Neʼe Natou Fakatalitali Ki Te Mēsia

“Nee nofo te hahai mo amanaki, pea nee natou eke fuli i onatou loto o uhiga mo Soane, naʼa e ko ia ape, ia te Mesia.”—LUKA 3:15, TAUHI FOOU.

 1. Koteā te logo fakaofoofo ʼaē neʼe tala age e te ʼāselo ki te kau tagata tauhi ovi?

 KUA pōʼuli pea neʼe nonofo ʼi tuʼa ia te ʼu tagata tauhi ovi, ʼo natou leʼoleʼo tanatou faga ovi. Neʼe natou punamaʼuli ʼi te hā age ʼa te ʼāselo ʼa Sehova kiā nātou pea mo natou mālamagia ʼi te kolōlia ʼo te ʼAtua! Pea neʼe tala age e te ʼāselo ia te logo fakaofoofo ʼaenī: “ ʼAua naʼa kotou manavasiʼi, heʼe koʼenī ʼe au fakahā atu kiā koutou te logo lelei ʼo he fiafia lahi kā maʼu anai e te hahaʼi fuli, heʼe ʼi te ʼaho nei, . . . kua tupu maʼa koutou tokotou Fakamaʼuli, ʼe ko Kilisito te ʼAliki,” ia ia ʼaē kā liliu anai ko te Mēsia. ʼE maʼu anai e te kau tagata tauhi ovi ia te tamasiʼi ʼaia ʼi te kolo ʼe tuʼu ovi age, pea ʼe takoto ia ʼi te kaiʼaga manu. Fokifā pē, ko “te tokolahi ʼo te kautau ʼaē ʼi selō” kua natou fakavikiviki kiā Sehova ʼo natou ʼui fēnei: “Kolōlia ki te ʼAtua ʼi te ʼu potu tauʼaluga, pea tokalelei ʼi te kele ʼi te lotolotoiga ʼo te ʼu tagata ʼo te finegaloʼofa.”—Luka 2:8-14.

 2. Koteā te fakaʼuhiga ʼo te kupu “Mēsia,” pea ʼe lava ʼiloʼi feafeaʼi pe ko ai ia ia?

² ʼE mahino ia, ko te kau tagata tauhi ovi Sutea neʼe natou ʼiloʼi, ko te “Mēsia,” peʼe ko “Kilisito,” ʼe ko te “Fakanofo” ʼa te ʼAtua.” (Eke. 29:5-7) Kae neʼe natou lava ʼiloʼi feafeaʼi he tahi ʼu faʼahi ʼo ʼuhiga mo te Mēsia, pea mo natou fakalotoʼi ʼihi ko te tamasiʼi ʼaē neʼe talanoa ki ai ia te ʼāselo, ʼe ko ia anai te Mēsia ʼaē neʼe fakanofo e te ʼAtua? ʼE natou lava ʼiloʼi anai ia te faʼahi ʼaia, ʼaki tanatou vakavakaʼi ia te ʼu lea fakapolofetā ʼaē ʼe tuʼu ʼi te Koga Fakatohi-tapu Fakahepeleo, pea mo natou sivisivi peʼe ʼalutahi mo te ʼu gāue pea mo te maʼuli ʼa te tamasiʼi ʼaia.

He Koʼē Neʼe Fakatalitali Te Hahaʼi?

3, 4. ʼE feafeaʼi tatatou mahino ki te vaega ʼo Taniela 9:24, 25?

³ ʼI ni ʼu taʼu ki muli age, ʼi te temi ʼaē neʼe hā ai ia Soane Patita, neʼe feʼekeʼaki e ʼihi pe neʼe ko ia koa ia te Mēsia ʼi tanatou logo ʼaē ki tana ʼu palalau pea mo sisio ki tana ʼu gāue. (Lau ia Luka 3:15.) ʼE hā mai ai neʼe lagi mahino lelei ki ʼihi ia te lea fakapolofetā ʼo ʼuhiga mo te Mēsia, ʼaē neʼe talanoa kiā “vāhaʼa e  fitugofulu.” Kapau koia, neʼe feala hanatou ʼiloʼi te temi ʼaē neʼe tonu ke ʼasi ai ia te Mēsia. ʼE ʼui fēnei ʼi te tahi koga ʼo te lea fakapolofetā ʼaia: “Talu mai te palalau ʼaē neʼe fai ke toe fakatuʼu pea mo toe laga ia Selusalemi ʼo aʼu kiā Mēsia te Takitaki, ʼe ʼi ai anai vāhaʼa e fitu, pea mo vāhaʼa e onogofulu-mā-lua.” (Tan. 9:24, 25) ʼE manatu tahi te ʼu hahaʼi sivi Tohi-Tapu kehekehe ʼo ʼuhiga mo te ʼu vāhaʼa ʼaia, ʼe ko te ʼu vāhaʼa taʼu. Ohagē lā, ʼe tou lau ʼi te Tohi-Tapu, La Bible ʼa Pierre de Beaumont: “Kua fakakatofa te ʼu vāhaʼa taʼu e fitugofulu ki tau hahaʼi pea mo tou kolo tapu.”

⁴ Iā ʼaho nei, kua mahino te ʼu kaugana ʼa Sehova ko te ʼu vāhaʼa ʼaia e 69, peʼe ko te ʼu taʼu e 483 ʼaē iā Taniela 9:25, neʼe kamata ʼi te taʼu 455 ʼi muʼa ʼo totatou temi, ʼi te temi ʼaē neʼe fakagafua ai e te Hau Pelesia ko Atasease kiā Nehemia ke ina toe fakatuʼu pea mo toe laga ia Selusalemi. (Neh. 2:1-8) Neʼe ʼosi ia te ʼu vāhaʼa ʼaia hili taʼu e 483, ʼi te taʼu 29 ʼo totatou temi, ʼi te temi ʼaē neʼe papitema ai pea mo fakanofo ai ia Sesu ʼo Nasaleti e te laumālie māʼoniʼoni, ʼo liliu ai ko te Mēsia.—Mat. 3:13-17. a

 5. Ko te ʼu lea fakapolofetā fea ʼaē kā tou vakaʼi anai?

⁵ Tou vakaʼi age muʼa he tahi age ʼu lea fakapolofetā ʼo ʼuhiga mo te Mēsia neʼe hoko ʼi te temi ʼaē neʼe tupu ai ia Sesu, ʼi te kamataʼaga ʼo tona maʼuli, pea mo tana minisitelio. ʼE mahino papau ia, ʼe fakamālohi ai anai ia tatatou tui ki te folafola fakapolofetā ʼa te ʼAtua. ʼE toe maʼu ai foki mo he fakamoʼoni, ko Sesu neʼe ko ia moʼoni ia te Mēsia ʼaē neʼe fakatalitali ki ai te hahaʼi talu mai fualoa.

Neʼe Fakakikite Ia Te ʼu Meʼa ʼAē Neʼe Hoko ʼi Te Kamataʼaga ʼo Tona Maʼuli

 6. Kotou fakamahino pe neʼe hoko feafeaʼi ia Senesi 49:10.

⁶ Neʼe tonu ke hifo mai ia te Mēsia mai te telepī ʼo Suta, ʼi Iselaele. ʼI te ʼamanaki mate ʼa te pāteliaka ko Sakopo, neʼe ina tapuakiʼi tona ʼu foha, pea neʼe ina fai te ʼu folafola fakakikite ʼaenī: “Ko te tokotoko fakahau ʼe mole maliu kehe anai mai iā Suta, pea ko te tokotoko fakalagiaki ʼe mole maliu kehe anai mai te vaha ʼo tona ʼu vaʼe, ʼo kaku ki te haʼu ʼa Silo; pea ʼe ina maʼu anai te fakalogo ʼa te hahaʼi.” (Sen. 49:10) Tokolahi te hahaʼi sivi Tohi-Tapu Sutea ʼo te temi muʼa, neʼe natou fakaʼuhiga ia te ʼu folafola ʼaia ki te Mēsia. ʼO kamata mai te pule ʼa te Hau Sutea ko Tavite, ko te tokotoko fakahau (te tuʼi fakahau) pea mo te tokotoko fakalagiaki (te pule takitaki) neʼe maʼu ia ʼi te telepī ʼo Suta. Ko te kupu “Silo” ko tona fakaʼuhiga “Ko Ia ʼAē ʼe Ina Maʼu Ia Te Fealagia ʼAia.” ʼE gata anai te hōloga hau ʼo Suta iā “Silo,” ia ia ʼaē kā ina maʼu anai te tofiʼa hau ʼo talu ai, he neʼe ʼui e te ʼAtua kiā Setesiasi, te hau Sutea fakamuli, ko te pule ʼe foaki anai ki he tahi ʼe maʼua ke ina maʼu te tuʼulaga ʼaia. (Esk. 21:26, 27) ʼI te ʼosi mate ʼo Setesiasi, neʼe ko Sesu tokotahi pē ʼaē neʼe hifo mai te hōloga ʼo Tavite, ʼaē neʼe fai ki ai ia te fakapapau ʼaē ʼo ʼuhiga mo te pule hau. ʼI muʼa ʼo te tupu ake ʼa Sesu, neʼe ʼui fēnei e te ʼāselo ko Kapeliele: “ ʼE foaki anai e Sehova ʼAtua kiā te ia te hekaʼaga fakahau ʼo Tavite tana tamai, pea ʼe hau anai ia ki te ʼapi ʼo Sakopo ʼo talu ai, pea ko tona puleʼaga, ʼe mole ʼi ai anai hona gataʼaga.” (Luka 1:32, 33) ʼE mahino ia ko Silo neʼe ko Sesu Kilisito, ʼaē neʼe hifo mai te telepī ʼo Suta pea mai te hōloga ʼo Tavite.—Mat. 1:1-3, 6; Luka 3:23, 31-34.

 7. Neʼe ko te kolo fea ʼaē neʼe tonu ke tupu ai ia te Mēsia, pea he koʼē ʼe fakaofoofo ia te hoko ʼo te lea fakapolofetā ʼaia?

⁷ Neʼe tonu ke tupu ake ia te Mēsia ʼi te kolo ʼo Petelehemi. Neʼe tohi fēnei e te polofetā ko Mikea: “Ko koe, Ê Petelehemi ʼo Efalata, ia [koe] ʼaē ʼe veliveli ʼaupitō ke kau ʼi te ʼu lauʼi afe ʼo Suta, mai iā te koe ʼe haʼu anai ki tuʼa kiā te au, ia ia ʼaē ʼe tonu ke liliu ko te pule ʼo Iselaele, ʼaē ʼe maʼuli talu mai te ʼu temi ʼāfea, talu mai te ʼu ʼaho ʼo te ʼu temi [ʼe mole ʼiloʼi hona gataʼaga].” (Mik. 5:2) Neʼe tonu ke tupu ake ia te Mēsia ʼi te kolo Sutea ko Petelehemi, ʼaē neʼe fakahigoaʼi ʼāfea atu ko Efalata. Logolā ko Malia ia te faʼē ʼa Sesu pea mo tana tamai tauhi ko Sosefo, neʼe nā nonofo ʼi Nasaleti, kae ʼaki te fakatotonu ʼa te puleʼaga Loma ʼaē ke tahi ʼolo te hahaʼi ʼo tohi tona higoa ʼi te kolo ʼaē neʼe tupu ai, neʼe tonu ai leva ke nā ʼolo ki Petelehemi, te kolo ʼaē neʼe tupu ai leva ia Sesu ʼi te taʼu 2 ʼi muʼa ʼo totatou temi. (Mat. 2:1, 5, 6) ʼI  fakaofoofo leva ʼo te fakahoko ʼo te lea fakapolofetā ʼaia!

8, 9. Koteā ʼaē neʼe fakakikite ʼo ʼuhiga mo te tupu ake ʼa te Mēsia pea mo te ʼu ʼaluʼaga ʼaē neʼe hoko ʼi tana kua ʼosi tupu ake?

⁸ Neʼe tonu ke fānauʼi ia te Mēsia e he taʼahine kei tāupoʼou. (Lau ia Isaia 7:14.) Ko te kupu Fakahepeleo bethoulah ʼe fakaʼuhiga ki te kupu “tāupoʼou,” kae ʼe ko te tahi kupu (‘almah) ʼe fakaʼaogaʼi iā Isaia 7:14. Neʼe fakakikite ai ko “te taʼahine [ha‘almah]” ʼe ina fānauʼi anai ia te tama. Ko te kupu ha‘almah ʼe fakaʼuhiga ki te taʼahine ko Lepeka ʼi muʼa ʼo tana ʼohoana. (Sen. 24:16, 43) ʼAki te takitaki fakaʼatua, neʼe fakaʼaogaʼi e Mateo ia te kupu Fakakeleka “tāupoʼou” (parthénos) ʼi tana fakahā ʼaē ia te fakahoko ʼo te lea fakapolofetā ʼa Isaia 7:14, ʼi te fānauʼi ʼaē ʼo Sesu. Ko te ʼu tagata faitohi Evaselio ko Mateo pea mo Luka, ʼe nā ʼui ko Malia neʼe ko he tāupoʼou neʼe faitama ʼaki te gāue ʼa te laumālie ʼo te ʼAtua.—Mat. 1:18-25; Luka 1:26-35.

⁹ ʼE tāmateʼi anai te tamaliki liliki ʼi te ʼosi tupu ake ʼa te Mēsia. Neʼe hoko ia te meʼa fēia ki muʼa atu, ʼi te temi ʼaē neʼe fakatotonu ai e te Falaone ʼo Esipito ke lī te kihiʼi tamaliki kei meamea ki te Vaitafe ʼo te Nile. (Eke. 1:22) Kae ʼe lelei ke tou tokagaʼi ia te vaega ʼo Selemia 31:15, 16, ʼaē ʼe fakamatala ai te tagiʼi e Lasele ia tana ʼu tama ʼaē neʼe ʼave ki “te fenua ʼo te fili.” Neʼe logo tana tagi mai Lama, ʼi te telituale ʼo Pesamino, ʼi te potu noleto ʼo Selusalemi. ʼE fakahā e Mateo ko te ʼu folafola ʼa Selemia, neʼe hoko ʼi te temi ʼaē neʼe fakatotonu ai e te Hau ko Helote, ke tāmateʼi ia te tamaliki tagata ʼi Petelehemi pea mo te ʼu telituale ʼi ʼona tafaʼaki. (Lau ia Mateo 2:16-18.) Kotou fakakaukauʼi age muʼa ia te toe lotomamahi ʼaē neʼe hoko ʼi te koga meʼa ʼaia!

10. Kotou fakamahino pe neʼe hoko feafeaʼi kiā Sesu ia te ʼu palalau ʼaē iā Osea 11:1.

¹⁰ Ohagē ko te kau Iselaele, neʼe tonu ke pāui ia te Mēsia mai Esipito. (Osea 11:1) ʼI muʼa ʼo te fakatotonu ʼaē e Helote ke tāmateʼi ia te kihiʼi tamaliki tagata, neʼe fakatotonu e te ʼāselo kiā Sosefo, mo Malia, pea mo Sesu ke natou ʼolo ki Esipito. Neʼe natou nonofo ʼi ai “ ʼo aʼu ki te mate ʼo Helote, koteʼuhi ke hoko te meʼa ʼaē neʼe folafola e Sehova ʼaki tana polofetā [ko Osea], ʼo ʼui māʼana: ‘Mai Esipito neʼe au pāui toku foha.’ ” (Mat. 2:13-15) ʼE mahino ia, neʼe mole feala kiā Sesu totonu ke ina haga ʼo fakatuʼutuʼu fakatomuʼa ia te ʼu meʼa fuli ʼaia neʼe fakakikite ʼo ʼuhiga mo tona tupu ake pea mo te ʼu meʼa ʼaē neʼe hoko ʼi te kamataʼaga ʼo tona maʼuli.

ʼE Kamata e Te Mēsia Ia Tana Minisitelio

11. Ko ai ʼaē neʼe ina tofa te ala ki te haʼu ʼaē ʼa te Fakanofo ʼa Sehova?

¹¹ Neʼe tonu ke tofa te ala ʼi muʼa ʼo te haʼu ʼaē ʼa te Fakanofo ʼa te ʼAtua. Neʼe fakakikite e Malakia ko “Elia te polofetā” ʼe ina fai anai ia te gāue ʼaia, ke ina teuteuʼi ia te loto ʼo te hahaʼi ki te haʼu ʼaē ʼa te Mēsia. (Lau ia Malakia 4:5, 6.) Ko Sesu totonu ʼaē neʼe ina ʼui ko Soane Patita ia te “Elia” ʼaia. (Mat. 11:12-14) Pea ko Maleko neʼe ina fakahā lelei ko te minisitelio ʼa Soane neʼe ina fakahoko ia te ʼu folafola fakapolofetā ʼa Isaia. (Isa. 40:3; Mko. 1:1-4) Neʼe mole fakatuʼutuʼu e Sesu ke fai e Soane ia te gāue ʼaē neʼe fai e Elia, ʼi Tona ʼuhiga tagata fakamelomelo. Neʼe ʼalutahi ia te gāue ʼa te “Elia” ʼaia mo te finegalo ʼo te ʼAtua, ʼaē ke ʼiloʼi pe ko ai ia te Mēsia.

12. Ko te gāue makehe fea ʼaē neʼe foaki ki te Mēsia ke ina fai?

¹² ʼE foaki anai e te ʼAtua ki te Mēsia ia te gāue makehe. ʼI te sinakoka ʼo Nasaleti, te kolo ʼaē neʼe lahilahi ake ai, neʼe lau e Sesu ia te takaiga tohi ʼo Isaia pea mo ina fakaʼuhiga kiā te ia te ʼu folafola ʼaenī: “Ko te laumālie ʼo Sehova ʼe iā te au, koteʼuhi kua ina fakanofo au ke au fakahā te logo lelei ki te kau māsisiva, neʼe ina fekauʼi au ke au fakamafola te ʼāteaina kiā nātou ʼe pōpula pea ki te kau kivi ke natou toe sisio, pea mo [toe] fakaliliu ʼi te ʼāteaina ia nātou [ʼaē] ʼe taʼomia, ke fakamafola te taʼu fakaʼofa ʼo Sehova.” Mai tona ʼaluʼaga ʼaē neʼe ko ia moʼoni ia te Mēsia, neʼe matatonu ai te ʼui fēnei ʼa Sesu: “ ʼI te ʼaho nei, ko te folafola ʼaenī ʼo te Tohi ʼaē kua kotou logo kiai, kua hoko ia.”—Luka 4:16-21.

13. Neʼe koteā ʼaē neʼe fakakikite ʼo ʼuhiga mo te minisitelio ʼa Sesu ʼi Kalilea?

¹³ Neʼe fakakikite te minisitelio ʼa te Mēsia ʼi Kalilea. Neʼe fakakikite e Isaia ʼo ʼuhiga mo “te fenua ʼo Sapulone pea mo te fenua ʼo Nefetali,” pea mo  “Kalilea ʼo te ʼatu puleʼaga.” Neʼe ina tohi fēnei: “Ko te hahaʼi ʼaē neʼe haʼele ʼi te fakapōʼuli neʼe natou sio ki he mālama lahi. Kae ko nātou ʼaē neʼe natou nonofo ʼi te fenua ʼo te fakapōʼuli gaogao, kiā nātou neʼe tapa ki ai te mālama.” (Isa. 9:1, 2) Neʼe kamata e Sesu tana minisitelio ʼi Kalilea, ʼo nofo ʼi Kapenaume, pea ko te hahaʼi tokolahi ʼaē neʼe nonofo ʼi Sapulone pea mo Nefetali, neʼe natou maʼu ai ia te ʼu lelei ʼo te mālama fakalaumālie ʼaē neʼe ina fakagigila kiā nātou. (Mat. 4:12-16) ʼI Kalilea, neʼe fai e Sesu tana Akonaki ʼi te Moʼuga ʼaē neʼe uga ai te hahaʼi ke natou fakakaukauʼi tana ʼu akonaki, mo ina filifili tana kau ʼapositolo, mo ina fakahoko ia te ʼuluaki milakulo, pea ʼe mahino ia neʼe ʼasi ai ki te toko 500 kau tisipulo ʼi tona kua ʼosi fakatuʼuake. (Mat. 5:1–7:27; 28:16-20; Mko. 3:13, 14; Soa. 2:8-11; 1 Ko. 15:6) Neʼe ina fakahoko ai ia te lea fakapolofetā ʼa Isaia, ʼi tana fai fakamafola ʼaē ʼi te “fenua ʼo Sapulone pea mo te fenua ʼo Nefetali.” Kae ʼe mahino ia, neʼe toe fakamafola e Sesu ia te logo ʼo te Puleʼaga ʼi te tahi atu ʼu potu ʼo Iselaele.

Neʼe Fakakikite Te Tahi Age ʼu Gāue Kā Fai Anai e Te Mēsia

14. Neʼe fakahoko feafeaʼi e Sesu ia te Pesalemo 78:2?

¹⁴ ʼE fakaʼaogaʼi anai e te Mēsia te ʼu hisitolia, peʼe ko te ʼu lea fakatātā. Neʼe hiva fēnei e te tagata fai pesalemo ko Asafe: “ ʼAki he tākuga lea ʼe au ʼavahi anai toku gutu.” (Pes. 78:2) ʼE tou ʼiloʼi feafeaʼi neʼe fakaʼuhiga kiā Sesu ia te lea fakapolofetā ʼaia? ʼE fakahā mai e Mateo pe neʼe hoko feafeaʼi ia te lea fakapolofetā ʼaia. ʼI tana ʼosi talanoa ki te ʼu lea fakatātā ʼaē neʼe fakatatau ai e Sesu ia te Puleʼaga ki te homo ake ʼa te tegaʼi sinapi pea mo te meʼa fakatupu, neʼe ʼui fēnei e Mateo: “[Ko Sesu] neʼe mole palalau age kiā nātou [kae] mole ʼi ai hana lea fakatātā; koteʼuhi ke hoko te meʼa ʼaē neʼe fakahā ʼaki te polofetā, ʼi tana ʼui [ʼaē]: ‘ ʼE au ʼavahi anai toku gutu ʼaki he ʼu lea fakatātā, ʼe au fakahā anai te ʼu meʼa ʼaē neʼe fufū talu mai te kamataʼaga.’ ” (Mat. 13:31-35) Neʼe fua lelei te fakaʼaogaʼi ʼaē e Sesu te ʼu tākuga lea, peʼe ko te ʼu hisitolia moʼo akoʼi ʼo te hahaʼi.

15. Kotou fakahā pe neʼe fakahoko feafeaʼi ia Isaia 53:4.

¹⁵ Neʼe tonu ke ʼamo e te Mēsia totatou ʼu mahaki. Neʼe fakakikite fēnei e Isaia: “ ʼE mahino ia neʼe ina fua totatou ʼu mahaki; pea ki ʼotatou mamahi, neʼe ina ʼamo.” (Isa. 53:4) Neʼe fakahā e Mateo, ʼi te ʼosi fakamālōlō ʼaē ʼo te faʼē ʼa te ʼohoana ʼo Petelo, neʼe fakamālōlō e Sesu ʼihi atu hahaʼi “koteʼuhi ke hoko te meʼa ʼaē neʼe folafola ʼaki te polofetā ko Isaia, ʼo ʼui māʼana: ‘Ia Ia, neʼe ina toʼo totatou ʼu mahaki pea neʼe ina fua ʼotatou mamahi.’ ” (Mat. 8:14-17) Kae neʼe mole ko te fai fakamālōlō pē ʼaia e tahi ʼa Sesu, heʼe talanoa ʼi te Tohi-Tapu ki te tahi atu ʼu lakaga neʼe fai fakamālōlō ai ia Sesu.

16. Neʼe fakahā feafeaʼi e te ʼapositolo ko Soane neʼe fakahoko e Sesu ia te ʼu palalau ʼaē iā Isaia 53:1?

¹⁶ Logolā te ʼu lelei fuli ʼaē kā fai anai e te Mēsia, kae tokolahi te hahaʼi ʼe mole natou tui anai kiā te ia. (Lau ia Isaia 53:1.) ʼI tana fakahā ʼaē kua hoko ia te lea fakapolofetā ʼaia, neʼe tohi fēnei e te ʼapositolo ko Soane: “Logopē lā [ko Sesu] neʼe lahi te ʼu fakaʼiloga neʼe ina fai ʼi ʼonatou muʼa, neʼe mole natou tui kiā te ia, ʼo hoko ai te folafola ʼa te polofetā ko Isaia, ʼaē neʼe ina ʼui fēnei: ‘Ê Sehova, ko ai ʼaē neʼe tui ki te ʼu meʼa ʼaē neʼe matou logo kiai? Pea ki te nima ʼo Sehova, ko ai ʼaē neʼe fakahā ki ai?’ ” (Soa. 12:37, 38) Pea ʼi te temi ʼaē neʼe fakamafola ai ia te ʼapositolo ko Paulo ia te logo lelei ʼo ʼuhiga mo Sesu, te Mēsia, neʼe tokosiʼi ia te hahaʼi ʼaē neʼe natou tui kiai.—Loma 10:16, 17.

17. Neʼe fakamahino feafeaʼi e Soane te fakahoko ʼaē ʼo te ʼu palalau iā Pesalemo 69:4?

¹⁷ ʼE fehiʼaʼinaʼi anai ia te Mēsia kae mole hona tupuʼaga. (Pes. 69:4) Neʼe talanoa ia te ʼapositolo ko Soane ki te ʼu folafola ʼaē neʼe fai e Sesu, ʼaē ʼe ina ʼui fēnei ai: “Kanapaulā neʼe mole au fai te ʼu gāue ʼaia ʼaē neʼe mole heʼeki fai e he tahi kehe, kanaʼaualā ʼe mole hanatou agahala; kae ʼi te temi nei kua natou sisio kiā māua pea mo fehiʼa kiā māua, kiā au pea mo taku Tamai. Kae ʼe [tonu ke] fēia, ke hoko te folafola ʼaē ʼe tohi ʼi tanatou Lao: ‘Neʼe natou fehiʼa kiā te au ka mole hona tupuʼaga.’ ” (Soa. 15:24, 25) ʼI ʼihi temi, ʼe fakaʼuhiga ia te kupu “Lao” ki te ʼu Tohi Taputapu ʼaē neʼe kua natou maʼu ʼi tonatou temi. (Soa. 10:34; 12:34) Ko te ʼu fakamatala ʼaē ʼi te ʼu Evaselio, ʼe natou fakamoʼoni ko Sesu neʼe fehiʼaʼinaʼi e te hahaʼi, kae tāfito e te kau takitaki lotu Sutea. Pea tahi ʼaē meʼa, neʼe ʼui fēnei e Kilisito: “ ʼE mole he ʼuhiga e tahi ke fehiʼa ai te mālamanei kiā koutou, kae ʼe fehiʼa  ia kiā te au, heʼe au fakamoʼoni ʼo ʼuhiga mo ia ko tana ʼu gāue ʼe kovi.”—Soa. 7:7.

18. Koteā he tahi age meʼa kā tou vakaʼi anai, ʼe ina fakamālohi ai tatatou tui papau ʼaē ko Sesu ʼe ko te Mēsia?

¹⁸ Neʼe tui papau ia te ʼu tisipulo ʼa Sesu ʼaē ʼi te ʼuluaki sēkulō ko Sesu neʼe ko te Mēsia, koteʼuhi neʼe ina fakahoko moʼoni ia te ʼu lea fakapolofetā ʼo ʼuhiga mo te Mēsia, ʼaē ʼe tuʼu ʼi te Koga Fakatohi-tapu Fakahepeleo. (Mat. 16:16) Ohagē ko te meʼa ʼaē neʼe kua tou ʼosi vakaʼi, ko ʼihi lea fakapolofetā neʼe hoko ia lolotoga te kamataʼaga ʼo te maʼuli pea mo te minisitelio ʼa Sesu ʼo Nasaleti. ʼE tou vakaʼi anai te tahi ʼu lea fakapolofetā ʼo ʼuhiga mo te Mēsia ʼi te ʼalatike ʼaē kā hoa mai. Ko tatatou metitāsioʼi ʼi te faikole ia te ʼu lea fakapolofetā ʼaia, ʼe mahino papau ia ʼe fakamālohi ai anai tatatou tui papau ʼaē ko Sesu Kilisito, ʼe ko ia moʼoni te Mēsia ʼaē neʼe fakanofo e Sehova, tatatou Tamai ʼaē ʼi selō.

[Nota]

ʼE Kotou Tali Feafeaʼi Anai?

• Ko te ʼu lea fakapolofetā fea neʼe hoko ʼo ʼuhiga mo te fānauʼi ʼaē ʼo Sesu?

• Ko ai ʼaē neʼe ina tofa te ala ki te haʼu ʼaē ʼa te Mēsia?

• Iā Isaia 53, ko te ʼu folafola fakapolofetā fea ʼaē neʼe hoko ʼo ʼuhiga mo Sesu?

[ʼU fehuʼi ʼo te ako]