Tou Ako Mai Te Folafola ʼa Te ʼAtua

He Koʼē Koa ʼe Fakagafua e Te ʼAtua Ia Te Agakovi Pea Mo Te Mamahi?

ʼE fakahā ʼi te ʼalatike ʼaenī te ʼu fehuʼi ʼe feala ke kotou fai ʼo ʼuhiga mo te ʼAtua, pea ʼe ina fakahā peʼe ko te ʼu vaega Tohi-Tapu fea ʼi takotou Tohi-Tapu ʼe feala ke kotou maʼu ai tona ʼu tali. ʼE fiafia anai te kau Fakamoʼoni ʼa Sehova ʼi te felōgoi mo koutou ki te ʼu fehuʼi ʼaia.

 1. Neʼe kamata feafeaʼi koa te agakovi?

Ko te agakovi neʼe kamata ʼaki te ʼuluaki loi ʼa Satana. Neʼe mole tupu agakovi ia Satana. Neʼe ko he ʼāselo haohaoa ia, kae neʼe mole “haga nofo ia ʼi te moʼoni.” (Soane 8:44) Neʼe mānumānu ki te tauhi ʼaē neʼe tonu ke fai ʼāteaina pē ki te ʼAtua. Neʼe ina loiʼi ia Eva te ʼuluaki fafine, pea mo ina fakalotoʼi leva ke fai te fakalogo kiā te ia kae liʼaki te ʼAtua. Neʼe muliʼi e Atama ia Eva ʼo nā talagataʼa ai ki te ʼAtua. Pea ko te fua ʼo te tonu ʼaē neʼe fai e Atama, ko te mamahi pea mo te mate.—Lau ia Senesi 3:1-6, 17-19.

ʼI te ʼui age e Satana kiā Eva ke talagataʼa ki te ʼAtua, neʼe lagaʼi ai leva te fakafeagai ki te pule faʼitaliha ʼa te ʼAtua. Tokolahi te hahaʼi ʼo te mālamanei kua natou muliʼi ia Satana ʼo natou fakafisi ki te pule ʼa te ʼAtua. ʼO liliu ai ia Satana “ko te pule ʼo te mālamanei.”—Lau ia Soane 14:30; Fakahā 12:9.

 2. Neʼe kovi koa te fakatupu ʼa te ʼAtua?

Ko te hahaʼi mo te kau ʼāselo neʼe fakatupu haohaoa e te ʼAtua ke feala hanatou fakalogo ki tana ʼu fakatotonu. (Teutalonome 32:5) Neʼe fakatupu ia tātou e te ʼAtua ʼaki te loto faʼitaliha ke tou filifili ai peʼe tou fai te meʼa ʼaē ʼe lelei peʼe tou fai te meʼa ʼaē ʼe kovi. Ko te ʼāteaina ʼaia ʼe ina foaki mai kiā tātou te fealagia ʼaē ke tou fakahā totatou ʼofa ʼaē ki te ʼAtua.—Lau ia Sake 1:13-15; 1 Soane 5:3.

 3. He koʼē koa neʼe fakagafua e te ʼAtua ia te mamahi?

Talu mai te kamata, neʼe fakagafua e Sehova te fakafeagai ki tana pule faʼitaliha. Koteā tona tupuʼaga? Ke hā lelei mai, ʼe mole he fua lelei ki te tagata hana fia takitaki tokotahi pē tona ala. (Selemia 10:23) Hili kiai taʼu e 6 000 ʼo te hisitolia ʼo te tagata, kua maʼu te tonu ʼo ʼuhiga mo te pule faʼitaliha ʼaē neʼe fakafihiʼi. Neʼe mole lavaʼi e te takitaki fakatagata te fakagata ʼo te tau, mo te fai fakapō, mo te heʼe faitotonu, pea mo te mahaki.—Lau ia Tagata Tānaki 7:29; 8:9; Loma 9:17.

Kae ko nātou ʼaē neʼe natou tali te takitaki ʼa te ʼAtua neʼe fua lelei ki tonatou maʼuli. (Isaia 48:17, 18) Kua vave pē anai te pulihi e Sehova ia te ʼu puleʼaga fakatagata fuli. Pea ʼe gata pē ki te hahaʼi ʼaē neʼe natou filifili te takitaki ʼa te ʼAtua ʼaē kā natou māʼuʼuli anai ʼi te kele.—Isaia 2:3, 4; 11:9; Lau ia Taniela 2:44.

  4. Koteā ʼaē neʼe fakafealagia e te faʼa kātaki ʼa te ʼAtua ke hoko?

Neʼe lau e Satana ʼe mole feala kiā Sehova ke ina maʼu he tahi ʼe agatonu mo fakalogo kiā ia. Ko te faʼa kātaki ʼa te ʼAtua ʼe ina fakafealagia mai kiā tātou fuli ke tou filifili peʼe tou loto ki tana takitaki peʼe ko te takitaki ʼa te tagata. Pea ʼe ʼiloga pē anai ʼi totatou maʼuli te ala ʼaē neʼe tou filifili.—Lau ia Sopo 1:8-11; Tāʼaga Lea 27:11.

 5. ʼE feafeaʼi hatatou filifili te takitaki ʼa te ʼAtua?

ʼE tou fakahā ʼe tou filifili te takitaki ʼa te ʼAtua, ʼo tou fekumi pea mo maʼuliʼi ia te tauhi moʼoni ʼaē ʼe fakatafito ki tana Folafola, ʼaē ko te Tohi-Tapu. (Soane 4:23) ʼE tonu foki ke kita fakamamaʼo mai te ʼu gāue fakapolitike pea mo te tau, ohagē pē ko tona fai e Sesu.—Lau ia Soane 17:14.

ʼE toe fakaʼaogaʼi foki e Satana tona mālohi moʼo fakatuputupu ia te ʼu aga heʼeʼaoga. Kapau e tou liʼaki te ʼu faʼahiga aga ʼaia, pea ko ʼihi anai ʼi totatou ʼu kaumeʼa peʼe ʼi totatou ʼu feʼilo ʼe natou fakalainoaʼi anai tātou peʼe natou feagai mai anai kiā tātou. (1 Petelo 4:3, 4) Koia ʼe maʼua aipē ia ke tou fai he tonu ʼo ʼuhiga mo te ʼu meʼa ʼaē ʼe tonu ke tou filifili. ʼE tou fakatahi anai koa mo te hahaʼi ʼaē e ʼoʼofa ki te ʼAtua? ʼE tou fakalogo anai koa ki tana u lao ʼaē ʼe hā ai tona poto mo tona ʼofa? Kapau ʼe tou fai fēia pea ʼe tou fakamoʼoni anai ko Satana ʼe gutuloi i tana ʼui ʼaē ʼe mole he tahi ʼe feala anai ke ina fai te meʼa ʼaē ʼe fakatotonu e te ʼAtua.—Lau ia 1 Kolonito 6:9, 10; 15:33.

Kapau ʼe kotou fia maʼu he tahi ʼu fakamahino, vakaʼi te kāpite 11 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.

[Paki ʼo te pāsina 22]

Neʼe filifili e Atama te ala ʼaē ʼe kovi

[Paki ʼo te pāsina 23]

ʼE ʼiloga pē anai ʼi totatou maʼuli peʼe neʼe tou filifili te takitaki ʼa te ʼAtua