Neʼe ‘Lavelavea Ia Te Tagata Kaugana ʼa Sehova Maʼa Tatatou ʼu Talagataʼa’

“Neʼe lavelavea ia maʼa tatatou ʼu talagataʼa; neʼe fakavolu ia maʼa tatatou ʼu hala. . . . ʼUhi ko tona ʼu mataʼi lavea neʼe tou maʼu ai ia te faitoʼo.”—ISA. 53:5.

 1. Koteā ʼaē ʼe tonu ke tou manatuʼi mokā tou kau ki te ʼAho Fakamanatu, pea ko te lea fakapolofetā fea ʼaē kā tokoni mai anai ke tou fai ia te faʼahi ʼaia?

 ʼE TOU kau ki te ʼAho Fakamanatu moʼo fakamanatuʼi ia te mate ʼo Kilisito pea mo fakamanatuʼi ia te ʼu meʼa fuli ʼaē neʼe fakahoko e tona mate pea mo tona fakatuʼuake. ʼE fakamanatuʼi mai e te ʼAho Fakamanatu ia te lagavaka ʼo te pule faʼitaliha ʼa Sehova, te fakatapuhā ʼo tona huafa, pea mo te fakahoko ʼo tana fakatuʼutuʼu, ʼo kau ai ia te haofaki ʼo te mālamanei. ʼE lagi mole ʼi ai he tahi lea fakapolofetā ʼi te Tohi-Tapu ʼe ina fakamatala fakalelei ia te sākilifisio ʼo Kilisito pea mo te ʼu meʼa ʼaē neʼe ina fakahoko ohagē ko tona fakamatala mai e te lea fakapolofetā ʼa Isaia 53:3-12. Neʼe fakakikite e Isaia te ʼu mamahi ʼo te Tagata Kaugana pea mo fakahāhā mai te ʼu agaaga ʼo te mate ʼo Kilisito pea mo te ʼu tapuakina ʼaē tupu mai tona mate ʼaē kā maʼu anai e tona ʼu tehina fakanofo pea mo tana “tahi ʼu ovi.”—Soa. 10:16.

 2. Koteā ʼaē ʼe fakamoʼoni kiai ia te lea fakapolofetā ʼa Isaia, pea ʼe malave feafeaʼi anai kiā tātou?

² Iā sēkulō e fitu ʼi muʼa ʼo te tupu ʼa Sesu ʼi te kele, neʼe takitaki e Sehova ia Isaia ke ina fakakikite, ko Tana Tagata Kaugana ʼaē neʼe ina fili ʼe agatonu anai logolā te ʼu ʼahiʼahi faigataʼa ʼaē kā tau mo ia. Ko te tohi ʼo te lea fakapolofetā ʼaia, ʼe fakamoʼoni ai ki te falala kātoa ʼaē ʼa Sehova ki te agatonu ʼo tona ʼAlo. ʼI tatatou vakavakaʼi ia te lea fakapolofetā ʼaia, ʼe fonu anai ʼotatou loto ʼi te fiafia pea ʼe mālohi ai anai ia tatatou tui.

Neʼe “Fehiʼaʼinaʼi” Pea Neʼe “Meʼa Noaʼi”

 3. He koʼē neʼe tonu ki te kau Sutea ke natou fai he fakatalitali lelei kiā Sesu, kae neʼe feafeaʼi ia tanatou fakatalitali ʼaē ki ai?

³ Lau ia Isaia 53:3. Kotou fakakaukauʼi age muʼa pe neʼe feafeaʼi ki te loto ʼo te ʼAlo ʼulutokotahi ʼo te ʼAtua ia tana sākilifisioʼi ʼaē ia tana fiafia ʼi te tauhi iā tafa ʼo tana Tamai kae haʼu ki te kele ʼo foaki fakasākilifisio ia tona maʼuli moʼo haofaki ia te mālamanei mai te agahala pea mo te mate! (Filp. 2:5-8) Ko tana sākilifisio neʼe fakatuʼutuʼu moʼo fakamolemole moʼoni ia te ʼu agahala, ʼaē neʼe fakakikite e te ʼu sākilifisio manu ʼi te Lao ʼa Moisese. (Hep. 10:1-4) Neʼe mole tonu koa lā ke tali ia ia pea mo fakaʼapaʼapaʼi, tāfito lā e te kau Sutea, ʼaē neʼe natou fakatalitali ki te Mēsia ʼaē neʼe fakapapauʼi mai? (Soa. 6:14) Kae ko Kilisito neʼe “fehiʼaʼinaʼi” e te kau Sutea, pea neʼe natou ‘meʼa noaʼi ia ia,’ ohagē ko tona fakakikite e Isaia. Neʼe tohi fēnei e te ʼapositolo ko Soane: “Neʼe haʼu ki tona ʼapi totonu, kae neʼe mole tali ia ia e tana hahaʼi totonu.” (Soa. 1:11) Neʼe ʼui fēnei e te ʼapositolo ko Petelo ki te kau Sutea: “Ko te ʼAtua ʼo tatatou ʼu kui neʼe ina fakakolōliaʼi tana Tagata Kaugana, ia Sesu, ʼaē ia koutou, neʼe kotou momoli pea mo fakafisi ki ai iā muʼa ʼo Pilato, ʼaē neʼe kua ina fakatuʼutuʼu ia ke ina fakaʼāteaina. ʼEī, neʼe kotou fakafisi ki te māʼoniʼoni pea mo faitotonu ʼaia.”—Gāue 3:13, 14.

 4. Neʼe ʼiloʼi feafeaʼi e Sesu ia te mahaki?

⁴ Neʼe toe fakakikite e Isaia ko Sesu neʼe fakatuʼutuʼu ke ina “ ʼiloʼi te mahaki.” Lolotoga tana minisitelio, ʼi ʼihi lakaga neʼe gaʼegaʼe moʼoni ia Sesu, kae ʼe mole maʼu he fakamatala ʼe hā mai ai neʼe mahaki. (Soa. 4:6) Kae neʼe ina ʼiloʼi te mahaki ʼaki ia nātou ʼaē neʼe fai fakamafola ki ai. Neʼe manavaʼofa kiā nātou pea mo ina fakamālōlō ia te tokolahi. (Mko. 1:32-34) Neʼe toe fakahoko e Sesu ia te lea fakapolofetā ʼaē ʼe ʼui fēnei ai: “ ʼE mahino ia neʼe ina fua totatou ʼu mahaki; pea ki ʼotatou mamahi, neʼe ina ʼamo.”—Isa. 53:4a; Mat. 8:16, 17.

 ʼE Hagē Neʼe “Fakatūʼā e Te ʼAtua”

 5. Neʼe koteā ia te manatu ʼa te kau Sutea tokolahi ʼo ʼuhiga mo te mate ʼa Sesu, pea he koʼē neʼe toe hilifaki ia te faʼahi ʼaia ki tona ʼu mamahi?

⁵ Lau ia Isaia 53:4b. Tokolahi te hahaʼi ʼi te temi ʼo Sesu neʼe mole natou mahino ki te tupuʼaga ʼo tona ʼu mamahi pea mo tona mate. ʼI tanatou ia manatu neʼe ko hona fakatūʼā e te ʼAtua, neʼe ina tauteaʼi ia ia ʼaki he mahaki fakalialia. (Mat. 27:38-44) Neʼe tukugākoviʼi e te kau Sutea ia Sesu ʼe fasituʼu. (Mko. 14:61-64; Soa. 10:33) ʼE mahino ia, ko Sesu neʼe mole ko he tagata agahala pea neʼe mole fasituʼu ia. Kae ʼi tona ʼofa lahi ʼaē ki tana Tamai, ko tana ʼiloʼi ʼaē neʼe fakatūʼā ia ia ki te mate ohagē ko he tahi neʼe fasituʼu, ko he faʼahi neʼe toe hilifaki ki tona mamahi ʼi tona ʼuhiga Tagata Kaugana ʼa Sehova. Kae neʼe ina tali lelei pē ke ina fai ia te finegalo ʼo Sehova.—Mat. 26:39.

6, 7. ʼE fakaʼuhiga feafeaʼi te “malamalaki” e Sehova ia tana Tagata Kaugana agatonu, pea he koʼē ko he faʼahi neʼe “fiafia” ai te ʼAtua?

⁶ ʼE feala ke tou mahino pe koʼē neʼe ʼui e te lea fakapolofetā ʼa Isaia ʼe lau anai ko Kilisito neʼe “fakatūʼā e te ʼAtua” kae ʼe lagi tou toe punamaʼuli foki ki te toe ʼui e te lea fakapolofetā: “Neʼe fiafia ia Sehova ʼi tona malamalaki.” (Isa. 53:10) “Koʼenī! Taku tagata kaugana. . . . Ko ia ʼaē neʼe au fili kua fiafia ai toku laumālie,” neʼe feafeaʼi ʼapē kiā Sehova hana ‘fiafia ʼi te malamalaki ʼo ia’? (Isa. 42:1) ʼE fakaʼuhiga feafeaʼi ia te fiafia ʼa Sehova ʼi te fai ʼo te faʼahi ʼaia?

⁷ Ke tou mahino ki te koga ʼaia ʼo te lea fakapolofetā, ʼe tonu ke tou manatuʼi ʼi te fakafifihi ʼa Satana ki te pule faʼitaliha ʼa Sehova, neʼe ina fakafihiʼi ia te agatonu ʼo te ʼu kaugana fuli ʼa te ʼAtua, ia nātou ʼaē ʼi selō pea mo nātou ʼaē ʼi te kele. (Sopo 1:9-11; 2:3-5) Ko Sesu, ʼi tana nofo agatonu ʼo aʼu ki tona mate, neʼe ina foaki ia te tali kātoa ki te fakafifihi ʼa Satana. Koia lā ʼaē logolā neʼe tuku e Sehova ke matehi ia Kilisito e tona ʼu fili, kae ʼe mahino ia neʼe lotomamahi ʼaupitō ia Sehova ʼi tana sio ifo ki te matehi ʼo tana Tagata Kaugana ʼaē neʼe ina fili. Kae ʼi tana sio ifo ki te nofo agatonu ʼaē ʼo tona ʼAlo, neʼe fakatupu fiafia ʼaupitō kiā Sehova. (Taag. 27:11) Tahi ʼaē, neʼe fiafia ʼaupitō ia Sehova ʼi tana ʼiloʼi ia te ʼu tapuakina ʼaē kā maʼu anai e te hahaʼi fakahemala ʼaki te mate ʼo tona ʼAlo.—Luka 15:7.

Neʼe “Lavelavea Ia Maʼa Tatatou ʼu Talagataʼa”

8, 9. (a) Neʼe feafeaʼi ia te ‘lavelavea ʼa Sesu maʼa tatatou ʼu talagataʼa’? (b) Neʼe fakamoʼoni feafeaʼi ia Petelo ki te faʼahi ʼaia?

⁸ Lau ia Isaia 53:6. Ohagē ko he ʼu ovi kua hehē, ko te hahaʼi agahala ʼe natou hehē ʼi te kumi ʼo honatou ʼāteaina mai te mahaki pea mo te mate ʼaē neʼe maʼu mai iā Atama. (1 Pet. 2:25) ʼI te kua heʼe haohaoa ʼa te mālamanei, ʼe mole he tahi ʼi te hōloga ʼo Atama neʼe feala ke ina totogi ia te meʼa ʼaē neʼe pulihi e Atama. (Pes. 49:7) Kae ʼi te ʼofa lahi ʼo Sehova, neʼe ina haga ‘ ʼo fai ko te hala ʼa tātou fuli ke felāveʼi mo ia,’ tona ʼAlo ʼofaina pea mo Tagata Kaugana ʼaē neʼe ina fili. ʼI tana tali lelei ke “lavelavea ia maʼa tatatou ʼu talagataʼa” pea ke “fakavolu ia maʼa tatatou ʼu hala,” neʼe ʼamo e Kilisito tatatou ʼu agahala ʼi te pou fakamamahi pea mo mate maʼa tātou.

⁹ Neʼe tohi fēnei e te ʼapositolo ko Petelo: “Ko te ala ʼaia neʼe pāuiʼi koutou kiai, koteʼuhi neʼe mamahi foki ia Kilisito maʼa koutou, ʼo ina tuku atu kiā koutou he faʼifaʼitaki ke kotou mulimuli lelei ki tona ʼu tapugā vaʼe. Neʼe ina fua tatatou ʼu agahala ʼi tona sino ʼi te pou fakamamahi, ke feala ai he fakagata ʼo te ʼu agahala pea ke tou maʼuli maʼa te faitotonu.” ʼOsi ʼaia, neʼe toe talanoa ki te lea fakapolofetā ʼa Iselaele, neʼe toe ʼui fēnei e Petelo: “Pea ‘ ʼaki tona ʼu mataʼi lavea kua maʼu ai tokotou faitoʼo.’ ” (1 Pet. 2:21, 24; Isa. 53:5) Neʼe ʼavahi ai te ala maʼa te kau agahala ke natou fakatokatoka mo te ʼAtua, ohagē ko tona ʼui e Petelo ki muli age: “Ko  Kilisito totonu neʼe mate tuʼa tahi pē ke talu ai ʼo ʼuhiga mo te ʼu agahala, ko he tagata faitotonu maʼa he kau heʼe faitotonu, ke feala hana taki koutou ki te ʼAtua.”—1 Pet. 3:18.

“Ohagē Ko He ʼAkeno Neʼe Taki Ki Te Tāmateʼiʼaga Manu”

10. (a) Koteā ʼaē neʼe ʼui e Soane Patita ʼo ʼuhiga mo Sesu? (b) He koʼē ʼe matatonu ia te ʼu palalau ʼaē neʼe fai e Soane?

¹⁰ Lau ia Isaia 53:7, 8. ʼI te temi ʼaē neʼe sio ai ia Soane Patita ki te fakaovi age ʼa Sesu kiā te ia, neʼe ina ʼui fēnei: “Koʼenī te ʼAkeno ʼa te ʼAtua ʼaē ʼe ina toʼo te agahala ʼo te mālamanei!” (Soa. 1:29) ʼI tana talanoa kiā Sesu ohagē ko he ʼAkeno, neʼe lagi manatuʼi e Soane ia te ʼu palalau ʼaenī ʼa Isaia: “Ohagē ko he ʼakeno neʼe taki ki te tāmateʼiʼaga manu.” (Isa. 53:7) Neʼe fakakikite fēnei e Isaia: “Neʼe ina folahi tona nefesi ʼi te mate.” (Isa. 53:12) Tahi ʼaē, ʼi te pō ʼaē neʼe fai ai e Sesu te Fakamanatu ʼo tona mate, neʼe ina foaki ia te ʼipu vino ki te toko 11 kau ʼapositolo agatonu pea mo ʼui fēnei māʼana: “Ko te meʼa ʼaenī ʼe ina fakatātā toku ‘taʼataʼa ʼo te fuakava,’ ʼaē ʼe tonu ke liligi maʼa te tokolahi ki te fakamolemole ʼo te ʼu agahala.”—Mat. 26:28.

11, 12. (a) ʼO ʼuhiga mo te sākilifisio ʼo Kilisito, koteā ʼaē ʼe fakatā ʼi te tali lelei ʼaē e Isaake ke momoli ia ia? (b) Koteā ʼaē ʼe tonu ke tou manatuʼi tuʼumaʼu ʼo ʼuhiga mo Sehova ia te Apalahamo Lahi mokā tou kau ki te ʼAho Fakamanatu?

¹¹ Ohagē ko Isaake, neʼe tali lelei e Sesu ke ina momoli fakasākilifisio ia tona maʼuli ʼi te ʼaletale ʼo te finegalo ʼo Sehova. (Sen. 22:1, 2, 9-13; Hep. 10:5-10) Logolā neʼe tali lelei e Isaake ke sākilifisioʼi ia ia, kae neʼe ko Apalahamo ʼaē neʼe ina fakatuʼutuʼu ke ina fai ia te sākilifisio ʼaia. (Hep. 11:17) ʼO toe fēia pē, neʼe tali lelei e Sesu ke mate, kae neʼe ko Sehova ʼaē neʼe ina Fakatuʼutuʼu te totogi. Ko te sākilifisio ʼo tona ʼAlo neʼe ko he fakahā ʼaia ʼo te ʼofa lahi ʼo te ʼAtua ki te mālamanei.

¹² Neʼe ʼui totonu pē e Sesu: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soa. 3:16) Neʼe tohi fēnei e te ʼapositolo ko Paulo: “Ko te ʼAtua ʼe ina fakahā totonu mai kiā tātou tona ʼofa ʼi te faʼahi ʼaia, ʼi te temi ʼaē neʼe kei tou agahala ai, neʼe mate ia Kilisito maʼa tātou.” (Loma 5:8) Koia, ʼi tatatou fakaʼapaʼapa kiā Kilisito ʼaki te fakamanatu ʼo tona mate, ʼe tonu ke tou manatuʼi tuʼumaʼu neʼe ko Sehova ia te Apalahamo Lahi ʼaē neʼe ina fai ia te fakatuʼutuʼu ʼo te sākilifisio. ʼE tou kau ki te ʼAho Fakamanatu moʼona fakavikiviki.

ʼE Foaki e Te Tagata Kaugana “Te Faitotonu Ki Te Tokolahi”

13, 14. Neʼe foaki feafeaʼi e te Tagata Kaugana ʼa Sehova ia “te faitotonu ki te tokolahi”?

¹³ Lau ia Isaia 53:11, 12. ʼO ʼuhiga mo tana Tagata Kaugana ʼaē neʼe ina fili, neʼe ʼui fēnei e Sehova: “Ko te tagata faitotonu, ia taku tagata kaugana, ʼe ina foaki anai te faitotonu ki te tokolahi.” ʼO feafeaʼi? Ko te fakaʼosi ʼo te vaega 12 ʼe ina foaki mai ia te fakamahino ki te tali ʼo te fehuʼi ʼaia. “[Ko te Tagata Kaugana] neʼe ina hūfaki te kau talagataʼa.” Ko te hōloga fuli ʼo Atama neʼe natou tutupu agahala ake, ko te “kau talagataʼa,” pea koia neʼe natou maʼu ai ia “te totogi ʼaē ʼe foaki e te agahala,” ʼaē ko te mate. (Loma 5:12; 6:23) ʼE maʼuhiga ke fakatokatoka ia Sehova pea mo te tagata agahala. Ko te lea fakapolofetā ʼa Isaia kāpite 53 ʼe taulekaleka ai ia te talanoa ki te faʼahi ʼaia, pe neʼe ‘hūfakiʼi’ feafeaʼi e Sesu ia te hahaʼi agahala, ʼo ʼui fēnei: “Ko te tautea ʼaē neʼe tonu ke ʼaoga ki totatou tokalelei neʼe fai kiā te ia, pea ʼuhi ko tona ʼu mataʼi lavea neʼe tou maʼu ai ia te faitoʼo.”—Isa. 53:5.

¹⁴ ʼI tana ʼamo ia tatatou ʼu agahala pea mo mate maʼa tātou, neʼe foaki mai e Kilisito “te faitotonu ki te tokolahi.” Neʼe tohi fēnei e Paulo: “Neʼe manatu ia te ʼAtua ʼe lelei te fakatuʼu ia meʼa fuli iā ia [Kilisito], pea, ʼaki ia ia, ke toe fakatokatoka te ʼu meʼa fuli ʼaē mo ia totonu, ʼo ina fakahoko te tokalelei ʼaki te taʼataʼa ʼaē neʼe ina liligi ʼi te pou fakamamahi, ʼo mole ina lauʼia peʼe ko te ʼu meʼa ʼo te kele peʼe ko te ʼu meʼa ʼi te lagi.”—Kol. 1:19, 20.

15. (a) ʼE fakaʼuhiga kiā ai ia “te ʼu meʼa ʼi te lagi” ʼaē neʼe talanoa kiai ia Paulo? (b) Ko ai pē ʼaē ʼe kua foaki age ki ai ke natou kai te pane pea mo ʼinu te vino ʼi te ʼAho Fakamanatu, pea koteā tona tupuʼaga?

¹⁵ Ko “te ʼu meʼa ʼi te lagi” ʼaē kua fakatokatoka mo Sehova ʼaki ia te taʼataʼa ʼaē neʼe liligi e Kilisito, ʼe ko te kau Kilisitiano fakanofo, ʼaē neʼe pāui ke kaugā hau mo Kilisito ʼi selō. Ko te kau Kilisitiano ʼaē ʼe natou “kau ki te pāui ʼaē mai lagi” ʼe tala nātou ko ‘te kau faitotonu ki te maʼuli.’ (Hep. 3:1; Loma 5:1, 18) Pea kua vaheʼi nātou e Sehova ko tona ʼu foha fakalaumālie. ʼE fakamoʼoni ia te  laumālie māʼoniʼoni ʼe natou “kaugā maʼu tofiʼa fakatahi pea mo Kilisito,” kua pāui ia nātou ke natou liliu ko he ʼu hau pea mo pelepitelō ʼi tona Puleʼaga ʼi selō. (Loma 8:15-17; Fakh. 5:9, 10) ʼE natou kau ʼi te Iselaele fakalaumālie, “te Iselaele ʼo te ʼAtua,” pea kua natou kau ki te “fuakava foʼou.” (Sel. 31:31-34; Kal. 6:16) ʼI tanatou kau ki te fuakava foʼou, kua foaki age kiā nātou ke natou kai te pane pea mo ʼinu te vino ʼi te ʼAho Fakamanatu, ʼaē neʼe ʼui fēnei e Sesu: “Ko te ʼipu ʼaenī ʼe ina fakatātā te fuakava foʼou ʼo ʼuhiga mo toku taʼataʼa, ʼaē ʼe tonu ke liligi maʼa koutou.”—Luka 22:20.

16. Koteā “te ʼu meʼa ʼo te kele,” pea ʼe fakaʼuhiga feafeaʼi ia te foaki ʼaē kiā nātou te faitotonu iā muʼa ʼo Sehova?

¹⁶ Ko “te ʼu meʼa ʼo te kele” ʼe ko te tahi ʼu ovi ʼa Kilisito, ʼaē ʼe natou maʼu ia te ʼamanaki ke natou māʼuʼuli ʼo heʼegata ʼi te kele. Kiā nātou ʼaia, ʼe toe foaki foki e te Tagata Kaugana ʼaē neʼe fili e Sehova ia te faitotonu iā muʼa ʼo Sehova. ʼUhi ʼe natou tui ki te sākilifisio faitotonu ʼa Kilisito pea kua natou “fō tonatou ʼu kofu loloa pea mo natou fakahihina ʼi te taʼataʼa ʼo te ʼAkeno,” kua tala nātou e Sehova ʼe natou faitotonu, mole ko hona ʼu foha fakalaumālie, kae ko tona ʼu kaumeʼa, ʼo ina foaki kiā nātou ia te ʼamanaki taulekaleka ʼaē ke natou māʼuʼuli ʼi “te mamahi lahi.” (Fakh. 7:9, 10, 14; Sake 2:23) ʼE mole natou kau ki te fuakava foʼou pea ʼe mole natou maʼu ia te ʼamanaki ke natou māʼuʼuli ʼi te lagi, koia ʼaē ko te tahi ʼu ovi ʼaia ʼe mole natou kai te pane pea mo ʼinu te vino ʼi te ʼAho Fakamanatu kae ʼe natou lagolago fakaʼapaʼapa ki te toʼotoʼoga ʼaia.

ʼE Fai Ia Te Fakafetaʼi Lahi Kiā Sehova Pea Mo Tana Tagata Kaugana ʼAē ʼe Fiafia Ai!

17. ʼE tokoni feafeaʼi mai ia te ako ʼo te ʼu lea fakapolofetā ʼa Isaia ʼaē ʼe talanoa tāfito ki te Tagata Kaugana ke tou teuteuʼi totatou ʼatamai ki te ʼAho Fakamanatu?

¹⁷ Ko te ako ʼo te ʼu lea fakapolofetā ʼa Isaia ʼaē ʼe talanoa tāfito ki te Tagata Kaugana, ʼe ko he fakatuʼutuʼu lelei moʼo teuteuʼi ia totatou ʼatamai ki te ʼAho Fakamanatu ʼo te mate ʼo Kilisito. ʼE ina fakafealagia mai ke tou “sioʼi tuʼumaʼu ia . . . te Fakafofoga Tāfito pea ina Fakakātoa tatatou tui.” (Hep. 12:2) Kua tou mahino ko te ʼAlo ʼo te ʼAtua neʼe mole agatuʼu. ʼO mole hagē ia ko Satana, neʼe fiafia ia ʼi tona akoʼi e Sehova, ʼo ina fakamoʼoni ko Sehova te Tuʼi ʼAliki. Neʼe tou vakaʼi lolotoga te minisitelio ʼa Sesu, neʼe manavaʼofa ia ki te hahaʼi ʼaē neʼe fai fakamafola ki ai, ʼo ina fakamālōlō ia te tokolahi iā nātou ʼi te faʼahi fakasino pea mo te faʼahi fakalaumālie. Neʼe ina toe fakahā foki ia te gāue ʼaē kā ina fai anai ʼi tona tuʼulaga Hau Fakamēsia ʼi te mālama foʼou mokā “ ʼe ina fakatuʼu te faitotonu ʼi te kele.” (Isa. 42:4) Ko te faʼafai ʼaē neʼe ina fakahā ʼi tana fakamafola ia te Puleʼaga, ko “he mālama ʼo te ʼu puleʼaga,” ʼe ko he fakamanatu ki tana ʼu tisipulo ke natou faʼafai ʼo fakamafola ia te logo lelei ʼo te Puleʼaga ʼi te kele kātoa.—Isa. 42:6.

18. He koʼē ko te lea fakapolofetā ʼa Isaia ʼe ina fakafonu totatou loto ʼaki he loto fakafetaʼi kiā Sehova pea mo tana Tagata Kaugana agatonu?

¹⁸ Ko te lea fakapolofetā ʼa Isaia ʼe ina toe hikihiki tatatou mahino ki te sākilifisio lahi ʼaē neʼe fai e Sehova ʼi tana fekauʼi mai ki te kele ia tona ʼAlo ʼofaina ke haʼu ʼo mamahi pea mo mate maʼa tātou. Neʼe lotomamahi ia Sehova ʼi tana sio ifo ki te ʼu mamahi ʼaē neʼe tau mo tona ʼAlo, kae neʼe fiafia ia ʼi tana sio ki te agatonu kātoa ʼaē ʼa Sesu ʼo aʼu ki tana mate. ʼE tonu ke tou kau ki te fiafia ʼo Sehova, ʼo tou fakamoʼoni fuli ko Sesu kua ina foaki ia te fakamoʼoni ko Satana ʼe gutuloi pea neʼe ina fakatapuhā ia te huafa ʼo Sehova, ʼo ina fakalakatonuʼi ai te faitotonu ʼo Tona pule faʼitaliha. Tahi ʼaē meʼa, kua toʼo e Kilisito ia tatatou ʼu agahala pea neʼe mate maʼa tātou. ʼAki tana fai ia te faʼahi ʼaia, neʼe ina fakafealagia ki te kiʼi faga ovi ʼo tona ʼu tehina fakanofo pea mo te tahi ʼu ovi ke natou faitotonu iā muʼa ʼo Sehova. Kā tou fakatahitahi ʼi te ʼAho Fakamanatu, ʼofa pē ke tou fakafonu ʼotatou loto ʼaki he loto fakafetaʼi kiā Sehova pea mo tana Tagata Kaugana agatonu.

Moʼo Fakamanatu

• ʼE fakaʼuhiga feafeaʼi ko Sehova ʼe ‘fiafia’ ʼi te “malamalaki” ʼo tona ʼAlo?

• Neʼe feafeaʼi ia te ‘lavelavea ʼa Sesu maʼa tatatou ʼu talagataʼa’?

• ʼE feafeaʼi te ‘foaki e te Tagata Kaugana ia te faitotonu ki te tokolahi’?

• ʼE teuteuʼi feafeaʼi ia tokotou loto pea mo tokotou ʼatamai ki te ʼAho Fakamanatu e takotou ako ia te ʼu lea fakapolofetā ʼo ʼuhiga mo te Tagata Kaugana?

[ʼU fehuʼi ʼo te ako]

[Paki ʼo te pasina 26]

“Neʼe fehiʼaʼinaʼi, pea neʼe meʼa noaʼi”