Ko Halamaketone—Te Tau ʼa Te ʼAtua ʼAē Kā Ina Fakagata Anai Te ʼu Tau Fuli

“Maʼa te hahaʼi Inuit, ko te tau ʼe ko he fakatuʼutuʼu fakamataku moʼo matehi he tahi iā nātou; koia ʼaē ʼe faigataʼa ai kiā nātou hanatou mahino ki te tupuʼaga ʼo te tau pea ʼe ko he meʼa fakamataku ia, pea ʼe mole he kupu ʼi tanatou lea moʼo talanoa kiai.”—KO TE FAKAMATALA NEʼE FAI E TE TAGATA NOLOVESIA KO FRIDTJOF NANSEN ʼI TE TAʼU 1888 ʼO ʼUHIGA MO TE HAHAʼI INUIT ʼO GROENLAND.

KO AI anai ʼe mole fiafia ʼi hana maʼuli ʼi he mālama ʼe ko te tau neʼe ‘faigataʼa hata mahino kiai pea neʼe ko he meʼa fakamataku’? Ko ai ʼaē ʼe mole fakaʼamu ki he mālama ʼe mole toe fakaʼaogaʼi ai anai ia te kupu tau? ʼE lagi faigataʼa hata falala ki he mālama fēia, tāfito lā mo kapau neʼe tou falala ke fakatuʼu ia te taʼi mālama ʼaia e ni ʼu tagata.

Kae ʼi te lea fakapolofetā ʼa Isaia, ʼe fakapapau mai e te ʼAtua ʼe ina fakatuʼu anai he mālama fēia: “ ʼE tonu anai ke natou tuki tanatou ʼu heletā ke liliu ko he ʼu huo laga kele pea mo tanatou ʼu tao ke liliu ko he ʼu pipi moʼo pakimaga. Pea ʼe mole hiki anai he heletā e he fenua ki he tahi fenua, pea ʼe mole natou toe ako anai te tau.”—Isaia 2:4.

ʼE mahino ia ke hoko te fakapapau ʼaia, ʼe tonu anai ke fai ia he toe fetogi lahi e te mālamanei mo tana kau sōlia e toko 20 miliona ʼaē ʼe gāue nei pea mo te ʼu tau e 20 ʼaē ʼe lolotoga hoko nei. Kae ʼe mole tou punamaʼuli, ko te ʼAtua māfimāfi ko Sehova ʼe tonu ke tokaga mai ki te ʼu gāue ʼaē ʼe fai e te  tagata. Ko te gāue ʼaia kā fai e Sehova ʼe iku anai ki te meʼa ʼaē ʼe fakahigoaʼi ʼi te Tohi-Tapu ko Halamaketone.—Fakahā 16:14, 16.

Logolā ko te kupu “Halamaketone” ʼi te ʼu taʼu ʼaenī kua hili neʼe fakaʼuhiga ki he tau fakanukeleʼea fakamālamanei, kae ʼe fakahā ʼi te tikisionalio ia tona fakaʼuhiga ʼuluaki ʼaenī: “Ko he koga meʼa ʼe fai ai ia te tau lahi pea mo fakaʼosi ʼa te ʼu mālohi ʼo te agalelei pea mo te agakovi.” ʼE mālo anai koa te lelei ʼi te kovi, peʼe ko he tau ia ʼe mole moʼoni?

Tou tokagaʼi ʼi te Tohi-Tapu ʼe talanoa liuliuga ai ki te fakaʼosi ʼo te agakovi. ʼE fakakikite fēnei e te tagata fai pesalemo: “ ʼE fakaʼauha anai te kau agahala ʼi te kele, pea ʼe puli anai te kau agakovi.” (Pesalemo 104:35) ʼE ʼui ʼi te tohi ʼo Tāʼaga Lea: “Ko te hahaʼi agatonu ʼe ko nātou ʼaia ʼaē kā natou nonofo anai ʼi te kele, pea ko nātou ʼaē ʼe mole hanatou lakahala ʼe ko nātou ʼaia ʼaē kā natou nonofo ai anai. ʼO ʼuhiga mo te hahaʼi agakovi, ʼe toʼo anai ia nātou ʼi te kele; pea ki te hahaʼi kākā ʼe taʼaki anai nātou mai ai.”—Tāʼaga Lea 2:21, 22.

ʼE toe fakahā lelei foki ʼi te Tohi-Tapu, ʼe faiga tuʼumaʼu pē anai te kau agakovi ke natou pule ʼaki te agakovi; koia kua ʼaoga ai ke fai he tau fakaʼosi e te ʼAtua moʼo pulihi kātoa ia te agakovi, ʼo kau ai te tau. (Pesalemo 2:2) Pea ko te Tohi-Tapu ʼe ina fakahigoaʼi te fihi lahi ʼaia e tahi, ko Halamaketone, ʼaē ʼe ʼi ai tona ʼuhiga lahi.

Te ʼu Tau Neʼe Fai ʼi Te Temi Muʼa ʼe Ovi Ki Mekito

Ko te kupu “Halamaketone” ko tona fakaʼuhiga “Moʼuga ʼo Mekito.” Neʼe hoko te ʼu tau maʼuhiga ʼi te kolo ʼāfea ʼo Mekito mo tona Malaʼe ʼo Siseleele. ʼI te tohi The Battles of Armageddon, ʼe ʼui fēnei ai e te tagata fai hisitolia ko Eric H. Cline: “ ʼI te lolotoga ʼo te hisitolia, ko Mekito pea mo te Malaʼe ʼo Siseleele neʼe ko he ʼu koga meʼa neʼe fakahāhā faiva ai peʼe ko te hahaʼi fea ʼaē kā mālo.”

Ohagē ko tona ʼui e Cline, ʼi te agamāhani ko te ʼu tau ʼaē neʼe fai ʼo ovi ki Mekito neʼe maʼuhiga. Ko te ʼu kautau Mongol ʼaē ʼi te 13 sēkulō neʼe natou mālo ʼi te ʼu potu lahi ʼo te fenua Asia, neʼe ko tanatou hoki tō ʼaē ʼi te malaʼe ʼaia. Mole faʼa mamaʼo mai Mekito, ʼi te takitaki ʼa te Senelale ko Edmund Allenby ko te ʼu kautau Pilitānia neʼe natou mālo ʼi te kau Tulukia lolotoga te ʼuluaki tau fakamālamanei. Ko te tagata fai hisitolia sōlia neʼe talanoa ki te mālo ʼa Allenby ohagē “ko he tau ʼi te ʼu tau ʼaē neʼe vave pea mo lahi tokotahi ʼi te ʼu tau kua hoko ʼi te temi.”

Ko te ʼu tau maʼuhiga ʼi te temi ʼo te kau pāteliaka neʼe fai pē foki ʼo ovi ki Mekito. ʼI te malaʼe ʼaia neʼe mālo ai te Tuʼi Fakamāu ko Palake ʼi te foʼi kautau Kanaane ʼa Sisela. (Kau Tuʼi Fakamāu 4:14-16; 5:19-21) ʼI te koga meʼa ʼaia, neʼe mālo ai ia Seteone mo tana kiʼi kautau e toko 300 ʼi te foʼi kautau Matianite. (Kau Tuʼi Fakamāu 7:19-22) ʼI te Moʼuga ʼo Kilipoa ʼe tuʼu ovi mai pē, neʼe mamate ai te Hau ko Saulo pea mo tona foha ko Sonatane ʼi te temi ʼaē neʼe fehōkosi ai mo te kau sōlia Filisitini, ʼo tō ai te kautau Iselaele.—1 Samuele 31:1-7.

Ko te tuʼuʼaga ʼo Mekito pea mo te ʼu malaʼe ʼaē ʼe tuʼu ovi mai kiai neʼe ko he ʼu koga meʼa lelei ki te tau, pea neʼe hoko lahi ai te ʼu tau iā taʼu e 4 000. Neʼe tānaki e te tagata fai hisitolia, ʼe teitei pē ko tau e 34 neʼe hoko ai!

Ko te hisitolia ʼo Mekito pea mo tona tuʼuʼaga lelei ki te tau, ʼaē neʼe tupu ʼaki te fakaʼaogaʼi ʼo te kupu “Halamaketone” ʼi hona ʼaluʼaga fakatātā. Logolā ko te kupu ʼaia ʼe maʼu tuʼa tahi pē ʼi te Tohi-Tapu, kae ko tona fakaʼaogaʼi ʼaē ʼi te tohi ʼo Fakahā ʼe hā lelei ai ko Halamaketone ʼe ʼi ai tona fakaʼuhiga ki te maʼuli ʼo te hahaʼi fuli ʼo te kele.

Te Fakaʼuhiga ʼo Te Kupu Halamaketone ʼi Te Tohi-Tapu

Logolā neʼe lahi te ʼu tau maʼuhiga neʼe hoko ʼo ovi ki Mekito, kae neʼe mole feala ki te ʼu tau ʼaia ke natou pulihi ʼosi ia te agakovi. ʼE mole heʼeki he tau kua fehōkosi moʼoni ai te ʼu mālohi agalelei pea mo te ʼu mālohi agakovi. Koia ko te taʼi faʼahiga tau ʼaia, ʼe ko te ʼAtua totonu pē ia ʼaē ʼe ina fakahoko. Ohagē ko tona ʼui e Sesu ʼi te tahi ʼaho: “ ʼE mole ʼi ai he tahi ʼe agalelei, gata pē ki te tokotahi, ko te ʼAtua.” (Luka 18:19) Tahi ʼaē, ʼe fakahā ʼi te Tohi-Tapu ʼo ʼuhiga mo Halamaketone ʼe ko te tau ʼa te ʼAtua.

ʼI te Tohi-Tapu, ʼe ʼui ʼi te tohi ʼo Fakahā ko “te ʼu hau ʼo te kele kātoa” ʼe natou fakatahitahi anai “ki te tau ʼo te ʼaho lahi ʼo te ʼAtua te Māfimāfi.” (Fakahā 16:14) ʼE toe ʼui fēnei e te lea fakapolofetā: “Pea neʼe natou tānaki ia nātou ki te potu ʼaē ʼe higoa ʼi te  Fakahepeleo ko Hala-Maketone.” a (Fakahā 16:16) Ki muli age, ʼe fakamahino ʼi te tohi ʼo Fakahā ko “te ʼu hau ʼo te kele pea mo tanatou ʼu kautau” ʼe “natou fakatahi [anai] moʼo tauʼi ia ia ʼaē ʼe heka ʼi te hōsi pea mo tana kautau.” (Fakahā 19:19) Ko Sesu Kilisito te tagata ʼaē ʼe heka ʼi te hōsi ʼaia.—1 Timoteo 6:14, 15; Fakahā 19:11, 12, 16.

Koteā ʼaē ʼe feala ke tou ʼui ʼo ʼuhiga mo te ʼu vaega ʼaenī? Ko te Halamaketone ʼaia ʼe ko te tau ʼa te ʼAtua pea mo te ʼu mālohi talagataʼa ʼo te mālamanei. He koʼē ko Sehova pea mo tona ʼAlo ko Sesu Kilisito ʼe nā kau anai ki te tau ʼaia? ʼUluaki, heʼe ko Halamaketone ʼe ina “maumauʼi [anai] ia nātou ʼaē ʼe natou maumauʼi te kele.” (Fakahā 11:18) Tahi ʼaē meʼa, ʼe ina fakatuʼu anai ʼi he kele kua tokalelei “ohagē ko [te] fakapapau mai [e te ʼAtua], ʼe tou talitali ki te . . . kele foʼou ʼaē ʼe tonu ke nofo ai te faitotonu.”—2 Petelo 3:13.

He Koʼē ʼe Tonu Ke Hoko Mai Ia Halamaketone?

ʼE mata faigataʼa koa kiā koutou hakotou fakakaukauʼi ko Sehova, ʼaē ko he “ ʼAtua ʼo te ʼofa” ʼe ina hinoʼi anai tona ʼAlo, ia te “ ʼAliki ʼo te Tokalelei,” ke kau ʼi he tau? (2 Kolonito 13:11; Isaia 9:6) Ke kotou mahino ki te ʼu fakatuʼutuʼu ʼaia, ʼe lagi lelei age muʼa ke kotou mahino lelei ki te ʼu tupuʼaga ʼo tanā fai te faʼahi ʼaia. Ko te tohi ʼo Pesalemo ʼe ina fakamahino mai ko Sesu ʼe ko he tagata tau ʼe heka ʼi te hōsi. He koʼē ʼe kau ki te tau? ʼE fakamahino e te tagata fai pesalemo, ʼe heka hōsi ia Kilisito “ ʼi te tau ʼo te lagolago ki te moʼoni, pea mo te agavaivai, pea mo te faitotonu. “ ʼE laga tau heʼe manako ia ki te faitotonu kae ʼe fehiʼa ia ki te agakovi.—Pesalemo 45:4, 7.

Pea ʼe toe fakahā ʼi te Tohi-Tapu ia te fakatuʼutuʼu ʼaē kā fai e Sehova ʼo ʼuhiga mo te heʼe faitotonu ʼaē ʼe sio kiai ʼi te mālamanei. ʼE ʼui e te polofetā ko Isaia: “Neʼe sio te ʼALIKI kiai, pea ʼe fehiʼa ia ki te heʼe faitotonu. ʼE ina kofuʼi anai te faitotonu ohagē ko he kofu tau pea ʼe ina kofuʼi anai te mālohi moʼo haofaki ohagē ko he puloga tau. ʼE ina kofuʼi anai ʼaki te holi mālohi ke ina fai te ʼu meʼa ʼe totonu pea mo fakatūʼā, mo lagavaka ki te ʼu lakahala ʼaē ʼe tupu ai te mamahi ʼa te hahaʼi.”—Isaia 59:15, 17, Today’s English Version.

ʼE mole maʼu anai e te hahaʼi faitotonu ia te tokalelei pea mo te fīmālie, mo kapau ʼe kei māʼuʼuli pē te hahaʼi agakovi ʼaē ʼe natou takitaki nātou. (Tāʼaga Lea 29:2; Tagata Tānaki 8:9) ʼI tona fakahagatonu, ʼe mole feala hata toʼo te aga fakahehema pea mo te agakovi mai te hahaʼi ʼaē ʼe natou fai ia te ʼu aga ʼaia. Koia, ʼe hoki maʼu pē anai ia he tokalelei pea mo he  faitotonu ʼe tologa, mo kapau ʼe pulihi ia te kau agakovi ʼi te kele. ʼE ʼui fēnei e Salomone: “Ko te agakovi ʼe ko he totogi maʼa te tagata faitotonu.”—Tāʼaga Lea 21:18.

Ko te ʼAtua ʼe ko te Tuʼi Fakamāu, pea ʼe tou tui papau ʼe faitotonu ia tana ʼu fakamāu fuli ʼaē ʼe ina fai ʼo ʼuhiga mo te kau agakovi. Neʼe fehuʼi fēnei e Apalahamo: “Ko te Tuʼi Fakamāu ʼo te kele kātoa ʼe mole ina fai anai koa te meʼa ʼaē ʼe totonu?” Neʼe mahino kiā Apalahamo ʼi te tali ki tana fehuʼi, ʼe ko Sehova ʼe faitotonu tuʼumaʼu pē ia! (Senesi 18:25) Tahi ʼaē meʼa, ʼe tou maʼu te fakapapau ʼi te Tohi-Tapu, ko Sehova ʼe mole fiafia ia ki te fakaʼauha ʼo te kau agakovi, ʼe hoki ina fakahoko pē anai te faʼahi ʼaia mo kapau ʼe mole fia fakahemala anai ki tana agakovi.—Esekiele 18:32; 2 Petelo 3:9.

Ke Tou Mahino Papau Ko Halamaketone ʼe Ko Te Tau ʼe Moʼoni

ʼE tou lagolago anai koa kiā ai ʼi te tau maʼuhiga ʼaia? ʼE mahino ia, tokolahi iā tātou ʼe tou tali pē anai ʼe tou kau mo te ʼu mālohi ʼaē ʼe agalelei. Kae ʼe feafeaʼi hatatou ʼiloʼi papau ʼe tou fai moʼoni te faʼahi ʼaia? ʼE fakalotomālohiʼi fēnei tātou e te polofetā ko Sofonia: “Kotou kumi te faitotonu, kotou kumi te agavaivai.” (Sofonia 2:3) ʼE ʼui e te ʼapositolo ko Paulo ko te finegalo ʼo te ʼAtua, “ke haofaki te faʼahiga tagata fuli pē, pea ke natou aʼu ki te ʼatamai mālama totonu ʼo te moʼoni.”—1 Timoteo 2:4.

Ko te ʼuluaki fakatuʼutuʼu ki te haofaki, ke tou ako ia te moʼoni ʼo ʼuhiga mo Sehova pea mo tana fakatuʼutuʼu ʼaē ke pulihi te kau agakovi ʼi te kele. Lua fakatuʼutuʼu, ke tou maʼuliʼi te faitotonu ʼaē ʼe feala ai anai ke tou maʼu ia te ʼofa pea mo te puipui ʼa te ʼAtua.

Kapau ʼe tou fai te ʼu fakatuʼutuʼu ʼaia, pea ʼe tou fakahā moʼoni anai ʼe tou fakaʼamu ke hoko mai lā Halamaketone, ko he tau ʼe ina fakagata moʼoni anai te ʼu taʼu fakatagata. ʼI te kua ʼosi leva ʼo te tau ʼaia, ko te hahaʼi ʼo te ʼu potu fuli ʼe natou sio anai ki te tau ohagē ko he meʼa ʼe mole natou mahino ki tona tupuʼaga pea mo fakamataku. “ ʼE mole natou toe tau anai.”—Isaia 2:4, New American Standard Bible.

[Nota]

[Fakamatala ʼo te pasina 5]

ʼE fakaʼuhiga ia te tokaga ʼaē ʼa te ʼAtua ki te ʼu gāue ʼa te tagata, ʼe ko Halamaketone

[Paki ʼo te pasina 6]

Neʼe mālo ia Seteone pea mo tana ʼu tagata tau ʼi te tau maʼuhiga neʼe fai ʼo ovi ki Mekito

[Paki ʼo te pasina 6]

MEKITO

[Paki ʼo te pasina 7]

ʼI te kua ʼosi leva ʼo Halamaketone, ko te hahaʼi ʼo te ʼu potu fuli ʼe natou sio anai ki te tau ohagē ko he meʼa ʼe mole natou mahino ki tona tupuʼaga pea mo fakamataku