4 Kotou Tauʼi Takotou Lotolotolua

“Tagata tui vaivai, koteā ʼaē neʼe ke lotolotolua ai?”—Mateo 14:31.

KOTEĀ TE FAKAFIFIHI? Māʼiapē lā mo te ʼu tisipulo ʼa Sesu neʼe natou lotolotolua ʼi ʼihi temi. (Mateo 14:30; Luka 24:36-39; Soane 20:24, 25) ʼI tona fakahagatonu, ʼe ʼui ʼi te Tohi-Tapu ko te mole maʼu ʼo te tui ʼe hagē ko “te agahala ʼaē ʼe ina tāʼofi gafua ia tātou.” (Hepeleo 12:1) Neʼe tohi fēnei e te ʼapositolo ko Paulo: “Ko te tui ʼe mole ko he meʼa ʼe maʼu e te hahaʼi fuli.” (2 Tesalonika 3:2) ʼE mole ʼui ʼe mole feala ke maʼu e ʼihi ia te tui. Kae ko te tokolahi ʼe mole natou faiga ke natou maʼu ia te tui. ʼE tapuakina e te ʼAtua te ʼu faiga ʼa nātou ʼaē ʼe natou fia maʼu te tui.

ʼE KOTOU LAVA TAUʼI FEAFEAʼI TE FAKAFIFIHI ʼAIA? Kotou mahino ki te ʼu faʼahi ʼaē ʼe tupu ai takotou lotolotolua. Ohagē lā, neʼe lotolotolua ia te tisipulo ko Tomasi ʼo ʼuhiga mo te kua fakatuʼuake ʼa Sesu, logolā neʼe ʼui age e te tahi atu kau tisipulo neʼe kua natou sisio kiā te ia. Neʼe fia maʼu e Tomasi ia he fakamoʼoni. Koteā ʼaē neʼe hoko? Neʼe foaki e Sesu kiā ia te fakamoʼoni  ʼaē neʼe ʼaoga moʼo fakamālohi tana tui.—Soane 20:24-29.

ʼAki ia te Tohi-Tapu, ʼe foaki mai e Sehova ʼAtua ia te ʼu tali ʼaē ʼe ʼaoga kiā tātou ke puli ai tatatou lotolotolua. Ohagē lā, tokolahi ʼe mole kei natou tui ki te ʼAtua heʼe natou tukugākoviʼi fakahagatonu peʼe natou manatu ko te ʼAtua, ʼe ko ia ʼaē ʼe ina fakahoko te ʼu tau, mo te agamālohi, pea mo te masiva ʼi te mālamanei. Koteā ʼaē ʼe ʼui ʼi te Tohi-Tapu ʼo ʼuhiga mo te faʼahi ʼaia?

ʼE mole fakafofoga e te ʼu puleʼaga fakagata ia te pule ʼa te ʼAtua. Neʼe ʼui e Sesu ko te laumālie fakapulipuli ʼaē ko Satana ʼe ko ia “te pule ʼo te mālamanei.” (Soane 14:30) Neʼe ʼui e Satana ʼe ina foaki anai kiā Sesu ia te pule ki te ʼu puleʼaga fuli pē ʼo te kele mo kapau ʼe tauhi age kiā ia, ʼo ina ʼui fēnei: “ ʼE au foaki atu anai kiā te koe te pule kātoa ʼaenī pea mo te kolōlia ʼo te ʼu puleʼaga fuli ʼaenī, he neʼe foaki mai kiā te au, pea ʼe au foaki ki ʼaē ʼe au loto ki ai.” Neʼe mole fakafisi Sesu ia te maʼu e Satana ia te pule ʼaia. Kae neʼe ina ʼui fēnei: “ ʼE tohi fēnei, ‘Ko Sehova tou ʼAtua ʼaē ʼe maʼua ke ke ʼatolasio ki ai, pea ʼe ko ia tokotahi pē ʼe maʼua ke ke tauhi ki ai ʼaki he tauhi tapu.’ ” (Luka 4:5-8) Ko Satana pea mo te ʼu puleʼaga fakatagata ʼaē ʼe tonu ke tukugākoviʼi ki te ʼu mamahi ʼo te mālamanei, kae mole ko te ʼAtua.—Fakahā 12:9, 12.

Kua vave pulihi anai e Sehova ʼAtua ia te ʼu tupuʼaga fuli ʼo te mamahi. Kua ina fakatuʼutuʼu ia he Puleʼaga, ʼe hau ai tona ʼAlo, ia Kilisito Sesu, ke pule ki te mālamanei. (Mateo 6:9, 10; 1 Kolonito 15:20-28) Moʼo fakahoko ia te lea fakapolofetā ʼi te Tohi-Tapu, ko te logo lelei ʼo ʼuhiga mo te Puleʼaga ʼaia ʼe lolotoga fakamafola nei ʼi te kele kātoa. (Mateo 24:14) Kua vave pulihi anai e te Puleʼaga ʼaia nātou fuli ʼaē ʼe mole fia fakalogo kiai pea mo ina fakaʼauha te ʼu tupuʼaga fuli ʼo te mamahi ʼa te tagata.—Taniela 2:44; Mateo 25:31-33, 46; Fakahā 21:3, 4.

KOTEĀ TE ʼU LELEI ʼE MAʼU? Ko nātou ʼaē ʼe lotolotolua ʼe natou hagē ko te ʼu peau ʼaē ʼe fetafeaʼaki e “te matagi ʼo te ʼu akonaki fuli pē, ʼaki te kākā ʼa te tagata.” (Efesi 4:14; 2 Petelo 2:1) Kae ko nātou ʼaē ʼe natou maʼu ia te ʼu tali feʼauga ki tanatou ʼu fehuʼi, ʼe feala hanatou “tāʼofi maʼu ʼi te tui.”—1 Kolonito 16:13.

Ko te kau Fakamoʼoni ʼa Sehova, ʼaē ʼe natou tā ia te nusipepa ʼaenī, ʼe natou fia tokoni atu ke kotou maʼu ia te ʼu tali ki te ʼu fehuʼi ʼaē ʼe tupu ai takotou lotolotolua. ʼE natou fakaafe atu koutou ke kotou fakatahi mo nātou pea mo vakavakaʼi e koutou totonu ia tanatou ʼu akonaki. Kapau ʼe kotou fai ia te faʼahi ʼaia, pea ʼe mālohi lahi ai anai takotou tui ki te ʼAtua.

Kapau ʼe kotou fia maʼu he tahi ʼu fakamahino, vakaʼi ia te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼi te kāpite 8, ko tona kupu tāfito: “Koteā Koa Ia Te Puleʼaga ʼo Te ʼAtua?” pea mo te kāpite 11, ko tona kupu tāfito: “He Koʼe Koa ʼe Fakagafua e Te ʼAtua Te ʼu Mamahi?” a

[Nota]

[Paki ʼo te pasina 9]

Ko nātou ʼaē neʼe natou maʼu ia te ʼu tali feʼauga ki tanatou ʼu fehuʼi, ʼe natou maʼu ia he tafitoʼaga mālohi ki tanatou tui