Kotou Puipui Ia Koutou Mai Te ʼu Laumālie Agakovi

KO JAMES neʼe lahilahi ake ʼi he koga meʼa mamaʼo ʼo te motu ko Malaita, ʼi te ʼu Motu ʼo Salomone. Talu mai tana kei veliveli, neʼe akoʼi age ke fakaʼapaʼapa ki te ʼu laumālie. ʼE ina ʼui fēnei: “Neʼe mole au kole ki te ʼu laumālie ke natou fai he meʼa ʼe kovi ki te hahaʼi, kae neʼe au manatu ʼe feala ke kita maʼuli fiafia mokā ʼe kita mulimuli ki te rarafono [ko te ʼu agaʼi fenua ʼe kole tokoni ai ki te ʼu laumālie] ke ina puipui kita mai he tuʼutāmaki.”

Ohagē ko te ʼu hahaʼi mai te ʼu potu kehekehe ʼo te kele, ko te hahaʼi ʼaē ʼe māʼuʼuli ʼi te ʼu Motu ʼo Salomone, ʼe natou tui ko te ʼu laumālie ʼe feala ke natou tokoni peʼe ke natou fai he meʼa ʼe kovi ki he tahi. ʼI tona fakahagatonu, maʼa te hahaʼi tokolahi ʼo te ʼu motu ʼo te Pasifika ʼe natou leleiʼia ia te ʼu laumālie ʼaē ʼe ʼui e agalelei, kae ʼe mole natou mātataku ai.

Ko te tui ki te ʼu gāue ʼa te ʼu laumālie ʼe hā ʼi he ʼu ʼaluʼaga kehekehe. Ohagē lā, ʼi te kei veliveli ʼa James, neʼe fakahū fakavilivili e te ʼu fafine tanatou fānau ki te loto fale mokā natou logo ki te tagi ʼo te manulele ʼaē ko te korokoro. Koteā tona tupuʼaga? Neʼe natou tui ko te tagi ʼa te manulele ʼaia neʼe fakaʼuhiga ki te ʼamanaki gaohi koviʼi ʼo he tahi.

Ko ʼihi hahaʼi ʼo te kolo ʼe natou hili ia he maka hina makehe ki te fuga matapā ʼo tonatou ʼapi. Neʼe fai e James ia te faʼahi ʼaia, ʼi tana tui ʼaē ko te maka ʼaia ʼe ina puipui anai ia ia mai te ʼu laumālie ʼaē ʼe natou fai te ʼu meʼa ʼe kovi. Pea kā gāue ia James, ʼe ina tae te ʼu toega meʼa kai pea mo ʼai ki he kato ʼo hoki ina liʼaki ki muli age. Neʼe mataku tāfito ia James naʼa fakaʼaogaʼi e he tagata gaohi meʼa fakamanamana ia te ʼu toe meʼa kai ʼo faitutuku ki ai, ke hoko ai hona mahaki.

Tatau aipē peʼe mole fai māhani te ʼu aga ʼaia ʼi tokotou fenua, kae lagi ohagē ko James, neʼe kotou fia mulimuli ki te ʼu agaʼi fenua ke puipui koutou mai te ʼu laumālie agakovi. ʼE lagi kotou tui ko te mulimuli ki te ʼu toʼotoʼoga ʼaia ʼe maʼuhiga ke ʼaua naʼa hoko he tuʼutāmaki kiā koutou.

Kapau ʼe kotou fakaʼapaʼapa ki te Tohi-Tapu, ʼe mahino ia ʼe kotou fia ʼiloʼi anai pe koteā tona tali ki te ʼu fehuʼi ʼaenī: (1) Koteā ia te meʼa ʼaē ʼe kovi ʼaē ʼe feala ke fai atu e te ʼu laumālie agakovi kiā koutou? (2) ʼI takotou mulimuli ki ʼihi agaʼi fenua, ʼe feala ai koa ke kotou fakalogo ki te mālohi ʼo te kau temonio? (3) ʼE lava puipui moʼoni feafeaʼi koutou mai te ʼu laumālie agakovi pea mo kotou fiafia ai?

ʼE Gaohi Koviʼi Feafeaʼi e Te ʼu Laumālie Agakovi Ia Te Hahaʼi?

ʼE fakahā ʼi te Tohi-Tapu ko te ʼu laumālie agakovi ʼe mole ko te ʼu laumālie ʼo te kau mate. ʼE ʼui  fēnei ʼi te Folafola ʼa te ʼAtua: “Ko te kau māʼuʼuli ʼe natou ʼiloʼi ʼe natou mamate anai; kae ko te kau mate, ʼe mole kei natou ʼiloʼi he meʼa.” (Tagata Tānaki 9:5) ʼI tona fakahagatonu, ko te ʼu laumālie agakovi ʼe ko te ʼu ʼāselo agatuʼu neʼe natou fakatahi kiā Satana moʼo faigaʼi ke natou kākāʼi ia te hahaʼi.—Fakahā 12:9.

ʼE ʼui fakalelei ʼi te Tohi-Tapu ʼe tonu ke tou puipui ia tātou mai te ʼu laumālie agakovi. Neʼe tohi e te ʼapositolo ko Paulo ki te kau Kilisitiano ʼo Efesi: “Ko tatatou tau ʼe mole fai ʼo fakafeagai ki te toto pea mo te kakano, kae ʼe fakafeagai ki . . . te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” Neʼe fakatatau e te ʼapositolo ko Petelo ia te pule ʼo te ʼu laumālie agakovi, ia Satana te Tēvolo, ki “he laione ʼe gugulu, [ʼe] ina kumi ke ina kai he tahi.”—Efesi 6:12; 1 Petelo 5:8.

Ko te meʼa ʼaē ʼe kovi ʼe fai tāfito e Satana ʼe ko te kākāʼi ʼo te hahaʼi, ʼo ina loiʼi nātou peʼe fakahalaʼi nātou ke natou fai he aga ʼe fakafeagai ai ki te ʼAtua. ʼE ʼui ʼi te Tohi-Tapu ko Satana “ ʼe ina fakaliliu tuʼumaʼu pē ia ia ko he ʼāselo ʼo te mālama.” (2 Kolonito 11:14) ʼE ina lau ko ia ʼe ko he laumālie ʼe ina puipui te hahaʼi kae ʼi tona fakahagatonu, ʼe kovi tana ʼu manatu. ʼE fakakiviʼi e Satana ia te ʼatamai ʼo te hahaʼi ke mole natou ʼiloʼi te moʼoni ʼo ʼuhiga mo ia pea mo te moʼoni ʼo ʼuhiga mo te ʼAtua. (2 Kolonito 4:4) Koteā tana fakatuʼutuʼu ʼi tana kākāʼi ia te hahaʼi?

ʼE holi e Satana ke ʼatolasioʼi ia ia e te hahaʼi, peʼe natou mahino kiai peʼe kailoa. ʼI te maʼuli ʼo Sesu, te ʼAlo ʼo te ʼAtua ʼi te kele, neʼe loto e Satana ke ‘punou age ia Sesu pea mo fai age he ʼatolasio’ ʼi ʼona muʼa. Neʼe ʼui fēnei e Sesu: “ ʼAlu, Satana, heʼe tohi fēnei: ‘Ko Sehova, tou ʼAtua, ʼaē ʼe maʼua ke ke ʼatolasio ki ai.’ ” (Mateo 4:9, 10) Neʼe fakafisi ia Sesu ke ina fai ia he meʼa ʼe liliu ai ʼo fakalogo kiā Satana, peʼe ʼatolasio ai kiā Satana.

Ko Sehova ʼe ko te laumālie ʼaē ʼe mālohi ʼaupitō age ʼi te ʼu laumālie fuli pea ʼe mole ina tuku anai ke gaohi koviʼi fualoa ia nātou ʼaē ʼe fakalogo kiā te ia. (Pesalemo 83:18; Loma 16:20) Kae kapau ʼe tou loto ke tou fakafiafiaʼi ia Sehova ʼAtua ohagē ko tona fai e Sesu, ʼe tonu ke ʼaua naʼa tou fai he meʼa ʼe tou liliu ai ʼo fakalogo kiā Satana peʼe ko tana kau temonio. Ke mole tou fai ia te aga ʼaia, ʼe tonu ke tou ʼiloʼi ia te ʼu agaʼi fenua ʼaē ʼe ʼatolasioʼi mo fakaʼapaʼapaʼi ai ia te ʼu mālohi fakalaumālie agakovi. ʼE kotou lava fai feafeaʼi te faʼahi ʼaia?

Kotou ʼIloʼi Ia Te ʼu Agaʼi Fenua ʼAē ʼe Mole Leleiʼia e Te ʼAtua

Neʼe fakatokaga e Sehova ʼAtua ia tana hahaʼi ʼo te temi muʼa, te kau Iselaele, ke ʼaua naʼa natou mulimuli ki ʼihi agaʼi fenua ʼo te ʼu fenua ʼi tonatou ʼu tafaʼaki. Neʼe ina ʼui fēnei: “ ʼAua naʼa maʼu ʼi tou loto fale he tahi . . . ʼe fai fakakikite peʼe ko he tahi ʼe gaohi meʼa fakamanamana, peʼe ko he tahi ʼe ina kumi he ʼu fakaʼiloga, peʼe ko he tahi ʼe gaohi meʼa fakatemonio, peʼe ko he tahi ʼe faitutuku ki he tahi.” ʼO ʼuhiga mo nātou ʼaē ʼe natou fai te ʼu aga ʼaia, ʼe ʼui fēnei ʼi te Tohi-Tapu: “Ko te tagata fuli pē ʼaē ʼe ina fai te ʼu meʼa ʼaia ʼe ko he meʼa fakalialia ia kiā Sehova.”—Teutalonome 18:10-12.

Koia, kā kotou vakavakaʼi ia te ʼu agaʼi fenua ʼaē ʼe fai ʼi tokotou fenua, kotou tokagaʼi ia te ʼu fehuʼi ʼaenī: ʼE fakalotomālohiʼi koa e te agaʼi fenua ia te tui ki he ʼu fai fakakikite? Ko te agaʼi fenua ʼaia ʼe ina foaki koa ia he mālohi ki he ʼu meʼa mate moʼo puipui ʼo he tahi? ʼE fai ai koa he faitutuku peʼe ko he kole ki he puipui mai he faitutuku? ʼE fai ai anai koa he meʼa ʼe kita fakalogo ai ki he laumālie, kae mole ko Sehova peʼe ko Sesu, tana tagata fakafofoga ʼaē neʼe ina fakanofo?—Loma 14:11; Filipe 2:9, 10.

ʼE maʼuhiga ke kotou liʼaki te ʼu agaʼi fenua fuli ʼaē ʼe ina uga ia te ʼu taʼi aga ʼaia. Koteā tona tupuʼaga? Neʼe takitaki te ʼapositolo ko Paulo e te laumālie māʼoniʼoni ke ina tohi fēnei: “ ʼE mole feala ke kotou kau ki ‘te laupapa ʼo Sehova’ pea mo te laupapa ʼa te kau temonio.” Neʼe fai ai te fakatokaga ʼaē ko nātou ʼaē ʼe natou faiga ke natou fakafiafiaʼi te ʼAtua pea mo te tahi ʼu laumālie ʼe natou ‘fakaneke ia te fuaʼā ʼo Sehova.’ (1 Kolonito 10:20-22) Ko Sehova ʼAtua ʼe ina fakamaʼua pea ʼe tuha mo ia ke tauhi ʼāteaina age pē kiā te ia.—Ekesote 20:4, 5.

Kotou toe tokagaʼi mo te fehuʼi ʼaenī: ʼE uga koa e te agaʼi fenua te manatu ʼaē kapau ʼe fai e he tahi he meʼa ʼe kovi ʼe mole ko hana hala? Ohagē lā, ko te tono pea mo te ʼu felāveʼi fakasino ʼi muʼa ʼo te ʼohoana ʼe ko he ʼu meʼa ʼe kovi ki te ʼu hahaʼi e  tokolahi pea ʼe tauteaʼi ʼi te Tohi-Tapu. (1 Kolonito 6:9, 10) Kae ʼi ʼihi agaʼi fenua ʼo te Pasifika, ko te ʼu taʼi aga ʼaia ʼe tali mo kapau ʼe ʼui e te taʼahine neʼe “fakalauʼakauʼi” a ia ia, ko tona fakaʼuhiga ʼaē neʼe fakaneke ke ina fai he ʼu felāveʼi fakasino ʼuhi he neʼe faitutuku age ki ai.

Kae ʼe akoʼi mai ʼi te Tohi-Tapu ʼe tou tahi ʼamo te ʼu hala ʼo he aga neʼe tou fai. (Loma 14:12; Kalate 6:7) Ohagē lā, ko te ʼuluaki fafine, ia Eva neʼe manatu ia neʼe kākāʼi ia ia e Satana ke talagataʼa ki te ʼAtua, he neʼe ina ʼui fēnei: “Ko te gata—neʼe ina kākāʼi au pea neʼe au kai leva.” Kae kiā Sehova, ʼe huʼi maʼua ia Eva ki te aga ʼaē neʼe ina fai. (Senesi 3:13, 16, 19) ʼE toe fēia pē mo tātou, kiā Sehova ʼe ko tatatou hala mokā neʼe tou fai he aga ʼe kovi.—Hepeleo 4:13.

Koteā ʼAē ʼe Tonu Ke Kotou Fai?

Kapau ʼe kotou fia fakafiafiaʼi ia te ʼAtua pea mo mulimuli ki te ʼu pelesepeto ʼa te Tohi-Tapu, ʼe tonu ke kotou faiga ke kotou puipui ia koutou mai iā Satana pea mo tana kau temonio. Ko te hahaʼi fakamālotoloto ʼaē neʼe māʼuʼuli ʼi Efesi ʼi te ʼuluaki sēkulō, neʼe natou tuku ia he faʼifaʼitaki lelei ʼi te faʼahi ʼaia. Ke natou ʼāteaina mai te mālohi ʼo te ʼu laumālie agakovi, neʼe natou tānaki tanatou ʼu tohi fuli ʼaē neʼe talanoa ai ki te ʼu meʼa fai fakalauʼakau pea neʼe “natou tutu iā muʼa ʼo te hahaʼi fuli.”—Gāue 19:19.

ʼI muʼa ʼo tanatou tutu ia te ʼu tohi, ko te hahaʼi ʼaia neʼe natou “kōfēsio pea mo fakahā tanatou ʼu gāue.” (Gāue 19:18) ʼI te malave ki tonatou loto ia te faiakonaki ʼa Paulo ʼo ʼuhiga mo Kilisito, neʼe uga ai nātou ke natou maumauʼi tanatou ʼu tohi fai fakalauʼakau. Neʼe natou fetogi mo tanatou ʼu manatu ʼo ʼuhiga mo tanatou ʼu agaʼi fenua.

ʼE moʼoni, ʼe lagi mole faigafua ia te liʼaki ʼo te ʼu agaʼi fenua. Ko James, ʼaē neʼe tou talanoa ki ai ʼi muʼa atu, neʼe hoko kiā ia te faigataʼaʼia ʼaia. Neʼe ina kamata ako te Tohi-Tapu mo te kau Fakamoʼoni ʼa Sehova pea neʼe ina leleiʼia te ʼu meʼa ʼaē neʼe ina ako. Kae neʼe kei haga mulimuli ki te toʼotoʼoga ʼaē ko te rarafono. ʼI tana sivisivi ia ia totonu ʼo ʼuhiga mo te ʼu aga ʼaia, neʼe mahino ai kiā ia neʼe tui ki te ʼu fakapapau ʼa Sehova ʼo ʼuhiga mo te kā haʼu kae neʼe manatu ia ke ina maʼu hana puipui mai te agakovi, neʼe kei ʼaoga ke tui ki te ʼu agaʼi fenua.

Koteā ʼaē neʼe tokoni kiā James ke fetogi tana manatu? ʼE ina ʼui fēnei: “Neʼe au faikole kiā Sehova ke ina puipui au pea mo tokoni mai ke au falala kiā te ia. Pea neʼe au liʼaki taku ʼu agaʼi fenua.” Neʼe hoko koa kiā ia he meʼa ʼe kovi? ʼE ʼui fēnei e James: “Kailoa. Ko te meʼa pē ʼaē neʼe hoko neʼe ko taku ako ke au falala kiā Sehova. Neʼe au sio ai neʼe feala pē ke hagē ia Sehova ko he kaumeʼa lelei.” ʼI tona fakahagatonu, ʼi te ʼu taʼu e fitu kua hili, neʼe liliu ia James ko he pioniē temi kātoa, ʼo tokoni ki te hahaʼi ke natou ʼiloʼi pe koteā ʼaē ʼe akoʼi mai ʼi te Tohi-Tapu.

He koʼē ʼe mole kotou mulimuli ki te faʼifaʼitaki ʼa James? Kotou sivisivi ia te ʼu agaʼi fenua ʼaē ʼe fai ʼi tokotou kolo, pea kotou fakaʼaogaʼi tokotou “ ʼatamai” ke kotou ʼiloʼi peʼe ʼalutahi mo te “finegalo ʼo te ʼAtua.” (Loma 12:1, 2) Pea kotou maʼu te mālohi ke kotou mavae mai te ʼu aga fai fakalauʼakau. Kapau ʼe kotou fai fēia, ʼe feala hakotou falala ko Sehova ʼe ina “tali anai koutou” pea ʼe ina puipui anai koutou. (2 Kolonito 6:16-18) Ohagē ko James, ʼe kotou sisio anai ki te moʼoni ʼo te fakapapau ʼaenī ʼi te Tohi-Tapu: “Ko te huafa ʼo Sehova ʼe ko he tule mālohi. ʼE lele kiai te tagata agatonu pea ʼe haofaki ai.”—Tāʼaga Lea 18:10.

[Nota]

[Paki ʼo te pasina 29]

“Korokoro”

[Haʼuʼaga ʼo te paki]

Courtesy of Dr. Bakshi Jehangir

[Paki ʼo te pasina 29]

ʼE tae e te taʼahine ia te ʼu toe ʼo te meʼa kai ke mole fakaʼaogaʼi moʼo fai age ki ai he faitutuku