4 Tokoni

Kotou Filifili Lelei Tokotou ʼu Kaumeʼa

KOTEĀ ʼAĒ ʼE AKOʼI MAI ʼI TE TOHI-TAPU? “Ko ʼaē ʼe haʼele mo te kau poto ʼe liliu anai ia ʼo poto.”—Tāʼaga Lea 13:20.

HE KO’Ē ʼE FAIGATAʼA? Ko totatou ʼu kaumeʼa ʼe feala pē anai ke natou fakalotomālohiʼi tātou ʼo ʼuhiga mo te maʼuli fakafeʼauga, peʼe ke natou fakalotovaivaiʼi tātou ʼi te faʼahi ʼaia. Koia ʼe feala ai ki tanatou ʼu aga pea mo tanatou ʼu fai palalau, ke malave ki tatatou ʼu faʼahiga manatu ʼaē ʼo ʼuhiga mo totatou maʼuli.—1 Kolonito 15:33.

Ohagē lā, ʼe talanoa ʼi te Tohi-Tapu ki te ʼu tagata e toko 12 neʼe natou liliu mai tanatou mamata ʼaē ʼo te fenua ʼo Kanaane. Tokolahi iā nātou ‘ ʼi muʼa ʼo te ʼu foha ʼo Iselaele neʼe natou fai te ʼu palalau ʼe mole lelei ʼo ʼuhiga mo te fenua ʼaē neʼe natou ʼolo ʼo vakavakaʼi.’ Kae logolā te faʼahi ʼaia, ko te toko lua iā nātou neʼe nā palalau lelei, ʼo nā ʼui fēnei ʼo ʼuhiga mo te fenua ʼo Kanaane: “ ʼE ko he fenua ʼe lelei ʼaupitō.” Kae neʼe mafola ʼi te hahaʼi ia te ʼu palalau fakalotovaivai ʼa te toko hogofulu malomu. ʼE ʼui fēnei ʼi te fakamatala: “Ko te hahaʼi fuli neʼe natou kalaga leʼo lahi . . . pea ko te ʼu foha ʼo Iselaele neʼe natou lāuga.”—Faka au 13:30–14:9.

ʼE toe fēia iā ʼaho nei, ʼe tokolahi te hahaʼi “ ʼe natou muhumuhu, peʼe natou meo ʼo ʼuhiga mo te ʼu meʼa ʼaē neʼe hoko kiā nātou ʼi tonatou maʼuli.” (Suta 16) ʼE faigataʼa te taupau ʼo he maʼuli fakafeʼauga mokā ʼe tou fakakaugā ki hotatou ʼu kaumeʼa ʼe meo tuʼumaʼu.

KOTEĀ ʼAĒ ʼE FEALA KE KOTOU FAI? Kotou vakavakaʼi takotou ʼu fai palalau ʼaē mo tokotou ʼu kaumeʼa. ʼE laupisi tuʼumaʼu koa tokotou ʼu kaumeʼa ki te ʼu meʼa ʼaē ʼe natou maʼu, peʼe natou meo tuʼumaʼu koa ʼo ʼuhiga mo te ʼu meʼa ʼaē ʼe mole natou maʼu? Pea kiā koutou, ʼe feafeaʼi takotou faʼahiga kaumeʼa ʼaē kiā nātou? ʼE kotou fai koa he ʼu meʼa ke fakaʼamu atu tokotou ʼu kaumeʼa ki te ʼu meʼa ʼaē ʼe kotou maʼu, peʼe kotou fakalotomālohiʼi koa nātou ke natou maʼuli fakafeʼauga?

Kotou vakaʼi te faʼifaʼitaki neʼe tuku mai e Tavite, ʼaē neʼe liliu ʼo hau, pea mo Sonatane ʼaē neʼe ko te foha ʼo te Hau ko Saulo. Neʼe maʼuli feholaʼaki ia Tavite ʼi te toafa. Neʼe tuʼaniaʼi e te Hau ko Saulo ia Tavite pea neʼe ina fia matehi ia ia. Logolā ʼi te hōloga hau, neʼe ko Sonatane ʼaē neʼe tonu ke fakanofo ke hau ki muli mai, kae neʼe liliu ia ko he kaumeʼa lelei ʼo Tavite. Neʼe mahino kiā Sonatane ko te ʼAtua ʼaē neʼe ina fakanofo ia Tavite ke hau ki muli mai, pea neʼe fiafia ʼo lagolago ki tona kaumeʼa.—1 Samuele 19:1, 2; 20:30-33; 23:14-18.

ʼE lelei ke kotou maʼu hokotou ʼu kaumeʼa fēia, he ʼu kaumeʼa ʼe faiga ke natou maʼuli fakafeʼauga pea ʼe natou loto ke natou fai te meʼa ʼaē ʼe lelei maʼa koutou. (Tāʼaga Lea 17:17) ʼE mahino ia, ke kotou maʼu he ʼu kaumeʼa fēia, ʼe tonu mo koutou ke kotou maʼu ia te ʼu kalitātē ʼaia.—Filipe 2:3, 4.

[Paki ʼo te pasina 7]

Ko tokotou ʼu kaumeʼa ʼe natou fakalotomālohiʼi koa koutou ʼo ʼuhiga mo te maʼuli fakafeʼauga peʼe natou fakalotovaivaiʼi koa koutou ʼi te faʼahi ʼaia?