Tou Faʼafai Maʼa Te Fale ʼo Sehova!

“Ko te faʼafai ʼaē ki tou fale, ʼe ina mofi anai au.”—SOA. 2:17.

1, 2. ʼI te taʼu 30 ʼo totatou temi, ʼi te fale lotu, koteā ʼaē neʼe fai e Sesu, pea koteā tona tupuʼaga?

 KOTOU fakakaukauʼi age muʼa ia te meʼa ʼaē neʼe hoko. ʼE ko te temi ʼo te Pāsikate ʼo te taʼu 30 ʼo totatou temi. Iā māhina e ono ki muʼa atu, neʼe kamata ai e Sesu ia tana minisitelio ʼaē ʼi te kele. ʼI te temi nei, ʼe hake ki Selusalemi. ʼI te kolo ʼaia, ʼi te fale lotu, ʼi te Malaʼe ʼo Te Kau Senitile, ʼe maʼu atu e Sesu “te hahaʼi ʼaē ʼe natou fakatau te ʼu vītulo, te ʼu ovi mo te ʼu lupe, pea mo te kau fetogi paʼaga ʼi tonatou ʼu hekaʼaga.” ʼAki he huipi neʼe faʼu ʼaki te ʼu kauʼi maea, ʼe ina kapu te ʼu manu fuli, pea ʼe mahino ia mo te hahaʼi faifakatau. Neʼe toe laku e Sesu te paʼaga ʼa te kau fetogi paʼaga, pea mo tokatokahi ʼanatou laupapa gāue. ʼE ina fakatotonu ki te hahaʼi fakatau lupe ke natou toʼo tonatou ʼu koloa pea ke natou mavae ʼi te fale lotu.—Soa. 2:13-16.

² ʼE hā ʼi te ʼu meʼa ʼaia ʼe fai e Sesu ia te maʼuhiga ʼaē kiā te ia ia te fale lotu. ʼE ina fakatotonu fēnei: “Tuku takotou fakaliliu te fale ʼo taku Tamai, ko he fale faifakatau!” ʼI te mamata ʼa te kau tisipulo ʼa Sesu ki te ʼu meʼa ʼaia, ʼe natou manatuʼi te ʼu folafola ʼaē neʼe tohi e te tagata fai pesalemo ko Tavite ʼi ni ʼu sēkulō ki muʼa atu: “Ko te faʼafai ʼaē ki tou fale, ʼe ina mofi anai au.”—Soa. 2:16, 17; Pes. 69:9.

 3. (a) Koteā te faʼafai? (b) Ko te fehuʼi fea ʼaē ʼe feala ke tou fai kiā tātou takitokotahi?

³ Neʼe fai e Sesu te faʼahi ʼaia ʼuhi he neʼe tokaga pea neʼe faʼafai maʼa te fale ʼo te ʼAtua. Ko te faʼafai ʼe ko “te holi ʼaē ʼe maʼu e he tahi pea mo tana tokaga fakamālotoloto ʼi tana fakahoko he fakatuʼutuʼu.” ʼI te 21 sēkulō, ko te kau Kilisitiano e toko fitu miliona tupu neʼe natou faʼafai maʼa te fale ʼo te ʼAtua. ʼE feala ke tou fai kiā tātou takitokotahi ia te fehuʼi ʼaenī: ‘ ʼE lava feafeaʼi haku fakatuputupu taku faʼafai maʼa te fale ʼo Sehova?’ Ke tou tali kiai, tou vakaʼi age muʼa pe koteā te fale ʼo te ʼAtua iā ʼaho nei. Pea ʼe tou vakaʼi anai he ʼu faʼifaʼitaki ʼi te Tohi-Tapu ʼo he ʼu tagata agatonu neʼe natou faʼafai maʼa te fale ʼo te ʼAtua. Neʼe tohi ia te ʼu faʼifaʼitaki ʼaia “moʼo akoʼi ʼo tātou” pea ke uga ai tātou ke lahi age tatatou faʼafai.—Loma 15:4.

Te Fale ʼo Te ʼAtua—ʼI Te Temi Muʼa Pea ʼi Te Temi Nei

 4. He koʼē neʼe laga ia te fale lotu ʼi te temi hau ʼaē ʼo Salomone?

⁴ ʼI te Iselaele ʼo te temi muʼa, ko te fale ʼo te ʼAtua neʼe ko te fale lotu ʼi Selusalemi. ʼE mahino ia, neʼe mole maʼuli moʼoni ia Sehova ʼi te fale ʼaia. Neʼe ina ʼui fēnei: “Ko te lagi ʼe ko toku hekaʼaga fakahau, pea ko te kele ʼe ko toku hiliʼaga vaʼe. ʼE ʼifea koa ia te ʼapi ʼaē ʼe feala ke kotou faʼu maʼa ʼaku, pea ʼe ʼifea koa te koga meʼa ʼaē ʼe feala ke au mālōlō ai?” (Isa. 66:1) Kae ko te fale lotu ʼaē neʼe laga ʼi te temi hau ʼo Salomone, neʼe ko te koga meʼa tāfito ʼaia ʼaē neʼe fai ai te tauhi kiā Sehova, ʼaē neʼe momoli ai te ʼu faikole.—1 Hau 8:27-30.

 5. Koteā te fakatuʼutuʼu ʼi totatou temi neʼe fakatātā e te tauhi ʼaē neʼe fai ʼi te fale lotu ʼo Salomone?

⁵ Iā ʼaho nei, ko te fale ʼo Sehova ʼe mole ko he fale ʼe tuʼu ʼi Selusalemi peʼe ʼi he tahi age koga meʼa. ʼE ko he fakatuʼutuʼu neʼe fai maʼa tātou, ke tou fakaovi ai kiā te ia ʼi tatatou tauhi ʼo fakatafito ki te sākilifisio faitotogi ʼo Kilisito. Ko te ʼu kaugana agatonu fuli ʼa te ʼAtua ʼi te kele ʼe natou logotahi ʼo tauhi kiā Sehova ʼi te fale lotu fakalaumālie ʼaia.—Isa. 60:4, 8, 13; Gāue 17:24; Hep. 8:5; 9:24.

 6. Ko ai te ʼu hau Sutea ʼaē neʼe natou faʼafai ʼaupitō maʼa te tauhi moʼoni?

⁶ ʼI te ʼosi vaheʼi ʼo Iselaele ke liliu ko puleʼaga e lua ʼi te taʼu 997 ʼi muʼa ʼo totatou temi, ko te ʼu hau e 4 ʼi te ʼu hau e 19 ʼaē neʼe hau ʼi Suta, te  faʼahi ʼi te potu sautē, neʼe natou faʼafai ʼaupitō maʼa te tauhi moʼoni. Neʼe ko te hau ko Asa, mo Sosafate, mo Esekiasi, pea mo Sosiasi. Koteā te ʼu ako maʼuhiga ʼe feala ke tou tāʼofi mai tanatou faʼifaʼitaki?

Ko He Tauhi ʼAki He Loto Kātoa ʼe Maʼu Ai He ʼu Tapuakina

7, 8. (a) Ko te faʼahiga tauhi fea ʼaē ʼe tapuakinaʼi e Sehova? (b) Koteā te fakatokaga ʼe tou lava ako mai te faʼifaʼitaki ʼa te Hau ko Asa?

⁷ ʼI te temi hau ʼo Asa, neʼe fekauʼi e Sehova te ʼu polofetā moʼo takitaki Tona puleʼaga ʼi te ala ʼo te agatonu. Ohagē lā, ʼe ʼui mai ʼi te Tohi-Tapu ko Asa neʼe fakalogo ki te polofetā ko Asalia, te foha ʼo Opete. (Lau ia 2 Fakamatala 15:1-8.) ʼAki te ʼu fetogi ʼaē neʼe fai e Asa, neʼe liliu ai te hahaʼi ʼo Suta ʼo logotahi, ʼo toe fēia mo te hahaʼi tokolahi mai te puleʼaga ʼo Iselaele ʼaē neʼe natou hihifo ki te fakatahi lahi ʼaē neʼe fai ʼi Selusalemi. Neʼe natou tala fakatahi ia tanatou fakatotonu ʼaē ke natou tauhi agatonu kiā Sehova. ʼE tou lau fēnei: “Neʼe natou fakapapau ai kiā Sehova ʼaki he leʼo lahi, ʼaki he ʼu kalaga fakafiafia, ʼaki te ʼu meʼa puhi fakatagi pea mo te ʼu tala. Pea neʼe fiafia ia Suta kātoa ʼi te fakapapau ʼaia, he neʼe natou fai ia te fakapapau ʼaki tonatou loto kātoa, pea ʼaki he fiafia kātoa iā nātou neʼe natou kumi ia ia, ʼo ina tuku ai ke natou maʼu ia ia; pea neʼe haga foaki e Sehova kiā nātou ia te mālōlō ʼi tonatou ʼu tafaʼaki.” (2 Fkma. 15:9-15) ʼE mahino ia, ʼe toe tapuakinaʼi fēia pē anai tātou e Sehova mokā tou tauhi age kiā te ia ʼaki he loto kātoa.—Mko. 12:30.

⁸ Meʼa fakaʼofaʼofa foki, ko Asa ki muli age neʼe ʼita ʼi te temi ʼaē neʼe tokoniʼi ai ia ia e Hanani te tagata fai fakakikite. (2 Fkma. 16:7-10) ʼE tou feafeaʼi mokā foaki mai e Sehova he tokoni peʼe ko he fakatotonu ʼaki te ʼu tagata ʼāfea? ʼE tou foimo tali koa pea mo mulimuli ki tanatou tokoni ʼaē ʼe fakatafito ki te Tohi-Tapu pea mo tou tekeʼi te hele ʼaē ko te ʼita?

 9. Ko ai ʼaē neʼe laga tau kiā Sosafate pea mo te ʼu hahaʼi ʼo Suta, pea koteā ʼaē neʼe natou fai?

⁹ Ko Sosafate neʼe hau ʼi Suta lolotoga te hogofulu sēkulō ʼi muʼa ʼo totatou temi. Neʼe laga tau ki te hau pea mo Suta kātoa ia te ʼu foʼi kautau mālolohi ʼo Amone, mo Moape pea mo te hahaʼi ʼi te ʼu koga meʼa moʼugaʼia ʼo Seile. Logolā tana mataku, kae koteā ʼaē neʼe fai e te hau? Ko ia pea mo tana ʼu tagata, pea mo ʼonatou ʼohoana pea mo ʼanatou fānau, neʼe natou fakatahitahi ʼi te fale ʼo Sehova ʼo faikole. (Lau ia 2 Fakamatala 20:3-6.) ʼO mulimuli ki te ʼu folafola ʼa Salomone ʼaē neʼe ina fai ʼi muʼa atu ʼi te fakatapu ʼo te fale lotu, neʼe kolekole fēnei e Sosafate kiā Sehova: “Ê tomatou ʼAtua, ʼe mole ke fakahoko anai koa te fakamāu kiā nātou? Heʼe mole kei ʼi ai he mālohi iā mātou iā muʼa ʼo te toe hahaʼi kaugamālie ʼaenī ʼaē ʼe fakafeagai mai kiā mātou; pea ʼe mole matou ʼiloʼi te meʼa ʼaē ʼe tonu ke matou fai, kae ko tomatou ʼu mata ʼe haga atu kiā te koe.” (2 Fkma. 20:12, 13) ʼI te ʼosi faikole ʼo Sosafate, neʼe uga e te laumālie ʼo Sehova ia Saasiele, te tagata Levite, ke ina tala “ ʼi te lotomālie ʼo te kōkelekāsio,” he ʼu palalau fakalotofīmālie ke maʼu e te hahaʼi ia te loto falala.—Lau ia 2 Fakamatala 20:14-17.

10. (a) Neʼe takitaki feafeaʼi ia Sosafate pea mo te puleʼaga ʼo Suta? (b) ʼE tou lava fakahā feafeaʼi tatatou fakafetaʼi ʼaē ki te takitaki ʼo tātou e Sehova iā ʼaho nei?

¹⁰ ʼI te temi leva ʼaia, neʼe takitaki e Sehova ia Sosafate pea mo te puleʼaga ʼo Suta ʼaki ia Saasiele. Iā ʼaho nei, ʼe fakalotofīmālieʼi tātou pea mo takitaki tātou e te kalasi ʼo te tagata kaugana agatonu mo poto. ʼE mahino papau ia, ʼe tou fia lagolago tuʼumaʼu kiā ia pea mo fakaʼapaʼapa ki te ʼu tagata ʼāfea ʼaē neʼe hinoʼi, ʼaē ʼe natou gāue kinakina moʼo tokaga kiā tātou pea mo fakahoko ia te ʼu fakatotonu ʼaē mai “te tagata kaugana agatonu mo poto.”—Mat. 24:45; 1 Tes. 5:12, 13.

11, 12. Koteā te ako ʼe tou lava tāʼofi mai te meʼa ʼaē neʼe hoko kiā Sosafate pea mo te puleʼaga ʼo Suta?

¹¹ Ohagē pē ko te fakatahitahi ʼa Sosafate pea mo tana hahaʼi moʼo kumi te takitaki ʼa Sehova, ʼaua naʼa tou tōtō ʼi te ʼu fono ʼaē ʼe tou fakatahi ai mo totatou ʼu tehina mo tuagaʼane. Kapau ʼi ʼihi temi ʼe tou tau mo he ʼu faigataʼaʼia, ʼo mole tou ʼiloʼi he meʼa ke tou fai, tou mulimuli ki te faʼifaʼitaki lelei neʼe tuku mai e Sosafate pea mo te hahaʼi ʼo Suta pea tou faikole kiā Sehova ʼaki he falala kātoa kiā te Ia. (Taag. 3:5, 6; Filp. 4:6, 7) Māʼiapē lā mokā tou tō tokotahi ʼi he faʼahi, ko tatatou ʼu faikole kiā Sehova ʼe ina fakatahiʼi tātou ki “te fāmili kātoa ʼo [totatou] ʼu tehina ʼi te mālamanei.”—1 Pet. 5:9.

¹² Ko Sosafate pea mo tana hahaʼi neʼe natou  mulimuli ki te takitaki ʼa te ʼAtua ʼaē neʼe ina fai ʼaki ia Saasiele. Neʼe koteā tona fua? Neʼe natou mālo ʼi te tau ʼaē neʼe hoko pea neʼe natou toe liliu ki Selusalemi “ ʼaki he fiafia” pea “ ʼaki te ʼu meʼa māholo filo pea mo te ʼu ʼalepa pea mo te ʼu meʼa puhi fakatagi ki te fale ʼo Sehova.” (2 Fkma. 20:27, 28) ʼE tou toe fakaʼapaʼapa fēia ki te takitaki ʼaē ʼe foaki mai e Sehova ʼaki te kalasi ʼo te tagata kaugana pea mo tou kau ki te fakavikiviki kiā te Ia.

Tou Tōkakaga Fakalelei Ki Tatatou ʼu Fale Fono

13. Koteā te gāue ʼaē neʼe ʼuluaki fai e Esekiasi ʼi te kamataʼaga ʼo tona temi hau?

¹³ ʼI te ʼuluaki māhina ʼo tona temi hau, ko Esekiasi neʼe ina fakahā tana faʼafai ki te tauhi ʼa Sehova ʼaki tana toe ʼavahi pea mo toe gaohi ia te fale lotu. Neʼe ina fakanofo ia te kau pelepitelō pea mo te kau Levite ke natou fakamaʼa ia te fale ʼo te ʼAtua. Neʼe natou fai ia te faʼahi ʼaia iā ʼaho e 16. (Lau ia 2 Fakamatala 29:16-18.) Ko te ʼu faiga ʼaia, ʼe ina fakamanatuʼi mai ia te taupau lelei pea mo te ʼu gāue moʼo toe gaohi tatatou ʼu fale fono, ʼaē ʼe fakaʼiloga ai tatatou faʼafai ʼi tatatou tauhi ʼaē kiā Sehova. Neʼe mole heʼeki kotou logo koa ki te ʼu meʼa neʼe hoko ʼi te punamaʼuli ʼaē ʼa te hahaʼi ʼi te faʼafai ʼa te ʼu tehina mo tuagaʼane ʼaē neʼe kau ki te ʼu gāue ʼaia? ʼIo, ʼaki tanatou ʼu faiga ʼaia neʼe tupu ai te toe fakavikiviki lahi kiā Sehova.

14, 15. Koteā te gāue iā ʼaho nei ʼe tupu ai te toe fakavikiviki lahi ʼo Sehova? Kotou tuku mai he ʼu faʼifaʼitaki.

¹⁴ ʼI te kolo ʼi te potu noleto ʼo Pilitānia, neʼe mole tali e te tagata ia te kole ʼaē ke toe gaohi ia te Fale ʼo Te Puleʼaga ʼaē neʼe tafa age ki tona kele. Neʼe palalau lelei age te ʼu tehina ʼo ʼuhiga mo te ʼu gāue ʼaē neʼe tonu ke fai. ʼI te tokagaʼi ʼaē e te ʼu tehina neʼe ʼaoga ke toe gaohi te kaupā ʼaē neʼe ina fakatuʼakoi ia te Fale ʼo Te Puleʼaga pea mo te kele ʼo te tagata ʼaia, neʼe natou kole ai leva ki te tagata ke natou fai te gāue pea ko nātou ʼaē kā totogi. Neʼe natou gāue kinakina pea neʼe teitei pē ke natou toe laga kātoa ia te kaupā. ʼI te lelei ʼo tanatou gāue, neʼe fetogi ai leva ia te aga ʼa te tagata. ʼE ina leʼoleʼo lelei ʼi te temi nei ia te koga meʼa ʼaē ʼe tuʼu ai te Fale ʼo Te Puleʼaga.

¹⁵ ʼE kau te hahaʼi ʼa Sehova ki he gāue laga fale fakamālamanei. Pea ko te ʼu tehina mo tuagaʼane ʼo te ʼu fenua ʼe natou kaugā gāue mo te kau gāue fakamālamanei ʼaia ki te laga ʼo te ʼu Fale ʼo Te Puleʼaga pea mo te ʼu Fale Fakatahi pea mo te ʼu Petele. Ko Sam, ʼe faiva ʼi te gaohi ʼo te ʼu masini fakamāfana, fakamokomoko pea mo te ʼu masini moʼo fetogi te ʼaele ʼi he fale. Ko ia pea mo tona ʼohoana ko Ruth, neʼe nā folau ki te ʼu fenua ʼe lahi ʼo te Eulopa pea mo Afelika moʼo tokoni ki te  ʼu gāue laga fale. ʼI te ʼu potu fuli ʼaē neʼe nā ʼolo kiai, neʼe nā toe kau ki te fai fakamafola mo te ʼu kōkelekāsio ʼo te ʼu potu ʼaia. ʼE fakamahino fēnei e Sam ia te meʼa ʼaē neʼe ina uga ai ia ia, ke kau ki te ʼu gāue laga fale fakamālamanei: “Neʼe ko te ʼu fakalotomālohi ʼa ʼihi iā nātou ʼaē ʼe gāue ʼi te ʼu Petele ʼi henī pea mai te ʼu fenua tai. Ko taku sio ʼaē ki tanatou faʼafai pea mo tanatou fiafia neʼe ina uga tāfito au ke au fai te gāue ʼaenī.”

Tou Fakalogo Ki Te ʼu Fakatotonu Mai Te ʼAtua

16, 17. Koteā ia te gāue makehe ʼaē ʼe kau fakamālotoloto kiai te hahaʼi ʼa te ʼAtua, pea koteā tona fua?

¹⁶ ʼO mole gata pē ki te toe gaohi ʼaē ʼo te fale lotu, neʼe toe fakatuʼu e Esekiasi ia te ʼaho ʼo te Pāsikate ʼaē neʼe fakatotonu e Sehova ke fai ʼi te taʼu fuli. (Lau ia 2 Fakamatala 30:1, 4, 5.) Ko Esekiasi pea mo te hahaʼi ʼo Selusalemi neʼe natou fakaafe ia te puleʼaga kātoa—ʼo fēia mo nātou ʼo te puleʼaga ʼi te potu noleto—ke natou kau ki te ʼaho ʼaia. Ko te ʼu tagata lele neʼe natou ʼolo ki te fenua kātoa ʼo ʼave ia te ʼu pepa fakaafe.—2 Fkma. 30:6-9.

¹⁷ ʼI te ʼu taʼu pē ʼaenī, neʼe tou fai mo tātou ia te ʼu gāue ʼaia. Neʼe tou tufa ia te ʼu pepa lotu matalelei neʼe tā moʼo fakaafe ia te hahaʼi ʼo totatou telituale ke natou fakatahi mo tātou ki te fakamanatu ʼo te Taumafa ʼo te ʼAliki, ʼo mulimuli ki te fakatotonu neʼe fai e Sesu. (Luka 22:19, 20) ʼAki tatatou maʼu ia te ʼu tokoni ʼi tatatou ʼu Fono Gāue, neʼe tou faʼafai ʼi te gāue ʼaia. Pea neʼe tapuakinaʼi lahi e Sehova tatatou ʼu faiga ʼaia! Koia, ʼi te taʼu ʼaenī kua hili, neʼe tou toko fitu miliona tupu moʼo tufa ia te ʼu pepa fai fakaafe, pea ko te toko 17 790 631 hahaʼi neʼe natou kau ki te ʼaho ʼaia.

18. He koʼē ʼe maʼuhiga ʼaupitō kiā koutou ke kotou faʼafai maʼa te tauhi moʼoni?

¹⁸ Neʼe ʼui fēnei ʼo ʼuhiga mo Esekiasi: “Neʼe falala kiā Sehova te ʼAtua ʼo Iselaele; ki muli mai, neʼe mole he tahi age neʼe hagē ko ia ʼi te ʼu hau fuli ʼo Suta, ʼo fēia aipē kiā nātou ʼaē neʼe hau ki muʼa atu iā ia. Neʼe haga pipiki kiā Sehova. Neʼe mole maliu kehe ʼi tana mulimuli iā te ia, kae neʼe ina taupau maʼu te ʼu fakatotonu ʼaē neʼe fakatotonu e Sehova kiā Moisese.” (2 Hau 18:5, 6) ʼOfa pē ke tou mulimuli ki tana faʼifaʼitaki. Ko tatatou faʼafai maʼa te fale ʼa te ʼAtua ʼe tokoni mai anai ke tou ‘haga pipiki kiā Sehova’ ʼaki te ʼamanaki ʼaē ki te maʼuli heʼegata.—Teu. 30:16.

Tou Foimo Mulimuli Ki Te Takitaki

19. Koteā te faiga fakamālotoloto ʼe fai ʼi te temi ʼo te ʼAho ʼo Te Fakamanatu?

¹⁹ ʼI te temi hau ʼo Sosiasi, neʼe ina toe fakatuʼutuʼu ke fai ia te Pāsikate, ʼo ina fai ia te ʼu teuteu lelei ki te ʼaho ʼaia. (2 Hau 23:21-23; 2 Fkma. 35:1-19) ʼE tou toe tōkakaga ʼo teuteu lelei ki te ʼu fakatahi fakatisitilike, mo te ʼu fakatahi fakasilikō, mo te ʼu fakatahi makehe, pea mo te ʼAho ʼo Te Fakamanatu. Logolā te tuʼutāmaki, kae ko te ʼu tehina ʼo ʼihi kolo ʼe natou fakatahitahi, moʼo fakamanatuʼi ia te mate ʼo Kilisito. Ko te ʼu tagata ʼāfea faʼafai ʼe natou tōkakaga ke mole galoʼi he tahi ʼi te kōkelekāsio. ʼE toe foaki ia te tokoni ki te hahaʼi mātutuʼa pea mo māʼimoa ke feala hanatou kau ki te ʼaho ʼaia.

20. (a) Koteā ʼaē neʼe hoko ʼi te temi hau ʼo Sosiasi, pea koteā ʼaē neʼe ina fai? (b) Koteā te ako ʼaē ʼe tou mulimuli anai kiai?

²⁰ ʼI te temi gāue ʼaē neʼe fakatuʼutuʼu e te Hau ko Sosiasi, ko te Pelepitelō Lahi ko Ilikia neʼe ina “maʼu ia te tohi ʼo te lao ʼa Sehova ʼaē neʼe tohi e Moisese.” Neʼe ina ʼavage te tohi ʼaia kiā Safane, te sīkalaipe ʼo te hau, ʼaē ki muli age, neʼe ina kamata lau kiā Sosiasi. (Lau ia 2 Fakamatala 34:14-18.) Neʼe koteā ʼaē neʼe hoko ai? ʼI te lotomamahi ʼaē ʼa te hau, neʼe ina hae atu aipē tona ʼu kofu pea neʼe ina fakatotonu ki te ʼu tagata ke natou ʼolo ʼo fakafehuʼi ia Sehova. ʼAki te polofetā ko Ulita, neʼe foaki e te ʼAtua ia te logo ʼe ina tauteaʼi ai ʼihi aga fakalotu neʼe fai ʼi Suta. Kae neʼe tokagaʼi te ʼu fakatuʼutuʼu lelei ʼaē neʼe fai e Sosiasi moʼo molehi ia te ʼu aga ʼo te tauhi taulāʼatua, pea neʼe ʼofainaʼi  ia ia e Sehova logolā te ʼu malaʼia ʼaē neʼe fakakikite kā hoko anai ki te puleʼaga kātoa. (2 Fkma. 34:19-28) Koteā ʼaē ʼe feala ke tou ako mai te faʼahi ʼaia? ʼE lagi hagē totatou loto ko Sosiasi. ʼE tou foimo tali anai te takitaki ʼa Sehova, ʼo tou mulimuli ki te fakatokaga ʼo ʼuhiga mo te ʼu meʼa ʼaē ʼe lava hoko mo kapau ʼe tou tuku ke tāʼofi e te ʼapositasia pea mo te aga heʼe faitotonu ia tatatou tauhi ʼaē ki te ʼAtua. Pea ʼe feala ke tou falala ʼe tokagaʼi anai e Sehova tatatou faʼafai maʼa te tauhi maʼa, ohagē ko tana fai mo Sosiasi.

21, 22. (a) He koʼē ʼe tonu ke tou faʼafai maʼa te fale ʼo Sehova? (b) Koteā ʼaē kā tou vakaʼi anai ʼi te ʼalatike kā hoa mai?

²¹ Ko te ʼu hau ʼaia e fā ʼo Suta—ia Asa, mo Sosafate, mo Esekiasi, pea mo Sosiasi—neʼe natou tuku mai ia he faʼifaʼitaki lelei kiā tātou, ʼi tanatou faʼafai maʼa te fale ʼo te ʼAtua pea mo te tauhi ʼaē kiā te ia. Ko tatatou faʼafai, ʼe tonu ke ina toe uga tātou ke tou falala kiā Sehova pea mo tou faiga fakamālotoloto ʼo lagolago ki tana tauhi. ʼE mahino ia, ʼe ko he aga fakapotopoto ʼaia pea ʼe tou maʼu te fiafia ʼi tatatou fakalogo ki te ʼu fakatotonu fakaʼatua pea mo tali ki te tokaga ʼofa pea mo te ʼu fakatotonuʼi ʼaē ʼe foaki mai e te kōkelekāsio pea mo te ʼu tagata ʼāfea.

²² ʼI te ʼalatike kā hoa mai, ʼe tou vakaʼi tāfito ai anai ia te faʼafai ʼaē ʼi te minisitelio pea mo te fakalotomālohi ʼaē ʼe feala ke maʼu ai e te kau tūpulaga, ke natou tauhi ki tatatou Tamai ʼofa ʼaki he faʼafai. ʼE tou toe vakaʼi ai anai, peʼe lava feafeaʼi hatatou tekeʼi te fakahala ʼi te ʼu fakahala kovi ʼa Satana. ʼI tatatou faʼafai ʼo mulimuli ki te ʼu fakamanatu fuli ʼaia mai iā Sehova, ʼe tou muliʼi anai ia te faʼifaʼitaki ʼo te ʼAlo totonu ʼo Sehova, ia Sesu, ʼaē neʼe ʼui fēnei ʼo ʼuhiga mo ia: “Ko te faʼafai ʼaē ki tou fale neʼe ina mofi au.”—Pes. 69:9; 119:111, 129; 1 Pet. 2:21.

ʼE Kei Kotou Manatuʼi Koa?

• Ko te faʼahiga tauhi fea ʼaē ʼe tapuakinaʼi e Sehova, pea koteā tona tupuʼaga?

• ʼE tou lava fakahā feafeaʼi tatatou falala ʼaē kiā Sehova?

• ʼE lava uga feafeaʼi ia tātou e te faʼafai ke tou fakalogo ki te ʼu fakatotonu ʼaē mai te ʼAtua?

[ʼU fehuʼi ʼo te ako]

[Paki ʼo te pasina 13]

Neʼe fakahā feafeaʼi e Asa, mo Sosafate, mo Esekiasi, pea mo Sosiasi ia he faʼafai maʼa te fale ʼo Sehova?