Ko Te Logotahi Fakakilisitiano ʼe Ina Fakakolōliaʼi Te ʼAtua

“Kotou faiga fakamālotoloto ke kotou taupau te logotahi ʼo te laumālie.”—EFE. 4:3.

 1. Neʼe fakakolōliaʼi feafeaʼi te ʼAtua e te ʼu Kilisitiano ʼo Efesi ʼi te ʼuluaki sēkulō?

 KO TE logotahi ʼo te kōkelekāsio Fakakilisitiano ʼo Efesi te kolo ʼo te temi muʼa, neʼe ina fakakolōliaʼi te ʼAtua moʼoni ko Sehova. ʼI te kolo koloaʼia ʼaia neʼe lahi ai te faifakatau, ʼe mahino ia neʼe ʼi ai ʼihi tehina Kilisitiano maʼu koloa neʼe ʼi ai tanatou ʼu sinifu, pea ko ʼihi tehina neʼe ko te ʼu sinifu pea lagi natou māsisiva. (Efe. 6:5, 9) Ko ʼihi tehina neʼe ko te kau Sutea neʼe natou logo ki te moʼoni ʼi te ʼu māhina e tolu ʼaē neʼe faiakonaki ai te ʼapositolo ko Paulo ʼi tonatou sinakoka. Ko ʼihi age tehina neʼe natou tauhi ʼi muʼa atu kiā Alatemisi pea neʼe natou gaohi meʼa fakatemonio. (Gāue 19:8, 19, 26) Kae ko te Lotu Fakakilisitiano moʼoni neʼe ina fakatahiʼi te hahaʼi neʼe kehekehe ʼonatou maʼuli. Neʼe fakamoʼoni e Paulo ko Sehova neʼe fakakolōliaʼi e te logotahi ʼaē ʼo te kōkelekāsio. Neʼe tohi fēnei e Paulo: “Ke ina maʼu ia te kolōlia ʼaki te kōkelekāsio.”—Efe. 3:21.

 2. Koteā ʼaē neʼe feala ke puli ai ia te logotahi ʼo te kau Kilisitiano ʼo Efesi?

² Kae neʼe feala pē ki te logotahi lelei ʼaia ʼo te kōkelekāsio ʼo Efesi ke puli. Neʼe fai e Paulo ia te fakatokaga ʼaenī ki te kau tagata ʼāfea ʼo Efesi: “ ʼI te lotolotoiga ʼo koutou ʼe mafuta ake anai te ʼu tagata ʼe natou palalau ki he ʼu meʼa fakapikopiko, ke tupu ʼaki ai hanatou taki mai ni ʼu tisipulo ke muli iā nātou.” (Gāue 20:30) Pea ko ʼihi tehina neʼe kei natou nonofo mo te ʼu manatu fakatupu maveuveu, ohagē ko tona fakatokaga e Paulo, “ ʼe gāue [te taʼi manatu ʼaia] . . . ʼi te ʼu foha ʼo te talagataʼa.”—Efe. 2:2; 4:22.

Ko He Tohi ʼe Talanoa Tāfito Ki Te Logotahi

3, 4. ʼE fakamaʼuhigaʼi feafeaʼi ia te logotahi ʼi te tohi ʼaē neʼe fai e Paulo ki te kau Efesi?

³ Neʼe mahino kiā Paulo, kapau ʼe tonu ke gāue fakatahi te kau Kilisitiano, pea ʼe tonu ke natou tahi faiga takitokotahi ki te taupau ʼaē ʼo tanatou logotahi. Neʼe takitaki e te ʼAtua ia Paulo ke ina fai he tohi ki te kau Kilisitiano ʼo Efesi, pea neʼe ko te manatu tāfito ʼo tana tohi ʼaia neʼe ko te logotahi. Ohagē lā, neʼe talanoa ia Paulo ʼi tana tohi ki te fakatuʼutuʼu ʼa te ʼAtua ʼaē ke ina “toe fakatahiʼi ia meʼa fuapē iā Kilisito.” (Efe. 1:10) Neʼe ina toe fakatatau ia te kau Kilisitiano ki he ʼu faʼahiga piliki kehekehe ʼe laga ʼaki ai he fale. “Ko te fale kātoa, ʼi tona malaga ake ki ʼoluga ʼe liliu ia ko he fale lotu taputapu maʼa Sehova.” (Efe. 2:20, 21) Tahi ʼaē meʼa, neʼe fakamaʼuhigaʼi e Paulo ia te logotahi ʼa te kau Kilisitiano Sutea pea mo te kau Kilisitiano Senitile, pea mo ina toe fakamanatuʼi age ki te ʼu tehina neʼe ko te ʼAtua ʼaē neʼe ina fakatupu fuli ia nātou. Neʼe ina ʼui ko Sehova ko “te Tamai, ʼaē ʼe maʼu ai e te fāmili kātoa  ʼi selō pea mo te kele tonatou higoa.”—Efe. 3:5, 6, 14, 15.

⁴ ʼI tatatou vakavakaʼi ia te kāpite 4 ʼo Efesi, ʼe tou ako anai pe koʼē ʼe tonu ke tou faiga mālohi ke tou logotahi, ʼe tokoni feafeaʼi mai Sehova ke tou logotahi, pea koteā te ʼu kalitātē ʼaē kā tokoni mai anai ke tou taupau ia tatatou logotahi. Koteā ʼaē ʼe mole kotou lau ai muʼa te kāpite kātoa ke lahi age tona ʼu fua lelei kiā koutou?

He Koʼē ʼe Tonu Ke Tou Faiga Lahi Ke Tou Maʼuli ʼi Te Logotahi?

 5. He koʼē ʼe feala ki te ʼu ʼāselo ʼa te ʼAtua ke natou logotahi ʼi tanatou tauhi, kae koteā ʼaē ʼe feala ai ke faigataʼa ʼaupitō kiā tātou hatatou logotahi?

⁵ Neʼe kolekole e Paulo ki tona ʼu tehina ʼo Efesi ke natou ‘faiga fakamālotoloto ke natou taupau te logotahi ʼo te laumālie.’ (Efe. 4:3) Tou vakaʼi age muʼa te ʼaluʼaga ʼo te kau ʼāselo ʼa te ʼAtua, ke tou mahino ai ki te ʼaoga ʼaē ke tou faiga fakamālotoloto ki te taupau ʼaē ʼo te logotahi. ʼI te kele, ʼe mole he ʼu meʼa maʼuli e lua ʼe nā tatau ʼosi, koia ʼaē ʼe matatonu ai te manatu ʼaē ko Sehova ʼe ina tapuakina takitahi pē tana ʼu ʼāselo ʼaē e toko lauʼi miliona ʼaki tana faʼu kehekehe ia nātou fuli, ʼo tahi maʼu pē tona ʼulugaaga. (Tan. 7:10) Logolā tonatou kehekehe ʼaia, kae ʼe natou logotahi ʼi tanatou tauhi ʼaē kiā Sehova, heʼe natou fakalogo fuli kiā te ia pea mo fai tona finegalo. (Lau ia Pesalemo 103:20, 21.) Ko te kau ʼāselo agatonu ʼe natou maʼu nātou ia tonatou ʼu kalitātē kehekehe, kae ko te kau Kilisitiano ʼe natou toe maʼu nātou mo tonatou ʼu vaivaiʼaga. Pea ko he faʼahi ʼe ina fakafaigataʼaʼia te taupau ʼaē ʼo te logotahi.

 6. Ko te ʼu kalitātē fea ʼaē kā tokoni mai ke tou gāue fakatahi ai mo ʼotatou tehina ʼaē ʼe mole tatau totatou ʼu vaivaiʼaga?

⁶ Kā faiga he ʼu hahaʼi heʼe haohaoa ke natou gāue fakatahi, pea ʼe feala pē ke hoko he ʼu fihifihia. Ohagē lā, ko he tehina ʼe agamalū kae ʼe haʼu tauhala tuʼumaʼu pē pea mo he tehina ʼe tautonu tuʼumaʼu pē ia kae ʼe hoko ʼita, ʼe nā feafeaʼi anai ʼi te temi ʼaia? ʼE lagi nā tahi fia lakatonu pē, kae ko te faʼahi ʼaē ʼe galo kiā nāua, ko te tauhala tuʼumaʼu pea mo te hoko ʼita, ʼe ko he ʼu aga ia ʼe mole lelei. ʼE lava gāue fakatahi feafeaʼi te ʼu tehina ʼaia e toko lua? Kotou fakatokagaʼi te ʼu kalitātē ʼaē neʼe ʼui e Paulo ʼi tana ʼu palalau ʼaē ʼe hoa mai, peʼe tokoni feafeaʼi anai ki te fakatokatoka ʼo tonā fihifihia. Pea kotou fakakaukauʼi age muʼa peʼe feafeaʼi hatatou taupau te logotahi ʼaki tatatou maʼuliʼi te ʼu kalitātē ʼaia. Neʼe tohi fēnei e Paulo: “ ʼE au kole mamahi atu ke kotou haʼele ʼi he ʼaluʼaga ʼe tuha . . . [mo te] agavaivai pea mo he agamalū kātoa, mo he faʼa kātaki, ʼo kotou fekātaki ʼaki ʼi te ʼofa, ʼo kotou faiga fakamālotoloto ke kotou taupau te logotahi ʼo te laumālie ʼi te noʼo ʼo te tokalelei.”—Efe. 4:1-3.

 7. He koʼē ʼe maʼuhiga ke tou faiga fakamālotoloto ke tou logotahi mo te ʼu Kilisitiano heʼe haohaoa ʼi tatatou tauhi fakatahi ʼaē ki te ʼAtua?

⁷ ʼE maʼuhiga ke tou ako ke tou logotahi mo te hahaʼi heʼe haohaoa ʼi tatatou tauhi fakatahi ʼaē ki te ʼAtua, koteʼuhi ko te kau ʼatolasio moʼoni ʼe natou faʼufaʼu pē te foʼi sino e tahi. “ ʼE ko te sino pē e tahi pea mo te laumālie pē e tahi, ohagē pē ko tokotou pāui ki he ʼamanaki pē e tahi ʼaē neʼe pāui koutou kiai; ko he ʼAliki pē e tahi, ko he tui pē e tahi, ko he papitema pē e tahi; ko he ʼAtua pē e tahi pea mo Tamai maʼa te hahaʼi fuapē.” (Efe. 4:4-6) Ko te laumālie pea mo te tapuakina ʼa Sehova ʼe maʼu pē ʼi te kautahi ʼo te ʼu tehina ʼaē ʼe fakaʼaogaʼi e te ʼAtua. Tatau aipē peʼe tou tūkia ʼi he aga ʼa he tahi ʼi te kōkelekāsio, kae kofea anai kā tou ʼolo kiai? ʼE mole he tahi age faʼahi ʼe feala ai ke tou logo ki te ʼu folafola ʼo te maʼuli heʼegata.—Soa. 6:68.

ʼE Taupau Te Logotahi e Te “ ʼu Meʼa ʼOfa Ko He ʼu Tagata”

 8. Koteā ʼaē ʼe fakaʼaogaʼi e Kilisito moʼo tokoni mai ke tou mālolohi ʼo tauʼi te ʼu fakatupu maveuveu?

⁸ Moʼo fakahā pe neʼe feafeaʼi te foaki ʼaē e Sesu te “ ʼu meʼa ʼofa ko he ʼu tagata” moʼo tokoni ki te logotahi ʼa te kōkelekāsio, neʼe talanoa Paulo ki te aga ʼāfea neʼe fai e te kau sōlia ʼo te temi muʼa. Ko he tagata sōlia neʼe mālo ʼi te tau, neʼe feala hana ʼaumai ki tona loto fale he tagata pōpula matāpule, ke tokoni ki tona ʼohoana ki te ʼu gāue ʼo te loto fale. (Pes. 68:1, 12, 18) ʼO toe fēia pē, ko te mālo ʼaē ʼa Sesu ʼi te mālamanei, neʼe ina maʼu ai te ʼu kaugana lotolelei e tokolahi. (Lau ia Efesi 4:7, 8.) ʼI hona ʼaluʼaga fakatā, koteā  te ʼu gāue neʼe ina fakaʼaogaʼi kiai te hahaʼi pōpula ʼaia? “Neʼe ina foaki ʼihi ko te kau ʼapositolo, ʼihi ko te kau polofetā, ʼihi ko te kau fagonogono ʼo te evaselio, ʼihi ko te kau tauhi ovi pea mo te kau faiako, moʼo fakatonutonuʼi te kau māʼoniʼoni, ʼo ʼuhiga mo te gāue fakaminisitelio, ʼo ʼuhiga mo te fakatuʼu ʼo te sino ʼo Kilisito, ke tou aʼu ki te logotahi ʼi te tui.”—Efe. 4:11-13.

 9. (a) Koteā te tokoni ʼe fai e te “ ʼu meʼa ʼofa ko he ʼu tagata” ʼo ʼuhiga mo te taupau ʼaē ʼo tatatou logotahi? (b) He koʼē ʼe tonu ki te kau Kilisitiano takitokotahi ke natou lagolago ki te logotahi ʼo te kōkelekāsio?

⁹ ʼI tanatou gāue ʼaē ko te ʼu tauhi ovi ʼofa, ko ‘te ʼu meʼa ʼofa ʼaia ko te ʼu tagata ʼe natou tokoni mai ki te taupau ʼaē ʼo tatatou logotahi. Ohagē lā, kapau ko he tagata ʼāfea ʼi he kōkelekāsio ʼe ina tokagaʼi he ʼu tehina e toko lua ʼe nā “fakataupiepie,” ʼe feala pē mo ia ke lagolago mālohi ki te taupau ʼaē ʼo te logotahi ʼo te kōkelekāsio, ʼaki hana tokoniʼi ia nāua ʼāteaina pē, ʼo “fakatonutonuʼi [nāua] ʼaia ʼaki he agamalū.” (Kal. 5:26–6:1) ʼI tonatou ʼuhiga kau faiako, ko ‘te ʼu meʼa ʼofa ʼaia ko te ʼu tagata’ ʼe natou tokoni mai ke tou laga hatatou tui ʼe mālohi mo fakatafito ki te ʼu akonaki ʼo te Tohi-Tapu. ʼAki te ʼu faʼahi ʼaia, ʼe lagolago ai te ʼu tagata ʼāfea ki te logotahi pea mo tokoni mai ke tou maʼu te ʼu kalitātē ʼaē ke tou liliu ai ko he ʼu Kilisitiano kua fotufotuʼa ʼi te faʼahi fakalaumālie. Neʼe ʼui e Paulo te faʼahi ʼaia ke “ ʼaua naʼa tou hagē ko he ʼu kiʼi tamaliki ʼe fetafeaʼaki ʼi te ʼu fuga vai pea mo feʼāveʼaki ʼi hē mo hē e te matagi ʼo te ʼu akonaki fuli pē, ʼaki te kākā ʼa te tagata, ʼi tanatou faiva ʼaē ʼi te faʼufaʼu ʼo te kākā.” (Efe. 4:13, 14) ʼE tonu ki te kau Kilisitiano takitokotahi ke natou lagolago ki te logotahi ʼo te fale tautēhina, ohagē pē ko te fetokoniʼaki ʼaē ʼo te ʼu koga kehekehe ʼo totatou sino, ʼo natou tahi fefoakiʼaki te ʼu meʼa ʼaē ʼe ʼaoga kiā nātou.—Lau ia Efesi 4:15, 16.

Tou Maʼu He ʼu Aga ʼe Foʼou

10. ʼE lava maumauʼi feafeaʼi tatatou logotahi e te aga heʼeʼaoga?

¹⁰ Neʼe kotou tokagaʼi koa ʼi te kāpite 4 ʼo te tohi ʼa Paulo ki te kau Efesi, ʼe fakahā ai ko te maʼuliʼi ʼo te ʼofa ʼe ko te puleʼaki ʼaia ke tou aʼu ai ki te logotahi, ʼuhi ko tātou ko he ʼu Kilisitiano kua tou fotufotuʼa ʼi te faʼahi fakalaumālie? Pea ʼe toe fakahā ai peʼe koteā ʼaē ʼe fakaʼuhiga kiai te ʼofa. Kā tou maʼuli ʼi te ala ʼo te ʼofa, pea ʼe mole tou tali anai te fai folonikāsio pea mo te ʼu aga heʼeʼaoga. Neʼe uga e Paulo tona ʼu tehina ke ‘ ʼaua naʼa natou haʼele ohagē ko te haʼele ʼo nātou ʼo te ʼu puleʼaga.’ Ko te hahaʼi ʼaia ʼe “mole kei natou mahino ki te aga ʼaē ʼe tonu ke fai,” pea “kua natou maʼuli pē nātou ʼi te ʼu aga heʼeʼaoga.” (Efe. 4:17-19) Ko te mālama heʼeʼaoga ʼaē ʼe tou māʼuʼuli ai, ʼe feala ke ina maumauʼi tatatou logotahi. ʼE fakahuahuaʼi e te hahaʼi te fai folonikāsio, mo fai tanatou ʼu hiva kiai, mo natou sioʼi ʼi tonatou ʼu temi fakafiafia, mo natou fai folonikāsio fakafufū peʼe fai fakahāhā. Tahi ʼaē, tatau aipē mokā ko he tama mo he taʼahine ʼe nā felōgoi tuʼumaʼu heʼe nā holi ke nā fai ni ʼu felāveʼi fakasino kae mole nā fia ʼohoana, ʼe feala ki te taʼi aga ʼaia ke fakatupu kovi ki tanā felōgoi  ʼaē mo Sehova pea mo te kōkelekāsio. Koteā tona tupuʼaga? Heʼe faigafua aipē takotou tō ki te fai folonikāsio. Pea kā ko he tahi kua ʼohoana kae fēia tana aga mo he tahi ʼe mole ko hona ʼohoana, ʼo tupu ai hana tono, ʼe feala ai he veteki ʼo te fānau mai ʼanatou mātuʼa, pea ki ʼaē neʼe mole hala ki tuʼa ke māvete mo tona ʼohoana. ʼE mahino ia, ʼe hoko moʼoni ai anai he maveuveu! Neʼe ko te tupuʼaga lelei lā ʼaia ʼo te faitohi fēnei ʼa Paulo: “Neʼe mole kotou ako neʼe fēia ia Kilisito”!—Efe. 4:20, 21.

11. Koteā te fetogi ʼaē ʼe fakalotomālohiʼi e te Tohi-Tapu ke fai e te kau Kilisitiano?

¹¹ Neʼe fakahā lelei e Paulo te maʼua ʼaē ke tou liʼaki te ʼu faʼahiga manatu fakatupu maveuveu kae ke tou maʼu te ʼu aga ʼaē ʼe feala ai ke tou māʼuʼuli fakatahi mo niʼihi, ʼo ina tohi fēnei: “Ke kotou liʼaki tokotou ʼulugaaga ʼāfea ʼaē ʼe ʼalutahi mo takotou aga ʼāfea pea ʼe fakahehema ʼo fai pē ki [te] ʼu holi kākā [ʼo te ʼulugaaga ʼāfea]; . . . ʼe tonu ke kotou fakafoʼou ia koutou ʼi te mālohi ʼaē ʼe ina uga tokotou ʼatamai pea mo kotou kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efe. 4:22-24) ʼE feafeaʼi hatatou lava ‘fakafoʼou ia tātou ʼi te mālohi ʼaē ʼe ina uga totatou ʼatamai’? Kapau ʼe tou metitāsioʼi ʼaki he loto fakafetaʼi te ʼu manatu ʼaē ʼe tou ako mai te Folafola ʼa te ʼAtua pea ʼi te faʼifaʼitaki lelei ʼa te kau Kilisitiano kua fotufotuʼa fakalaumālie, ʼe feala ʼaki tatatou ʼu faiga, ke tou maʼu ia te ʼulugaaga foʼou ʼaē neʼe “fakatupu ʼo mulimuli ki te finegalo ʼo te ʼAtua.”

Tou Maʼu He Faʼahiga Palalau ʼe Foʼou

12. Ko te palalau ʼi te moʼoni ʼe lagolago feafeaʼi ki te logotahi, pea he koʼē ʼe faigataʼa maʼa ʼihi hanatou palalau ʼi te moʼoni?

¹² Ko te palalau ʼi te moʼoni ʼe maʼuhiga kiā nātou ʼaē ʼe maʼuli tahi ʼi he fāmili peʼe ʼi he kōkelekāsio. ʼE feala ki te hahaʼi ke natou maʼuli fakatahi mokā natou palalau lelei mo fakahagatonu, mo moʼoni, ʼe feala ke fakatahiʼi ai te hahaʼi. (Soa. 15:15) Kae ʼe feafeaʼi mokā ʼe loiʼi e he tahi tona tehina? Kā ʼiloʼi e he tehina neʼe kākāʼi ia ia e hona tehina, pea ʼe mole toe falala anai ia ki ai. Koia ʼe kotou mahino ai anai, peʼe koʼē neʼe tohi fēnei e Paulo: “Kotou tahi tala te moʼoni ki tona kāiga, heʼe ko tātou ko te ʼu koga ʼo te sino e tahi.” (Efe. 4:25) Ko he tahi kua māhani ʼi te loi, ʼe feala ke faigataʼa kiā ia hana palalau ʼi te moʼoni heʼe lagi ko he aga ia neʼe ina kamata talu mai tana kei veliveli. Kae ko Sehova ʼe fiafia anai ia ʼi tana ʼu faiga ʼaē ke fetogi pea ʼe tokoni anai ki ai.

13. Koteā ʼaē ʼe tonu ke fai ke mole hoko ai he lea kovi?

¹³ ʼE akoʼi tātou e Sehova ke tou aga fakaʼapaʼapa pea mo taupau te logotahi ʼo te kōkelekāsio pea mo te fāmili, ʼaki hatatou tōkakaga ki te ʼu palalau ʼaē ʼe tou fai. “Ke ʼaua naʼa haʼu he palalau ʼuli mai tokotou gutu. . . . Ke toʼo iā koutou te lotokovi fuli pē, te ʼita fuli pē, te hauhau fuli pē,  te kalaga fuli pē, te lea kovi fuli pē, pea mo te agakovi fuli pē.” (Efe. 4:29, 31) Ke ʼaua naʼa tou palalau kovi ki he tahi, ʼe ʼaoga ke tou fakaʼapaʼapa ki te hahaʼi. Ohagē lā, ko he tagata ʼe palalau kovi ki tona ʼohoana, ʼe tonu ke ina fetogi tana aga ʼaia, tāfito lā ʼi tana kua mahino ʼaē ko Sehova ʼe fakaʼapaʼapa ia ki te hahaʼi fafine. Neʼe haga pē foki lā te ʼAtua ʼo fakanofo ʼihi fafine ʼaki tona laumālie māʼoniʼoni, ke liliu mo nātou ko he ʼu kaugā hau ʼo Kilisito. (Kal. 3:28; 1 Pet. 3:7) ʼO toe fēia pē ki te fafine, kapau ʼe ko hana agamāhani te munaʼi ʼo tona ʼohoana, pea ʼe tonu ke fetogi mo ia ʼi tana kua mahino ʼaē ko Sesu neʼe loto lolomi ʼi te temi ʼaē neʼe fakafihiʼi ai.—1 Pet. 2:21-23.

14. He koʼē ʼe fua kovi mokā tou palalau kae tou ʼiʼita?

¹⁴ Ko he tahi ʼe lea kovi ko tona fakaʼuhiga ʼe mole ina lava lolomi tona ʼita. Ko te aga ʼaia ʼe feala pē foki ke ina veteki he felōgoi lelei ʼa ni hahaʼi ʼe fakatahi. Ko te ʼita ʼe hagē ko he afi, pea ʼe faigataʼa hona tātāʼofi pea ʼe fua kovi ia. (Taag. 29:22) Ko he tahi ʼe ʼita tonu, ʼe tonu ke tokaga ʼo lolomi tona ʼita naʼa liliu te faʼahi ʼaia ʼo fakatupu kovi ki tana ʼu felōgoi ʼaē mo te hahaʼi. ʼE tonu ki te kau Kilisitiano ke natou loto fakamolemole, ke ʼaua naʼa natou taupau he loto kovi peʼe natou talanoa ki he faʼahi kua ʼosi. (Pes. 37:8; 103:8, 9; Taag. 17:9) Neʼe fai e Paulo ia te tokoni ʼaenī ki te kau Efesi: “Kotou ʼiʼita, kae ʼaua naʼa kotou agahala; ke ʼaua naʼa tō te laʼā ki tokotou ʼita pea ʼaua naʼa kotou tuku he faigamālie ki te Tēvolo.” (Efe. 4:26, 27) Ko he tahi ʼe mole ina lava tāʼofi tona ʼita ʼe ko he faigamālie ʼaia ʼe ina tuku ki te Tēvolo moʼo veteki te logotahi pea mo fakatupu he ʼu fihi ʼi te loto kōkelekāsio.

15. Koteā ʼaē ʼe feala ke hoko mo kapau ʼe tou toʼo he meʼa ʼe mole ʼa tātou?

¹⁵ ʼE tokoni ki te logotahi ʼo te kōkelekāsio ia te fakaʼapaʼapa ʼaē ki te ʼu meʼa ʼa ʼihi. ʼE tou lau fēnei: “Ke ʼaua naʼa toe kaihaʼa te tagata kaihaʼa.” (Efe. 4:28) ʼI te agamāhani, ʼe maʼu ia te loto falala ʼi te lotolotoiga ʼo te hahaʼi ʼa Sehova. Kapau ʼe gaohi meʼa fakakākā he Kilisitiano ki te taʼi falala ʼaia ʼaki hana toʼo he meʼa ʼe mole ʼaʼana, pea ʼe ina maumauʼi anai te logotahi fakafiafia ʼaia.

Ko Te ʼOfa Ki Te ʼAtua ʼe Ina Fakalogotahiʼi Tātou

16. ʼE feafeaʼi hatatou tokoni ke mālohi ia te logotahi ʼaki he ʼu palalau ʼe lelei?

¹⁶ Ko te logotahi ʼaē ʼe maʼu ʼi te kōkelekāsio Fakakilisitiano, ʼe ko te fua ʼaia ʼo te ʼofa ʼa te hahaʼi ʼaē ki te ʼAtua, ʼo uga nātou fuli ʼaia ke natou ʼoʼofa ki te hahaʼi. Ko totatou loto fakafetaʼi ki te agaʼofa ʼo Sehova ʼe ina fakalotomālohiʼi tātou ke tou faiga mālohi ʼo maʼuliʼi ia te tokoni ʼaenī: “[Kotou fai] he ʼu lea ʼe lelei moʼo laga mokā ʼe ʼaoga, ke feala hona ʼaoga kiā nātou ʼaē ʼe fagono ki ai. . . . Ke kotou liliu ʼo feagaleleiʼaki, fonu ʼi te manavaʼofa, ʼo kotou fefakamolemoleʼaki, ohagē ko te fakamolemole ʼa te ʼAtua kiā koutou ʼaki ia Kilisito.” (Efe. 4:29, 32) ʼE agaʼofa Sehova ʼo fakamolemole mai ki te ʼu hahaʼi agahala ohagē ko tātou. ʼE mole tonu koa lā ke tou toe loto fakamolemole fēia mo tātou ki te hahaʼi mokā tou fakatokagaʼi tonatou ʼu vaivaiʼaga?

17. He koʼē ʼe tonu ke tou faiga fakamālotoloto ʼo taupau te logotahi?

¹⁷ Ko te logotahi ʼo te hahaʼi ʼa te ʼAtua ʼe ina fakakolōliaʼi ia Sehova. Ko tona laumālie ʼe ina uga tātou ke tou taupau te logotahi ʼi te ʼu faʼahi kehekehe ʼo totatou maʼuli. ʼE mahino papau ia ʼe mole tou fia fakafeagai anai ki te takitaki ʼa te laumālie. Neʼe tohi fēnei e Paulo: “ ʼAua naʼa kotou fakalotomamahiʼi ia te laumālie māʼoniʼoni ʼo te ʼAtua.” (Efe. 4:30) Ko te logotahi ʼe ko he koloa maʼuhiga ia ʼe tonu ke tou taupau fakalelei. Ko nātou ʼaē ʼe logotahi ʼe natou fiafia pea ʼe fakakolōlia ai ia Sehova. “Koia, ke kotou liliu ko he kau faʼifaʼitaki ʼo te ʼAtua, ohagē ko he fānau ʼofaina, pea ke kotou haga haʼele ʼi te ʼofa.”—Efe. 5:1, 2.

ʼE Kotou Tali Feafeaʼi Anai?

• Ko te ʼu kalitātē fea ʼaē ʼe tokoni ki te kau Kilisitiano ke natou taupau tanatou logotahi?

• Koteā ʼaē ʼe tou lava fai moʼo taupau te logotahi ʼa te kōkelekāsio?

• ʼE lava tokoni feafeaʼi mai tatatou ʼu palalau ke tou gāue fakatahi mo ʼihi?

[ʼU fehuʼi ʼo te ako]

[Paki ʼo te pasina 21]

ʼE logotahi te hahaʼi mai te ʼu faʼahiga maʼuli kehekehe

[Paki ʼo te pasina 22]

ʼE kotou mahino koa ki te ʼu fua kovi ʼaē ʼe hoko mokā ʼe felōgoi tuʼumaʼu he tama mo he taʼahine kae mole heʼeki nā fia ʼohoana?