Te ʼu Fehuʼi ʼa Te Kau Lautohi

Ko Te Tēvolo ʼe Ko He Tahi Moʼoni Koa?

ʼEī, ʼe akoʼi mai ʼi te Tohi-Tapu ko Satana ia te Tēvolo ʼe ko he tahi moʼoni. Kae ko te ʼu hahaʼi ʼaē ʼe natou valoki ia te Tohi-Tapu ʼe natou fakalainoaʼi ia te ʼui ʼaē ko te Tēvolo ʼe ko te tahi moʼoni. ʼE natou ʼui ko Satana ko he higoa pē ia moʼo talanoa ki te kovi ʼaē ʼe nofo ʼi te loto ʼo te hahaʼi.

ʼE tonu koa ke tou punamaʼuli ki te ʼu fakamahino kehekehe ʼaē ki te ʼuhiga moʼoni ʼo Satana? Kailoa ia. Tou toʼo he faʼifaʼitaki: Ko he tagata fai fakapō ʼe faiga anai ke ina holoholoʼi ia te ʼu fakaʼiloga ʼo tona ʼu kauʼi tuhi ʼi te koga meʼa ʼaē neʼe hoko ai te fai fakapō ʼaia, ke mole ʼiloʼi ai peʼe ko ai ʼaē neʼe ina fai ia te fakapō ʼaia pea ina hoko fakafufū atu aipē te fai ʼo tana gāue ʼaē ʼe ina maumauʼi ia te lao. ʼE toe fēia pē mo Satana, ʼe ko he tagata fai fakapō ʼe ʼatamai, ʼaē ʼe ina leleiʼia ia te fai fakafufū ia te ʼu aga heʼeʼaoga ʼaia, ʼo ina fakaneke ia te hahaʼi ke natou fai te aga ʼaē ʼe kovi. Ko Sesu neʼe ina fakahā lelei ko Satana ia te tupuʼaga ʼo te agakovi ʼi te ʼu gāue ʼa te tagata. Neʼe fakahigoaʼi e Sesu ia Satana “ko te pule ʼo te mālama ʼaenī.”—Soane 12:31.

ʼE haʼu koa mai fea ia te Tēvolo? ʼI te kamataʼaga neʼe fakatupu ko he laumālie haohaoa ʼi te lagi, pea neʼe liliu leva ia ia totonu ko he ʼāselo agatuʼu, ko te Tēvolo, ʼi tona holi mālohi ʼaē ke ʼatolasio age ia te hahaʼi kiā te ia kae mole ki te ʼAtua. ʼE fakamatala ʼi te Tohi-Tapu ia te fai palalau ʼa Satana pea mo Sesu ʼi te kele, neʼe fakahā e te Tēvolo ia tana fia maʼu ia te tuʼulaga ʼo te ʼAtua. Ko Satana neʼe ina fakahalaʼi ia Sesu “ke punou pea mo fai ʼi [ʼona] muʼa he ʼatolasio” kiā te ia.—Mateo 4:8, 9.

ʼO toe fēia pē, ʼi te ʼu fai palalau ʼa Satana pea mo te ʼAtua, ohagē ko tona tuʼu ʼi te tohi ʼa Sopo, neʼe fakahā ai e Satana ia te ʼuhiga moʼoni ʼo tona loto. ʼE ina fai anai ia meʼa fuli pē moʼo fakaneke ia te hahaʼi ke natou lītuʼa ki te ʼAtua.—Sopo 1:13-19; 2:7, 8.

Kotou fakakaukauʼi age muʼa: Kapau neʼe fai palalau ia Satana mo Sehova ʼAtua pea mo Sesu Kilisito, ʼe feala koa ke tou ʼui ko Satana ʼe ko te kovi ʼaē ʼe nofo ʼi te loto ʼo te hahaʼi? ʼE mole maʼu he aga ʼe kovi ʼi te ʼAtua peʼe ko tona ʼAlo! ʼE hā lelei mai ai, ko Satana ʼe maʼuli moʼoni—ko he laumālie agakovi neʼe mole ina fakahā he fakaʼapaʼapa kiā Sehova peʼe kiā Sesu.

Ko te kovi ʼo te ʼu gāue ʼa te tagata ʼe fakamoʼoni ai ia te maʼuli moʼoni ʼa te Tēvolo. Ko te ʼu puleʼaga ʼo te mālama ʼe natou maumauʼi ia te meʼa kai ʼaē ʼe toe lahi ʼo mole natou fafaga tanatou hahaʼi ʼaē ʼe māʼuʼuli pakupaku. Ko te ʼu puleʼaga ʼe natou tānaki he ʼu mahafu ʼaē ʼe fakatupu ia he ʼu toe mātea, ke natou fematematehiʼaki pē ia nātou. ʼE natou ʼulihi ia te kele. Kae ko te tokolahi ʼo te hahaʼi ʼe mole natou ʼiloʼi ia te tupuʼaga ʼo te taʼi fehiʼa ʼaia pea mo fematematehiʼaki ʼa te tagata. Koteā tona tupuʼaga?

ʼE fakahā mai ʼi te Tohi-Tapu ko Satana “neʼe [ina] fakakiviʼi . . . ia te ʼatamai ʼo nātou ʼaē ʼe mole tui.” (2 Kolonito 4:4) ʼE fakaʼaogaʼi e Satana te kautahi fakapulipuli moʼo puleʼi ia te hahaʼi. Ko ia “te pule ʼo te kau temonio.” (Mateo 12:24) Ohagē pē ko he pule ʼo he kautahi ʼo he ʼu hahaʼi fai fakapō ʼe ina fakatuʼutuʼu ia te ʼu gāue ʼo te kautahi ʼaia kae mole ina fakahā ia ia totonu kiā nātou fuli ʼaē ʼe kau ki te kautahi ʼaia, ko Satana ʼe ina fakaʼaogaʼi tana kautahi agakovi ʼaē ʼe kau ai te ʼu ʼāselo agakovi, moʼo puleʼi ia te hahaʼi tokolahi kei fakapōʼuli kiā nātou tana ʼu gāue peʼe ko tana puleʼi nātou.

Ke tou loto fakafetaʼi ki te fakahā mai kiā tātou ʼi te Tohi-Tapu ia te ʼuhiga moʼoni ʼo te Tēvolo pea ke tou ʼiloʼi lelei tana kautahi! Koia, ʼe feala hatatou fai he ʼu fakatuʼutuʼu ke tou tekeʼi ia te ʼu fakaneke ʼa te Tēvolo. ʼE fakatokaga fēnei mai ʼi te Tohi-Tapu: “Ke kotou fakalogo ki te ʼAtua; kae ke kotou fakafeagai ki te Tēvolo, pea ʼe hola mamaʼo anai iā koutou.”—Sake 4:7.