe natou fakaʼalikiʼi ia te kau tamaliki.—Lau ia Mateo 24:3-5, 11, 12.

ʼE akoʼi ʼi te Tohi-Tapu ʼe ko faʼahiga lotu e lua: te lotu moʼoni pea mo te lotu hala. ʼE mole akoʼi e te lotu hala ia te moʼoni ʼo ʼuhiga mo te ʼAtua. Kae, ʼe loto e Sehova ʼAtua ke ʼiloʼi e te hahaʼi ia te moʼoni ʼo ʼuhiga mo ia.—Lau ia 1 Timoteo 2:3-5.

2. Koteā ʼaē kā hoko anai ki te ʼu lotu?

ʼE mole loto e te ʼAtua ke lotomamahi ia te hahaʼi ʼuhi ko te ʼu lotu ʼaē ʼe natou lau ʼe natou tauhi kiā te ia kae ʼe mole natou ako te moʼoni ʼo ʼuhiga mo ia. ʼI tona fakahagatonu, ko nātou ʼaē ʼe kau ki te ʼu lotu ʼaia ʼe natou fia fakakaumeʼa mo te mālamanei ʼaē ʼe puleʼi e Satana te Tiapolo. (Sakopo 4:4; 1 Soane 5:19) ʼE fakatatau ʼi te Tohi-Tapu ia te filifili faʼifaʼitaliha e te ʼu lotu ke natou fakalogo ki te ʼu hau ʼo te kele kae mole ki te ʼAtua, ki te fai feʼauʼaki ʼa he fafine. ʼE fakahigoaʼi ʼi te Folafola ʼa te ʼAtua ia te fafine fai feʼauʼaki ʼaia ko “Papilone lahi,” te kolo ʼāfea ʼaē neʼe kamata ai te lotu hala ʼi te hili ʼo te Lōmaki ʼi te temi ʼo Noe. Kua vave hoko mai te temi ʼaē kā tauteaʼi ai e te ʼAtua ia te ʼu lotu ʼaē ʼe natou fakalotomamahiʼi pea mo fakapōpulaʼi ia te hahaʼi.—Lau ia Apokalipisi 17:1, 2, 5, 17; 18:8, 23, 24.

  3. ʼE foaki feafeaʼi anai e te ʼAtua ia te fiafia ki te hahaʼi fuli?

Ko te fakamāu ʼaē kā hoko anai ki te lotu hala ʼe ko he logo lelei, heʼe ina fakaʼāteaina anai te mālamanei kātoa mai tonatou fakapōpulaʼi. ʼE mole toe fakamaveuveu pea mo fakahalaʼi anai e te lotu hala ia te hahaʼi. Pea ʼe natou tauhi anai ʼi te logo tahi ki te ʼAtua moʼoni pē e tahi.—Lau ia Esaia 11:9; Apokalipisi 18:20, 21; 21:3, 4.

4. Koteā ʼaē ʼe tonu ke fai e te hahaʼi ʼaē ʼe fakamālotoloto?

ʼE mole galoʼi e Sehova ia te hahaʼi fakamālotoloto ʼaē ʼe mavetevete ʼi te ʼu lotu hala ʼo te mālamanei. ʼE ina lolotoga fakatahiʼi ia te hahaʼi ʼaia ʼi te logotahi ʼaki ia tana akoʼi age kiā nātou ia te moʼoni.—Lau ia Mikea 4:2, 5.

ʼE fakaafe mai e Sehova ki tona fāmili ia nātou fuli ʼaē ʼe natou fia tauhi age kiā te ia. Tatau aipē pe mole leleiʼia e ʼotatou kaumeʼa pea mo totatou fāmili ia tatatou tauhi ʼaē kiā Sehova, kae ʼe lahi age ia te ʼu lelei ʼaē ʼe tou maʼu mai ai. ʼE tou maʼu ai he ʼu felōgoi lelei mo te ʼAtua, mo hotatou tahi fāmili ʼe maʼu lahi ai ia te ʼofa, pea mo te ʼamanaki ʼaē ki te maʼuli heʼegata.—Lau ia Maleko 10:29, 30; 2 Kolonito 6:17, 18.

Kapau ʼe kotou fia maʼu he tahi ʼu fakamahino, vakaʼi te ʼu kāpite 15 pea mo te 16 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.

[Haʼuʼaga ʼo te paki pāsina 26]

The Complete Encyclopedia of Illustration/J. G. Heck