Ko Apalahamo—Ko He Tagata Lotomālohi

Neʼe fakalogo ia Apalahamo mo tona fāmili pea mo tana ʼu kaugana ʼo natou teuteu ke natou mavae ʼo ʼolo ki Kanaane. (Senesi 12:1-5) ʼI tana sio ʼaē ʼe fakalogo ia te maʼuli ʼo te hahaʼi tokolahi ʼaia kiā te ia, neʼe fakahoko fakalelei e Apalahamo ia tona ʼu maʼua kiā nātou. ʼE ina foaki feafeaʼi anai ia te ʼu meʼa ʼaē ʼe ʼaoga ki tonatou maʼuli fakasino kae mole ina ʼiloʼi lelei ia te fenua ʼaia? Koteā ia te ʼu gāue ʼaē neʼe foaki age kiā nātou ʼi muʼa atu ʼi Ulu, ia te koga meʼa maʼu koloa, ko he toe koga meʼa lunaʼia moʼo fafaga ai te faga manu, mo kele maʼuli pea mo lahi ai te vai ʼinu? Koteā anai kā hoko mo kapau ʼe mahaki peʼe mate ʼi te fenua ʼaia? Ko ai ʼaē kā tokaga anai ki tona fāmili? Kapau neʼe maʼu e Apalahamo ia te ʼu tuʼania ʼaia, kae neʼe mole ina tuku ia te mataku ke ina tāʼofi ia tana fai ia he ʼu tonu. Neʼe lototoʼa ke ina fakahoko ia te faʼahi ʼaia, ʼo fakalogo ki te ʼu fakatotonu ʼa te ʼAtua, tatau aipē peʼe mole ina ʼiloʼi ia tona ikuʼaga —ʼe ko he fakaʼiloga ʼaia ʼo te lotomālohi moʼoni.

KOTEĀ IA TE FAKAʼUHIGA ʼO TE LOTOMĀLOHI? ʼE ko te kalitātē ʼo he tahi ʼe mālohi, mo lototoʼa pea mo toʼa, ʼe kehekehe ia mo he tahi ʼe aga ufiufi peʼe hoko mataku. Ko he tahi ʼe lotomālohi ʼe mole fakaʼuhiga leva ʼe mole feala ke ina logoʼi ia te mataku. Logopē lā tana ʼu tuʼania, kae neʼe foaki age e te ʼAtua ia te lotomālohi ke ina fakahoko ia tona ʼu maʼua.

NEʼE FAKAHĀ FEAFEAʼI E APALAHAMO IA TONA LOTOMĀLOHI? Neʼe lotolelei ia Apalahamo ke fakafeagai ki te agaaga ʼo te fenua. Neʼe lahilahi ake ia Apalahamo ʼi te koga meʼa ʼe tauhi ai te hahaʼi ki te ʼu tuʼuga ʼatua pea mo te ʼu tuʼuga tamapua. Pea tahi ʼaē, neʼe mole tuʼania ʼo ʼuhiga mo te faʼahiga manatu ʼa te hahaʼi ʼo ʼuhiga mo ia ʼi tana ʼiloʼi ia te meʼa ʼaē ʼe totonu. Koia, neʼe lotomālohi ia Apalahamo ke kehe age ia tona faʼahiga maʼuli, ʼo ina filifili ke tauhi ʼāteaina pē ki te ʼAtua, “te Atua Maoluga,” ia Sehova.—Senesi 14:21, 22.

Neʼe fakatafito te tauhi ʼa Apalahamo ki te ʼAtua moʼoni kae mole ki te ʼu koloa fakamālama. Neʼe fakafisi ʼaki he lotomālohi ki tona faʼahiga maʼuli fīmālie ʼi Ulu, ʼo natou mavae ʼo ʼolo ki te toafa, ʼo natou falala kātoa ʼe foaki age anai e Sehova ia te ʼu meʼa ʼaē ʼe ʼaoga kiā nātou ʼi te faʼahi fakasino. Koia, hili kiai ni taʼu, neʼe lagi manatuʼi e Apalahamo ia tona maʼuli fīmālie ʼaē neʼe fiafia ai i ʼUlu. Kae neʼe ʼiloʼi papau e Apalahamo, ʼe foaki age anai e Sehova kiā ia pea mo tona fāmili ia te ʼu meʼa ʼaē ʼe ʼaoga kiā nātou. Ko tatatou pipiki ʼaē kiā Sehova, ia Ia ʼaē ʼe maʼuhiga ʼaupitō ʼi totatou maʼuli, neʼe fakatafito e Apalahamo ia tana lotomālohi ʼaki tana fakalogo ki te ʼu fakatotonu ʼa te ʼAtua.

KOTEĀ HE ʼU AKO MAʼA TĀTOU? ʼE feala ke tou faʼifaʼitakiʼi ia Apalahamo ʼo tou maʼu ia te lotomālohi ʼo tou fakalogo kiā Sehova, tatau aipē peʼe mole fai e ʼihi iā tātou ia te faʼahi ʼaia. Ohagē lā, ʼe akoʼi mai ʼi te Tohi-Tapu ko nātou ʼaē ʼe natou fakatafito ia tanatou tui kiā Sehova ʼAtua, ʼe lagi fakatagaʼi anai nātou e ʼonatou kaumeʼa peʼe ko ʼonatou fāmili. (Soane 15:20) Kā tou tui ki te ʼu meʼa ʼaē ʼe akoʼi mai ʼo ʼuhiga mo Sehova, ʼe feala ai ke tou tauʼi ia tatatou tui ʼaki he aga fakaʼapaʼapa.—1 Petelo 3:15.

 ʼE feala ke tou toe tui papau ki te fakapapau ʼa te ʼAtua ʼaē kā ina fakahoko anai kiā nātou ʼaē ʼe falala kiā te ia. ʼAki tanatou tui papau, ʼe ina foaki age anai kiā nātou ia te lotomālohi, neʼe natou fakamuʼamuʼa ʼi tonatou maʼuli ia te ʼu meʼa fakalaumālie kae mole ko te ʼu meʼa fakamālama. (Mateo 6:33) Tou tokagaʼi ia he faʼifaʼitaki ʼo he fāmili neʼe natou fai ia te faʼahi ʼaia.

Logolā neʼe kua nā toe lua, neʼe fakaʼamu ia Doug pea mo Becky ke nā ʼolo ki he koga meʼa ʼe ʼaoga lahi kiai he kau fai fakamafola ʼo te logo lelei ʼo te Tohi-Tapu. ʼI te hili ʼo tanā fai ia he ʼu fekumi loloto pea mo tanā faikole fakamālotoloto, neʼe nā fakatuʼutuʼu leva ke nā ʼolo ʼo mulimuli ki te ʼu fakatuʼutuʼu ʼaia. ʼE ʼui fēnei e Doug: “Neʼe mā lotomālohi ʼo toʼo tamā ʼu toe, ʼo matou ʼolo kae neʼe mole au ʼiloʼi lelei ia te ʼu faʼahiga ʼaluʼaga ʼe hoko anai kiā mātou. Kae ʼi muʼa ʼo tamā fai ia te tonu ʼaia, neʼe mā fai palalau ki te faʼifaʼitaki ʼo Apalahamo pea mo Sala. Tou fakakaukauʼi age muʼa ʼo ʼuhiga mo tanatou falala ʼaē kiā Sehova, pea mo tonatou mole liʼakina e Sehova, ʼe tokoni moʼoni mai anai kiā tātou.”

ʼO ʼuhiga mo tanatou nonofo ʼaē ʼi he fenua matāpule, ʼe ʼui fēnei e Doug: “Neʼe tapuakina mātou ʼi te ʼu ʼaluʼaga kehekehe.” ʼE ina fakamahino fēnei: “Mai tona ʼaluʼaga ʼaē ʼe faigafua age tomatou maʼuli, kua feala ai ke lahi ia te ʼu ʼaho ʼaē ʼe matou fakaʼaogaʼi fakatahi fakafāmili ki te fai fakamafola, mo te fai palalau pea mo ʼihi atu, pea mo tamā gaoʼi fakatahi mo te ʼu tama. ʼE ko he ʼāteaina ʼe tou logoʼi ʼe mole feala ke tohi ʼaki he ʼu kupu.”

Koia, ʼe mole feala ki te hahaʼi fuli ke natou fakatuʼutuʼu ke natou fai ia he ʼu fetogi lalahi fēia. Kae, ʼe feala kiā tātou fuli ke tou mulimuli ki te faʼifaʼitaki ʼo Apalahamo, ʼo tou fakamuʼamuʼa ia tatatou tauhi ʼaē ki te ʼAtua, ʼo tou tui papau ʼe lagolago mai anai kiā tātou. ʼI te temi ʼaē ʼe tou fai ai ia te faʼahi ʼaia, ʼe tou manatuʼi ai ia te ʼu tokoni ʼo te Tohi-Tapu ‘ke tou ʼui mālohi ai: ko te ʼAliki ia Sehova ko toku tokoni, ʼe mole au mataku anai ki he meʼa.’—Hepeleo 13:5, 6.

[Talanoa/Paki ʼo te pāsina 7]

Ko He Fafine ʼe Pipiki Ki Te ʼAtua Pea Mo Maʼuhiga

Neʼe ʼohoana ia Sala mo te tagata maʼuhiga ʼo te tui. Kae neʼe tuku mai e te fafine tui ʼaenī ia he faʼifaʼitaki lelei. Koia, ʼe talanoa tuʼa tolu ia te Tohi-Tapu ki tona higoa ohagē ko he fafine ʼe pipiki ki te ʼAtua ʼe ʼaoga ke faʼifaʼitakiʼi. (Esaia 51:1, 2; Hepeleo 11:11; 1 Petelo 3:3-6) Tatau aipē peʼe mole faʼa talanoa ia te Tohi-Tapu ki te fafine makehe ʼaia, kae ʼe feala ke tou tokagaʼi ia tona ʼu kalitātē.

Ohagē lā, tou fakatokagaʼi ia te faʼahiga tali e Sala ʼi te temi ʼaē neʼe fakahā age ki ai e Apalahamo ia te fakatotonu ʼa te ʼAtua ʼaē ke nā mavae ʼi Ulu. Neʼe feʼekeʼaki koa peʼe nā ʼolo ki fea pea koteā ia tona tupuʼaga? Neʼe tuʼania koa ʼo ʼuhiga mo te ʼu meʼa ʼaē ʼe ʼaoga kiā nātou ʼi te faʼahi fakasino? Neʼe ina logoʼi koa ia te lotomamahi ʼi tana ʼiloʼi ʼaē ʼe mavae mai tona ʼu kaumeʼa pea mo tona fāmili, ʼo mole ina ʼiloʼi peʼe natou toe fesioʼaki anai ʼāfea peʼe kailoa? ʼE mahino ia, neʼe lagi ina manatuʼi ia te ʼu faʼahi ʼaia. Kae, neʼe lotolelei ke mavae, he neʼe tui papau ʼe tapuakina anai ia ia e Sehova ʼi tana fakalogo.—Gaue 7:2, 3.

Neʼe mole gata ʼaki pē ko he kaugana ʼe fakalogo ki te ʼAtua, kae ko Sala neʼe ko he fafine ʼohoana lelei. Neʼe mole fakafeagai ki tona ʼohoana ʼo ʼuhiga mo te fakaʼaluʼalu ʼo te ʼu maʼua fakafāmili, neʼe fakaʼapaʼapa fakamālotoloto ia Sala ki tona ʼohoana, ʼo lagolago kiai ʼaki he lotolelei ki tana takitaki ia tonatou fāmili. ʼI tana fai ia te faʼahi ʼaia, neʼe hā ai ia tona ʼu kalitātē matalelei.—1 Petelo 3:1-6.

ʼE feala koa ke fua lelei ia te ʼu kalitātē ʼaia ki te ʼu fafine ʼohoana ʼo totatou temi? Neʼe ʼui fēnei e te fafine ʼe higoa ko Jill, kua taʼu 30 tupu ia tana fiafia ʼi te maʼuli nofo ʼohoana: “Neʼe tokoni mai ia te faʼifaʼitaki lelei ʼo Sala ke au palalau faʼifaʼitaliha pea mo fakahā ia taku manatu ki toku ʼohoana.” ʼE ina hoko atu fēnei: “ ʼO toe fēia aipē ʼi te temi nei, ki te takitaki ʼo te fāmili, ʼe fakalogo ki toku ʼohoana ia tana fai ia te tonu fakaʼosi. ʼI te temi ʼaē ʼe fai ai ia te tonu ʼaia, ko toku maʼua ʼe feala ke au fai ʼe ko taku gāueʼi ia te tonu ʼaia.”

ʼE malave mālohi ia te ʼu ako ʼe tou tāʼofi mai iā Sala: Logolā neʼe ko he fafine finemui, kae neʼe mole ina tuku ia tona finemui ke ina fakaliliu ia ia ko he tahi ʼe fialahi. (Senesi 12:10-13) Koia, neʼe lagolago ʼaki he agavaivai kiā Apalahamo ʼi te ʼu temi ʼaē neʼe lelei pea mo kovi ai ia tonatou maʼuli fakatahi. ʼE mahino ia, ko Apalahamo mo Sala, neʼe nā agatonu, mo agavaivai pea mo feʼofaʼofani ʼi tonā maʼuli fakataumātuʼa, ko he taumātuʼa neʼe tapuakina tokolua.