Te ʼu Fehuʼi ʼa Te Kau Lautohi

ʼE Toʼo Koa e Te ʼAtua Te Tamaliki Ke Natou Liliu Ko Ni ʼu ʼĀselo ʼi Selō?

Kā mate he tamasiʼi, ko te ʼu kaumeʼa ʼo te fāmili ʼaē ʼe lotomamahi ʼe lagi natou faiga ke natou fakalotofīmālieʼi ia te fāmili ʼaia ʼo natou ʼui fēnei: “Neʼe lagi ʼaoga ki te ʼAtua he tahi age ʼāselo ʼi selō.” ʼE ko he manatu fakapotopoto koa ʼaia?

Kanapaulā neʼe moʼoni te ʼui ʼaē ko te ʼAtua ʼe ina matehi te fānau heʼe ʼaoga kiā ia he tahi age ʼu ʼāselo ʼi selō, ko tona fakaʼuhiga ko te ʼAtua ʼe mole ina tokagaʼi ia te ʼu meʼa ʼaē ʼi te loto ʼo te hahaʼi, ʼe agakovi ʼaupitō. ʼE mole ko te manatu ʼaia ʼaē ʼe tuʼu ʼi te Tohi-Tapu. (Sopo 34:10) Ko he tamai ʼe loto manavaʼofa ʼe mole ina toʼo fakapunamaʼuli fēia anai he tamasiʼi mai tana ʼu mātuʼa ʼuhi pē ke hahaʼi age ia tona fāmili ʼoʼona. ʼE mole loto manavaʼofa lahi age leva ia te tagata iā Sehova, ʼaē ko tona kalitātē tāfito ʼe ko te ʼofa. (1 Soane 4:8) ʼUhi ko tona toe ʼofa lahi ʼaia, ʼe mole ina fai anai ia te taʼi aga fefeka ʼaia.

Kotou fai kiā koutou ia te fehuʼi ʼaenī: ‘ ʼE ʼaoga koa ki te ʼAtua ke hahaʼi age tana ʼu ʼāselo ʼi selō?’ ʼE ʼui ʼi te Tohi-Tapu ko te ʼu gāue fuli ʼaē ʼe fai e te ʼAtua ʼe lelei pea mo haohaoa. (Teutalonome 32:4) Ko tana fakatupu ia te ʼu toko lauʼi miliona ʼāselo ʼaē neʼe ko he gāue haohaoa, pea neʼe feʼauga lelei pē te lahi ʼaia ʼo te ʼu ʼāselo. (Taniela 7:10) Neʼe mole lelei koa ia te fakafuafua e te ʼAtua ia te lahi ʼa te ʼu ʼāselo ʼaē ʼe ʼaoga kiā te ia? Kailoa ia! ʼE mahino ia, ko te ʼAtua Māfimāfi ʼe mole feala ʼi he temi ke faihala. ʼE moʼoni, neʼe filifili e Sehova he ʼu hahaʼi ke natou liliu ko he ʼu ʼāselo ʼi tona Puleʼaga ʼaē ʼe ʼi selō, kae ko te hahaʼi ʼaia neʼe mole ko ni ʼu tamaliki ʼi te temi ʼaē neʼe natou mamate ai.—Fakahā 5:9, 10.

Ko te tahi tupuʼaga ʼo te mole toʼo e te ʼAtua ia te tamaliki mai te kele ke natou liliu ko ni ʼu ʼāselo ʼi selō, heʼe mole ʼalutahi ia mo tana fakatuʼutuʼu maʼa te ʼu tamaliki talu mai te kamataʼaga. ʼI te ʼōloto ʼo Eteni, neʼe ʼui fēnei e te ʼAtua kiā Atama mo Eva: “Kolua fānaunau, pea kolua liliu ʼo hahaʼi, pea kolua fakafonu te kele, pea kolua puleʼi.” (Senesi 1:28) Ko te fānau ʼe ko he meʼa ʼofa mai te ʼAtua, ʼe ʼaoga moʼo fakahoko tana fakatuʼutuʼu ʼi te kamataʼaga ʼaē ke fakafonu ia te kele ʼaki he foʼi fāmili faitotonu. Neʼe mole ina fakatuʼutuʼu ʼi he temi ke ina fakagata ia te maʼuli ʼo te fānau pea ke ina fakaliliu nātou ko he ʼu ʼāselo. ʼE ʼui ʼi te Tohi-Tapu ko te fānau ʼe ko “he tofiʼa mai iā Sehova.” (Pesalemo 127:3) Ko Sehova, te ʼAtua ʼofa, ʼe ina toe toʼo anai koa ia he meʼa ʼofa neʼe ina foaki ki te ʼu mātuʼa? Kailoa ia!

Kā mate fakatomuʼa he tamasiʼi, pea ʼe hoko ai he toe lotomamahi lahi ʼaupitō. Koteā te ʼamanaki ʼe maʼu e te ʼu mātuʼa ʼaē ʼe lotomamahi? ʼE fakapapau ʼi te Tohi-Tapu ko te ʼAtua ʼe ina fakatuʼuake anai te ʼu hahaʼi e toko lauʼi miliona tupu ʼi te palatiso ʼi te kele. Kotou fakakaukauʼi age ia te fānau, ʼaē kā fakatuʼuake ʼaki he ʼu sino haohaoa, ʼe natou toe fakatahi anai mo te hahaʼi ʼaē ʼe ʼoʼofa iā nātou. (Soane 5:28, 29) ʼE ko te finegalo ʼo te ʼAtua ke lahilahi ake te fānau, mo natou māʼuʼuli fiafia, pea mo natou ako ʼo ʼuhiga mo ia pea mo tana fakatuʼutuʼu ʼo ʼuhiga mo te kele. Koia, ko te fānau ʼaē kua mamate ʼe mole natou liliu ko ni ʼu ʼāselo ʼi selō, kae ʼe natou fakatalitali ki tonatou fakatuʼuake ʼi te palatiso ʼi te kele. ʼI te temi ʼaia, ʼaki te tokaga ʼofa ʼo totatou Tupuʼaga, ko nātou liliki pea mo nātou kua mātutuʼa ʼe natou fiafia anai ʼi te tauhi kiā Sehova ʼAtua ʼo talu ai.