Tou Ako Mai Te Folafola ʼa Te ʼAtua

He Koʼē ʼe ʼi Ai Te Kautahi ʼa Te ʼAtua?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai tona ʼu tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. He koʼē neʼe liliu ia te kau Iselaele ko te kautahi ʼa te ʼAtua?

Neʼe fakatuʼutuʼu e te ʼAtua mo te hōloga ʼo te pāteliaka ko Apalahamo ki he puleʼaga pea neʼe ina foaki kiā nātou ia te ʼu lao. Neʼe ina fakahigoaʼi ko te puleʼaga ʼo Iselaele pea neʼe ina tuku age ki te puleʼaga ʼaia ia te maʼua ʼaē ke natou puipui ia te tauhi moʼoni pea mo tana Folafola, ia te ʼu Tohi Taputapu. (Pesalemo 147:19, 20) Koia, neʼe fua lelei ki te hahaʼi ʼo te ʼu puleʼaga fuli pē.—Lau ia Senesi 22:18.

Neʼe filifili e te ʼAtua ia te kau Iselaele ke natou liliu ko ʼana kau fakamoʼoni. Neʼe fua lelei kiā nātou ia te ʼu lao ʼa te ʼAtua mo kapau ʼe natou fakalogo kiai. (Tetelonome 4:6) ʼAki tatatou ako ia te hisitolia ʼo te kau Iselaele, ʼe feala ke lahi age ia tatatou mahino ʼo ʼuhiga mo te ʼAtua moʼoni.—Lau ia Esaia 43:10, 12.

2. He koʼē ʼe faʼufaʼu ia te kautahi ʼaia e te kau Kilisitiano moʼoni?

ʼAki te temi, neʼe mole kei maʼu e Iselaele ia te ʼofa ʼo te ʼAtua pea neʼe fetogi ai leva e Sehova ia te puleʼaga ʼaia ʼaki te kōkelekāsio Fakakilisitiano. (Mateo 21:43; 23:37, 38) ʼI te temi muʼa, neʼe ko te kau Iselaele ia te kau fakamoʼoni ʼa te ʼAtua. Iā ʼaho nei, ko te kau Kilisitiano moʼoni ʼe ko te kau Fakamoʼoni ʼa Sehova.—Lau ia Gaue 15:14, 17.

Neʼe akoʼi e Sesu ki tana kau tisipulo ke natou gāue ohagē ko he kau fakamoʼoni ʼo ʼuhiga mo Sehova pea mo fai ni tisipulo ʼi te atu puleʼaga fuli. (Mateo 10:7, 11; 24:14; 28:19, 20) Kua vave fakahoko kātoa ia te gāue ʼaia. Iā ʼaho nei, kua fakatahi e Sehova ia te toko lauʼi miliona hahaʼi mai te atu puleʼaga kehekehe ʼi te tauhi moʼoni. (Apokalipisi 7:9, 10) Neʼe toe akoʼi e Sesu ia te kau Kilisitiano ʼi tonatou ʼuhiga kūtuga ke feala ai hanatou fakalotomālohiʼi pea mo tokoni ki niʼihi. ʼI te mālamanei kātoa, ʼe maʼu e te kau Fakamoʼoni ʼa Sehova ia he polokalama ako Fakatohi-tapu e tahi ʼi ʼanatou fono.—Lau ia Hepeleo 10:24, 25.

  3. ʼI totatou temi, neʼe kamata feafeaʼi ia te hisitolia ʼo te kau Fakamoʼoni ʼa Sehova?

ʼI totatou temi, neʼe kamata ia te hisitolia ʼo te kau Fakamoʼoni ʼa Sehova ʼi te ʼu taʼu 1870. Neʼe toe kamata fekumi e te kiʼi kūtuga ʼo te kau ako Tohi-Tapu ia te ʼu moʼoni Fakatohi-tapu neʼe kua puli. Neʼe natou mahino ai neʼe fakatotonu e Sesu ki te kōkelekāsio Fakakilisitiano ke natou fai fakamafola. Koia neʼe natou fakatuʼutuʼu ai ke natou fakamafola ia te Puleʼaga ʼi te mālamanei kātoa. ʼI te taʼu 1931, neʼe natou toʼo ai ia te higoa ʼaē ko te kau Fakamoʼoni ʼa Sehova.—Lau ia Gaue 1:8; 2:1, 4; 5:42.

4. ʼE fakatuʼutuʼu feafeaʼi ia te kau Fakamoʼoni ʼa Sehova iā ʼaho nei?

ʼI te ʼuluaki sēkulō, ko te ʼu kōkelekāsio Fakakilisitiano mai te ʼu fenua kehekehe neʼe ʼi ai tanatou kolesi pule ʼe fakalogo kiā Sesu, ia te Takitaki ʼo te kōkelekāsio. (Gaue 16:4, 5) ʼO toe fēia aipē iā ʼaho nei, ʼe fakalogo ia te kau Fakamoʼoni ʼa Sehova ki tonatou Takitaki, ia Sesu. (Mateo 23:9, 10) ʼE natou toe maʼu ia te takitaki mai he kau tagata ʼāfea fakapotopoto ʼo te Kolesi Pule ʼe natou foaki ia he ʼu fakalotomālohi Fakatohi-tapu pea mo natou takitaki ia kōkelekāsio e 100 000 afe tupu. ʼI te ʼu kōkelekāsio takitahi, ʼe maʼu ai ia te ʼu tehina fakapotopoto ʼe natou tagata ʼāfea, peʼe natou tagata taupau. Ko te ʼu tehina agaʼofa ʼaia ʼe natou tōkakaga ki te faga ovi ʼa te ʼAtua.—Lau ia 1 Petelo 5:2, 3.

ʼE fakatuʼutuʼu e te kau Fakamoʼoni ʼa Sehova ke natou fakamafola ia te logo lelei pea mo fai ni tisipulo. ʼI tanatou fia tokoni ki te faʼahiga hahaʼi kehekehe, ʼe natou fakaliliu, mo tā, pea mo tufa ia te ʼu tohi Fakatohi-tapu iā lea e 500 tupu. Ohagē ko te kau ʼapositolo, ʼe natou fai fakamafola ʼi te ʼu ʼapi. (Gaue 20:20) ʼE natou fai ia te ʼu ako Tohi-Tapu pea mo te hahaʼi ʼaē ʼe natou ʼoʼofa ki te moʼoni. Koteʼuhi ʼaē ko te hahaʼi ʼa Sehova ʼe natou fia fakafiafia ia tona loto pea mo tokoni ki niʼihi, ʼe ko nātou ko he kautahi ʼo he hahaʼi fiafia.—Lau ia Pesalemo 33:12; Gaue 20:35.

Kapau ʼe kotou fia maʼu he tahi ʼu fakamahino, vakaʼi te kāpite 19 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.