“Ko ia ae e ina fetogi te u temi mo te u aluaga o te u mea; ko ia ae e ina fakahifo mo ina fakanofo te hau.”—TAN. 2:21.

ʼE KOTOU TALI FEAFEAʼI ANAI?

ʼE hā feafeaʼi ʼi te fakatupu pea mo te fakahoko ʼo te ʼu lea fakapolofetā ʼe ko Sehova te Pule Lahi ʼo Te Temi?

Koteā ʼaē kā tou fai anai ʼi tatatou ʼiloʼi ʼaē ko Sehova ʼe ko te ʼAtua ʼo “te u temi mo te u aluaga o te u mea”?

He koʼē ʼe fakahoko e Sehova he ʼu ʼaluʼaga ʼi te temi ʼaē kua ina fakakatofa kiai, tatau aipē pe koteā ʼaē ʼe hoko ʼi te mālamanei pea mo te ʼu fakatuʼutuʼu ʼa te tagata?

1, 2. He koʼē ʼe mahino kātoa ia Sehova ki te temi?

 FUALOA ʼi muʼa ʼo tana fakatupu te tagata, neʼe faʼu e Sehova ʼAtua te ʼu mālama moʼo vaheʼi te temi. ʼI te fā ʼaho ʼo te fakatupu, neʼe ʼui fēnei e te ʼAtua: “Ke ha ni mea malama i te lagi ke vahei te aho mo te pouli; ke tuu te u malama aena ko ni fakailoga o te temi, mo te u aho, mo te u tau.” (Sen. 1:14, 19, 26) ʼE mahino ia neʼe hoko te ʼu faʼahi ʼaia ʼo mulimuli ki te finegalo ʼo Sehova.

² Kae ʼo kaku mai kiā ʼaho nei, ko te hahaʼi popoto ʼe mole natou lava fakamahino pe koteā te temi. ʼE ʼui fēnei ʼi te tohi: “ ʼE kau te temi ki te ʼu faʼahi ʼi te mālamanei ʼaē ʼe ko he misitelio. ʼE mole he tahi ʼe feala ke ina fakamahino lelei peʼe koteā.” Kae kiā Sehova, ʼe mahino kātoa ia kiai, he “nee ina fakatupu te atu lagi, . . . nee ina fau ia te kele, nee ina fai ia ia.” Pea ʼe ina toe “fakaha mai te kamataaga te mea ae e tonu ke hoko, pea mai mamao te mea ae e heeki hoko.” (Esa. 45:18; 46:10) Ke mālohi tatatou tui kiā te ia pea mo tana Folafola, te Tohi-Tapu, tou vakaʼi peʼe hā feafeaʼi ʼi te fakatupu pea mo te fakahoko ʼo te ʼu lea fakapolofetā ʼe ko Sehova te Pule Lahi ʼo Te Temi.

ʼE MĀLOHI TATATOU TUI ʼAKI TE ʼU MEʼA ʼAĒ NEʼE FAKATUPU

3. He koʼē ʼe feala ke tou ʼui ʼe mulimuli lelei pē te ʼu meʼa ʼi te ʼatulaulau ki te temi ʼaē kua fakakatofa kiai?

³ Ko meʼa fuli ʼo te ʼatulaulau ʼe mulimuli lelei pē ki te temi ʼaē kua fakakatofa kiai. Ohagē lā, ko te feʼoloʼaki ʼo te ʼu fetuʼu, mo te māhina pea mo te kele. Kua ʼiloʼi fakatomuʼa tonatou tuʼuʼaga ʼi te lagi, pea neʼe feala ai ke ʼiloʼi te ʼu fasigā taʼu pea mo te faifolau ʼo te kauvaka. Neʼe fakatupu e Sehova te ʼu faʼahi ʼaia ʼaki “tona malohi lahi” pea ʼe tāu mo feʼauga ke tou vikiʼi.—Lau ia Esaia 40:26.

4. ʼE hā feafeaʼi te poto ʼa te ʼAtua ʼi te ʼu meʼa maʼuli ʼi te kele ʼaē ʼe mulimuli lelei pē ki te temi ʼaē kua fakakatofa kiai?

⁴ Ko meʼa maʼuli fuli ʼi te kele ʼe mulimuli lelei pē ki te  temi ʼaē kua fakakatofa kiai. Ko te ʼulu ʼakau pea mo te ʼu manu ʼe natou hagē ko he ʼuasi, ohagē lā ko te moa tagata ʼe ʼuʼua ʼi te hola tolu māfoatā fuli (ʼaē ʼe ʼui ko te ʼuluaki moa). Pea ko te ʼu fonu ʼe natou ʼiloʼi pē te temi ʼaē ʼe tonu ke natou fakatō ai, ʼo toe fēia pē mo te ʼu manu lele, ʼe natou toe ʼiloʼi te temi ʼaē ʼe tonu ke natou ʼolo ai ki he tahi koga meʼa pea mo toe liliu mai. (Sel. 8:7) Pea ko te tagata ʼe toe mulimuli lelei pē ki te ʼu hola ʼaē kua fakakatofa ki ai. Ohagē lā, ʼe logoʼi e totatou sino mokā kua ʼuhu peʼe kua pōʼuli. Kā tou folau ki he koga meʼa mamaʼo, ʼe lagi ʼaoga he ʼu ʼaho ke feala ki totatou sino ke mulimuli ki te ʼu hola ʼo te koga meʼa ʼaia. Koia, ʼe hā mai ʼi te ʼu faʼifaʼitaki ʼaia te mālohi pea mo te poto ʼa te ʼAtua ʼo “te u temi mo te u aluaga o te u mea.” (Lau ia Pesalemo 104:24.) ʼE moʼoni, ko te Pule Lahi ʼo Te Temi ʼe lahi ʼaupitō tona poto pea mo tona māfimāfi. ʼE feala ke tou tui ʼe ina lava fakahoko te meʼa ʼaē ʼe loto kiai!

ʼE MĀLOHI TATATOU TUI ʼAKI TE FAKAHOKO ʼO TE ʼU LEA FAKAPOLOFETĀ ʼI TONA TEMI TOTONU

5. (1) Koteā ʼaē ʼe tonu ke tou vakaʼi ke tou ʼiloʼi ai te kā haʼu ʼo te mālamanei? (2) He koʼē ʼe feala kiā Sehova ke ina fakakikite te ʼu meʼa ʼaē kā hoko pea mo te temi ʼaē kā hoko ai?

⁵ ʼAki te ʼu meʼa ʼaē neʼe fakatupu, ʼe tou lava ako ai “te ʼu lelei fakapulipuli” ʼo ʼuhiga mo Sehova. Kae ʼe mole feala hatatou maʼu ai he ʼu tali ki te ʼu fehuʼi maʼuhiga, ohagē lā pe koteā anai te kā haʼu ʼo te mālamanei? (Loma 1:20) Moʼo tali kiai, ʼe tonu ke tou vakaʼi pe koteā ʼaē neʼe fakahā e te ʼAtua ʼi tana Folafola, te Tohi-Tapu. ʼE tou maʼu ai te ʼu lea fakapolofetā neʼe hoko tuʼumaʼu pē ʼi tona temi totonu. ʼE feala ke fakahā e Sehova te meʼa ʼaē kā hoko heʼe ina lava ʼiloʼi fakatomuʼa te kā haʼu. Pea ko te ʼu fakakikite Fakatohi-tapu ʼe hoko ʼi tona temi totonu heʼe feala kiā Sehova ke ina fakahoko he ʼu ʼaluʼaga ʼi te temi ʼaē kua ina fakakatofa kiai pea mo mulimuli ki tana fakatuʼutuʼu.

6. Koteā ʼaē ʼe hā ai ʼe loto e Sehova ke tou mahino ki te fakahoko ʼo te ʼu lea fakapolofetā ʼi te Tohi-Tapu?

⁶ ʼE loto e Sehova ke mahino ʼana kau ʼatolasio ki te ʼu lea fakapolofetā ʼi te Tohi-Tapu pea mo ʼaoga kiā nātou. ʼE mole tatau te faʼahiga sio ʼa te ʼAtua ki te temi mo tatatou faʼahiga sio, kae kā ina fakakikite he ʼaluʼaga kā hoko anai ʼi hona temi totonu, pea ʼe feala hatatou mahino ki te ʼu kupu ʼaē ʼe ina fakaʼaogaʼi. (Lau ia Pesalemo 90:4.) Ohagē lā, ʼe talanoa ʼi te tohi ʼo Apokalipisi ki “te u aselo e fa ae kua teuteu ki te hola, mo te aho, mo te mahina pea mo te tau” pea ʼe ko te ʼu kupu ʼe tou mahino kiai. (Apk. 9:14, 15) Kā tou mahino pe neʼe hoko feafeaʼi te ʼu lea fakapolofetā ʼi tona temi totonu pea ʼe tou tui ai ki te ʼAtua ʼo “te u temi mo te u aluaga o te u mea” pea mo tana Folafola. Tou vakaʼi he ʼu lea fakapolofetā.

7. Koteā ʼaē ʼe hā ai ko Sehova ʼe ko te Pule Lahi ʼo Te Temi ʼi te hoko ʼaē ʼo te lea fakapolofetā ʼa Selemia ʼo ʼuhiga mo Selusalemi pea mo Suta?

⁷ ʼUluaki tou vakaʼi te meʼa ʼaē neʼe hoko ʼi te ʼu taʼu e 600 tupu ʼi muʼa atu ʼo Kilisito. “I te tau fa o Sosakimi, hau o Suta, foha o Sosiasi,” ko te folafola ʼo te Pule Lahi ʼo Te Temi neʼe “tuku leva . . . kia Selemia o uhiga mo te hahai katoa o Suta.” (Sel. 25:1) Neʼe fakakikite e Sehova te fakaʼauha ʼo Selusalemi pea mo te ʼave ʼa te kau Sutea mai te fenua ʼo Suta ki Papilone. Pea ʼe natou “popula anai . . . ki te hau o Papilone ia tau e fitugofulu.” ʼI te taʼu 607 ʼi muʼa ʼo totatou temi, neʼe fakaʼauha e te fua tau Papilone ia Selusalemi pea neʼe ʼave ai te kau Sutea mai Suta ki Papilone. Kae koteā ʼaē neʼe tonu ke hoko ʼi te fakaʼosi ʼo te ʼu taʼu e 70? Neʼe fakakikite fēnei e Selemia: “Koeni te mea ae e fakaha e te Eteleno: Ka hili anai ni tau e fitugofulu o Papilone, e au toe manatui anai kia koutou, pea e au fakahoko anai kia koutou taku folafola lelei, o au toe aumai anai koutou ki te kogamea aeni.” (Sel. 25:11, 12; 29:10) Neʼe hoko te lea fakapolofetā ʼaia ʼi tona temi totonu,  ʼi te taʼu 537 ʼi muʼa ʼo totatou temi ʼi te ʼosi fakaʼāteainaʼi e te kau Meti mo te kau Pelesi ia te kau Sutea mai Papilone.

8, 9. ʼE hā feafeaʼi ʼi te ʼu lea fakapolofetā ʼa Taniela ʼo ʼuhiga mo te hā ʼo te Mēsia pea mo te fakatuʼu ʼo te Puleʼaga ʼi selō ko Sehova ʼe ko te ʼAtua ʼo “te u temi mo te u aluaga o te u mea”?

⁸ Tou vakaʼi te tahi lea fakapolofetā ʼe toe pipiki kiai te hahaʼi ʼa te ʼAtua ʼo te temi muʼa. Iā teitei taʼu e lua ʼi muʼa ʼo te mavae ʼa te kau Sutea ʼi Papilone, neʼe fakakikite e te ʼAtua ʼaki te polofetā ko Taniela ʼe hā anai te Mēsia hili taʼu e 483 ʼi te ʼosi fai ʼo te fakatotonu ʼaē ke toe laga ia Selusalemi. Ko te fakatotonu ʼaia neʼe fai e te hau ʼo Meti mo Pelesi ʼi te taʼu 455 ʼi muʼa ʼo totatou temi. Pea hili kiai taʼu e 483, ʼi te taʼu 29 ʼo totatou temi, neʼe papitema Sesu ʼo Nasaleti pea neʼe fakanofo leva ʼaki te laumālie māʼoniʼoni. Neʼe liliu ai ʼi te temi totonu ʼaia ko te Mēsia. a—Nee. 2:1, 5-8; Tan. 9:24, 25; Luka 3:1, 2, 21, 22.

⁹ Kotou tokagaʼi pe koteā ʼaē neʼe fakakikite ʼi te Tohi-Tapu ʼo ʼuhiga mo te Puleʼaga. Neʼe fakahā ʼi te lea fakapolofetā ʼe fakatuʼu anai te Puleʼaga Fakamēsia ʼi selō ʼi te taʼu 1914. Ohagē lā ʼe talanoa ʼi te Tohi-Tapu ki te “fakailoga” ʼo te toe liliu mai ʼa Sesu, peʼe ko tana ʼi henī, pea mo te hoko ʼo te toe malaʼia lahi ki te kele he neʼe kapu ifo Satana mai lagi ʼi te temi ʼaia. (Mat. 24:3-14; Apk. 12:9, 12) Pea neʼe toe fakahā ʼi te lea fakapolofetā ʼi te Tohi-Tapu ko “te katoa o te temi o te u puleaga” neʼe hoko ʼi te taʼu 1914 pea neʼe kamata ai te pule ʼa te Puleʼaga.—Luka 21:24; Tan. 4:10-17. b

10. Ko te ʼu faʼahi fea ʼaē kā hoko moʼoni anai ʼi tona temi totonu?

¹⁰ Kua vave hoko pē te “mamahi lahi” ʼaē neʼe fakakikite e Sesu. Pea ʼe hoa anai kiai tana ʼAfio Iā Taʼu e Afe. Koia ʼe hoko moʼoni anai te ʼu faʼahi ʼaia ʼi tona temi totonu. ʼI te maʼuli ʼa Sesu ʼi te kele, neʼe kua fakatuʼutuʼu e Sehova “te aho pea mo te hola” ʼaē ʼe tonu ke hoko ai te ʼu faʼahi ʼaia.—Mat. 24:21, 36; Apk. 20:6.

TOU TOTOGI TE TEMI

11. Koteā ʼaē ʼe tonu ke tou fai ʼi tatatou ʼiloʼi ʼaē ʼe tou māʼuʼuli ʼi te temi fakamuli?

¹¹ Koteā ʼaē ʼe tonu ke tou fai ʼi tatatou ʼiloʼi ʼaē kua kamata pule ia te Puleʼaga ʼo Kilisito pea ʼe tou māʼuʼuli nei ʼi “te temi fakamuli”? (Tan. 12:4) Tokolahi ʼe natou sio ki te kua ʼāʼāsili kovi ʼo te ʼu ʼaluʼaga ʼi te mālamanei kae ʼe mole mahino kiā nātou ʼe ko te fakahoko ʼaia ʼo te ʼu lea fakapolofetā ʼi te Tohi-Tapu ʼo ʼuhiga mo te ʼu ʼaho fakamuli. ʼI tanatou manatu ʼe lagi hoko anai he ʼu maveuveu ʼi te mālamanei peʼe fakatuʼu anai te “tokalelei mo te fimalie” ʼaki te ʼu faiga ʼa te tagata. (1 Tes. 5:3) Kae ʼe feafeaʼi kiā tātou? Kapau ʼe tou fakamoʼoni ʼe tou māʼuʼuli ʼi te ʼu ʼaho fakaʼosi ʼo te mālama ʼa Satana, pea ʼe mole tonu koa lā ke tou faiga ʼi te temi ʼaē  kei toe, ke tou tauhi ki te ʼAtua ʼo “te u temi mo te u aluaga o te u mea” pea mo tokoni ki te hahaʼi ke natou ʼiloʼi ia ia? (2 Tim. 3:1) ʼE tonu ke tou fai he ʼu puleʼaki lelei ʼo ʼuhiga mo tatatou fakaʼaogaʼi totatou temi.—Lau ia Efeso 5:15-17.

12. Koteā ʼaē ʼe feala ke tou ako mai te fakamatala ʼa Sesu ʼo ʼuhiga mo te temi ʼo Noe?

¹² ʼI he mālama ʼe lahi ai te ʼu fakalelu, ʼe mole faigafua hatatou “totogi te temi.” Neʼe fai e Sesu te fakatokaga ʼaenī: “Ko te mea ae nee hoko i te temi o Noe e toe hoko anai i te toe liliu mai [“te ʼi henī,” MN] o te Foha o te tagata.” Neʼe feafeaʼi koa te temi ʼo Noe? Neʼe fakakikite e te ʼAtua ʼe fakaʼauha anai te hahaʼi agakovi ʼo te temi ʼaia, pea mo natou mamate anai ʼi te tulivio. Ko Noe, ʼaē neʼe ko “te tagata faiakonaki . . . o te faitotonu” neʼe agatonu ʼo tala te logo ʼa te ʼAtua ki te hahaʼi ʼo tona temi. (Mat. 24:37; 2 Pet. 2:5) Kae “nee kai mo inu te u tagata, pea nee natou ohoana mo fakaohoana anatou fanau, . . . pea nee mole pe natou amanaki ki he mea, o kaku ki te to a te lomaki, o ave ia natou fuli.” Koia lā ʼaē neʼe fai ai e Sesu te fakatokaga ʼaenī ki ʼana tisipulo: “Ke kotou nofo teuteu, koteuhi e hau anai te Foha o te tagata i te hola ae e mole kotou talitali ki ai.” (Mat. 24:38, 39, 44) ʼE tonu ke tou hagē ko Noe kae mole ko te hahaʼi ʼo tona temi. Koteā ʼaē kā tokoni mai anai ke tou nonofo teuteu?

13, 14. ʼI tatatou fakatalitali ki te haʼu ʼo te Foha ʼo te tagata, koteā ʼaē ʼe ʼaoga ke tou manatuʼi ʼo ʼuhiga mo Sehova ke feala ai hatatou tauhi agatonu kiā te ia?

¹³ Logolā ʼe haʼu anai te Foha ʼo te tagata ʼi he temi ʼe mole tou ʼamanaki kiai, kae ʼe ʼaoga ke tou manatuʼi ko Sehova ʼe ko te Pule Lahi ʼo Te Temi. ʼE feala pē kiā Sehova ke ina fakahoko he ʼu ʼaluʼaga ʼi te temi ʼaē kua ina fakakatofa kiai, tatau aipē pe koteā ʼaē ʼe hoko ʼi te mālamanei pea mo te ʼu fakatuʼutuʼu ʼa te tagata. (Lau ia Taniela 2:21.) ʼE ʼui fēnei iā Taaga Lea 21:1: “Ko te loto o te hau ko he vaitafe i te nima o te Eteleno; e ina fulihi ia ki te u kogamea fuli e loto ia ki ai.”

¹⁴ ʼE feala kiā Sehova ke ina fakaʼaogaʼi he ʼu ʼaluʼaga moʼo fakahoko te meʼa ʼaē ʼe loto kiai ʼi tona temi totonu. ʼE lahi te ʼu fetogi ʼi te mālamanei ʼe natou fakahoko te ʼu lea fakapolofetā, tāfito ʼo ʼuhiga mo te fakamafola ʼo te logo lelei ʼo te Puleʼaga ʼo te ʼAtua ʼi te kele kātoa. Ohagē lā kotou fakakaukauʼi muʼa te ʼu meʼa ʼaē neʼe hoko ʼi te ʼu fenua ʼaē neʼe puleʼi e te kau takitaki aga fefeka pea mo te kau Kominisi. Tokosiʼi te hahaʼi neʼe mole natou ʼamanaki ʼe hoko fakavilivili anai he ʼu toe fetogi lahi fēia ʼi te faʼahi fakapolitike. Kae ʼaki te ʼu fetogi ʼaia, kua feala ʼi te temi nei ke fakamafola te logo lelei ʼi te ʼatu fenua ʼaē neʼe tapuʼi ai tatatou gāue. Koia tou faiga ke tou totogi te temi faigamālie ke tou tauhi agatonu ai ki te ʼAtua ʼo “te u temi mo te u aluaga o te u mea.”

TOU TUI ʼE FAKAHOKO E SEHOVA TANA FAKATUʼUTUʼU ʼI TONA TEMI TOTONU

15. ʼE feafeaʼi hatatou fakahā ʼe tou tui ki te ʼu fetogi ʼaē ʼe fai e te kautahi ʼa Sehova?

¹⁵ Ke feala hatatou hoko atu te fakamafola ʼo te Puleʼaga ʼi te ʼu ʼaho fakamuli ʼaenī, ʼe maʼua ke tou tui ʼe fakahoko e Sehova tana fakatuʼutuʼu ʼi tona temi totonu. Ko te hoko ʼo te ʼu fetogi ʼi te mālamanei, ʼe lagi ʼaoga ai ke fai mo he ʼu fetogi ʼi te gāue ʼaē ko te fai ʼo ni tisipulo. ʼI ʼihi temi, ʼe lagi fai e te kautahi ʼa Sehova he ʼu fetogi moʼo tokoni ki tatatou fakamafola te Puleʼaga. ʼE tou fakahā tatatou tui ki te ʼAtua ʼo “te u temi mo te u aluaga o te u mea” ʼaki tatatou lagolago kātoa ki te ʼu fetogi ʼaia, pea mo tou tauhi agatonu ʼo fakalogo ki tona ʼAlo, te “pule o te Ekelesia [“te kōkelekāsio,” MN].”—Efe. 5:23.

16. He koʼē ʼe feala ke tou tui ʼe foaki mai anai e Sehova te tokoni ʼi tona temi totonu?

¹⁶ ʼE loto e Sehova ke tou faikole ʼi te temi fuli pē ʼaki he falala kātoa heʼe ina foaki mai anai “he tokoni i tona temi.” (Hep. 4:16, Tauhi Foou) ʼE mole fakamoʼoni ai koa tana tokaga ʼofa ʼaē kiā tātou takitokotahi? (Mat. 6:8; 10:29-31) ʼE tou fakahā tatatou tui kiā  Sehova ʼAtua mokā ʼe tou kole tuʼumaʼu tana tokoni pea mo tou mulimuli foki ki te ʼu faʼahi ʼaē neʼe tou faikoleʼi pea mo tana takitaki. Pea tou toe manatuʼi ke tou hūfakiʼi ʼotatou tehina mo tuagaʼane.

17, 18. (1) Koteā ʼaē kā vave fai e Sehova ki ʼona fili? (2) Koteā te manatu ʼaē ʼe mole tonu ke tou maʼu?

¹⁷ ʼE mole ko te temi ʼaenī ke tou “lotolotolua . . . i he tui gataa” kae ke fakamālohiʼi tātou e te tui. (Loma 4:20) Ko te ʼu fili ʼo te ʼAtua, ia Satana pea mo nātou ʼaē ʼe ina puleʼi, ʼe natou faiga ke tāʼofi te gāue ʼaē neʼe foaki e Sesu ki ʼAna tisipulo, ohagē lā ko tātou. (Mat. 28:19, 20) Logolā te ʼohofi ʼo tātou e te Tēvolo, kae ʼe tou ʼiloʼi ko Sehova ʼe ko “te Atua mauli, ae ko te Fakamauli o te tagata fuli, kae tafito te hahai tui.” ʼE ina “iloi . . . te fakamauli o te u tagata maonioni mai te ahiahi.”—1 Tim. 4:10; 2 Pet. 2:9.

¹⁸ Kua vave fakaʼauha e Sehova te tuʼu ʼo te ʼu faʼahiga meʼa agakovi ʼaenī. Tatau aipē pe mole tou ʼiloʼi te ʼu meʼa fuli ʼaē kā hoko anai pea mo tona temi totonu, kae ʼe tou ʼiloʼi ʼe molehi anai e Kilisito te ʼu fili ʼo te ʼAtua ʼi tona temi totonu pea ʼe fakalakatonuʼi anai te pule faʼitaliha ʼa Sehova. Koia ʼe fua kovi anai kiā tātou mokā ʼe mole kei tou tokagaʼi “te u temi mo te u aluaga o te u mea” ʼaē ʼe tou māʼuʼuli ai! ʼOfa pē ke mole tou maʼu ʼi he temi te manatu ʼaē “e tuu aipe te u mea fuli o hage i te kamataaga o te fakatupu o te malamanei.”—1 Tes. 5:1; 2 Pet. 3:3, 4.

TOU TUKU TATATOU “AMANAKI” KI TE ʼATUA

19, 20. He koʼē ʼe tonu ke tou tuku tatatou ʼamanaki kiā Sehova?

¹⁹ Neʼe fakatuʼutuʼu e Sehova ʼAtua ʼi te kamata ke māʼuʼuli ʼo heʼegata te hahaʼi ke feala ai hanatou ʼiloʼi ia ia pea mo te ʼu meʼa fakatalakitupua ʼaē neʼe ina fakatupu. ʼE ʼui fēnei iā Ekelesiasi 3:11: “Kua ina fai [e Sehova] te u mea fuli ke matalelei i tona temi totonu. Kua ina tuku foki ki onatou loto te manatu o te mauli heegata, logo ai e mole feala ke mahino te tagata ki te gaue ae e fai e te Atua mai tona kamataaga o kaku ki tona fakaosi.”

²⁰ ʼE feala ke tou fiafia lahi ʼi te mole heʼeki fetogi e Sehova tana fakatuʼutuʼu maʼa te hahaʼi. (Mala. 3:6) Ko te ʼAtua “e mole toe fetogi pee mohu lakaga.” (Sakp. 1:17) Ko Sehova ʼe mole fetogi ia ʼaki te temi, heʼe “mai te heegata ki te heegata, e . . . Atua.” (Pes. 90:2) Koia tou tuku tatatou “amanaki” ki te ʼAtua. (Mik. 7:7) “Ke koutou loto toa, pea ke fakamalohii okotou loto, koutou fuli ae e amanaki lelei ki te Eteleno!”—Pes. 31:25 [31:24, MN].

[ʼU nota]

[ʼU fehuʼi ʼo te ako]

[Paki ʼo te pāsina 21]

Neʼe tui ia Taniela ki te fakahoko ʼo te lea fakapolofetā ʼaē neʼe fakahā age e te ʼAtua

[Paki ʼo te pāsina 23]

ʼE kotou fakaʼaogaʼi lelei koa tokotou temi moʼo fakahoko te finegalo ʼo Sehova?