Te ʼu Fehuʼi ʼa Te Kau Lautohi

Ko te temi fea ʼaē neʼe kapu ifo ai ia Satana mai te lagi?—Fakh. 12:1-9.

Logolā ʼe mole fakahā fakahagatonu mai ʼi te tohi ʼo te Tohi-Tapu ʼaē ko te Fakahā ia te temi totonu ʼaē neʼe kapu ifo ai ia Satana mai te lagi, kae ʼe talanoa ki te ʼu tuʼuga ʼaluʼaga neʼe hoko ʼe feala ke tokoni mai kiā tātou ke tou fakafuafua peʼe ko te temi fea ʼaē neʼe kapu ifo ai mai te lagi. Ko te ʼuluaki ʼi te ʼu meʼa ʼaē neʼe hoko, ʼe ko te fakatuʼu ʼo te Puleʼaga Fakamēsia. Ki muli mai, “neʼe hoko te tau ʼi te lagi,” neʼe mole mālo ai ia Satana pea moʼo fakaʼosi, neʼe kapu ifo ia ia mai te lagi.

ʼE fakaʼiloga lelei ʼi te Tohi-Tapu ko te taʼu 1914 ʼaē neʼe fakaʼosi ʼaia “te ʼu temi ʼaē kua fakakatofa ki te ʼu puleʼaga” pea mo te fakatuʼu ʼo te Puleʼaga. * (Luka 21:24) Koteā ʼaē neʼe hoko ʼi te hili ʼo te tau ʼaē neʼe hoko ʼi te lagi pea mo te kapu ifo ʼo Satana?

ʼE ʼui fēnei iā Fakahā 12:4: “Neʼe tuʼu te talakone [ia Satana] iā muʼa ʼo te fafine ʼaē neʼe ʼamanaki fānau, ke feala hana kai ia tana tamasiʼi ʼi te temi ʼaē kā fānau ai ia te fafine.” ʼE hā mai ʼi henī neʼe loto e Satana ke ina foimo pulihi fakavilivili ia te Puleʼaga foʼou, ʼi te temi pē ʼaē neʼe fakatuʼu ai mo kanapaulā neʼe ina fealagia. Logolā ia te haga ʼa Sehova ʼo tāʼofi ia Satana ʼi tana fakahoko ia tana fakatuʼutuʼu agakovi, kae neʼe faiga mālohi pea mo fakakinau aipē ia Satana ke ina fai ia he meʼa ʼe kovi ki te Puleʼaga ʼaē neʼe hoki fakatuʼu pē. Koia ʼaē neʼe mole fakatuatuai ia “Mikaele mo tana kau ʼāselo” ʼo natou kapu ifo ia “te talakone mo tana kau ʼāselo” ke ʼaua naʼa toe lava hoko he meʼa ʼe kovi ki te Puleʼaga. Koia ʼe matatonu ke tou ʼui ko te tō pea mo te kapu ifo ʼaia ʼo Satana neʼe hoko ʼi te hili pē ʼaē ʼo te ʼosi tupu ʼo te Puleʼaga ʼi te taʼu 1914.

Ko te tahi faʼahi ʼe tonu ke tou vakaʼi ʼe ko te fakatuʼuake ʼo te kau Kilisitiano fakanofo,—ohagē ko tona fakamoʼoni mai ʼi te Tohi-Tapu—ʼaē neʼe kamata ʼi te hili pē ʼaē ʼo te ʼosi fakatuʼu ʼo te Puleʼaga. * (Fakh. 20:6) Mai tona ʼaluʼaga ʼaē ʼe mole he tehina fakanofo ʼo Kilisito neʼe ina ʼui neʼe kaugā ʼalu mo Sesu ʼo tauʼi ia te talakone pea mo tana kau ʼāselo, ko te tau ʼaē neʼe hoko ʼi te lagi pea mo te kapu ifo ʼo Satana mo tana kau temonio neʼe lagi fakaʼosi ʼi te temi ʼaē neʼe kamata ai ia te fakatuʼuake ʼo te ʼu tehina ʼo Kilisito.

Koia, ʼe mole fakahā mai ʼi te Tohi-Tapu ia te temi totonu ʼaē neʼe kapu ifo ai ia Satana mo tana kau temonio mai te lagi. Kae, ʼe mahino ia ko te ʼaluʼaga ʼaia neʼe hoko ʼi te hili pē ʼo te ʼosi fakanofo hau ʼo Sesu Kilisito ʼi te lagi ʼi te taʼu 1914.

[ʼU nota]