Te ʼu Fehuʼi ʼa Te Kau Lautohi

Kua ʼOsi Fakatuʼutuʼu Fakatomuʼa Koa Totatou Maʼuli?

ʼE ʼui e ʼihi kua ʼosi tohi fakatomuʼa totatou ʼaho mate. ʼE tui papau e ʼihi kua ʼosi fakatuʼutuʼu e te ʼAtua totonu totatou ʼaho mate. Pea maʼa te hahaʼi ʼaia ʼe mole feala ke fetogi ia te ʼu meʼa ʼaē ʼe hoko ʼi totatou maʼuli. ʼE kotou manatu fēia koa ʼo ʼuhiga mo te ʼu meʼa ʼaē ʼe hoko?

ʼE feala ke kotou fai kiā koutou ia te ʼu fehuʼi ʼaenī: ‘Kapau ʼe moʼoni ʼe mole feala haku fetogi te ʼu meʼa ʼaē kua ʼosi tohi fakatomuʼa, kapau kua fakatuʼutuʼu fakatomuʼa e te ʼAtua te ikuʼaga ʼo he ʼaluʼaga, koteā te tupuʼaga ʼo te fakalotomālohiʼi ʼo tātou ke tou faikole? Pea kapau kua ʼosi tohi fakatomuʼa te ʼu meʼa ʼe tonu ke hoko kiā tātou, koteā te tupuʼaga ʼo hatatou tōkakaga ʼo puipui tātou? Koteā te tupuʼaga ʼo te ʼai ʼo te kiliʼipipi mokā tou ʼolo ʼi te ʼu motokā? Koteā te tupuʼaga ʼo te tapuʼi ʼaē ke tou taki motokā mokā neʼe tou ʼinu kava?’

ʼE mole tali tuʼa tahi ʼi te Tohi-Tapu ia te ʼu taʼi aga fēia. ʼE mole akoʼi ʼi te Tohi-Tapu te kua ʼosi fakatuʼutuʼu fakatomuʼa ʼo te ʼu meʼa, kae neʼe fakatotonu ia ki te kau Iselaele ke natou tōkakaga ʼo puipui ia nātou. Ohagē lā, neʼe fakatotonu kiā nātou ke natou ʼātakai ia te fuga ʼato ʼo tonatou ʼapi ʼaki he kiʼi kaupā. Neʼe feala ai ke ina puipui he tahi ke ʼaua naʼa tō mai te ʼato. Koteā te tupuʼaga ʼo te foaki e te ʼAtua ia he fakatotonu fēia mo kanapau lā neʼe kua ʼosi tohi fakatomuʼa ʼe tonu ke tō he tahi mai te ʼato ʼo mate?—Teutalonome 22:8.

ʼE feafeaʼi kiā nātou ʼaē ʼe mamate ʼuhi ko he tuʼutāmaki fakanātulā peʼe ko he fakaʼī? Neʼe kua ʼosi fakatuʼutuʼu fakatomuʼa koa “tonatou ʼaho mate”? Kailoa ia, kae ʼe fakamoʼoni mai e te tagata faitohi ʼo te Tohi-Tapu, te Hau ko Salomone, ko “te ʼu temi pea mo te ʼu meʼa fakafokifā ʼe hoko kiā [tātou] fuli.” (Tagata Tānaki 9:11) Koia tatau aipē peʼe mata faikehe peʼe fakapunamaʼuli, kae ko te ʼu tuʼutāmaki ʼaē ʼe hoko neʼe mole fakatuʼutuʼu fakatomuʼa ia.

Kae ʼe manatu e ʼihi ko te palalau ʼaia ʼe fakafeagai ki te meʼa ʼaē neʼe ʼuluaki ʼui e Salomone ʼo fēnei: “Kiā meʼa fuli ʼe ʼi ai tona temi kua fakakatofa, ʼeī, he temi kiā meʼa fuli ʼi te lalo lagi: ko he temi ke tupu ai pea mo he temi ke mate ai.” (Tagata Tānaki 3:1, 2) Kae neʼe lagolago moʼoni koa ia Salomone ki te manatu ʼaē ʼe mole feala ke fetogi te ʼu meʼa ʼaē ʼe hoko? Tou vakaʼi fakalelei age muʼa ia te ʼu folafola ʼaia.

Neʼe mole ʼui e Salomone kua ʼosi fakatuʼutuʼu fakatomuʼa ia te tupu pea mo te mate. Kae neʼe manatu ia ko te tupu pea mo te mate, ohagē pē ko te ʼu meʼa fuli ʼo te maʼuli, ʼe hoko tuʼumaʼu pē ia, ʼe mole gata ia ʼi he temi. ʼE moʼoni, ʼe hoko ʼi totatou maʼuli he ʼu ʼaluʼaga fakafiafia pea mo fakalotomamahi. ʼE ʼui fēnei e Salomone: “ ʼE ʼi ai . . . te temi moʼo tagi pea mo te temi moʼo kata.” ʼE fakahā e Salomone, ko te hoko tuʼumaʼu pē ʼo te ʼu meʼa ʼaia pea mo te ʼu meʼa fakafokifā, ʼe ko he ʼu meʼa māhani ʼo te maʼuli, “kiā meʼa fuli ʼi te lalo lagi.” (Tagata Tānaki 3:1-8; 9:11, 12) Koia, ko tana manatu fakaʼosi, ke mole tou maʼumaʼua fau ʼi te fakahoko ʼo tatatou ʼu gāue ʼo te ʼaho fuli, ʼo liu  galoʼi ai ia totatou Tupuʼaga.—Tagata Tānaki 12:1, 13.

Logolā te mahino kātoa ʼo totatou Tupuʼaga ki te maʼuli pea mo te mate, kae neʼe mole heʼeki ina tohi fakatomuʼa totatou maʼuli. ʼE akoʼi mai ʼi te Tohi-Tapu ko te ʼAtua ʼe ina foaki mai kiā tātou fuli ia te ʼamanaki ke tou māʼuʼuli ʼo heʼegata. Kae ʼe mole fakakinauʼi tātou e te ʼAtua ke tou tali ia te ʼamanaki ʼaia. Kae ʼe ʼui fēnei ʼi tana Folafola: “Ko ʼaē ʼe loto kiai ke ina toʼo noa te vai ʼo te maʼuli.”—Fakahā 22:17.

ʼEī, ʼe tonu ke tou fia “toʼo . . . te vai ʼo te maʼuli.” Koia ʼe mole tohi fakatomuʼa totatou kā haʼu. Ko te ʼu tonu ʼaē ʼe tou fai, tatatou aga pea mo tatatou ʼu gāue ʼe ʼi ai tona fua moʼoni ki totatou kā haʼu.