Kotou Kumi Fakamālotoloto Te Tapuakina ʼa Sehova

“Ko [te ʼAtua] . . . ʼe ina fakapale ia nātou ʼaē ʼe natou kumi moʼoni ia ia.”—HEP. 11:6.

1, 2. (a) ʼE kaugamālie koa ia nātou ʼaē e natou kumi ia te tapuakina fakaʼatua? (b) He koʼē koa ʼe tou tōkakaga tāfito ke tou maʼu ia te tapuakina ʼa Sehova?

 “KE TAPUAKIʼI koe e te ʼAtua!” ʼI ʼihi fenua, ʼe tou logo māhani ki te hahaʼi ʼe natou fai te ʼu palalau ʼaia mokā mafatua he tahi ʼe mole feʼiloʼiʼaki mo nātou. ʼE ko te kau takitaki lotu ʼe natou tapuakiʼi te hahaʼi, mo te ʼu manu, pea mo te ʼu meʼa mate. Ko te kau tulisi ʼe natou ʼolo ki he ʼu mātaga fakalotu ʼaki te fakaʼamu ʼaē ke natou maʼu ai anai he tapuakina. ʼE kole tuʼumaʼu e te hahaʼi fai politike te tapuakina ʼa te ʼAtua maʼa tonatou puleʼaga. ʼI takotou manatu ʼe fakamālotoloto koa te ʼu taʼi kole tapuakina ʼaia? ʼE lelei koa te ʼu taʼi kole ʼaia? Ko ai koa ʼaē ʼe ina maʼu moʼoni ia te tapuakina ʼa te ʼAtua, pea koteā tona tupuʼaga?

² Neʼe fakakikite e Sehova ʼi te ʼu ʼaho fakamuli, ʼe ʼi ai anai tana hahaʼi mai te ʼu puleʼaga fuli ʼe natou maʼa mo tokalelei, pea ʼe natou fakamafola anai te logo lelei ʼo te Puleʼaga ʼo aʼu ki te ʼu potu taupotu ʼo te kele, logolā tonatou fehiʼaʼinaʼi pea mo tonatou fakatagaʼi. (Isa. 2:2-4; Mat. 24:14; Fakh. 7:9, 14) Ko tātou ʼaenī neʼe tou tali ia te pilivilēsio ʼaē ke tou kau ki te hahaʼi ʼaia, pea ʼe tou loto ke tapuakiʼi tātou e te ʼAtua, pea ʼe ʼaoga kiā tātou te faʼahi ʼaia, heʼe kapau ʼe mole tou maʼu te tapuakina ʼa te ʼAtua, pea ʼe mole fua lelei anai ia tatatou ʼu gāue. (Pes. 127:1) Kae ʼe feafeaʼi hatatou maʼu ia te tapuakina ʼa te ʼAtua?

ʼE Aʼu Te ʼu Tapuakina Ki Te Hahaʼi Fakalogo

 3. Kanapau lā neʼe fakalogo te kau Iselaele, koteā anai tona ʼu fua kiā nātou?

³ Lau ia Tāʼaga Lea 10:6, 7. ʼI muʼa ʼo te hū ʼo te puleʼaga ʼo Iselaele ki te Kele ʼo Te Fakapapau, neʼe fakahā e Sehova kiā nātou, ʼe natou koloaʼia anai pea mo maʼuli fīmālie mo kapau ʼe natou fakalogo ki tona leʼo. (Teu. 28:1, 2) Ko te ʼu tapuakina ʼa Sehova ʼe mole haʼu pē anai ki te hahaʼi ʼa te ʼAtua kae ʼe hagē pē ʼe fakaʼuhiga ko te ʼu tapuakina ʼaia ʼe natou “maʼu” anai tana hahaʼi. Maʼa te hahaʼi fakalogo, ʼe hoko moʼoni anai te ʼu tapuakina ʼaia.

 4. Koteā ʼaē ʼe fakamaʼua kiai ia te fakalogo fakamālotoloto?

⁴ Neʼe tonu ke feafeaʼi te fakalogo ʼa te kau Iselaele? ʼI te Lao ʼa te ʼAtua, ʼe fakahā ai ʼe mole fiafia anai te loto ʼo Sehova mo kapau ʼe tauhi age tana hahaʼi kae mole natou fai ‘ ʼaki he loto fiafia lahi.’ (Lau ia Teutalonome 28:45-47.) ʼE mole tonu ke fai te fakalogo ʼaē kiā Sehova he neʼe ina fakatotonu mai, ohagē ko te ʼu taʼi fakalogo ʼaē ʼe fai e he ʼu manu peʼe ko te ʼu temonio mokā ʼe fakatotonu age he meʼa ke natou fai. (Mko. 1:27; Sake 3:3) Ko te fakalogo fakamālotoloto ʼaē ʼe fai ki te ʼAtua, ʼe ko he fakahā ʼo tokita ʼofa. ʼE tou fakalogo fakafiafia heʼe tou tui ko te ʼu fakatotonu ʼa Sehova ʼe mole mamafa ia pea “ ʼe ina fakapale ia nātou ʼaē ʼe natou kumi moʼoni ia ia.”—Hep. 11:6; 1 Soa. 5:3.

 5. Kapau ʼe tui papau he tahi ki te fakapapau ʼa Sehova, pea ʼe tokoni feafeaʼi anai ia te faʼahi ʼaia ke fakalogo ki te lao ʼaē iā Teutalonome 15:7, 8?

⁵ Tou vakaʼi age muʼa peʼe feafeaʼi ki he tahi ʼe tui papau, kapau ʼe fakalogo fakamālotoloto pea ʼe fakapale anai ia mokā mulimuli ki te lao ʼaē ʼe tuʼu iā Teutalonome 15:7, 8. (Lau.) Ko te fakalogo fakakinau ki te lao ʼaia, neʼe lagi feala pē ki he tagata masiva ke ina maʼu hona faʼahiga maʼuli fīmālie, kae ko te taʼi fakalogo ʼaia ʼe maʼu ai anai koa he ʼu felōgoi lelei ʼi te hahaʼi ʼa te ʼAtua pea mo he fiafia iā nātou? Tahi ʼaē meʼa maʼuhiga, kapau neʼe natou fakalogo fakakinau ki te lao ʼaia, ʼe fakahā ai anai koa ia tanatou tui ʼaē ko Sehova ʼe lava tokoni ki tana ʼu kaugana? ʼE natou loto fakafetaʼi anai koa ki te fealagia ʼaē ʼe natou maʼu ke natou faʼifaʼitakiʼi ia te loto foaki ʼa te ʼAtua? Kailoa ia! Neʼe ʼiloʼi lelei pē e te ʼAtua te loto ʼo ia ʼaē ʼe loto foaki moʼoni pea neʼe ina fakapapau ʼe ina fakapale te tagata ʼaia ʼi tana ʼu gāue fuli pea mo tana ʼu fakatuʼutuʼu  fuli. (Teu. 15:10) Ko he tahi ʼe tui ki te fakapapau ʼaia, ʼe ina uga ai ia ia ke ina fai he meʼa ʼe lelei, pea ʼe iku ai anai ki he ʼu tapuakina lahi.—Taag. 28:20.

 6. Koteā te tui papau ʼaē ʼe tou maʼu iā Hepeleo 11:6?

⁶ ʼO mole gata pē ʼi te tui ʼaē ko Sehova ʼe Ina Fakapale, kae ko te ʼu palalau ʼaē iā Hepeleo 11:6 ʼe ina fakahā ia te tahi kalitātē ʼe ʼaoga ke tou maʼu ke feala ai hatatou maʼu te tapuakina ʼa te ʼAtua. Kotou fakatokagaʼi ko Sehova ʼe ina fakapale ia nātou ʼaē ʼe natou “kumi moʼoni ia ia.” Ko te kupu ʼaē ʼe fakaʼaogaʼi ʼi henī, ʼe fakaʼuhiga ki he faiga ʼe mālohi pea mo kātoa. ʼE ko he faʼahi ʼe tonu ke ina fakatupu iā tātou he tui ʼe mālohi, ʼe tapuakina anai tātou! Ko te matapuna ʼo te tapuakina ʼaia, ʼe ko te ʼAtua moʼoni pē e tahi “ ʼaē ʼe mole feala ke loi.” (Tito 1:2) Neʼe ina fakahā talu mai fualoa, ko te ʼu meʼa ʼaē ʼe ina fakapapau ʼe moʼoni kātoa ia. ʼE hoko tuʼumaʼu pē tana ʼu folafola. (Isa. 55:11) Koia ʼe feala ke tou falala kātoa, kapau ʼe tou tui moʼoni ki tana ʼu fakapapau, pea ko te ʼAtua ʼe hagē pē anai kiā tātou ʼe ko he Tahi ʼe Ina Fakapale tātou.

 7. Koteā ʼaē ʼe tou tui papau ai ʼe tou maʼu anai te tapuakina ʼaki te “hako” ʼo Apalahamo?

⁷ Neʼe ko Sesu Kilisito te ʼuluaki koga ʼo te “hako” ʼo Apalahamo. Ko te kau Kilisitiano fakanofo ʼe natou faʼufaʼu te lua koga ʼo te “hako” ʼaia neʼe fakakikite mai. Neʼe foaki kiā nātou te gāue ʼaē ke natou ʼolo ʼo “fakamafola te ʼu kalitātē ʼo ia ʼaē neʼe ina pāui . . . [nātou] mai te fakapōʼuli ki tona mālama taulekaleka.” (1 Pet. 2:9; Kal. 3:7-9, 14, 16, 26-29) ʼE mole feala ke tou maʼu he ʼu felōgoi lelei mo Sehova mo kapau ʼe mole tou ʼiloʼi ia nātou ʼaē neʼe fakanofo e Sesu ke natou tokaga ki tona ʼu koloa. Kanapau lā neʼe mole tou maʼu te tokoni ʼa “te tagata kaugana agatonu mo poto,” neʼe mole feala anai ke tou mahino kātoa ki te ʼu manatu maʼuhiga ʼaē ʼe tou lau ʼi te Folafola ʼa te ʼAtua, pea neʼe mole feala ke tou ʼiloʼi peʼe feafeaʼi hona maʼuliʼi. (Mat. 24:45-47) Kā tou maʼuliʼi te ʼu manatu ʼaē ʼe tou ako ʼi te Tohi-Tapu, pea ʼe feala hatatou tui papau ʼe tou maʼu anai te tapuakina ʼa te ʼAtua.

Tou Haga Tōkakaga Ki Te Fai ʼo Te Finegalo ʼo Te ʼAtua

8, 9. Koteā ʼaē neʼe fai e te pāteliaka ko Sakopo pea neʼe ʼalutahi mo tana ʼu faikole?

⁸ Kā tou talanoa ki he ʼu faiga mālohi moʼo maʼu te tapuakina ʼa te ʼAtua ʼaē kiā Apalahamo, ʼe lagi tou manatuʼi ia te pāteliaka ko Sakopo. Neʼe mole ina ʼiloʼi peʼe fakahoko feafeaʼi anai te  fakapapau ʼa te ʼAtua, kae neʼe tui ia ko Sehova ʼe ina fakatuputupu anai ke hahaʼi ia te hōloga ʼo tana kui, ʼaē kā liliu anai ko he puleʼaga lahi. Koia, ʼi te taʼu 1781 ʼi muʼa ʼo totatou temi, neʼe ʼalu ia Sakopo ki Halane ʼo kumi mai ai hona ʼohoana. Neʼe mole fakaʼamu pē ia ke ina maʼu hona kaumeʼa lelei, kae neʼe ina kumi tāfito he fafine ʼe ʼatolasio kiā Sehova pea ʼe liliu anai ia ko he faʼē ʼe tokaga fakalelei ki tana fānau.

⁹ ʼE tou ʼiloʼi ko Sakopo neʼe felāveʼi mo tona kāiga ko Lasele, pea neʼe ʼofa ia ki ai, ʼo ina tali ke gāue maʼa te tamai ʼa Lasele, ko Lapani, iā taʼu e fitu ke feala hana ʼohoanaʼi ia Lasele. Neʼe mole ko he hisitolia pē ia ʼo he tagata mo he fafine neʼe femanakoʼaki. ʼE mahino ia, neʼe ʼiloʼi e Sakopo te fakapapau ʼaē neʼe fai e te ʼAtua Māfimāfi ki tana kui ko Apalahamo pea neʼe ina toe fai age ki tana tamai ko Isaake. (Sen. 18:18; 22:17, 18; 26:3-5, 24, 25) Koia, neʼe toe ʼui aipē e Isaake ki tona foha ko Sakopo: “Ko te ʼAtua Māfimāfi ʼe ina tapuakiʼi anai koe pea mo fakafānaunau koe pea mo fakahahaʼi koe, pea ʼe ke liliu moʼoni anai ko he hahaʼi kaugamālie. Pea ʼe ina foaki atu anai te tapuakina ʼo Apalahamo, kiā koe pea mo tou hako, ke ke maʼu te fenua ʼo tou ʼu nofoʼaga ʼi te kele matāpule, ʼaē neʼe foaki e te ʼAtua kiā Apalahamo.” (Sen. 28:3, 4) Koia ko te ʼu faiga mālohi ʼa Sakopo ke ina maʼu hona ʼohoana lelei pea ke ina maʼu hona fāmili, ʼe hā ai ia tana falala ʼaē ki te fakapapau neʼe fai e Sehova.

10. He koʼē neʼe tapuakinaʼi e Sehova ia Sakopo?

¹⁰ Neʼe mole kumi koloa Sakopo ke maʼuli fīmālie ai tona fāmili. Neʼe ina manatuʼi tuʼumaʼu pē ia te fakapapau ʼaē neʼe fai ʼo ʼuhiga mo tona hōloga. Neʼe tokaga tāfito ia ke ina fakahoko ia te finegalo ʼo Sehova. Logolā te ʼu fihifihia kae neʼe fakatotonu e Sakopo ke ina fai ia meʼa fuli pē neʼe ina lavaʼi ke ina maʼu ai ia te tapuakina ʼa te ʼAtua. Neʼe ina taupau maʼu te manatu ʼaia ʼo aʼu ki tona temi matuʼa, pea neʼe tapuakiʼi ia ia e Sehova ʼo ʼuhiga mo te faʼahi ʼaia.—Lau ia Senesi 32:24-28.

11. Koteā ʼaē ʼe tonu ke tou fai ke ʼalutahi mo te finegalo ʼo te ʼAtua ʼaē neʼe fakahā mai?

¹¹ Ohagē ko Sakopo, ʼe mole tou ʼiloʼi ia te ʼu agaaga fuli ʼo te fakahoko ʼaē ʼo te fakatuʼutuʼu ʼa Sehova. Kae ʼaki tatatou ako te Folafola ʼa te ʼAtua, ʼe tou ʼiloʼi ai te ʼu meʼa tāfito ʼaē kā hoko ʼi te “ ʼaho ʼo Sehova.” (2 Pet. 3:10, 17) Ohagē lā, ʼe mole tou ʼiloʼi papau peʼe ko ʼāfea ʼaē kā hoko ai anai te ʼaho ʼo Sehova, kae ʼe tou ʼiloʼi pē kua ovi mai. ʼE tou tui ki te ʼui ʼaē ʼi te Folafola ʼa te ʼAtua, ʼaki tatatou fai fagonogono ʼi te temi ʼaenī kei toe, ʼe tou haofaki ai anai ia tātou totonu pea mo nātou ʼaē ʼe fakalogo ki tatatou fai fakamafola.—1 Tim. 4:16.

12. Koteā ʼaē ʼe feala ke tou tui papau kiai?

¹² ʼE tou ʼiloʼi ko te fakaʼosi ʼe feala ke hoko fakafokifā mai; pea ʼe mole ko he maʼua ʼo Sehova ke fakatalitali ke logo fuli te hahaʼi takitokotahi ʼo te kele ki te logo lelei. (Mat. 10:23) Tahi ʼaē, ʼe tou maʼu te takitaki lelei ke tou fakahoko fakalelei ai ia te gāue fai fakamafola. ʼAki te tui, ʼe tou lagolago ki te gāue ʼaia, ʼo mulimuli pē ki totatou ʼu fealagia, ʼo tou fakaʼaogaʼi kiai te ʼu faʼahiga lelei kehekehe ʼaē ʼe tou maʼu. ʼE tou fai fakamafola tuʼumaʼu pē  anai koa ʼi te telituale ʼaē ʼe tali lelei ai te logo e te hahaʼi? ʼE mole he tahi ʼe ina lava ʼiloʼi fakatomuʼa te tali ki te fehuʼi ʼaia. (Lau ia Tagata Tānaki 11:5, 6.) Ko tatatou gāue ʼe ko te fai fakamafola, ʼo tou falala ko Sehova ʼe ina tapuakina anai tātou. (1 Ko. 3:6, 7) ʼE tou tui papau ʼe sio mai Sehova ki tatatou ʼu faiga mālohi, pea ʼaki tona laumālie māʼoniʼoni, ʼe ina foaki mai anai te takitaki tonu ʼaē ʼe ʼaoga kiā tātou.—Pes. 32:8.

Tou Kumi Te Tokoni ʼa Te Laumālie Māʼoniʼoni

13, 14. ʼO aʼu mai ki te ʼaho nei, neʼe fakahā feafeaʼi e te mālohi ʼo te laumālie māʼoniʼoni ia tana tokoni ʼaē ki te ʼu kaugana ʼa te ʼAtua ke natou faiva ʼi tanatou gāue?

¹³ ʼE feafeaʼi mo kapau ʼe tou manatu ʼe mole tou popoto ʼi te fakahoko ʼo he gāue peʼe mole tou lavaʼi te fai fakamafola? ʼE tonu ke tou kole kiā Sehova ke ina foaki mai tona laumālie māʼoniʼoni moʼo hikihiki totatou ʼu fealagia ʼaē ʼe tou maʼu ʼi tana tauhi. (Lau ia Luka 11:13.) ʼE feala ki te laumālie ʼo te ʼAtua ke tokoni ki te hahaʼi ke natou faiva ki he gāue peʼe ki he maʼua neʼe tuku age kiā nātou, logolā pe neʼe feafeaʼi tonatou maʼuli ʼi muʼa atu. Ohagē lā, ʼi te ʼosi pē ʼo tanatou mavae ʼaē mai Esipito, ko te laumālie ʼo te ʼAtua neʼe ina fakafealagia ki te ʼu tauhi ovi pea mo te ʼu kaugana ke natou mālo ʼi tonatou ʼu fili ʼi te tau, logolā tanatou mole popoto ʼaē ʼi te tau. (Eke. 17:8-13) Ki muli age, ko te laumālie pē ʼaia neʼe ina fakafealagia kiā Pesalele pea mo Oholiape ke nā fakahoko te ʼu naunau matalelei mai te ʼAtua ʼo ʼuhiga mo te faʼahiga faʼu ʼaē ʼo te fale fehikitaki.—Eke. 31:2-6; 35:30-35.

¹⁴ Ko te laumālie mālohi pē ʼaia neʼe toe tokoni ki te ʼu kaugana ʼa te ʼAtua ʼo te temi nei, ke natou tōkakaga ki te ʼu meʼa ʼaē neʼe ʼaoga ki te kautahi ʼi te temi ʼaē neʼe tonu ke kamata ai ia tanatou gāue tā tohi. ʼI te tohi ʼa te tehina taupau ʼo te fale tā tohi ʼo te temi ʼaia, ko te Tehina ko R.J. Martin neʼe ina fakamahino te meʼa ʼaē neʼe fakahoko ʼi te taʼu 1927. “ ʼI tona temi totonu, ko te ʼAliki neʼe ina ʼavahi te matapā, pea neʼe matou maʼu te foʼi masini tā tohi, logolā tamatou mole ʼiloʼi ʼaē ia tona faʼahiga faʼu pea mo tona faʼahiga fakahaʼele. Kae ko te ʼAliki ʼe ina ʼiloʼi peʼe feafeaʼi te fakatuputupu ʼo te ʼatamai pea mo te ʼu fealagia ʼo nātou ʼaē ʼe gāue age kiā te ia mo tonatou loto kātoa. . . . Iā kiʼi vāhaʼa pē, neʼe kua matou popoto ʼi te fakahaʼele ʼo te masini; pea ʼe kei haʼele pē nei, ʼo ina fai te gāue ʼe māʼiapē lā mo nātou ʼaē neʼe natou faʼu, neʼe mole natou ʼamanaki ʼe ina lavaʼi anai te faʼahi ʼaia.” Neʼe hoholo pē te tapuakina ʼaē e Sehova ia te ʼu taʼi faiga fakamālotoloto ʼaia ʼo aʼu mai ki te temi nei.

15. ʼE lava tokoni feafeaʼi te koga tohi ʼo Loma 8:11 ki te fakalotomālohiʼi ʼo nātou ʼaē ʼe ʼahiʼahiʼi?

¹⁵ Ko te laumālie ʼo Sehova ʼe gāue ʼi te ʼu faʼahiga ʼaluʼaga kehekehe. Ko te laumālie ʼaia ʼe maʼu e te ʼu kaugana fuli ʼa te ʼAtua, pea ʼe tokoni kiā nātou ke natou kātakiʼi te ʼu fihifihia lahi. Koteā ʼaē ʼe tonu ke tou fai mo kapau ʼe tou logoʼi ʼe ʼahiʼahiʼi tātou? ʼE tou lava maʼu te mālohi mai te ʼu palalau ʼa Paulo ʼaē iā Loma 7:21, 25 pea mo Loma 8:11. ʼEī, ko “te laumālie ʼo ia ʼaē neʼe ina fakatuʼuake ia Sesu mai te kau mate” ʼe feala ke gāue maʼa tātou, ke tou maʼu te mālohi ʼaē ke tou mālo ʼi te tauʼi ʼo te ʼu holi ʼo te kakano. Neʼe tohi te vaega ʼaia maʼa te kau Kilisitiano fakanofo, kae ʼe toe ʼaoga pē foki te pelesepeto ʼo te vaega ʼaia ki te ʼu kaugana fuli ʼaē ʼa te ʼAtua. Ko tātou fuli ʼe tou maʼu te maʼuli ʼaki te tui ki te sākilifisio ʼo Kilisito, ʼo tou lolomi te ʼu holi ʼo te kakano, pea mo mulimuli ki te takitaki ʼa te laumālie.

16. Koteā ʼaē ʼe tonu ke tou fai ke feala ai hatatou maʼu ia te laumālie māʼoniʼoni ʼo te ʼAtua?

¹⁶ ʼE tonu koa ke tou ʼamanaki ʼe foaki mai e te ʼAtua ia tona mālohi gāue kiā tātou kae tou fakaʼauʼauganoa pē tātou? Kailoa. ʼE mole gata pē ʼi tatatou ʼu faikole, ʼe tonu foki ke tou toe ako tuʼumaʼu mo te Folafola ʼa te ʼAtua. (Taag. 2:1-6) Tahi ʼaē meʼa, ʼe gāue te laumālie ʼo te ʼAtua ki te kōkelekāsio Fakakilisitiano. Ko tatatou kau tuʼumaʼu ʼaē ki te ʼu fono, ʼe tou fakahā ai ia tatatou fia “logo ki te meʼa ʼaē ʼe ʼui e te laumālie ki te ʼu kōkelekāsio.” (Fakh. 3:6) Pea tahi, ʼe tonu ke tou tali ʼaki he agavaivai te ʼu puani ʼaē ʼe tou ako. ʼE tokoniʼi fēnei  tātou e te Tāʼaga Lea 1:23: “Kotou tafoki mai ʼo fakalogo ki taku akonaki. Pea ʼe au huaʼi atu anai kiā koutou toku laumālie.” ʼIo, ʼe foaki e te ʼAtua ia tona laumālie māʼoniʼoni “kiā nātou ʼaē ʼe fakalogo ki tana takitaki.”—Gāue 5:32.

17. Koteā ʼaē ʼe feala ke tou fakatatau kiai te malave ʼaē ʼo te tapuakina ʼa te ʼAtua ki tatatou ʼu faiga?

¹⁷ Logolā te ʼaoga ʼaē ke tou faiga mālohi ke feala ai hatatou maʼu ia te tapuakina ʼa te ʼAtua, kae tou manatuʼi ʼe mole tou lava fakatatau ia te ʼu gāue kinakina ʼaia mo te ʼu toe meʼa lelei ʼaupitō ʼaē ʼe foaki mai e Sehova ki tana hahaʼi. ʼE tou lava fakatatau te ʼu fua lelei ʼo tana tapuakiʼi ʼo tatatou ʼu faiga, ki te maʼu ʼaē e totatou sino ia te ʼu meʼa lelei ʼaē mai he meʼa kai lelei. Neʼe faʼu e te ʼAtua tokita sino ke feala hana kai pea ke ina maʼu te ʼu meʼa ʼaē ʼe ʼaoga kiai mai te meʼa kai ʼaia. ʼE ina toe foaki mai foki mo te meʼa kai. ʼE mole tou mahino kātoa peʼe maʼu feafeaʼi ʼi te meʼa kai ia te ʼu meʼa ʼaē ʼe ʼaoga ki tokita sino, pea mole tou toe mahino peʼe lava feafeaʼi ki tokita sino hana maʼu te mālohi ʼaē mai te meʼa kai ʼaia. Ko te meʼa pē ʼaē ʼe tou ʼiloʼi ʼe ʼi ai te fua ʼo te gāue ʼaia pea ʼaki tatatou kai ʼe tou lagolago ki te gāue ʼaia. Kapau ʼe tou filifili ke tou kai he meʼa kai ʼe ʼaoga ki tokita sino, pea ʼe toe lahi age anai tona ʼu fua lelei kiā tātou. ʼO toe fēia pē, ʼe fai e Sehova te ʼu lēkula ke kita maʼu ai te maʼuli heʼegata, pea ʼe ina foaki mai te tokoni ʼaē ʼe ʼaoga kiā tātou moʼo fakahoko ia te ʼu maʼua ʼaia. ʼE mahino ia, ʼe lahi tana tokoni mai kiā tātou pea ʼe tuha mo ia te fakavikiviki. Koia, ʼe tonu ke tou kaugā gāue mo ia, ʼo tou fai te ʼu gāue ʼaē ʼe ʼalutahi mo te finegalo ʼo te ʼAtua ke tapuakiʼi ai tātou.—Asea 2:18, 19.

18. Koteā ʼaē ʼe kotou fakatuʼutuʼu kiai, pea koteā tona tupuʼaga?

¹⁸ Tou fai mo he loto kātoa ia te ʼu gāue ʼaē ʼe tuku mai ke tou fai. Tou falala tuʼumaʼu kiā Sehova ke fua lelei tatatou ʼu gāue. (Mko. 11:23, 24) Kapau ʼe tou fai te faʼahi ʼaia, pea ʼe mahino papau “ko ʼaē ʼe ina kumi ʼe ina maʼu.” (Mat. 7:8) ʼE tapuakina anai te kau Kilisitiano fakanofo ʼaki “te kolona ʼo te maʼuli” ʼi selō. (Sake 1:12) Ko te “tahi ʼu ovi” ʼa Kilisito, ʼaē ʼe natou faiga ke natou maʼu he tapuakina, ʼaki te hako ʼo Apalahamo, ʼe natou fiafia anai ʼi tanatou logo ʼe ʼui fēnei e Kilisito: “Kotou ʼomai, ia koutou ʼaē neʼe tapuakina e taku Tamai, ʼo maʼu te puleʼaga ʼaē neʼe teuteuʼi maʼa koutou talu mai te kamataʼaga ʼo te mālamanei.” (Soa. 10:16; Mat. 25:34) ʼEī, “ ʼe maʼu anai te kele e nātou ʼaē ʼe tapuakina [e te ʼAtua] . . . pea ʼe natou nonofo ai anai ʼo talu ai.”—Pes. 37:22, 29.

ʼE Feala Koa Hakotou Fakamahino?

• Koteā ʼaē ʼe fakamaʼua mai moʼo maʼu te tapuakina ʼa te ʼAtua?

• Koteā ʼaē ʼe pipiki ki te fakalogo moʼoni?

• ʼE tou lava maʼu feafeaʼi te laumālie māʼoniʼoni ʼo te ʼAtua pea ʼe lava gāue feafeaʼi maʼa tātou?

[ʼU fehuʼi ʼo te ako]

[ʼU paki ʼo te pasina 11]

Neʼe fehōkosi ia Sakopo mo te ʼāselo ke ina maʼu te tapuakina ʼa Sehova.

ʼE kotou toe faiga mālohi koa mo koutou?

[Paki ʼo te pasina 12]

Neʼe tokoni te laumālie māʼoniʼoni ʼo te ʼAtua kiā Pesalele pea mo Oholiape ke nā makehe age