Te ʼu Fehuʼi ʼa Te Kau Lautohi

ʼE Nofo Koa Ia Te Puleʼaga ʼo Te ʼAtua ʼi Tokotou Loto?

Tokolahi iā ʼaho nei ʼe natou tali anai fēnei: ko te puleʼaga ʼaia ʼe nofo ʼi ʼotatou loto. Ohagē lā, ʼe ʼui fēnei ʼi te tohi The Catholic Encyclopedia: “Ko te fakaʼuhiga ʼo te puleʼaga ʼo te ʼAtua, ko te ʼAtua ʼe ʼafio ʼi ʼotatou loto.” ʼE akoʼi ia te akonaki ʼaia e te kau takitaki lotu ki te hahaʼi ʼaia. ʼE akoʼi moʼoni mai koa ʼi te Tohi-Tapu, ʼe nofo ia te Puleʼaga ʼo te ʼAtua ʼi te loto ʼo te hahaʼi?

Ko ʼihi ʼe natou ʼui, neʼe ko Sesu totonu ʼaē neʼe ina fakatuʼu ia te akonaki ʼo ʼuhiga mo te Puleʼaga ʼo te ʼAtua ʼe nofo ʼi te loto ʼo te hahaʼi. He neʼe ʼui fēnei e Sesu: “Koʼenī ko te puleʼaga ʼo te ʼAtua ʼe ʼi te lotolotoiga ʼo koutou.” (Luka 17:21) Ko ʼihi Tohi-Tapu ʼe natou fakaliliu fēnei: “ ʼE nofo ia te Puleʼaga ʼo te ʼAtua iā koutou” peʼe “ ʼi tokotou loto.” ʼE totonu koa ia te fakaliliu ʼa te ʼu Tohi-Tapu ʼaia ia te palalau ʼa Sesu? ʼE fakaʼuhiga koa te ʼu palalau ʼa Sesu ʼe nofo moʼoni ia te Puleʼaga ʼo te ʼAtua ʼi te loto ʼo te hahaʼi?

ʼUluaki, tou vakaʼi age muʼa peʼe feafeaʼi ia te loto ʼo te tagata. Kā talanoa ia te Tohi-Tapu ʼo ʼuhiga mo te loto, ʼe fakaʼuhiga pē ia ki te tuʼuʼaga ʼo te ʼu manatu ʼo te hahaʼi, tonatou ʼu agaaga, pea mo te ʼu meʼa ʼaē ʼi ʼonatou loto. Ko te manatu ʼaē ʼe feala ki he meʼa fakatalakitupua ohagē ko te Puleʼaga ʼo te ʼAtua ke nofo ʼi te loto ʼo te tagata—ohagē lā ʼe ina fetogi pea mo fakamaʼuhigaʼi ia te hahaʼi—ʼe feala ke tou holi fuli kiai, kae ʼe ʼi ai koa he fakatafitoʼaga ʼo te manatu ʼaia?

ʼE ʼui fēnei ʼi te Tohi-Tapu: “ ʼE kākā te loto, ʼo laka iā meʼa fuapē, pea mo kovi ʼaupitō.” (Selemia 17:9) Neʼe ʼui totonu pē e Sesu: “Mai loto ʼi te loto ʼo te tagata, ʼe haʼu mai ai te ʼu fakakaukau kovi: te ʼu fai folonikāsio, te ʼu kaihaʼa, te ʼu fakapō, te ʼu tono, te ʼu mānumānu, te ʼu aga ʼe kovi.” (Maleko 7:20-22) Tou fakakaukauʼi age muʼa ia te faʼahi ʼaenī: ʼE ko te malaʼia ʼaē ʼe tou sio kiai ʼi te mālamanei, ʼe ko te ʼu meʼa fuli ʼaia ʼe mole tupu mai koa ʼuhi ko te loto ʼo te ʼu tagata agahala? Koia, ʼe feafeaʼi ʼapē ki he Puleʼaga haohaoa ʼo te ʼAtua hana haʼu mai he matapuna fēia? ʼIo, ʼe mole feala ki te loto ʼo te tagata ke ina fakatupu te Puleʼaga ʼo te ʼAtua ohagē pē ko he vao lau talatala ʼe mole feala hana fakatupu he ʼu fuaʼi fiku.—Mateo 7:16.

Lua, kotou fakatokagaʼi ia te hahaʼi ʼaē neʼe fakalogo ki te faiakonaki ʼa Sesu ʼi te temi ʼaē neʼe ina fai ai te ʼu palalau ʼaē iā Luka 17:21. ʼI te vaega ki muʼa age, ʼe tou lau fēnei: “ ʼI te fehuʼi age e te kau Faliseo peʼe ko te temi fea ʼaē ʼe haʼu ai te puleʼaga ʼo te ʼAtua, neʼe ina tali age kiā nātou.” (Luka 17:20) Ko te kau Faliseo neʼe ko te ʼu fili ʼo Sesu. Neʼe fakahā fakalelei e Sesu ko nātou ʼaia ko te kau mālualoi pea ʼe mole natou hū anai ki te Puleʼaga ʼo te ʼAtua. (Mateo 23:13) Koia kapau neʼe mole hū ia te kau Faliseo ki te Puleʼaga ʼo te ʼAtua, pea ʼe feala ʼapē ke nofo te Puleʼaga ʼi ʼonatou loto? ʼE mole feala ia te faʼahi ʼaia! Koteā ʼaē neʼe fia palalau kiai ia Sesu?

ʼI te fakaliliu ʼo te ʼu palalau ʼaia ʼa Sesu, ʼe lahi te ʼu Tohi-Tapu ʼe natou fakaʼaogaʼi pē te kupu e tahi ʼaē ʼe tou maʼu ʼi te Tohi-Tapu Traduction du monde nouveau. Ko ʼihi ʼe natou ʼui ko te Puleʼaga ʼe “iā koutou” peʼe “ ʼi te lotolotoiga ʼo koutou.” Neʼe fakaʼuhiga feafeaʼi ia te nofo ʼo te Puleʼaga ʼo te ʼAtua mo te hahaʼi ʼi te temi ʼaia, ʼo kau ai mo te kau Faliseo? Neʼe ko Sesu ʼaē neʼe fakanofo e Sehova ʼAtua ke Hau ki te Puleʼaga. Pea mai tona ʼaluʼaga ʼaē ko Sesu ʼaē neʼe fakanofo ke Hau, koia neʼe tuha ke ʼui ʼe nofo ia te Puleʼaga ʼaia ʼi te lotolotoiga ʼo te hahaʼi ʼaia. Neʼe faiakonaki ʼo ʼuhiga mo te Puleʼaga ʼo te ʼAtua pea mo ina fai mo te ʼu milakulo, ʼo ina fakahā fakatomuʼa ia te ʼu gāue ʼaē kā fakahoko anai e te Puleʼaga ʼaia. Koia neʼe feala ai ke ʼui, ko te Puleʼaga neʼe nofo ʼi te lotolotoiga ʼo nātou.

ʼE mahino ia, ʼe mole he vaega fakatohi-tapu ʼe lagolago ki te manatu ʼaē ko te Puleʼaga ʼo te ʼAtua ʼe nofo ʼi te loto ʼo te hahaʼi. Kae ʼe ko he puleʼaga moʼoni ia, ʼe ina fai anai ni ʼu fetogi lalahi ki te kele, ohagē ko te ʼu fakakikite ʼa te kau polofetā.—Isaia 9:6, 7; Taniela 2:44.