Kua Kotou ʼIloʼi Koa?

He koʼē ʼi te Tohi-Tapu ʼe fakapipiki tahi ia te tauhi ʼa te ʼatua hala ko Paale pea mo te ʼu lafeti ʼaē neʼe fai ai ia te ʼu felāveʼi fakasino heʼeʼaoga?

Ko te ʼatua Kanaane ʼaē ko Paale neʼe ko he ʼatua tāfito ia ʼe ina fakamaʼuli lelei ia te kele. ʼI te manatu ʼa tana kau ʼatolasio, neʼe fua lelei tanatou ʼu gāueʼaga pea neʼe lahi tanatou ʼu faga manu ʼuhi ko Paale. Koia, ohagē ko tona ʼui ʼi te tohi (Manners and Customs in the Bible): “Ko te ʼu felāveʼi fakasino heʼeʼaoga ʼaē neʼe fai ʼi te ʼu potu tapu, neʼe fai moʼo tokoni ki te maʼuli lelei ʼo te kele pea mo fakalotomālohiʼi ia te ʼatua ʼo te afā ko Paale pea mo tona ʼohoana ko Asela ke nā fai ni ʼu felāveʼi fakasino, ke tupu ʼaki ai he mahu ʼo te ʼu taʼukai pea mo te ʼu faga manu.”

Ko te kau Kanaane ʼi tanatou ia manatu, neʼe hifo ia Paale ki te lalo kele lolotoga te taʼi laʼā ʼi te mālo ʼaē ʼa Mote ia te ʼatua ʼo te taʼi laʼā pea mo te mate. Kae ʼi te temi ʼaē neʼe kamata tō ai ia te ʼua, maʼa nātou neʼe ko he fakaʼiloga ia ʼo te toe liliu mai ʼa Paale ki tona tuʼulaga pule mo te toe homo lelei ʼo te ʼulu ʼakau pea mo te toe lelei ʼo te maʼuli. ʼI te temi ʼaia, neʼe fai e te kau Kanaane ia te lafeti pea mo te ʼu felāveʼi fakasino heʼeʼaoga fakavalevale. ʼAki te faʼahi ʼaia, ʼe tou mahino ai, pe koʼē neʼe fai e te kau Iselaele ʼaē neʼe pipiki ki te tauhi ʼa Paale ʼo Peole ia tanatou “ ʼu felāveʼi fakasino heʼeʼaoga mo te ʼu ʼofafine ʼo Moape.”—Faka au 25:1-3.

Koteā te fakaʼuhiga ʼo te ʼui ʼaē ʼa Sesu ki te kau sekelipa pea mo te kau Faliseo, neʼe natou hagē “ko he ʼu falemaka kua pena hina”?

Neʼe fakahā e Sesu ko te kau sekelipa pea mo te kau Faliseo ʼe ko te kau mālualoi, pea neʼe ina ʼui fēnei age kiā nātou: “[ʼE] kotou hagē ko he ʼu falemaka kua pena hina, . . . ʼe hagē mai ʼe matamatalelei ʼi tuʼa, kae ʼi loto ʼe fonu ko te hui ʼo te hahaʼi mate pea mo te faʼahiga meʼa heʼemaʼa kehekehe.” (Mateo 23:27) ʼI te ʼaho 15 ʼo Atale, ko te māhina kātoa ʼi muʼa ʼo te Pāsikate, neʼe ko te agamāhani ʼa te kau Sutea hanatou fakamomole mo te lahe ia te ʼu falemaka ke matalelei, heʼe kā ʼua pea neʼe tō ia te pena hina ʼaē ʼo te ʼu falemaka.

Ohagē ko te ʼui ʼi te tohi (The Jewish Encyclopedia), neʼe fakahihina ia te ʼu falemaka moʼo puipui mai tona “alaʼi ʼaē e te ʼatu ʼu polosesio ʼaē neʼe fai ʼi te Pāsikate.” Ko te lao ʼaē ʼe tuʼu iā Faka au 19:16, neʼe ʼui ko he tahi neʼe fāfā ki he sino mate, ki te ʼu hui ʼo he tagata mate peʼe ki he falemaka ʼe heʼemaʼa anai lolotoga ʼaho e fitu. Ko te lao ʼo ʼuhiga mo te heʼemaʼa neʼe ina tapuʼi ki te kau Iselaele tanatou kau ki te ʼu gāue ʼo te tauhi maʼa, he neʼe feala ai honatou fakatūʼā ʼaki te mate. (Levitike 15:31) Neʼe palalau Sesu ki te lea fakatātā ʼaia ʼi muʼa pē ʼo te Pāsikate, koia ko te fakahihina ʼo te ʼu falemaka ʼi te taʼu fuli neʼe mahino vave ki te hahaʼi ʼaē neʼe fakalogo ki tana ʼu faiakonaki. Ko te puani ʼaē neʼe fia fakahā e Sesu, ko te kau takitaki lotu fakafeagai neʼe mole ko ni hahaʼi neʼe tauhi lotu moʼoni ki te ʼAtua pea ko nātou ʼaē ʼe pipiki kiā nātou ʼe natou toe heʼemaʼa mo nātou ʼi te faʼahi fakalaumālie.

[Paki ʼo te pasina 29]

Ko te maka fakamanatu ʼo Paale ʼo te ʼuhila, 14/13 sēkulō ʼi muʼa ʼo totatou temi

[Paki]

Musée du Louvre, Paris