Te ʼu Fehuʼi ʼa Te Kau Lautohi

ʼE talanoa ia te Tohi-Tapu ki “te tohi ʼa Sasale” pea mo “te tohi ʼo te ʼu Tau ʼa Sehova.” (Sos. 10:13; Fkau. 21:14) Ko te ʼu tohi ʼaia e lua ʼe mole kau ki te ʼu tohi moʼoni ʼo te Tohi-Tapu. Ko he ʼu tohi koa mai te ʼAtua ia te ʼu tohi ʼaia kua pupuli?

ʼE mole tonu ke tou ʼui, ko te ʼu tohi ʼaia e lua neʼe tohi ʼaki te takitaki ʼa te laumālie ʼo te ʼAtua pea ki muli age neʼe puli leva ia. Ko te kau faitohi ʼo te Tohi-Tapu ʼaē neʼe takitaki e te ʼAtua, ʼe natou talanoa ki te tahi age ʼu tohi. Ko ʼihi ʼi te ʼu tohi ʼaia, ʼe lagi kau ki te Tohi-Tapu kae neʼe mole toʼo ʼaki te ʼu higoa ʼaē kua tou māhani kiai ʼi te temi nei. Ohagē lā, iā 1 Fakamatala 29:29 ʼe talanoa ai ki “te ʼu folafola ʼa Samuele ia te tagata fai fakakikite,” “te ʼu folafola ʼa Natane ia te polofetā” pea mo “te ʼu folafola ʼa Kate ia te polofetā.” ʼE lagi kā fakatahiʼi ia te ʼu tohi ʼaia pea ʼe ko te ʼu tohi ʼaē ʼe tou ʼiloʼi, ko 1 mo 2 Samuele, peʼe lagi ko te tohi ʼa te Kau Tuʼi Fakamāu.

ʼI te tahi faʼahi, ko ʼihi tohi ʼe lagi fakaʼuhiga ki he ʼu tohi ʼe tatau mo te ʼu tohi ʼo te Tohi-Tapu kae ʼe mole ko he ʼu tohi moʼoni ia ʼo te Tohi-Tapu. ʼE feala ke tou toʼo ia te fakatā ʼaenī ʼo te ʼu tohi ʼāfea e fā: “Te tohi ʼo te ʼu gāue ʼi te temi ʼo te ʼu hau ʼo Suta,” “te Tohi ʼo te ʼu Hau ʼo Suta pea mo Iselaele,” “te Tohi ʼo te ʼu Hau ʼo Iselaele,” pea mo “te Tohi ʼo te ʼu Hau ʼo Iselaele mo Suta.” Logolā ko te ʼu higoa ʼaia ʼe hagē ʼe tatau mo te ʼu tohi ʼo te Tohi-Tapu ʼaē ʼe tou ʼiloʼi ko 1 Hau mo 2 Hau, kae ko te ʼu tohi ʼaia e fā neʼe mole ko he ʼu tohi neʼe tohi ʼaki te takitaki ʼa te laumālie ʼo te ʼAtua, peʼe ko te ʼu tohi ʼaia ʼe mole kau ia ki te ʼu tohi moʼoni ʼo te Tohi-Tapu. (1 Hau 14:29; 2 Fkma. 16:11; 20:34; 27:7) Neʼe lagi ko he ʼu tohi ʼi muʼa atu ʼo te temi ʼaē neʼe tohi ai e te polofetā ko Selemia pea mo Esitalasi ia te ʼu fakamatala ʼaē ʼe tou maʼu ʼi te Tohi-Tapu.

Ko ʼihi tagata faitohi ʼo te Tohi-Tapu neʼe natou talanoa pe neʼe lagi natou vakaʼi ia he ʼu hisitolia peʼe ko he ʼu tohi neʼe maʼu ʼi tonatou temi kae neʼe mole takitaki tona tohi e te laumālie ʼo te ʼAtua. Iā Esitele 10:2, ʼe talanoa ki “te Tohi ʼo te ʼu gāue ʼo te temi ʼo te ʼu hau ʼo Metia pea mo Pelesia.” ʼO toe fēia pē kiā Luka, moʼo teuteuʼi ia tana Evaselio, neʼe ina ‘toe kumi fakalelei ia meʼa fuli talu mai te kamataʼaga.’ Neʼe lagi ina kumi ki te ʼu tohi ʼaē neʼe fealagia kiai moʼo tohi ia te hōloga ʼo Sesu ʼaē ʼe tou maʼu ʼi tana Evaselio. (Luka 1:3; 3:23-38) Logolā ko te ʼu fakamatala ʼaē neʼe vakaʼi e Luka neʼe mole haʼu ia mai te ʼAtua, kae ko tana Evaselio neʼe ina tohi ʼaki te takitaki ʼa te ʼAtua. Pea ko te Evaselio ʼaia ʼe kei ʼaoga pē kiā tātou.

ʼO ʼuhiga leva mo te ʼu tohi e lua ʼaē neʼe lagaʼi ʼi te kamataʼaga—ia “te tohi ʼa Sasale” pea mo “te tohi ʼo te ʼu Tau ʼa Sehova”—neʼe hagē ia ko he ʼu tohi neʼe kua maʼu ʼi te temi muʼa kae neʼe mole takitaki tona tohi e te ʼAtua. Koia ʼaē neʼe mole puipui ai e Sehova ia te ʼu tohi ʼaia. ʼE ʼui e te ʼu tagata sivi Tohi-Tapu, ʼaki te ʼu fakamatala Fakatohi-tapu ʼo ʼuhiga mo te ʼu tohi ʼaia e lua, neʼe lagi ko he ʼu tohi fakatuketuke peʼe ko he ʼu hiva ʼo ʼuhiga mo he ʼu tau ʼa Iselaele mo tona ʼu fili. (2 Sam. 1:17-27) ʼE ʼui ʼi te tohi encyclopédie ʼo ʼuhiga mo te Tohi-Tapu, ko te ʼu fakamatala ʼi te ʼu tohi ʼaia neʼe lagi ko “te tānakiʼaga ʼo te ʼu tohi fakatuketuke pea mo te ʼu hiva ʼa te kau fai hiva ʼo te Iselaele ʼo te temi muʼa.” Māʼiapē lā mo ʼihi tagata ʼaē neʼe fakaʼaogaʼi e te ʼAtua ko he ʼu polofetā moʼo fai ia he ʼu fakamatala, neʼe mole takitaki nātou e Sehova peʼe fakaʼaogaʼi ke kau ki te Tohi-Tapu ʼaē ʼe “ ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa” ʼi totatou temi.—2 Tim. 3:16; 2 Fkma. 9:29; 12:15; 13:22.

Logolā ko ʼihi tohi neʼe talanoa kiai ia te Tohi-Tapu pea neʼe ko he ʼu tohi ʼaoga, kae ʼe mole fakaʼuhiga leva ke tou ʼui ko he ʼu tohi mai te ʼAtua. Kae neʼe puipui e Sehova ʼAtua ia te ʼu tohi fuli ʼaē ʼe maʼu ai ia “te folafola ʼo totatou ʼAtua,” pea ko te ʼu tohi fuli ʼaia “ ʼe tologa anai ia ʼo aʼu ki he ʼu temi ʼe mole ʼiloʼi hona gataʼaga.” (Isa. 40:8) ʼEī, ko te ʼu tohi ʼaē neʼe filifili e Sehova ke kau ki te ʼu tohi e 66 ʼo te Tohi-Tapu, ʼe ko ia pē ʼaē ʼe ʼaoga kiā tātou ke tou ‘faiva ai pea mo kātoa ki te ʼu gāue lelei fuli pē.’—2 Tim. 3:16, 17.