“Ko Koutou Ko Toku ʼu Kaumeʼa”

“Ko koutou ko toku ʼu kaumeʼa mo kapau ʼe kotou fai te meʼa ʼaē ʼe au fakatotonu atu kiā koutou.”—SOA. 15:14.

1, 2. (a) Neʼe feafeaʼi ia te maʼuli ʼo te ʼu kaumeʼa ʼo Sesu ʼi te temi muʼa? (b) He koʼē ʼe maʼuhiga ʼaupitō ke tou kaumeʼa mo Sesu?

 KO TE ʼu tagata ʼaē ʼe nonofo mo Sesu ʼi te koga fale fata, neʼe kehekehe tonatou ʼu maʼuli. Ko te tautēhina ko Petelo pea mo Atelea neʼe ko he ʼu tagata tautai. Ko Mateo, ʼi te temi muʼa, neʼe ko he tagata tānaki tukuhau, ko he gāue neʼe fehiʼaʼinaʼi e te kau Sutea. Ko ʼihi, ohagē ko Sake pea mo Soane, neʼe natou feʼiloʼiʼaki mo Sesu talu mai tanatou kei liliki. Pea ko ʼihi, ohagē ko Natanaele, neʼe lagi hoki natou feʼiloʼiʼaki mo Sesu ʼi ni ʼu kiʼi taʼu ki muʼa atu. (Soa. 1:43-50) Kae ko nātou fuli ʼaē neʼe kau ki te Pāsikate ʼi te pō ʼaia ʼi Selusalemi, neʼe natou tui papau ko Sesu neʼe ko te Mēsia ʼaē neʼe fakapapauʼi mai, ia te ʼAlo ʼo te ʼAtua maʼuli. (Soa. 6:68, 69) ʼE mahino ia, neʼe malave ki ʼonatou loto ia tanatou logo ʼaē ki te ʼui age ʼaenī ʼa Sesu kiā nātou: “Kua au fakahigoaʼi koutou ko te ʼu kaumeʼa, koteʼuhi he kua au fakaʼilo atu kiā koutou ia meʼa fuli ʼaē neʼe au logo kiai mai taku Tamai.”—Soa. 15:15.

² Ko te ʼu palalau ʼaia ʼa Sesu ki tana ʼu ʼapositolo agatonu ʼe fakaʼuhiga tāfito ki te kau Kilisitiano fakanofo fuli iā ʼaho nei, pea ʼe feala pē ke toe fakaʼuhiga atu ki tonatou ʼu kaumeʼa ʼaē ko te “tahi ʼu ovi.” (Soa. 10:16) Tatau aipē pe neʼe feafeaʼi totatou maʼuli, kae ʼe tou lava maʼu ia te pilivilēsio ʼaē ke tou kaumeʼa mo Sesu. Ko tatatou fakakaumeʼa mo ia ʼe maʼuhiga ʼaupitō heʼe kapau ʼe tou kaumeʼa mo ia pea ʼe tou toe kaumeʼa pē foki mo Sehova. ʼI tona fakahagatonu, ʼe mole feala hatatou fakaovi kiā Sehova mo kapau ʼe mole tou fakaovi muʼa kiā Kilisito. (Lau ia Soane 14:6, 21.) Koteā ʼaē ʼe tonu ke tou fai ke tou liliu ai ʼo kaumeʼa mo Sesu, ʼo talu ai? ʼI muʼa ʼo hatatou vakaʼi ia te faʼahi maʼuhiga ʼaia, tou vakaʼi age muʼa ia te faʼifaʼitaki ʼa Sesu totonu ʼi tona ʼuhiga kaumeʼa lelei, pea mo tou vakaʼi pe koteā te ako ʼe feala ke tou tāʼofi mai te meʼa ʼaē neʼe ʼui pea mo fai e tana ʼu tisipulo moʼo tali ki te kaumeʼa ʼa Sesu mo nātou.

Te Faʼifaʼitaki ʼa Sesu ʼi Tana Liliu Ko He Kaumeʼa Lelei

 3. Neʼe ʼiloa Sesu ʼuhi koteā?

³ Neʼe tohi fēnei e te Hau ko Salomone: “ ʼE kaugamālie ia te ʼu kaumeʼa ʼo te tagata maʼu koloa.” (Taag. 14:20) Ko te manatu ʼaia ʼe ina fakahā ia te aga ʼaē ʼe maʼu e te hahaʼi agahala, ʼaē ko he fakakaumeʼa mo te hahaʼi ke foaki age hanatou ʼu meʼa kae mole natou fakakaumeʼa mo te hahaʼi moʼo foaki he ʼu meʼa kiā nātou. Neʼe mole maʼu e Sesu ia te taʼi vaivaiʼaga ʼaia. Neʼe mole fakalai ia ki he tahi ʼe maʼu meʼa peʼe maʼu tuʼulaga. ʼE moʼoni, neʼe ʼofa Sesu ki te tama pule maʼu koloa pea neʼe ina fakaafe ia ia ke liliu ko hana tisipulo. Kae neʼe tokoniʼi e Sesu ia te tama ʼaia ke ina fakatau ia tona ʼu koloa fuli pea ke ina foaki ki te hahaʼi māsisiva. (Mko. 10:17-22; Luka 18:18, 23) Neʼe ʼiloa Sesu mole ʼuhi ko tana fakatahi mo te hahaʼi maʼu koloa pea mo ʼiloa, kae ʼuhi ko tana fakakaumeʼa ʼaē ki te hahaʼi māsisiva pea mo nātou ʼaē neʼe fehiʼaʼinaʼi.—Mat. 11:19.

 4. He koʼē ʼe feala ke tou ʼui neʼe ʼi ai ia te ʼu vaivaiʼaga ʼo te ʼu kaumeʼa ʼo Sesu?

⁴ ʼE mahino ia neʼe ʼi ai pē ia te ʼu vaivaiʼaga ʼo te ʼu kaumeʼa ʼo Sesu. Ko Petelo ʼi te tahi lakaga, neʼe mole ina maʼu ia te manatu ʼa te ʼAtua. (Mat. 16:21-23) Ko Sake pea mo Soane neʼe nā fia maʼu tuʼulaga, ʼi tanā kole ʼaē kiā Sesu ke ina foaki age kiā nāua honā ʼu tuʼulaga ʼi te Puleʼaga. Neʼe ʼiʼita lahi ai te tahi ʼu ʼapositolo, pea neʼe natou fihi tuʼumaʼu pē ʼuhi ko te faʼahi ʼo te fia maʼu tuʼulaga. Kae ko Sesu, neʼe faʼa kātaki ʼo faigaʼi tuʼumaʼu pē ke ina fetogi ia te manatu ʼo tona ʼu kaumeʼa pea neʼe mole hoko ʼita ia ki tanatou ʼu aga ʼaia.—Mat. 20:20-28.

5, 6. (a) He koʼē neʼe kaumeʼa aipē ia Sesu mo ʼihi ʼi te kau ʼapositolo? (b) He koʼē neʼe fakagata e Sesu ia tana kaumeʼa ʼaē mo Sutasi?

 ⁵ ʼE mole fakaʼuhiga leva neʼe kaumeʼa aipē ia Sesu mo te ʼu tagata heʼe haohaoa ʼaia he neʼe ina meʼa noaʼi tanatou ʼu hala pe neʼe mole ina tokagaʼi tonatou ʼu vaivaiʼaga. Kae ko te meʼa ʼaē neʼe maʼuhiga kiā Sesu, ko te ʼu meʼa ʼaē neʼe ʼi ʼonatou loto pea mo ʼonatou kalitātē. Ohagē lā, ko Petelo, mo Sake pea mo Soane neʼe natou tūlemomoe, kae neʼe mole natou lagolago kiā Sesu ʼi te temi faigataʼa ʼaupitō ʼaē neʼe hoko kiā ia. Neʼe lotomamahi Sesu ki tanatou aga ʼaia, pea ʼe feala pē ke tou mahino kiai. Kae logolā ia tanatou aga ʼaia, neʼe sio aipē ia ki ʼonatou loto neʼe lelei, ʼo ina ʼui fēnei: “Ko te laumālie, ʼe moʼoni, ʼe mālohi ia, kae ko te kakano ʼe vaivai.”—Mat. 26:41.

⁶ Kae ʼo ʼuhiga leva mo Sutasi Isikaliote, neʼe fakagata ʼosi e Sesu tana fakakaumeʼa ʼaē mo ia. Logolā te fia fakahāhā ʼaē e Sutasi neʼe kaumeʼa mo Sesu, kae neʼe fakatokagaʼi e Sesu neʼe kua kovi ia te loto ʼo te tagata ʼaia ʼaē ki muʼa atu neʼe kaumeʼa lelei mo ia. ʼI te kua liliu leva ʼa Sutasi ʼo kaumeʼa mo te mālama, neʼe ina fakaliliu ia ia totonu ko he fili ʼo te ʼAtua. (Sake 4:4) Koia lā ʼaē, ʼi te temi ʼaē neʼe fakahā ai e Sesu ki te toko 11 kau ʼapositolo ʼaē neʼe kei toe, ko nātou ko Tona ʼu kaumeʼa, neʼe kua ina fakamavae ia Sutasi iā nātou.—Soa. 13:21-35.

7, 8. Neʼe fakahā feafeaʼi e Sesu ia tona ʼofa ʼaē ki tona ʼu kaumeʼa?

⁷ Neʼe mole fakamaʼuhigaʼi fau e Sesu ia te ʼu hala ʼaē ʼo tona ʼu kaumeʼa agatonu pea ko meʼa fuli pē ʼaē neʼe ina fai ke fua lelei pē kiā nātou. Ohagē lā, neʼe ina kole ki tana Tamai ke ina puipui nātou ʼi tonatou ʼu ʼahiʼahi. (Lau ia Soane 17:11.) Neʼe fakahā e Sesu ia tana mahino ʼaē ki tonatou ʼu tuʼakoi. (Mko. 6:30-32) Neʼe mole tokaga pē ia ke ina fakahā age kiā nātou tana ʼu manatu kae neʼe toe fakalogo pea mo mahino ki tanatou ʼu manatu pea mo te ʼu meʼa ʼi tonatou loto.—Mat. 16:13-16; 17:24-26.

⁸ Ko Sesu neʼe maʼuli pea mo mate maʼa tona ʼu kaumeʼa. Neʼe ina ʼiloʼi ʼe tonu ke ina foaki ia tona maʼuli moʼo tali ki te lēkula faitotonu ʼa tana Tamai, ʼaē neʼe ko he faʼahi neʼe fakamaʼua ʼi te lao. (Mat. 26:27, 28; Hep. 9:22, 28) Kae neʼe foaki e Sesu tona maʼuli moʼo fakahā ʼaki ai ia tona ʼofa. Neʼe ina ʼui fēnei: “ ʼE mole he tahi ʼe ina maʼu he ʼofa ʼe lahi age ʼi te meʼa ʼaenī: ke foaki e he tahi tona nefesi maʼa tona ʼu kaumeʼa.”—Soa. 15:13.

Neʼe Tali Feafeaʼi e Te ʼu Tisipulo Ki Te Kaumeʼa ʼAē ʼa Sesu Mo Nātou?

9, 10. Neʼe feafeaʼi ia te hahaʼi ki te foaki fakalahi ʼaē ʼa Sesu?

⁹ Neʼe foaki fakalahi e Sesu ia tona temi, mo tona ʼofa pea mo te ʼu meʼa ʼaē neʼe ina maʼu. Koia lā ʼaē neʼe fia fakaovi ai ia te hahaʼi kiā te ia pea neʼe natou fiafia ʼi tanatou toe foaki age ki ai ia he ʼu meʼa ʼofa. (Luka 8:1-3) ʼAki ia te ʼu meʼa ʼaē neʼe hoko kiā ia totonu, neʼe feala ke ʼui fēnei e Sesu: “Kotou tokaga ʼo foaki, pea ʼe foaki atu anai kiā koutou. ʼE huaʼi atu anai ki te taga ʼo tokotou kofu he fua matalelei, kua lolomi, pea kua lulululu pea tauopeope. Heʼe fua anai maʼa koutou ʼaki te fua ʼaē ʼe kotou fua ʼaki.”—Luka 6:38.

¹⁰ ʼE mahino ia, neʼe faiga pē ʼihi ke natou fakatahi mo Sesu ʼuhi pē ko te ʼu meʼa ʼaē neʼe feala ke natou maʼu mai iā te ia. Ko te ʼu kaumeʼa loi ʼaia neʼe natou liʼaki Sesu ʼi te temi ʼaē neʼe natou mahino hala ai ki te ʼu palalau ʼaē neʼe ina fai. ʼO mole ʼui ke natou falala pē kiā Sesu logolā tanatou mole mahino ʼaia, kae neʼe natou maʼu fakavilivili ia te ʼu manatu hala ʼo ʼuhiga mo ia pea mo natou sītuʼa ai kiā te ia. Kae ki te kau ʼapositolo neʼe natou agatonu pē nātou. Neʼe ʼi ai te ʼu lakaga neʼe ʼahiʼahiʼi ai tanatou fakakaumeʼa ʼaē mo Kilisito, kae neʼe natou faiga lahi ke natou lagolago kiā te ia ʼi te ʼu temi lelei pea mo te ʼu temi faigataʼa. (Lau ia Soane 6:26, 56, 60, 66-68.) ʼI te pō fakaʼosi ʼo tana maʼuli ʼi te kele ʼi tona ʼuhiga tagata, neʼe fakahā e Sesu ia tona ʼofa ʼaupitō ʼaē ki tona ʼu kaumeʼa, ʼo ina ʼui fēnei: “Ko koutou ia ʼaē neʼe nonofo fakatahi tuʼumaʼu mo au ʼi toku ʼu ʼahiʼahiʼi.”—Luka 22:28.

11, 12. Neʼe fakalotofīmālieʼi feafeaʼi e Sesu te ʼu tisipulo, pea neʼe feafeaʼi ia tanatou tali kiai?

¹¹ Kae mole faʼa fualoa ki te haga ʼaia ʼa Sesu ʼo vikiʼi ia tana kau tisipulo ʼuhi ko tanatou agatonu, ko te ʼu tagata ʼaia neʼe natou liʼaki ia ia. Lolotoga te kiʼi temi, neʼe mālohi age ia tanatou mataku ʼaē ki te tagata ʼi tonatou ʼofa ʼaē kiā Kilisito. Neʼe toe loto fakamolemole aipē Sesu kiā nātou. ʼI tana kua ʼosi mate pea mo tona toe fakatuʼuake, neʼe hā kiā nātou pea mo ina fakalotofīmālieʼi nātou ʼo ʼuhiga mo tana kei kaumeʼa pē ʼaē mo nātou. Pea tahi ʼaē, neʼe ina foaki age kiā nātou ia te gāue taputapu, ke  natou fai he ʼu tisipulo “ ʼi te hahaʼi ʼo te ʼu fenua fuli pē” pea ke natou liliu ko hana kau fakamoʼoni “ ʼo kaku ki te potu taupotu ʼo te kele.” (Mat. 28:19; Gāue 1:8) Neʼe koteā ia te tali ʼa te kau tisipulo kiai?

¹² Neʼe gāue fakamālotoloto te kau tisipulo moʼo fakamafola ia te logo ʼo te Puleʼaga. ʼAki te tokoni ʼa te laumālie māʼoniʼoni ʼo Sehova, mole tuai pea natou fakafonu ia Selusalemi ʼaki tanatou faiakonaki. (Gāue 5:27-29) Māʼiapē lā mo te fakamatakuʼi ʼaē ke matehi nātou, neʼe mole feala ke fakagata ai ia tanatou fakalogo ʼaē ki te fakatotonu ʼa Sesu ke fai he ʼu tisipulo. ʼO mole faʼa fualoa ki te fai ʼaē e Sesu ʼo te fakatotonu ʼaia, neʼe feala ki te ʼapositolo ko Paulo ke ina tohi ko te logo lelei neʼe kua fakamafola “ki te ʼu fakatupu fuapē ʼi te lalo lagi.” (Kol. 1:23) ʼE mahino ia, neʼe fakamoʼoni ai e te ʼu tisipulo ʼaia ia te maʼuhiga ʼaē kiā nātou ʼo tanatou kaumeʼa ʼaē mo Sesu!

13. Ko te ʼu faʼahi fea ʼaē neʼe haga ai ia te ʼu tisipulo ʼa Sesu ʼo fakafealagia ki tana ʼu faiakonaki ke malave ki ʼonatou maʼuli?

¹³ Ko nātou ʼaē neʼe liliu ko he ʼu tisipulo neʼe natou toe fakafealagia ki te ʼu faiakonaki ʼa Sesu ke malave ki ʼonatou maʼuli. Maʼa te tokolahi, neʼe tonu ke natou fai he ʼu toe fetogi lalahi ʼi tanatou aga pea mo tonatou ʼulugaaga. Ko ʼihi ʼi te ʼu tisipulo foʼou, ʼi muʼa ʼo tanatou tafoki ki te moʼoni, neʼe ko ni ʼu tagata neʼe momoe mo te tahi ʼu tagata, neʼe natou tono, ʼinu kava peʼe kaihaʼa. (1 Ko. 6:9-11) Ko ʼihi neʼe tonu ke natou fetogi ia tanatou manatu ʼo ʼuhiga mo te hahaʼi ʼo te tahi lanu. (Gāue 10:25-28) Kae neʼe natou fakalogo aipē kiā Sesu. Neʼe natou liʼaki tonatou ʼulugaaga ʼāfea pea natou kofuʼi ia te ʼulugaaga foʼou. (Efe. 4:20-24) Neʼe natou kamata ʼiloʼi ia “te manatu ʼa Kilisito,” ʼo natou mahino ki tana ʼu manatu pea mo tana gāue, ʼo natou faʼifaʼitakiʼi.—1 Ko. 2:16.

Ko Te Kaumeʼa Mo Kilisito Iā ʼAho Nei

14. Koteā ʼaē neʼe fakapapau e Sesu kā ina fai anai ʼi te lolotoga ʼo “te fakaʼosi ʼo te tuʼu ʼo te ʼu faʼahiga meʼa ʼaenī”?

¹⁴ Tokolahi ʼi te kau Kilisitiano ʼaia ʼo te ʼuluaki sēkulō neʼe natou ʼiloʼi lelei ia Sesu pe neʼe natou sisio kiā te ia ʼi tona ʼosi fakatuʼuake. ʼE mahino ia, ʼe mole tou maʼu tātou ia te pilivilēsio ʼaia. ʼE lava feafeaʼi anai kiā tātou ia hatatou kaumeʼa mo Kilisito? ʼE feala mo kapau ʼe tou fakalogo ki te takitaki ʼaē ʼe foaki mai e te kalasi ʼo te tagata kaugana agatonu mo poto, ia te ʼu tehina fakanofo ʼaki te laumālie ʼo Sesu ʼaē ʼe kei māʼuʼuli ʼi te kele. Neʼe fakapapau e Sesu lolotoga “te fakaʼosi ʼo te tuʼu ʼo te ʼu faʼahiga meʼa ʼaenī,” ʼe ina fakanofo anai ia te tagata kaugana ʼaia ke pule “ki ʼona koloa fuli.” (Mat. 24:3, 45-47) Iā ʼaho nei, ko te tokolahi ʼaē ʼe natou kaumeʼa mo Kilisito ʼe mole natou ʼi te kalasi ʼo te tagata kaugana ʼaia. ʼE feafeaʼi hanatou kaumeʼa mo Kilisito ʼaki tanatou tali ʼaē ia te takitaki ʼa te kalasi ʼo te tagata kaugana agatonu?

15. ʼE lava ʼiloʼi feafeaʼi ʼe liliu anai he tahi ko he ovi peʼe ko he tao?

¹⁵ Lau ia Mateo 25:31-40. Neʼe fakahigoaʼi e Sesu ko tona ʼu tehina, iā nātou ʼaē ʼe natou faʼufaʼu ia te kalasi ʼo te tagata kaugana agatonu. ʼI te lea fakatā ʼo te vaevae ʼo te ʼu ovi mo te ʼu tao, ʼe ʼui fakalelei e Sesu, ko te aga ʼaē neʼe tou fai ki tona ʼu tehina ʼe hagē pē neʼe tou fai age kiā te ia. ʼI tona fakahagatonu, neʼe ʼui e Sesu ko te faʼahi ʼaē kā  ʼiloʼi ai anai he ovi mai he tao, ʼe ko te aga ʼaē neʼe ina fai māʼia kiā “nātou ʼaē ʼe liliki ʼosi ʼo [tona] ʼu tehina.” Koia, ko te ʼuluaki meʼa ʼaē ʼe tonu ke fai e nātou ʼaē ʼe fia kaumeʼa mo Kilisito, ʼaē ʼe natou ʼamanaki ki te maʼuli ʼi te kele, ʼe ko te lagolago ki te kalasi ʼo te tagata kaugana agatonu.

16, 17. ʼE tou lava fakahā feafeaʼi ʼe tou kaumeʼa mo te ʼu tehina ʼo Kilisito?

¹⁶ Kapau ʼe kotou maʼu ia te ʼamanaki ʼaē ki te maʼuli ʼi te kele ʼi te pule ʼo te Puleʼaga ʼo te ʼAtua, ʼe kotou lava fakahā feafeaʼi ʼe kotou kaumeʼa mo te ʼu tehina ʼo Kilisito? Tou vakaʼi faʼahi pē e tolu. ʼUluaki, ʼe kotou lava kaumeʼa mo Kilisito mo kapau ʼe kotou kau ki te gāue fai fakamafola ʼaki tokotou loto kātoa. Neʼe fakatotonu e Kilisito ki tona ʼu tehina ke natou fakamafola ia te logo lelei ʼi te kele kātoa. (Mat. 24:14) Kae ʼe faigataʼa anai ki te toe ʼo te ʼu tehina ʼa Kilisito ʼaē kei māʼuʼuli ʼi te kele iā ʼaho nei hanatou fakahoko ia te maʼua ʼaia, mo kanapau lā neʼe mole natou maʼu ia te tokoni ʼo tonatou ʼu kaumeʼa ia te tahi ʼu ovi. ʼE mahino ia, ʼi te temi fuli pē ʼaē ʼe kau ai ia nātou ʼo te kalasi ʼo te tahi ʼu ovi ki te gāue fai fakamafola, ʼe natou tokoni ai ki te ʼu tehina ʼo Kilisito ke natou fakahoko ia tanatou gāue taputapu. Ko Kilisito pea mo te kalasi ʼo te tagata kaugana agatonu pea mo poto ʼe natou fakafetaʼi ʼaupitō ki te tokoni ʼaia ʼo tonatou ʼu kaumeʼa.

¹⁷ Lua, ʼe feala kiā nātou ʼo te kalasi ʼo te tahi ʼu ovi ke natou tokoni ki te ʼu tehina ʼo Kilisito ʼaki tanatou foaki he falā moʼo lagolago ki te gāue fai fakamafola. Neʼe fakalotomālohiʼi e Sesu ia tana ʼu tisipulo ke natou fai honatou ʼu kaumeʼa mo “te ʼu koloa heʼe faitotonu.” (Luka 16:9) ʼE mole fakaʼuhiga te ʼu palalau ʼaenī, ʼe tou lava totogi ia Sesu pea mo Sehova ke nā liliu ko hotatou ʼu kaumeʼa. Kae ko tona fakaʼuhiga, ʼaki tatatou fakaʼaogaʼi ʼaē ia totatou ʼu koloa moʼo lagolago ki te ʼu gāue ʼo te Puleʼaga, ʼe tou fakamoʼoni ai ki tatatou fakakaumeʼa pea mo totatou ʼofa, ʼo mole gata ʼaki pē ʼi tatatou palalau kae ʼe tou toe fakahā “ ʼaki he ʼu gāue pea mo te moʼoni.” (1 Soa. 3:16-18) ʼE tou foaki te lagolago fakapaʼaga ʼaia mokā tou kau ki te gāue fai fakamafola, mokā tou foaki he falā ki te ʼu gāue laga fale pea mo te taupau ʼo tatatou ʼu fale tauhi, pea mokā tou foaki he falā ki te gāue fai fakamafola ʼi te mālamanei kātoa. Peʼe lahi peʼe veliveli te meʼa ʼaē ʼe tou foaki, kae ʼe mahino papau ia ko Sehova pea mo Sesu ʼe nā leleiʼia tatatou foaki ʼaia ʼaki he loto fiafia.—2 Ko. 9:7.

18. He koʼē ʼe tonu ke tou fakalogo ki te takitaki ʼa te ʼu tagata ʼāfea ʼi te kōkelekāsio, ʼaē ʼe fakatafito ki te Tohi-Tapu?

¹⁸ Tolu, ʼe tou fakamoʼoni e tātou fuli ʼe tou kaumeʼa mo Kilisito, ʼaki tatatou fakalogo ki te takitaki ʼa te ʼu tagata ʼāfea ʼi te kōkelekāsio. Ko te ʼu tagata ʼaia neʼe filifili nātou ʼaki te laumālie māʼoniʼoni, ʼi te takitaki ʼo Kilisito. (Efe. 5:23) Neʼe tohi fēnei e te ʼapositolo ko Paulo: “Kotou fakalogo kiā nātou ʼaē ʼe natou takitaki koutou, pea mo kotou talagafua.” (Hep. 13:17) ʼI ʼihi temi, ʼe lagi faigataʼa kiā tātou hatatou fakalogo ki te takitaki ʼaē ʼe foaki mai e te ʼu tagata ʼāfea, ʼaē ʼe fakatafito ki te Tohi-Tapu. ʼE tou ʼiloʼi ia tonatou ʼuhiga heʼe haohaoa, pea ʼe feala ai ke tou maʼu ia he ʼu manatu ʼe mole lelei ʼo ʼuhiga mo tanatou ʼu tokoni. Kae ko Kilisito, te Pule ʼo te kōkelekāsio, ʼe ina leleiʼia te fakaʼaogaʼi ʼo te ʼu tagata agahala ʼaia. Koia, ko tatatou faʼahiga tali ia tanatou pule ʼe fakahā lelei ai peʼe tou fia kaumeʼa mo Kilisito. Kā tou loto fakamolemole ki te ʼu hala ʼa te ʼu tagata ʼāfea pea mo tou mulimuli fakafiafia ki tanatou takitaki, ʼe tou fakahā ai ia totatou ʼofa ʼaē kiā Kilisito.

 ʼE Tou Lava Maʼu ʼIfea He ʼu Kaumeʼa Lelei?

19, 20. Koteā ʼaē ʼe feala ke tou maʼu ʼi te loto kōkelekāsio, pea koteā ʼaē kā tou vakaʼi anai ʼi te ʼalatike kā hoa mai?

¹⁹ ʼE haga tokaga Sesu kiā tātou, ʼo mole gata pē ʼi totatou leʼoleʼo ʼaē e te ʼu tagata tauhi ovi ʼofa, kae ʼe ina toe foaki mai he ʼu faʼē pea mo he ʼu tehina pea mo he ʼu tuagaʼane fakalaumālie ʼi te loto kōkelekāsio. (Lau ia Maleko 10:29, 30.) ʼI takotou kamata fakatahi mo te kautahi ʼa Sehova, neʼe feafeaʼi tokotou fāmili? ʼE matou fakaʼamu neʼe natou lagolago atu ki takotou ʼu faiga ʼaē ke kotou fakaovi ki te ʼAtua pea mo Kilisito. Kae neʼe fakatokaga e Sesu, ʼi ʼihi temi, “ko te ʼu fili anai ʼo te tagata ʼe ko nātou totonu pē ʼaē ʼo tona loto fale.” (Mat. 10:36) ʼI meʼa fakalotofīmālie te ʼiloʼi ʼaē, ʼi te loto kōkelekāsio, ʼe feala ke tou maʼu ai ia nātou ʼaē kā lahi age hatatou fakaovi ki ai ʼi hotatou tehina totonu.—Taag. 18:24.

²⁰ Ohagē ko tona fakahā ʼi te ʼu fakaʼalofa ʼa Paulo ʼi te fakaʼosi ʼo tana tohi ki te kōkelekāsio ʼi Loma, neʼe lahi tona ʼu kaumeʼa lelei. (Loma 16:8-16) Neʼe fakaʼosi fēnei e te ʼapositolo ko Soane tana tolu tohi: “Fakahā age toku ʼu ʼalofa ki te ʼu kaumeʼa, takitahi ʼi tona higoa.” (3 Soa. 14) ʼE hā lelei mai, ko Paulo neʼe toe kaumeʼa fualoa mo te tokolahi. ʼE tou lava faʼifaʼitakiʼi feafeaʼi ia Sesu pea mo te ʼu ʼuluaki tisipulo, ʼaki tatatou fakakaumeʼa ki totatou ʼu tehina mo tuagaʼane fakalaumālie pea mo taupau tuʼumaʼu ke fualoa ia totatou ʼu kaumeʼa ʼaia? ʼE tou vakaʼi anai te tali ki te fehuʼi ʼaia ʼi te ʼalatike kā hoa mai.

ʼE Kotou Tali Feafeaʼi Anai?

• Koteā te faʼifaʼitaki neʼe tuku e Sesu ʼi tana liliu ko he kaumeʼa lelei?

• Neʼe tali feafeaʼi e te kau ʼapositolo ki te kaumeʼa ʼaē ʼa Sesu mo nātou?

• ʼE tou lava fakamoʼoni feafeaʼi ko tātou ko he ʼu kaumeʼa ʼo Kilisito?

[ʼU fehuʼi ʼo te ako]

[Paki ʼo te pasina 22]

Neʼe fia ʼiloʼi e Sesu pe koteā te manatu ʼo tona ʼu kaumeʼa pea koteā ʼaē neʼe ʼi ʼonatou loto

[Paki ʼo te pasina 23]

ʼE tou lava fakahā feafeaʼi ia tatatou fia kaumeʼa ʼaē mo Kilisito?