ʼI Tokotou Temi Tūpulaga, Kotou Filifili Ke Kotou Tauhi Kiā Sehova

“Haga nofo ʼi te ʼu meʼa ʼaē neʼe ke ako pea neʼe fakalotoʼi koe ke ke tui kiai.”—2 TIM. 3:14.

 1. Koteā te manatu ʼa Sehova ʼo ʼuhiga mo te tauhi ʼo tana kau Fakamoʼoni tūpulaga?

 ʼE MAʼUHIGA ʼaupitō kiā Sehova ia te tauhi taputapu ʼa te kau tūpulaga, koia neʼe ina fai ia te fakakikite ʼo ʼuhiga mo nātou, ʼaki ia te tagata fai pesalemo ʼaē neʼe hiva fēnei: “Ko tau hahaʼi ʼe natou foaki fakamālotoloto anai ia nātou ʼi te ʼaho ʼo tou ʼu mālohi fakasōlia. ʼI te taulekaleka ʼo te māʼoniʼoni, ʼi te mafoa ʼo te ʼaho, kua ʼi ai tau kau tūpulaga ohagē ko he ʼu mosiʼi hahau.” (Pes. 110:3) ʼIo, ʼe fakamaʼuhigaʼi e Sehova ia te kau tūpulaga ʼaē ʼe natou lotolelei ke natou tauhi age kiā te ia.

 2. Koteā ia te ʼu fakahala ʼaē ʼe felāveʼi mo te kau tūpulaga ʼi te temi nei ʼo ʼuhiga mo tonatou kā haʼu?

² ʼO ʼuhiga mo koutou kau tūpulaga ʼo te kōkelekāsio, kua kotou foaki koa ia tokotou maʼuli kiā Sehova? Maʼa te tokolahi, ʼe lagi mata faigataʼa kiā nātou ia te tauhi ʼaē ki te ʼAtua moʼoni. Ko te kau takitaki gāue, mo te hahaʼi fai tokoni, pea ʼi ʼihi temi mo te fāmili pea mo te ʼu kaumeʼa, ʼe natou fakalotomālohiʼi ia te kau tūpulaga ke natou fia maʼu koloa. ʼI te agamāhani ʼe valokiʼi ia te kau tūpulaga ʼaē ʼe faiga ke natou fai hanatou ʼu fakatuʼutuʼu fakalaumālie. Kae ko te tauhi ʼaē ki te ʼAtua moʼoni, ʼe ko te fakatuʼutuʼu ʼaē ʼe lelei tāfito ke kotou fai e koutou kau tūpulaga. (Pes. 27:4) Pea ki te faʼahi ʼaia, tou vakaʼi te ʼu fehuʼi e tolu: He koʼē ʼe tonu ke kotou tauhi ki te ʼAtua? ʼE feafeaʼi hakotou maʼuli fiafia ʼi takotou foaki tokotou maʼuli kiā Sehova logolā he ʼu palalau peʼe ko he ʼu aga ʼe fai atu kiā koutou? Koteā ia te  ʼu faigamālie taulekaleka ʼaē ʼe feala ke kotou maʼu ʼi te tauhi taputapu?

Ko Te Tauhi ʼAē Kiā Sehova ʼe Ko He Fakatuʼutuʼu Lelei Pē ʼAia e Tahi

 3. ʼE tonu ke malave feafeaʼi kiā tātou ia te ʼu meʼa ʼaē neʼe fakatupu e Sehova?

³ He koʼē ʼe tonu ke kotou tauhi ki te ʼAtua ʼaē ʼe moʼoni pea mo maʼuli? Ko tona tupuʼaga tāfito, ʼe tou maʼu iā Fakahā 4:11: “ ʼE ke tāu mo feʼauga, Sehova, ʼio, tomatou ʼAtua ke ke tali ia te kolōlia, mo te fakaʼapaʼapa, pea mo te mālohi, heʼe ko koe ʼaē neʼe ke fakatupu ia meʼa fuli, pea ʼuhi ko tou finegalo neʼe māʼuʼuli pea mo fakatupu ia te ʼu meʼa ʼaia.” Ko Sehova ʼe ko te Tupuʼaga taulekaleka ʼo te meʼa maʼuli fuli pē. Ko te kele ʼe ko he faʼu matalelei! Neʼe faʼu e Sehova ia te ʼu meʼa fuli ʼaenī: Te ʼu fuʼu ʼakau, te ʼu fisiʼi teu, te ʼu manu, te moana, te ʼu moʼuga, pea mo te ʼu tōʼaga vai. ʼE ʼui fēnei ʼi te Pesalemo 104:24: “ ʼE mahu [te] ʼu koloa [ʼo te ʼAtua] ʼi te kele.” ʼE tou loto fakafetaʼi ki te ʼofa ʼo Sehova, ʼi tana foaki mai he sino pea mo he ʼatamai ke feala ai hatatou maʼuli fiafia ʼi te kele pea mo tou leleiʼia ia te ʼu meʼa lelei ʼaē ʼe maʼu ai! ʼE mole tonu koa lā ke tou fakafetaʼi ki te ʼu meʼa taulekaleka fuli ʼaē neʼe ina fakatupu maʼa tātou ʼaē ʼe fia tauhi kiā te ia?

4, 5. Ko te ʼu gāue fakaʼatua fea ʼaē neʼe tupu ai te felōgoi lelei ʼa Sosue pea mo Sehova?

⁴ Ko te tahi tupuʼaga ʼaē ke tou tauhi ai kiā Sehova, ʼe tou maʼu ʼi te ʼu palalau ʼaē neʼe fai e Sosue, ia te tagata ʼaē neʼe ina takitaki ia Iselaele. ʼI te kua vave mate ʼa Sosue, neʼe ina ʼui fēnei ki te kau Iselaele: “ ʼE kotou ʼiloʼi papau ʼaki tokotou loto kātoa pea mo tokotou nefesi kātoa, neʼe mole he folafola neʼe mole hoko ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou.” He koʼē neʼe fai ia te ʼu palalau ʼaia e Sosue?—Sos. 23:14.

⁵ ʼI te lahilahi ake ʼa Sosue ʼi Esipito, neʼe lagi logo ki te fakapapau ʼaē neʼe fai e Sehova: ke ina foaki he kele maʼa te kau Iselaele. (Sen. 12:7; 50:24, 25; Eke. 3:8) Pea neʼe sio ia Sosue ki te kamata fakahoko e Sehova ia te fakapapau ʼaia, ʼi tana fakahoko ia te ʼu Tautea e Hogofulu ki Esipito moʼo fakamālohiʼi ia Falaone ʼaē neʼe loto fefeka, ke ina fakamavae ia te ʼu foha ʼo Iselaele mai Esipito. Neʼe kau ia Sosue iā nātou ʼaē neʼe haofaki ʼi te Tai Kula pea neʼe sio ki te mou ʼa Falaone pea mo tana kautau ʼi te tai. Lolotoga te fagona loaloaga ‘ ʼi te toafa lahi pea mo fakamataku’ ʼo Sinai, neʼe sio ia Sosue ki te tokaga ʼa Sehova ʼo foaki ia meʼa fuli ʼaē neʼe ʼaoga ki te kau Iselaele. ʼE mole he tahi iā nātou neʼe mate pakupaku peʼe fia ʼinu. (Teu. 8:3-5, 14-16; Sos. 24:5-7) ʼI te temi ʼaē neʼe kua tonu ai ke ʼohofi e te kau Iselaele ia te ʼu puleʼaga mālohi ʼo Kanaane pea ke natou maʼu ia te Kele ʼo Te Fakapapau, neʼe sio ia Sosue pea mo te kau Iselaele neʼe lagolago age ia te ʼAtua ʼaē neʼe natou tauhi ki ai ʼi te tau ʼaia.—Sos. 10:14, 42.

 6. Koteā ʼaē kā tokoni atu anai ke kotou fia tauhi ki te ʼAtua?

⁶ Neʼe ʼiloʼi e Sosue neʼe fakahoko e Sehova ia Tana ʼu fakapapau. Koia, neʼe ʼui fēnei ai e Sosue: “Kiā au mo toku loto fale, ʼe matou tauhi anai kiā Sehova.” (Sos. 24:15) ʼE feafeaʼi kiā koutou? Kapau ʼe kotou fakakaukauʼi te ʼu fakapapau ʼaē kua fakahoko e te ʼAtua moʼoni pea mo ʼaē kā ina fakahoko anai, ʼe kotou fia tauhi koa kiā te ia ohagē ko Sosue?

 7. He koʼē ʼe ko he faʼahi maʼuhiga ia te papitema?

⁷ Kā kotou mamata ki te ʼu fakatupu ʼaē neʼe fai e Sehova pea mokā kotou metitāsioʼi tana ʼu fakapapau taulekaleka ʼaē ʼe tuha ke tou falala kiai, ʼe tonu ke ina uga koutou ke kotou foaki tokotou maʼuli kiā te ia ʼo kotou papitema. Ko te papitema ʼe ko he faʼahi maʼuhiga ʼe tonu ke fai e nātou ʼaē ʼe foaki tonatou maʼuli ki te ʼAtua. Neʼe fakahā lelei ia te faʼahi ʼaia e totatou Faʼifaʼitakiʼaga ko Sesu. ʼI muʼa pē ʼo tana kamata gāue ʼi tona ʼuhiga Mēsia, neʼe ʼalu ia kiā Soane Patita ke papitemaʼi ia ia. He koʼē neʼe fai e Sesu ia te faʼahi ʼaia? Neʼe ina ʼui ki muli age: “Neʼe au hifo mai te lagi mole ko he fai ʼo toku finegalo, kae ko te fai ʼo te finegalo ʼo ia ʼaē neʼe ina fekauʼi mai au.” (Soa. 6:38) Neʼe papitema ia Sesu moʼo fakahā kua ina foaki tona maʼuli moʼo fai ia te finegalo ʼo tana Tamai.—Mat. 3:13-17.

 8. He koʼē neʼe filifili e Timoteo ke tauhi ki te ʼAtua, pea koteā ʼaē ʼe lagi tonu anai ke kotou fai?

⁸ Kotou toe fakakaukauʼi age mo te faʼifaʼitaki ʼa Timoteo, ko he tūpulaga Kilisitiano neʼe foaki ki ai e Sehova ia te ʼu tuʼuga pilivilēsio. He koʼē  neʼe fia tauhi ia Timoteo ki te ʼAtua moʼoni? ʼE fakahā mai ʼi te Tohi-Tapu ‘neʼe akoʼi age ki ai te ʼu meʼa pea neʼe fakalotoʼi ia ia ke tui kiai.’ (2 Tim. 3:14) Kapau neʼe kotou ako te Folafola ʼa te ʼAtua pea neʼe fakalotoʼi koutou ke kotou tui ʼe moʼoni tana ʼu akonaki, pea ʼe kotou hagē ko Timoteo. Kua ʼaoga leva ʼi te temi nei ke kotou fai he tonu. He koʼē ʼe mole kotou felōgoi mo takotou ʼu mātuʼa ki te fakatuʼutuʼu ʼaē ʼe kotou fia fai? Ko takotou ʼu mātuʼa pea mo te ʼu tagata ʼāfea ʼe feala anai ke natou tokoni atu ke kotou mahino ki te ʼu pelesepeto Fakatohi-tapu ʼaē ʼe fakamaʼua ki te papitema.—Lau ia Gāue 8:12.

 9. ʼE feala ke malave feafeaʼi ki ʼihi mo kapau ʼe kotou papitema?

⁹ Kapau ʼe kotou papitema, pea ʼe ko he fakatuʼutuʼu lelei ʼaia moʼo kamata ia takotou tauhi ʼaē ki te ʼAtua. ʼI takotou fai ia te fakatuʼutuʼu ʼaia, ʼe kotou kamata kau ai ki te lele loaloaga, pea ko te ʼu fakapale ʼaē kā kotou maʼu ai anai ʼe ko te maʼuli heʼegata pea mo te fiafia ʼaē kā kotou maʼu ʼi takotou fai ia te finegalo ʼo te ʼAtua. (Hep. 12:2, 3) ʼE toe fiafia ai anai mo tokotou ʼu fāmili pea mo tokotou ʼu kaumeʼa ʼaē ʼi te kōkelekāsio, ʼaē kua natou kau ki te lele ʼaia. Ko te meʼa ʼaē ʼe maʼuhiga tāfito, heʼe kotou fakafiafia anai ia te loto ʼo Sehova. (Lau ia Tāʼaga Lea 23:15.) Kae lagi ko ʼihi ʼe mole natou mahino anai pe koʼē neʼe kotou filifili ke kotou tauhi kiā Sehova, pea ʼe lagi natou fakafihiʼi anai takotou tonu ʼaia. ʼE lagi feala ke natou fakafeagai atu, kae ʼe feala hakotou maʼu he ʼu puleʼaki lelei ki te ʼu fihifihia ʼaia.

Kā Fai Atu e Niʼihi He ʼu Fehuʼi Peʼe Fai Atu He ʼu Fakafeagai

10, 11. (a) Koteā ia te ʼu fehuʼi ʼaē ʼe feala ke fai atu e te hahaʼi ʼo ʼuhiga mo takotou tonu ʼaē ke kotou tauhi ki te ʼAtua? (b) Koteā te ako ʼe kotou maʼu mai te faʼahiga tali ʼaē ʼa Sesu ki te ʼu fehuʼi ʼo ʼuhiga mo te tauhi moʼoni?

¹⁰ ʼE feala ke mahino gataʼa ki tokotou ʼu kaugā ako, mo tokotou ʼu vāhaʼa fale pea mo tokotou ʼu kāiga ia takotou fia tauhi ʼaē kiā Sehova. ʼE lagi natou fehuʼi atu anai pe koʼē ʼe kotou fia fai ki te taʼi maʼuli ʼaia, pea mo faifehuʼi atu ʼo ʼuhiga mo takotou tui. Koteā anai takotou tali kiai? Ke feala hakotou fakamahino ia te ʼu tupuʼaga ʼo takotou fili te taʼi maʼuli ʼaia, ʼe tonu muʼa ke kotou sivisivi takotou ʼu manatu pea mo te ʼu meʼa ʼaē ʼe natou uga koutou. Pea moʼo tali ki te ʼu fehuʼi ʼaē ʼe lagaʼi atu ʼo ʼuhiga mo takotou tui, ʼe feala hakotou mulimuli ki te faʼifaʼitaki lelei ʼaē neʼe tuku mai e Sesu.

¹¹ ʼI te temi ʼaē neʼe fakafehufehuʼi ai ia Sesu e te kau takitaki lotu ʼo ʼuhiga mo te fakatuʼuake, neʼe ina fakaʼaogaʼi te vaega Tohi-Tapu neʼe mole natou tokagaʼi. (Eke. 3:6; Mat. 22:23, 31-33) ʼI te temi ʼaē neʼe fehuʼi age ai e te sekelipa kiā Sesu peʼe ko te fakatotonu fea ʼaē ʼe maʼuhiga tāfito, neʼe ina fakaʼaogaʼi ia te ʼu vaega Tohi-Tapu neʼe tali lelei ki tana fehuʼi. Neʼe loto fakafetaʼi te tagata kiā Sesu ʼo ʼuhiga mo tana tali. (Lev. 19:18; Teu. 6:5; Mko. 12:28-34) Ko te faʼahiga fakaʼaogaʼi e Sesu ia te Folafola pea mo tana faʼahiga palalau, neʼe tupu ai te “felōgoi kehekeheʼaki [ʼa] te hahaʼi ʼo ʼuhiga mo ia,” kae neʼe mole feala ki tona ʼu fili ke natou fai he meʼa kovi kiā te ia. (Soa. 7:32-46) Kā kotou tali ki te ʼu fehuʼi ʼaē ʼe fai atu ʼo ʼuhiga mo takotou tui, kotou fakaʼaogaʼi te Tohi-Tapu pea mo kotou tali “ ʼaki he agamalū pea mo he fakaʼapaʼapa lahi.” (1 Pet. 3:15) Kapau ʼe mole kotou ʼiloʼi ia te tali ki he fehuʼi, kotou fakahā fakalelei ʼe mole kotou ʼiloʼi tona tali pea mo ʼui age ʼe kotou fai anai ni ʼu kumi kiai. ʼOsi ʼaia, pea kotou fai he ʼu kumi ʼi te ʼu tohi ʼa te sōsiete Watchtower peʼe ʼi te CD-ROM mo kapau ʼe kotou maʼu ʼi  takotou lea. Kapau ʼe kotou teuteuʼi lelei, ʼe kotou “ ʼiloʼi [anai] te tali ʼaē ʼe tonu ke kotou fai.”—Kol. 4:6.

12. He koʼē ʼe mole tonu ke kotou lotovaivai ʼuhi ko te ʼu fakataga?

¹² ʼE lagi lahi anai te ʼu fehuʼi ʼaē kā fai atu ʼo ʼuhiga mo te tonu ʼaē kua kotou fai pea mo te ʼu meʼa ʼaē ʼe kotou tui kiai. Tou manatuʼi, ko te fili ʼo te ʼAtua, ia Satana te Tēvolo, ʼe ina puleʼi ia te mālamanei. (Lau ia 1 Soane 5:19.) ʼAua naʼa kotou ʼamanaki ʼe vikiʼi anai koutou peʼe tali anai koutou e te hahaʼi fuli, pea ʼe lagi kotou felāveʼi anai mo he ʼu fakafeagai. Ko ʼihi ʼe feala ke natou “talanoa kovi ʼo ʼuhiga mo koutou,” pea ʼe lagi natou fai hoholo te aga ʼaia. (1 Pet. 4:4) Kae kotou manatuʼi, ʼe mole ko koutou tokotahi ʼaē ʼe hoko ki ai ia te ʼu faʼahi ʼaia, he neʼe fakatagaʼi foki lā mo Sesu Kilisito. Neʼe toe fakatagaʼi mo te ʼapositolo ko Petelo, pea neʼe ina tohi fēnei: “U ofaina, aua naa koutou punamauli i tautou nofo i te kakaha o te ahiahi, aua naa koutou eke i te hoko atu o te u mea aia. Kae koutou fakafiafia i tautou kau ki te u mamahi o Kilisito.”—1 Pet. 4:12, 13, Tauhi Foou.

13. He koʼē ʼe feala ke fiafia te kau Kilisitiano mokā ʼe fakatagaʼi nātou?

¹³ ʼE tonu ke kotou fiafia mokā ʼe kotou ʼūtakiʼi te ʼu fakataga peʼe ko te ʼu fakafeagai heʼe ko koutou ko te ʼu Kilisitiano. He koʼē ʼe tonu ke kotou fiafia? Heʼe kapau ʼe leleiʼia koutou e te hahaʼi ʼo te tuʼu ʼaenī pea ʼe fakaʼuhiga anai ʼe kotou fakalogo ki te ʼu lēkula ʼa Satana kae mole ko te ʼu lēkula ʼa te ʼAtua. Neʼe fakatokaga fēnei mai e Sesu: “Malaʼia mokā ʼe talanoa lelei te tagata fuli pē ʼo ʼuhiga mo koutou, heʼe ko te ʼu meʼa pē ʼaia neʼe fai e tanatou ʼu kui ki te kau polofetā loi.” (Luka 6:26) Kapau ʼe fakatagaʼi koutou, pea ʼe ko he fakaʼiloga ʼaia ko Satana pea mo tona mālama ʼe nā ʼiʼita kiā koutou heʼe kotou kaugana kiā Sehova. (Lau ia Mateo 5:11, 12.) Pea ʼe ko he meʼa fakafiafia ʼaupitō mo kapau ʼe “laukoviʼi koutou ʼuhi ko te huafa ʼo Kilisito.”—1 Pet. 4:14.

14. Koteā ia te ʼu fua lelei ʼaē ʼe feala ke maʼu e he tahi mo kapau ʼe nofo agatonu kiā Sehova logolā ia te ʼu fakataga?

¹⁴ Kapau ʼe kotou nonofo agatonu kiā Sehova logolā te ʼu fakafeagai, pea ʼe ʼi ai tona ʼu fua lelei e fā. ʼE kotou tuku ai he fakamoʼoni ʼo ʼuhiga mo te ʼAtua pea mo tona ʼAlo. ʼAki takotou faʼa kātaki agatonu ʼe kotou fakalotomālohiʼi te tui ʼo tokotou ʼu tehina mo tuagaʼane ʼi te kōkelekāsio. Ko ʼihi ʼaē ʼe mole natou ʼiloʼi ia Sehova, ʼe lagi tupu ai anai hanatou fia ʼiloʼi ia ia. (Lau ia Filipe 1:12-14.) Pea ʼi takotou logoʼi ia te mālohi ʼaē ʼe foaki mai e Sehova moʼo ʼūtakiʼi ia te ʼu fihifihia, ʼe toe tuputupu ai tokotou ʼofa ʼaē kiā te ia.

Kua ʼAvahi Atu Ia Te “Matapā Lahi”

15. Koteā ia te “matapā lahi” ʼaē neʼe ʼavahi age ki te ʼapositolo ko Paulo?

¹⁵ ʼO ʼuhiga mo tana minisitelio ʼi Efesi, neʼe ʼui fēnei e te ʼapositolo ko Paulo: “Kua ʼavahi mai kiā au te matapā lahi ki te gāue.” (1 Ko. 16:8, 9) Ko te matapā ʼaia neʼe ko he faigamālie lahi moʼo fakamafola ia te logo lelei pea mo fai ni ʼu tisipulo ʼi te kolo ʼaia. ʼI tana fakaʼaogaʼi ia te faigamālie ʼaia moʼo fai fakamafola, neʼe feala ai kiā Paulo ke tokoni ki te tokolahi ke natou ʼiloʼi ia Sehova pea mo tauhi ki te ʼAtua.

16. Neʼe hū feafeaʼi te toe ʼo te kau Kilisitiano fakanofo ʼi te ‘matapā ʼaē neʼe ʼavahi’ ʼi te taʼu 1919?

¹⁶ ʼI te taʼu 1919, ko Sesu Kilisito ʼaē kua fakakolōliaʼi neʼe ina ‘ ʼavahi he matapā’ ki te toe ʼo te kau Kilisitiano fakanofo. (Fakh. 3:8) Neʼe natou hū ʼi te matapā ʼaia, ʼo natou kamata fakamafola  ia te logo lelei pea mo akoʼi lahi age ki te hahaʼi ia te ʼu moʼoni ʼo te Tohi-Tapu. Neʼe koteā te ʼu fua ʼo tanatou minisitelio ʼaia? Neʼe aʼu te logo lelei ki te ʼu potu taupotu ʼo te kele, pea teitei pē ko te toko fitu miliona hahaʼi kua natou maʼu ia te ʼamanaki ʼo te maʼuli heʼegata ʼi te mālama foʼou ʼo te ʼAtua.

17. ʼE feafeaʼi hakotou hū ʼi “te matapā lahi ki te gāue”?

¹⁷ ʼE kei tuʼu ava pē ki te ʼu kaugana fuli ʼa Sehova ia “te matapā lahi ki te gāue.” Ko nātou ʼaē ʼe natou hū ai ʼe natou fiafia pea mo natou leleiʼia ia tanatou lagolago mālohi ʼaē ki te fakamafola ʼo te logo lelei. ʼU kaugana tūpulaga ʼa Sehova, ʼe feafeaʼi kiā koutou ia te pilivilēsio lahi ʼaē ko te tokoni ki te hahaʼi ke natou “tui ki te logo lelei”? (Mko. 1:14, 15) Kua kotou fakakaukauʼi koa ke kotou kau ki te selevisi pioniē kātoa peʼe ko te selevisi vaeluaʼi temi? ʼE ʼi ai te tahi ʼu faigamālie, ʼe ko te ʼu Laga Fale, mo te gāue ʼi te Petele, pea mo te selevisi misionea. ʼI te kua nounou ʼo te temi ʼo te mālama agakovi ʼa Satana, kua maʼuhiga age ʼi te temi nei ke tou kau ki te ʼu faʼahiga gāue kehekehe ʼaia ʼo te Puleʼaga. ʼE kotou hū anai koa ʼi te “matapā lahi” ʼaia heʼe kei maʼu ia te temi faigamālie?

‘Kotou ʼAhiʼahi Pea Mo Kotou ʼIloʼi Ko Sehova ʼe Lelei’

18, 19. (a) Koteā ʼaē neʼe tokoni kiā Tavite ke ina maʼu he holi mālohi moʼo kaugana kiā Sehova? (b) Koteā ʼaē ʼe hā ʼaki mai neʼe mole fakahemala ia Tavite ʼi tana tauhi ʼaē ki te ʼAtua?

¹⁸ Neʼe fakaafe e te tagata fai pesalemo ʼihi hahaʼi ke natou ‘ ʼahiʼahi pea ke natou ʼiloʼi ko Sehova ʼe lelei.’ (Pes. 34:8) ʼI te temi ʼaē neʼe tauhi ovi ai ia te Hau ko Tavite ʼi tana kei veliveli, neʼe haofaki ia ia e Sehova mai te ʼu manu fekai. Neʼe tokoni te ʼAtua kiā ia ʼi tana tauʼi ia Koliate, pea mo ina haofaki ia ia mai te tahi ʼu malaʼia. (1 Sam. 17:32-51; Pes. 18, te ʼu palalau ʼaē ʼe tuʼu ʼi ʼoluga) Neʼe tupu te fai e Tavite ʼo te ʼu palalau ʼaenī ʼuhi ko te manavaʼofa lahi ʼo te ʼAtua: “Neʼe lahi te ʼu meʼa neʼe ke fai e koe totonu, Ê Sehova toku ʼAtua, ʼeī tau ʼu gāue fakaofoofo pea mo tau ʼu manatu ʼo ʼuhiga mo mātou; ʼe mole he tahi age ʼe tatau mo koe.”—Pes. 40:5.

¹⁹ ʼI te ʼāʼāsili ʼo te ʼofa ʼo Tavite kiā Sehova, neʼe ina fia fakavikiviki ai kiā te Ia mo tona loto kātoa pea mo tona ʼatamai kātoa. (Lau ia Pesalemo 40:8-10.) Neʼe mole he temi neʼe fakahemala ai ia Tavite ʼi tana fakaʼaogaʼi kātoa ʼo tona maʼuli moʼo tauhi ki te ʼAtua moʼoni. Neʼe ko he koloa maʼuhiga pea mo fakafiafia ʼaupitō kiā ia, tana pipiki ʼaē ki te ʼAtua. ʼI tona temi matuʼa, neʼe ʼui fēnei e Tavite: “Ko koe ko toku falalaʼaga, Ê Tuʼi ʼAliki ko Sehova, toku falalaʼaga talu mai toku temi tūpulaga. Pea ʼo aʼu ki toku temi matuʼa pea mo toku ʼulu hina, Ê ʼAtua, ʼaua naʼa ke liʼaki au.” (Pes. 71:5, 18) Logolā te hifohifo ʼo tona mālohi fakasino, kae neʼe toe mālohi age te falala pea mo te fakakaumeʼa ʼa Tavite mo Sehova.

20. He koʼē ʼe lelei age pē hakotou fakaʼaogaʼi ʼo tokotou maʼuli moʼo tauhi ki te ʼAtua?

²⁰ Ko te maʼuli ʼo Sosue, mo Tavite, pea mo Timoteo, ʼe ko he ʼu fakamoʼoni ʼaia ʼe lelei age ke kotou fakaʼaogaʼi tokotou maʼuli moʼo tauhi kiā Sehova. Ko te ʼu lelei fakatemi ʼo he gāue ʼi te mālama ʼaenī, ʼe mole feala ke fakatatau ki te ʼu lelei heʼegata ʼaē kā kotou maʼu anai ʼi takotou ‘tauhi ʼaē kiā Sehova mo tokotou loto kātoa pea mo tokotou nefesi kātoa.’ (Sos. 22:5) Kapau ʼe mole heʼeki kotou foaki ia tokotou maʼuli kiā Sehova ʼi te faikole, kotou fai ia te fehuʼi ʼaenī: ‘Koteā ʼaē ʼe ina lolotoga tāʼofi nei au ke au liliu ko he Fakamoʼoni ʼa Sehova?’ Pea kapau kua kotou papitema, ʼe mole kotou fia fakalahi age koa tokotou maʼuli fiafia? Kotou fakalahi takotou minisitelio, pea kotou haga tuputupu ʼi te faʼahi fakalaumālie. ʼE kotou vakaʼi anai ʼi te ʼalatike ʼaē kā hoa mai peʼe feafeaʼi hakotou tuputupu ʼi te faʼahi fakalaumālie ʼaki hakotou muliʼi ia te faʼifaʼitaki ʼa te ʼapositolo ko Paulo.

ʼE Kotou Tali Feafeaʼi Anai?

• Kotou tuku mai he ʼu tupuʼaga e lua, pe koʼē ʼe tonu ke tou tauhi ki te ʼAtua?

• Koteā ʼaē neʼe tokoni kiā Timoteo ke ina filifili ke tauhi ki te ʼAtua?

• He koʼē ʼe tonu ke kotou nofo agatonu logolā te ʼu fakataga?

• Ko te ʼu faigamālie fea ʼaē ʼe kotou maʼu moʼo tauhi ki te ʼAtua?

[ʼU fehuʼi ʼo te ako]

[Paki ʼo te pasina 23]

ʼE lelei age pē hakotou fakaʼaogaʼi ʼo tokotou maʼuli moʼo tauhi ki te ʼAtua

[Paki ʼo te pasina 24]

ʼE kotou lava tali koa ki te ʼu fehuʼi ʼaē ʼe lagaʼi atu ʼo ʼuhiga mo takotou tui?