ʼUluaki Talatuku: ʼE ʼi Ai He Koga ʼo Te Tagata ʼe Hoko Atu Tona Maʼuli ʼi Te Mate ʼo Te Sino

ʼE haʼu maifea ia te talatuku ʼaia? ʼE ʼui ʼi te tohi The New Encyclopædia Britannica (1988), Tohi 11, pāsina 25, ko te ʼu ʼuluaki tagata filosofia Kilisitiano neʼe natou tali ia te akonaki ʼa te kau Keleka, ʼaē ko he koga ʼi te sino ʼo te tagata ʼe tuputupua pea neʼe fakahū ia te koga ʼaia ki te sino ʼi te temi ʼaē neʼe faʼu ai.

Koteā te manatu ʼi te Tohi-Tapu? “ ʼE toe liliu ia [te mālohi gāue] ki te efu, pea ʼi te ʼaho pē ʼaia ʼe mate ai tana ʼu manatu.”—Pesalemo 146:4, Bible Segond Révisée.

ʼE ʼi ai koa he “laumālie” ʼe hoko atu tona maʼuli ʼi te kua mate ʼo te sino? ʼE akoʼi mai ʼi te Tohi-Tapu, neʼe ʼai e te ʼAtua ki te tagata pea mo te ʼu manu ia te mālohi gāue peʼe ko te laumālie, ʼaē ʼe maʼuli ʼaki te mānava. Ko te mālohi gāue ʼaia ʼe ina fakamaʼuli ia te sino. Kae kapau mole kei mānava ia te tagata pea mo te manu, pea mole kei maʼuli ia te mālohi gāue ʼaia ʼaē neʼe foaki age e te ʼAtua ʼi te kamata, pea ʼe nā mamate. ʼE mole kei nā ʼiloʼi he meʼa.—Senesi 3:19; Tagata Tānaki 3:19-21; 9:5.

Talu mai te temi ʼaē neʼe kamata ai, ko te akonaki ʼaē ʼe ʼi ai te koga ʼo te sino ʼe tuputupua pea ʼe hoko atu tona maʼuli ʼi te mate ʼo te sino, neʼe malaga ia te ʼu fehuʼi ʼaenī: ʼE ʼalu koa kifea ia te koga ʼaia ʼo te sino ʼi te hili ʼo te mate? Koteā ʼaē ʼe hoko ki te kau agakovi mokā natou mamate? Ko nātou ʼaē neʼe natou lau e nātou Kilisitiano, neʼe natou tali te talatuku ʼaē ʼe ʼi ai te koga ʼo te sino ʼe hoko atu tona maʼuli ʼi te kua mate ʼotatou sino, ʼo tupu ʼaki ai tanatou tali ia te tahi age talatuku—te akonaki ʼo te ʼifeli.

Vakaʼi ia te ʼu vaega Fakatohi-tapu ʼaenī: Tagata Tānaki 3:19; Mateo 10:28; Gāue 3:23

TE MANATU ʼAĒ ʼE MOʼONI:

Kā mate he tahi ʼe mole kei maʼuli ia