Te ʼu Meʼa ʼAē Neʼe Akoʼi e Sesu ʼo ʼUhiga Mo Te Puleʼaga

“Neʼe ʼalu ki te ʼu kolo lalahi pea mo te ʼu kolo liliki, ʼo . . . fakamafola . . . te logo lelei ʼo te puleʼaga ʼo te ʼAtua.”—LUKA 8:1.

ʼE TOU leleiʼia te palalau ki he ʼu meʼa ʼe maʼuhiga kiā tātou. Ohagē ko tona ʼui e Sesu, “[ʼe] ko te mahu ʼo te loto ʼaē ʼe palalau ai te gutu.” (Mateo 12:34) Kā tou vakaʼi ia te ʼu meʼa ʼaē neʼe palalau kiai Sesu lolotoga tana minisitelio, pea ʼe tou lava mahino ai ko te Puleʼaga ʼo te ʼAtua neʼe ko te faʼahi maʼuhiga ʼaupitō kiā te ia.

Koteā koa ia te Puleʼaga ʼo te ʼAtua? ʼI he puleʼaga, ʼe ko te hau ʼaē ʼe pule. Koia ko te Puleʼaga ʼo te ʼAtua ʼe ko he puleʼaga neʼe fakatuʼu e te ʼAtua. Neʼe lahi te talanoa ʼa Sesu ʼo ʼuhiga mo te Puleʼaga ʼo te ʼAtua, pea neʼe ko te kupu tāfito ʼaia ʼo tana logo. ʼI te ʼu Evaselio e fā, ʼe tuʼa 110 tupu te talanoa ʼo ʼuhiga mo te Puleʼaga ʼaia. Kae neʼe mole akoʼi e Sesu ia te hahaʼi ʼaki pē tana ʼu palalau. ʼAki tana ʼu gāue, neʼe lahi te ʼu meʼa neʼe feala ke natou ʼiloʼi ʼo ʼuhiga mo te Puleʼaga ʼo te ʼAtua pea mo te ʼu gāue ʼaē kā ina fai.

Ko ai ia te Hau? Ko te Hau ʼo te Puleʼaga ʼo te ʼAtua ʼe mole fili e te hahaʼi ʼaki he vote. Kae ko te Hau ʼaia ʼe filifili e te ʼAtua totonu. ʼI tana ʼu akonaki, neʼe fakahā e Sesu ʼe ko ia ʼaē neʼe fili e te ʼAtua ke Hau.

Neʼe ʼiloʼi e Sesu ko te ʼu lea fakapolofetā ʼi te Tohi-Tapu neʼe natou fakakikite ʼe ko te Mēsia ʼaē neʼe fakapapau ʼaē kā pule anai ʼi he Puleʼaga ʼe heʼegata. (2 Samuele 7:12-14; Taniela 7:13, 14; Mateo 26:63, 64) Kotou manatuʼi neʼe tala e Sesu ʼe ko ia ia te Mēsia ʼaē neʼe fakapapau. Koia neʼe fakamoʼoni ai e Sesu ʼe ko ia te Hau ʼaē neʼe fili e te ʼAtua. (Soane 4:25, 26) Ko tona tupuʼaga lā ʼaē ʼo te fakaʼaogaʼi tuʼa lahi e Sesu ia te kupuʼi palalau ko “toku puleʼaga.”—Soane 18:36.

Tahi ʼaē meʼa, neʼe akoʼi e Sesu ʼe ʼi ai anai te tahi ʼu hahaʼi ʼaē kā natou pule fakatahi anai mo ia ʼi te Puleʼaga. (Luka 22:28-30) Neʼe ina fakahigoaʼi te ʼu kaugā hau ʼaia ko te “kiʼi faga ovi” heʼe natou tokosiʼi. Neʼe ina ʼui fēnei ʼo ʼuhiga mo nātou: “Ko takotou Tamai neʼe ina leleiʼia ia te foaki atu ʼo te puleʼaga.” (Luka 12:32) Ko te tohi fakamuli ʼo te Tohi-Tapu ʼe ina fakahā ʼe ko te toko 144 000 ʼaē kā natou maʼu anai ia te pilivilēsio ke natou kaugā hau mo Kilisito.—Fakahā 5:9, 10; 14:1.

ʼE tuʼu ʼifea ia te Puleʼaga? Neʼe ʼui fēnei e Sesu ki te pule Loma ko Posio Pilato: “Ko toku puleʼaga ʼe mole kau ia ʼi te mālama ʼaenī.” (Soane 18:36) Ko te Puleʼaga ʼo te ʼAtua ʼaē ʼe pule ai Kilisito, ʼe mole fakafofoga anai e he ʼu puleʼaga fakatagata. Neʼe tuʼa lahi ia te talanoa ʼa Sesu ki te Puleʼaga ʼo te ʼAtua ʼo ina ʼui ko “te puleʼaga ʼo selō.” a (Mateo 4:17; 5:3, 10, 19, 20) Koia, ko te Puleʼaga ʼo te ʼAtua ʼe ko he puleʼaga ʼe tuʼu ʼi selō.

Neʼe ʼamanaki ia Sesu ke toe liliu ki selō ʼi te  ʼosi ʼo tona temi maʼuli ʼaē ʼi te kele. Koia ʼaē neʼe ina ʼui ai ʼe ina ‘teuteuʼi ai anai he nofoʼaga,’ ʼo ina ʼavahi ia te ala maʼa tana ʼu kaugā hau ke natou fakatahi mo ia.—Soane 14:2, 3.

Koteā ʼaē ʼe fakahoko e te Puleʼaga? Neʼe akoʼi e Sesu ki te hahaʼi ʼaē neʼe fagono kiā ia ke natou faikole fēnei ki te ʼAtua: “Ke hoko mai tou puleʼaga. Ke fai tou finegalo ʼi te kele, ohagē ko selō.” (Mateo 6:9, 10) Kua lolotoga fai nei ia te finegalo ʼo te ʼAtua ʼi selō. ʼE fakaʼaogaʼi anai e te ʼAtua ia te Puleʼaga moʼo fakahoko ia tona finegalo ʼi te kele. Moʼo fai ia te faʼahi ʼaia, ʼe fakahoko anai e te Puleʼaga ia te ʼu fetogi lahi ʼi te kele.

Koteā ʼaē ʼe fakahoko anai e te Puleʼaga ʼi te kele? Neʼe akoʼi e Sesu ko te Puleʼaga ʼo te ʼAtua ʼe ina pulihi anai ia te kovi heʼe ina fakaʼauha anai ia nātou ʼaē ʼe agakovi tuʼumaʼu. (Mateo 25:31-34, 46) Ko tona fakaʼuhiga ʼe pulihi anai ia te ʼu faʼahiga agakovi fuli pē. Neʼe akoʼi e Sesu, ko te kele ʼe fonu anai ko te hahaʼi ʼe “agavaivai,” mo faitotonu, mo manavaʼofa, mo “maʼa ʼi te loto,” pea mo tokalelei.—Mateo 5:5-9.

ʼE māʼuʼuli anai koa te hahaʼi agatonu ʼaia ʼi he kele ʼe ʼuli? Kailoa ia! Neʼe fakapapau e Sesu ʼe hoko anai ki te kele ia te ʼu fetogi fakatalakitupua ʼi te ʼafio ʼo te Puleʼaga ʼo te ʼAtua. Neʼe ʼui fēnei e te tagata neʼe matehi iā tafa ʼo Sesu: “Sesu, ke ke manatuʼi au mokā ke hū anai ki tou puleʼaga.” Neʼe tali fēnei age e Sesu: “ ʼE au tala moʼoni atu kiā te koe ʼi te ʼaho nei, ʼe ke ʼi te Palatiso anai mo au.” (Luka 23:42, 43) ʼEī, ko te Puleʼaga ʼo te ʼAtua ʼe ina fetogi anai ia te kele ʼaenī ke liliu ko he palatiso, ʼe tatau anai mo te palatiso ʼaē neʼe ʼi te ʼōloto ʼo Eteni.

Koteā te tahi ʼu gāue ʼaē kā fai anai e te Puleʼaga maʼa te hahaʼi ʼo te mālamanei? Neʼe mole fai pē e Sesu ia he ʼu fakapapau ʼo ʼuhiga mo te ʼu gāue ʼaē kā fai anai e te Puleʼaga ʼo te ʼAtua. Neʼe ina toe fakahā te ʼu gāue ʼaia. Neʼe fakahoko e Sesu ia te ʼu fakamālōlō, ʼo ina fakahā ai ʼi hona ʼaluʼaga veliveli te ʼu meʼa ʼaē kā ina fai anai ʼi hona ʼaluʼaga ʼe lahi age ʼi te kā haʼu,  lolotoga te temi ʼafio ʼo tona Puleʼaga. ʼI te Evaselio ʼaē neʼe tohi ʼaki te takitaki ʼa te ʼAtua, ʼe ʼui fēnei ʼo ʼuhiga mo Sesu: “Neʼe feʼaluʼaki ia ʼi Kalilea kātoa, ʼo akonaki ʼi ʼonatou sinakoka, pea mo fakamafola te logo lelei ʼo te puleʼaga, pea mo fakamālōlō ia faʼahiga mahaki kehekehe pea mo te ʼu faʼahiga māʼimoa kehekehe neʼe ʼi te hahaʼi.”—Mateo 4:23.

Neʼe fakamālōlō e Sesu te ʼu mahaki kehekehe. Neʼe ina “ ʼavahi he ʼu mata ʼo he tagata neʼe tupu ake ʼe kivi.” (Soane 9:1-7, 32, 33) ʼAki pē tana fāfā ki te tagata ʼaē neʼe ina maʼu ia te mahaki fakalialia ʼaē ko te kilia, neʼe ina fakamālōlō ia ia. (Maleko 1:40-42) ʼI te ʼaumai kiā ia ia “te tagata tuli ʼe faigataʼa tana palalau,” neʼe fakahā ai e Sesu neʼe feala ke ina gaohi ia “te kau tuli . . . ke natou logo pea fakapalalau te hahaʼi ʼaē neʼe mole palalau.”—Maleko 7:31-37.

Māʼia mo te kau mate, ʼe feala anai ke toe fakatuʼuake nātou e te Hau ʼaē neʼe fakanofo e te ʼAtua. Iā lakaga e tolu, neʼe fakatuʼuake e Sesu te ʼu mate. Neʼe ina fakatuʼuake ia te tama ʼulutokotahi ʼa te fafine vītua, mo te kiʼi taʼahine neʼe taʼu 12, pea mo tona kaumeʼa ʼofaina ko Lasalo.—Luka 7:11-15; 8:41-55; Soane 11:38-44.

ʼI tana fakamatala ia te kā haʼu taulekaleka ʼaē kā maʼu anai e te hahaʼi fakalogo ʼo te Puleʼaga ʼo te ʼAtua, neʼe fakakikite e Sesu ʼaki ia te ʼapositolo ko Soane ia te faʼahi ʼaenī: “Koʼenī, ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe natou liliu anai ko tana hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.” (Fakahā 1:1; 21:3, 4) Kotou fakakaukauʼi age ia he mālama ʼe mole toe ʼi ai he ʼu loʼimata, he mamahi pea mo te mate! ʼI te temi ʼaia, ko te faikole ʼaē ke fakahoko te finegalo ʼo te ʼAtua ʼi te kele ohagē ko tona kua fakahoko ʼi selō ʼe hoko kātoa anai.

Ko te temi fea ʼaē kā hoko mai anai ia te Puleʼaga ʼo te ʼAtua? Neʼe akoʼi e Sesu ko te kamata ʼo tana pule ʼe hoko anai ʼi he temi makehe, pea neʼe ina fakahigoaʼi ko tana “ ʼi henī.” Neʼe foaki e Sesu ia he lea fakapolofetā moʼo fakahā ia te kamataʼaga ʼo tana ʼi henī ʼaki te mālohi fakahau. Ko te temi ʼaia ʼe hoko ai anai he ʼu maveuveu ʼi te kele kātoa, ohagē ko te ʼu tau, mo te ʼu hoge, mo te ʼu mafuike, mo te ʼu mahaki, pea mo te tuputupu ʼo te maumauʼi ʼo te lao. (Mateo 24:3, 7-12; Luka 21:10, 11) Ko te ʼu faʼahi ʼaia pea mo te tahi atu ʼu ʼaluʼaga ʼaē neʼe fakakikite e Sesu neʼe ʼiloga tāfito talu mai te taʼu 1914, te taʼu ʼaē neʼe kamata ai ia te ʼUluaki Tau Fakamālamanei. Koia, kua ʼafio Sesu ʼi te temi nei ʼi tona ʼuhiga Hau. Mole tuai, pea hoko mai anai te temi ʼaē ke haʼele mai ai te Puleʼaga pea mo ina fakahoko ia te finegalo ʼo te ʼAtua ʼi te kele. b

ʼE malave feafeaʼi kiā koutou ia te hoko mai ʼo te Puleʼaga ʼo te ʼAtua? ʼE fakalogo te faʼahi ʼaia ki takotou tali ia te logo ʼa Sesu.

[ʼU nota]