ʼE ʼIloʼi Te Tauhi Moʼoni ʼAki Te Logotahi
ʼE ʼIloʼi Te Tauhi Moʼoni ʼAki Te Logotahi
“ ʼE au fakatahiʼi anai nātou ke natou logotahi ohagē ko he kiʼi faga manu ʼi te lotoʼā.”—MIK. 2:12.
1. ʼI te ʼu meʼa ʼaē neʼe fakatupu, koteā ʼaē ʼe tou sio kiai ʼe fakamoʼoni ai te poto ʼo te ʼAtua?
NEʼE ʼui fēnei e te tagata fai pesalemo: “ ʼE lahi tau ʼu gāue Ê Sehova! Neʼe ke fai tau ʼu gāue fuli ʼaia ʼaki te poto. ʼE mahu tou ʼu koloa ʼi te kele.” (Pes. 104:24) ʼE hā ia te poto ʼo te ʼAtua ʼi te felōgoi tahi ʼaē ʼa te ʼu lauʼi miliona fuʼu ʼakau kehekehe, mo te ʼu kiʼi manu liliki, mo te ʼu manu lalahi, pea mo te ʼu mikolope ʼaē ʼe maʼu ʼi te kele. Pea ʼi tokotou loto sino, ko te ʼu lauʼi afe gāue kehekehe ʼaē ʼe fai e te ʼu koga lalahi pea mo te ʼu kiʼi selule, ʼe natou felagolagoʼaki ke kotou maʼu ai he sino ʼe kātoa pea mo mālohi.
2. He koʼē neʼe feala ke ʼui neʼe ko he milakulo ia te logotahi ʼaē neʼe maʼu ʼi te kau Kilisitiano ʼo te ʼuluaki sēkulō?
2 Neʼe faʼu e Sehova te mālamanei ke felōgoi tahi. ʼE maʼu ʼi te mālamanei te hahaʼi mo tonatou ʼu agaaga kehekehe, mo tonatou ʼu ʼulugaaga kehekehe pea mo tonatou ʼu fealagia kehekehe. Pea tahi, neʼe ina faʼu te ʼuluaki tagata mo te ʼuluaki fafine mo ʼonā kalitātē, ke feala ai kiā nāua hanā felagolagoʼaki pea mo hanā fetokoniʼaki. (Sen. 1:27; 2:18) Kae ʼi te temi nei, ko te mālamanei kātoa kua mamaʼo ia mai te ʼAtua, pea neʼe mole he temi neʼe feala ai ki te mālamanei kātoa ke gāue fakatahi ʼi te logotahi. (1 Soa. 5:19) Koia, neʼe feala ai ke ʼui ko he milakulo ia te logotahi ʼaē neʼe maʼu ʼi te kōkelekāsio Fakakilisitiano ʼo te ʼuluaki sēkulō, he neʼe ʼi ai te ʼu hahaʼi kehekehe, ko te hahaʼi Efesi neʼe ko te kau sinifu, mo te ʼu fafine Keleka ʼaliki, mo te ʼu tagata Sutea ʼatamai, pea mo te hahaʼi neʼe tauhi tamapua ʼi muʼa atu.—Gāue 13:1; 17:4; 1 Tes. 1:9; 1 Tim. 6:1.
3. ʼE fakamatala feafeaʼi ʼi te Tohi-Tapu ia te logotahi ʼa te kau Kilisitiano, pea koteā ʼaē kā tou vakaʼi anai ʼi te ʼalatike ʼaenī?
3 ʼE fakafealagia e te tauhi moʼoni ke gāue fakatahi te hahaʼi ohagē pē ko te gāue tahi ʼa te ʼu koga kehekehe ʼo totatou sino. (Lau ia 1 Kolonito 12:12, 13.) ʼE tou vakaʼi anai ʼi te ʼalatike ʼaenī te ʼu fehuʼi ʼaenī: ʼE feafeaʼi te haga ʼa te tauhi moʼoni ʼo fakalogotahiʼi ia te hahaʼi? He koʼē ko Sehova tokotahi pē ʼaē ʼe feala ke ina fakalogotahiʼi te ʼu toko lauʼi miliona hahaʼi ʼo te ʼu puleʼaga fuli pē? Koteā te ʼu faigataʼaʼia moʼo fakatuʼu te logotahi ʼaē ʼe tokoni mai e Sehova ke tou tauʼi? Pea ʼo ʼuhiga mo te logotahi, koteā ʼaē ʼe kehekehe ai te Lotu Fakakilisitiano moʼoni pea mo te Keletiate?
ʼE Feafeaʼi Te Haga ʼa Te Tauhi Moʼoni ʼo Fakalogotahiʼi Ia Te Hahaʼi?
4. ʼE feafeaʼi te haga ʼa te tauhi moʼoni ʼo fakalogotahiʼi ia te hahaʼi?
4 Ko te hahaʼi ʼaē ʼe kau ki te tauhi moʼoni ʼe natou ʼiloʼi, mai tona ʼaluʼaga ʼaē ko Sehova neʼe ina fakatupu ia meʼa fuli, ʼe matatonu ko ia te Tuʼi ʼo te ʼatulaulau. (Fakh. 4:11) Koia logolā te māʼuʼuli ʼaē ʼa te kau Kilisitiano moʼoni ʼi te ʼu fenua kehekehe pea mo kehekehe te ʼaluʼaga ʼo tonatou maʼuli, kae ʼe tatau ʼosi pē te ʼu lao ʼa te ʼAtua ʼaē ʼe natou fakalogo fuli kiai pea ʼe toe tatau pē mo te ʼu pelesepeto Fakatohi-tapu ʼaē ʼe natou maʼuliʼi. Pea ʼe tuha mo te kau ʼatolasio moʼoni fuli ke natou toʼo ia Sehova ko tanatou “Tamai.” (Isa. 64:8; Mat. 6:9) Koia, ko nātou fuli ko te ʼu tehina fakalaumālie pea ʼe feala ai ke natou maʼu ia te logotahi matalelei ʼaē neʼe talanoa fēnei kiai te tagata fai pesalemo: “Kotou sisio! ʼE ko he meʼa lelei pea mo fakafiafia ki he ʼu tehina hanatou nonofo fakatahi ʼi te logotahi!”—Pes. 133:1.
5. Ko te kalitātē fea ʼaē ʼe lagolago ki te logotahi ʼa te kau ʼatolasio moʼoni?
5 Logolā te heʼe haohaoa ʼa te kau Kilisitiano moʼoni, kae ʼe natou tauhi fakatahi ʼi te logotahi he neʼe natou ako ke natou feʼofaniʼaki. ʼE akoʼi nātou e Sehova ke natou maʼu ia te ʼofa ʼaē ʼe mole feala ki he tahi ke ina akoʼi age kiā nātou. (Lau ia 1 Soane 4:7, 8.) ʼE ʼui fēnei ʼi tana Folafola: “Kotou kofuʼi foki te ʼu ʼofa mamahi ʼo te manavaʼofa, pea mo te agalelei, te manatu agavaivai, te agamalū pea mo te kātaki fualoa. Kotou haga fekātakiʼaki pea mo fefakamolemoleʼaki ʼaki he lotolelei, mo kapau ʼe lotomamahi he tahi ʼi he meʼa ki he tahi age. Ohagē pē ko te lotolelei ʼaē ʼa Sehova ke ina fakamolemole atu kiā koutou, kotou toe fai fēia pē mo koutou. Kae ʼo hilifaki ki te ʼu meʼa fuli ʼaia, kotou kofuʼi ia te ʼofa, he ko he noʼo haohaoa ia ki te logotahi.” (Kol. 3:12-14) Ko te noʼo haohaoa ʼaia, ʼaē ko te ʼofa, ʼe ko he kalitātē ʼe ʼiloʼi tāfito ai te kau Kilisitiano moʼoni. ʼAki te ʼu meʼa ʼaē neʼe kotou mamata kiai, neʼe mole kotou tokagaʼi koa lā ko te logotahi ʼe ko he faʼahi ʼe ina fakaʼilogaʼi kehe ai te tauhi moʼoni?—Soa. 13:35.
6. Ko tatatou ʼamanaki ki te Puleʼaga ʼe tokoni feafeaʼi mai kiā tātou ke tou logotahi?
6 Ko te kau ʼatolasio moʼoni ʼe natou toe logotahi heʼe natou falala ko te Puleʼaga ʼo te ʼAtua ʼe ko te ʼamanaki pē ʼaia e tahi maʼa te mālamanei. ʼE natou ʼiloʼi ko te Puleʼaga ʼo te ʼAtua ʼe kua ina vave fetogi anai ia te ʼu puleʼaga fakatagata pea mo tapuakiʼi ia te hahaʼi fakalogo ʼaki he tokalelei moʼoni pea mo heʼegata. (Isa. 11:4-9; Tan. 2:44) Koia, ʼe manatuʼi e te kau Kilisitiano te ʼu palalau ʼaenī neʼe fai e Sesu ʼo ʼuhiga mo tana ʼu tisipulo: “ ʼE mole natou kau ʼi te mālamanei, ohagē pē ko au ʼe mole au kau ʼi te mālamanei.” (Soa. 17:16) Ko te kau Kilisitiano moʼoni ʼe mole natou kau ki te ʼu fihi ʼo te mālamanei; ko te tupuʼaga lā ʼaia ʼo tanatou logotahi tatau aipē peʼe fetauʼaki te hahaʼi.
Ko Te Matapuna Pē e Tahi ʼo Te Ako Fakalaumālie
7, 8. ʼE lagolago feafeaʼi te ako Fakatohi-tapu ki tatatou logotahi?
7 Neʼe logotahi te kau Kilisitiano ʼo te ʼuluaki sēkulō heʼe ko nātou fuli neʼe fakalotomālohiʼi e te matapuna pē e tahi. Neʼe natou ʼiloʼi ko Sesu neʼe ina akoʼi pea mo takitaki ia te kōkelekāsio ʼaki te kolesi pule, ʼaē neʼe faʼufaʼu e te kau ʼapositolo pea mo te kau tagata ʼāfea ʼi Selusalemi. Ko te ʼu tagata faʼa gāue ʼaia neʼe natou fakatafito ia tanatou ʼu tonu ki te Folafola ʼa te ʼAtua pea neʼe ʼi ai te ʼu tehina feʼoloʼaki neʼe natou fakahā tanatou ʼu fakatotonu ʼaia ki te ʼu kōkelekāsio ʼo te ʼatu fenua kehekehe. ʼO ʼuhiga mo ʼihi taupau ʼi te ʼu taupau ʼaia, ʼe ʼui fēnei ʼi te Tohi-Tapu: “ ʼI tanā fakalaka ʼaē ʼi te ʼu kolo, neʼe nā tuku age kiā nātou ʼaia ʼaē neʼe nonofo ai, ke natou mulimuli kiai, ia te ʼu fakatotonu ʼaē neʼe tāʼofi e te kau ʼapositolo pea mo te kau tagata ʼāfea ʼaē neʼe nonofo ʼi Selusalemi.”—Gāue 15:6, 19-22; 16:4.
8 ʼO toe fēia iā ʼaho nei, ko te Kolesi Pule ʼaē ʼe faʼufaʼu e te kau Kilisitiano fakanofo, ʼe natou lagolago ki te logotahi ʼo te kōkelekāsio ʼi te mālamanei kātoa. ʼE lahi te ʼu lea kehekehe ʼe tā kiai ia te ʼu tohi fakalotomālohi ʼi te faʼahi fakalaumālie e te Kolesi Pule. Ko te meʼa kai fakalaumālie ʼaia ʼe fakatafito ki te Folafola ʼa te ʼAtua. Koia, ko te meʼa ʼaē ʼe natou akoʼi ʼe mole haʼu ia mai te tagata kae mai iā Sehova.—Isa. 54:13.
9. ʼE tokoni feafeaʼi mai ia te gāue ʼaē neʼe foaki mai e te ʼAtua ke tou logotahi?
9 ʼE toe lagolago mo te ʼu taupau Kilisitiano ki te logotahi ʼaki tanatou takitaki ʼaē ia te gāue fai fakamafola. Ko te felōgoi lelei ʼaē ʼe tupu ai te logotahi ʼo nātou ʼaē ʼe gāue fakatahi ʼi te tauhi ki te ʼAtua, ʼe mālohi age ia ʼi te felōgoi ʼa te hahaʼi ʼo te mālama ʼaē ʼe natou fakatahitahi pē moʼo fakafiafia. Neʼe mole fakatuʼu ia te kōkelekāsio Fakakilisitiano ke fakatahi kiai te hahaʼi moʼo fakafiafia, kae moʼo fakakolōliaʼi ai Sehova pea ke fakatuʼutuʼu ai te gāue, ʼaē ko te fakamafola ʼo te logo lelei, te fai ʼo he ʼu tisipulo, pea mo te lagalagaʼi ake ʼo te kōkelekāsio. (Loma 1:11, 12; 1 Tes. 5:11; Hep. 10:24, 25) Koia, neʼe feala ai ke ʼui e te ʼapositolo ko Paulo ʼo ʼuhiga mo te kau Kilisitiano: “Kotou taupau maʼu ʼi he ʼatamai e tahi, ʼo kotou faiga fakatahi ʼaki he nefesi e tahi maʼa te tui ʼo te logo lelei.”—Filp. 1:27.
10. Ko te ʼu faʼahi fea ʼaē ʼe fakalogotahiʼi ai e te ʼAtua ia tana hahaʼi?
10 Koia, mai tona ʼaluʼaga ʼaē ko tātou ko te hahaʼi ʼa Sehova, ʼe tou logotahi koteʼuhi ʼe tou tali te pule faʼitaliha ʼa Sehova, mo tou ʼoʼofa ki ʼotatou tehina, mo falala ki te Puleʼaga ʼo te ʼAtua, pea mo fakaʼapaʼapa kiā nātou ʼaē ʼe fakaʼaogaʼi e te ʼAtua moʼo takitaki tātou. ʼE tokoni mai Sehova ke tou tauʼi ʼihi agaaga ʼe feala ke fakatupu kovi ki tatatou logotahi, ʼuhi ko totatou ʼuhiga agahala.—Loma 12:2.
Tou Tauʼi Ia Te Fialahi Pea Mo Te Maheka
11. He koʼē ko te fialahi ʼe ina fakamavetevete te hahaʼi, pea ʼe tokoni feafeaʼi mai Sehova ke tou tauʼi te fialahi?
11 Ko te fialahi ʼe ina fakamavetevete te hahaʼi. Ko he tahi ʼe fialahi ʼe ina haga pē ʼo hikihiki ia ia totonu pea ʼi te agamāhani, ʼe fiafia pē ia mokā ina laupisiʼi ia ia totonu. Kae ʼe fakafeagai te aga ʼaia ki te logotahi; ko nātou ʼaē ʼe natou logo ki he tahi ʼe laupisi, ʼe feala ke natou maheka. Ko te tisipulo ko Sake ʼe ina ʼui fakalelei mai: “Ko te taʼi fialahi ʼaia ʼe kovi.” (Sake 4:16) ʼE mole ko he aga ʼofa te fakamālaloʼi ʼo he tahi. Tou fakatokagaʼi, ʼe tuku mai e Sehova ia he faʼifaʼitaki lelei ʼo ʼuhiga mo te agavaivai, heʼe felōgoi ia mo tātou ʼaē ko te hahaʼi agahala. Neʼe tohi fēnei e Tavite: “Ko tau agavaivai [ʼa te ʼAtua] ʼaē ʼe ina fakalahi au.” (2 Sam. 22:36) Ko te Folafola ʼa te ʼAtua ʼe tokoni mai ke tou mālo ʼi te fialahi ʼaki tana akoʼi mai ke tou manatu fakapotopoto. Neʼe takitaki e te ʼAtua ia Paulo ke ina fai ia te ʼu fehuʼi ʼaenī: “Ko ai ʼaē ʼe ina fakakeheʼi koe mai he tahi? ʼIo, koteā te meʼa neʼe ke maʼu neʼe mole foaki atu? Pea kapau lā ia neʼe foaki atu, he koʼē koa ʼe ke laupisiʼi ia koe kae neʼe foaki atu?”—1 Ko. 4:7.
12, 13. (a) He koʼē ʼe faigafua hatatou liliu ʼo maheka? (b) Koteā anai kā hoko mokā tou maʼu ia te manatu ʼa Sehova ʼo ʼuhiga mo ʼotatou tehina?
12 Ko te maheka ʼe ko te tahi aga ʼaia ʼe mole lagolago ki te logotahi. Mai tona ʼaluʼaga ʼaē ʼe tou agahala, ko tātou fuli ʼe tou “falele ki te loto mānumānu,” pea māʼia mo nātou ʼaē kua fualoa tanatou liliu ko he kau Kilisitiano, ʼe feala ʼi ʼihi temi ke natou maheka ki he ʼu meʼa ʼa ʼihi, peʼe ko he ʼu koloa ʼe natou maʼu, peʼe ko te ʼu pilivilēsio peʼe ko te ʼu fealagia ʼaē ʼe maʼu e ʼihi. (Sake 4:5) Ohagē lā, ko he tehina kua ʼohoana pea mo maʼu fānau ʼe feala ke maheka ki te ʼu pilivilēsio ʼaē ʼe maʼu e he tehina ʼe pioniē kātoa, ʼo lagi mole ina ʼiloʼi ko te tehina pioniē kātoa ʼe feala pē foki mo ia ke ʼai hana kiʼi maheka ki te tehina ʼaē kua ʼohoana pea mo maʼu fānau. Koteā ʼaē ʼe feala ke tou fai ke ʼaua naʼa tāʼofi e te maheka ia tatatou logotahi?
13 Ko te faʼahi ʼe tokoni mai anai ke ʼaua naʼa tou maheka, tou manatuʼi ʼi te Tohi-Tapu ʼe fakatatau ia te kau fakanofo ʼo te kōkelekāsio Fakakilisitiano ki te ʼu koga kehekehe ʼo te sino. (Lau ia 1 Kolonito 12:14-18.) Ohagē lā, ko tokotou ʼu mata ʼe sio te hahaʼi kiai, kae mole sisio nātou ki tokotou mafu, kae ko tona fakaʼuhiga koa ʼe mole maʼuhiga kiā koutou ia te ʼu koga ʼaia e lua ʼo tokotou sino? ʼO toe fēia, ʼe maʼuhiga kiā Sehova te hahaʼi fuli ʼo te kōkelekāsio, logolā ʼe lagi tokagaʼi lahi age niʼihi ʼi he kiʼi temi. Koia, tou maʼu ia te manatu ʼa Sehova ʼo ʼuhiga mo ʼotatou tehina. ʼAua naʼa tou maheka ki ʼihi, kae tou fakahā kiā nātou ʼaia totatou ʼofa pea mo tatatou tōkakaga ʼaē kiā nātou. Kapau ʼe tou fai fēia, pea ʼe tou fakahā ai anai ia te kehekehe ʼaē ʼo te kau Kilisitiano moʼoni mai iā nātou ʼo te ʼu lotu ʼo te Keletiate.
Ko Te Keletiate ʼe ʼIloga ʼi Tona Mavetevete
14, 15. Koteā ʼaē neʼe tupu ai te mavetevete ʼo te Lotu Fakakilisitiano ʼapositā ?
14 Ko te logotahi ʼa te kau Kilisitiano moʼoni ʼe kehe ia mo te fefihiʼaki ʼa te ʼu lotu ʼo te Keletiate. ʼI te fā sēkulō, ʼi te kua lahi ʼaē ʼo te mafola ʼo te Lotu Fakakilisitiano ʼapositā, neʼe takitaki ai leva e te pule pagani ʼo Loma, ʼo iku ai te tuputupu ʼo te Keletiate. Pea ʼi te hoko ʼaē ʼo te ʼu mavetevete, neʼe lahi ai leva te mavae kehe ʼa te ʼu puleʼaga fakatagata ʼo te Keletiate mai te Puleʼaga Loma pea natou faʼu tanatou lotu Fakafenua.
15 Ko te ʼu puleʼaga fakatagata ʼo te Keletiate neʼe natou fetauʼaki lolotoga ni ʼu sēkulō. Lolotoga te 17 pea mo te 18 sēkulō, ko te hahaʼi ʼi Pilitānia, mo Falani pea mo Amelika neʼe natou lagolago ki te tauhi Fakafenua, ʼo liliu ai ko he lotu ia te tauhi fakavale ki te fenua. Lolotoga te 19 pea mo te 20 sēkulō, neʼe kamata fakamaʼuhigaʼi ai e te hahaʼi tokolahi ia te tauhi fakavale ki te fenua. Ki muli age, ko te ʼu lotu ʼo te Keletiate neʼe natou mavetevete ʼo tupu ai te ʼu magaʼi lotu e lahi, pea tokolahi neʼe natou tali ia te tauhi fakavale ki te fenua. Ko te hahaʼi lotu neʼe natou tau mo te tahi hahaʼi ʼe natou lotu tahi kae mai te tahi age fenua. Koia iā ʼaho nei, ʼe mavetevete te Keletiate heʼe kehekehe te ʼu akonaki ʼaē ʼe lagolago kiai pea mo te tauhi fakavale ki tona fenua.
16. Ko te ʼu faʼahi fea ʼaē ʼe fakamavetevete ai te hahaʼi ʼo te Keletiate?
16 ʼI te 20 sēkulō, ʼi te ʼu magaʼi lotu e lauʼi teau ʼo te Keletiate ko ʼihi neʼe natou ʼahiʼahi fakatahiʼi te ʼu lotu ke feala ai he logotahi. Kae hili kiai te ʼu taʼu ʼo tanatou faiga ʼaia, neʼe mole lahi te ʼu lotu ʼaē neʼe natou lava felōgoi tahi, pea ko te hahaʼi lotu ʼe kei kehekehe tanatou ʼu manatu ʼaē ʼo ʼuhiga mo te ʼu fehuʼi ohagē ko te evolisio, te fakatō fatu, te maʼuli fakatahi ʼa te tagata mo te tagata pea mo te fafine mo te fafine, mo te fakanofo pātele ʼa te hahaʼi fafine. ʼI ʼihi potu ʼo te Keletiate, ko te kau takitaki lotu ʼe natou faiga ke natou fakatahiʼi te hahaʼi mai te ʼu magaʼi lotu kehekehe, ʼo mole kei natou fakamaʼuhigaʼi te ʼu akonaki ʼo te temi muʼa, ʼaē neʼe tupu ai tanatou mole felōgoi tahi. Kae ko te mole kei fakamaʼuhigaʼi ʼaia ʼo te ʼu akonaki, ʼe vaivai ai te tui ʼa te hahaʼi pea ʼe mahino ia ʼe mole logotahi ai ia te ʼu lotu ʼo te Keletiate ʼaē kua mavetevete.
ʼE Mole Maʼu ʼi Te Tauhi Moʼoni Ia Te Tauhi Fakavale Ki Te Fenua
17. Ohagē ko tona fakakikite, ʼe feafeaʼi te logotahi ʼa te hahaʼi ʼaki te tauhi moʼoni “ ʼi te ʼu ʼaho fakaʼosi”?
17 Logolā te kua tokakovi ʼaupitō age ʼo te mālamanei ʼi te temi nei, kae ʼe kei ʼiloga kehe pē te kau ʼatolasio moʼoni ʼi tanatou logotahi. Neʼe fakakikite fēnei e te polofetā ʼa te ʼAtua ko Mikea: “ ʼE au fakatahiʼi anai nātou ke natou logotahi ohagē ko he kiʼi faga manu ʼi te lotoʼā.” (Mik. 2:12) Neʼe fakakikite e Mikea te māʼoluga age ʼo te tauhi moʼoni ʼi te ʼu tauhi fuli, peʼe ko ʼaē ʼe fai ki he ʼu ʼatua hala peʼe ko te tauhi ʼaē ʼe fai ki te Fenua ohagē ko he ʼatua. Neʼe ina tohi fēnei: “ ʼE mahino papau ia, ʼi te ʼu ʼaho fakaʼosi, ko te moʼuga ʼo te fale ʼo Sehova ʼe tuʼu mālohi anai ʼi ʼoluga ʼo te tumutumu ʼo te ʼu moʼuga, pea ʼe māʼoluga anai ʼi te ʼu kiʼi moʼuga liliki; pea ʼe tonu anai ke ʼolo kiai te ʼu puleʼaga fuli pē. Ko te hahaʼi fuli ʼe natou tahi haʼele anai ʼi te huafa ʼo tona ʼatua, kae kiā tātou, ʼe tou haʼele anai ʼi te huafa ʼo Sehova totatou ʼAtua.”—Mik. 4:1, 5.
18. ʼAki te tauhi moʼoni, koteā te ʼu fetogi neʼe tou fai?
18 Neʼe toe fakamatala e Mikea peʼe feafeaʼi ia te haga ʼaē ʼa te tauhi moʼoni ʼo fakalogotahiʼi te hahaʼi ʼaē neʼe fefehiʼaʼaki ʼi muʼa atu. “ ʼE lahi te ʼu fenua ʼe natou ʼolo anai pea ʼe natou ʼui anai: ‘Kotou ʼōmai, pea ke tou hake ki te moʼuga ʼo Sehova pea ki te ʼapi ʼo te ʼAtua ʼo Sakopo; pea ʼe ina akoʼi anai kiā tātou tona ʼu ala, pea ʼe tou fia haʼele anai ʼi tona ʼu ala foufou.’ . . . Pea ʼe tonu anai ke natou tuki tanatou ʼu heletā ke liliu ko he ʼu huo fuli kele pea mo tanatou ʼu tao ke liliu ko he ʼu pipi moʼo sipi vaʼa ʼakau. Pea ʼe mole natou hiki anai tanatou ʼu heletā, ko he puleʼaga ki he tahi puleʼaga, pea ʼe mole natou toe ako anai te tau.” (Mik. 4:2, 3) Ko nātou ʼaē ʼe natou fili ke natou tauhi kiā Sehova, ʼo mole kei natou tauhi ki te ʼu ʼatua ʼaē neʼe faʼu e te tagata peʼe ko te tauhi ki te fenua, ʼe natou logotahi ʼi te mālamanei kātoa. ʼE akoʼi nātou e te ʼAtua ki te ala ʼo te ʼofa.
19. Koteā ʼaē ʼe hā lelei ʼi te logotahi ʼaē ʼa te ʼu toko lauʼi miliona hahaʼi ʼi te tauhi moʼoni?
19 Iā ʼaho nei, ʼe mole maʼu ʼi he tahi age faʼahi te logotahi fakamālamanei ʼa te kau Kilisitiano moʼoni, pea ʼe ko he fakamoʼoni lelei ʼaia ko Sehova ʼe ina takitaki tuʼumaʼu pē tana hahaʼi ʼaki tona laumālie. Ko te hahaʼi mai te ʼatu fenua ʼe lolotoga fakatahitahi nei, ʼi hona ʼaluʼaga neʼe mole heʼeki hoko fēia ʼi te hisitolia ʼo te tagata. Ko te faʼahi ʼaia ʼe ko te fakahoko ʼo te ʼu palalau ʼaē iā Fakahā 7:9, 14, pea ʼe fakahā ai kua vave pē te haga ʼa te ʼu ʼāselo ʼa te ʼAtua ʼo tuku mai ia te ʼu “matagi” ʼaē kā natou fakaʼauha anai te tuʼu agakovi ʼaenī. (Lau ia Fakahā 7:1-4, 9, 10, 14.) ʼE mole koa lā ko he pilivilēsio te logotahi ʼaē ʼa te fale tautēhina ʼi te mālamanei kātoa? ʼE tou lava lagolago feafeaʼi, ia tātou takitokotahi, ki te logotahi ʼaia? ʼE ko te faʼahi ʼaia ʼaē kā tou vakaʼi anai ʼi te ʼalatike kā hoa mai.
ʼE Kotou Tali Feafeaʼi Anai?
• ʼE feafeaʼi te haga ʼa te tauhi moʼoni ʼo fakalogotahiʼi ia te hahaʼi?
• Koteā ʼaē ʼe feala ke tou fai ke mole tāʼofi e te maheka tatatou logotahi?
• He koʼē ko te tauhi fakavale ki te fenua ʼe mole ina fakamavetevete ia te kau ʼatolasio moʼoni?
[ʼU fehuʼi ʼo te ako]
[Paki ʼo te pasina 15]
He koʼē neʼe feala ki te ʼu tisipulo ke natou palalau ʼi te ʼu lea kehekehe?
[Paki ʼo te pasina 17]
Ko takotou tokoni ki te ʼu laga ʼo te ʼu Fale ʼo Te Puleʼaga, ʼe lava lagolago feafeaʼi ki te logotahi?