Ko ʼĀfea Koa ʼAē Kā Hoko Mai Ai Anai Ia Te Puleʼaga ʼo Te ʼAtua?

“ ʼALIKI, ʼe ko te temi koa ʼaenī kā ke toe fakatuʼu ai te puleʼaga maʼa Iselaele?” (Gāue 1:6) Neʼe fia ʼiloʼi e te kau ʼapositolo ia te temi ʼaē kā fakatuʼu ai anai e Sesu ia tona Puleʼaga. Kua hili nei kiai taʼu e 2 000 tupu, ʼe kei fia ʼiloʼi aipē e te hahaʼi: Pe ko ʼāfea ʼaē kā hoko mai ai anai ia te Puleʼaga ʼo te ʼAtua?

Kapau neʼe ko te Puleʼaga ia te kupu tāfito ʼo te fai fakamafola ʼa Sesu, pea ʼe lagi ʼe kotou fakaʼamu ʼe ina fakamahino mai anai ia te faʼahi ʼaia. Pea neʼe ina foaki mai ia te ʼu fakamoʼoni! Neʼe talanoa tāfito ki he fakaʼiloga ʼe hoko anai ʼi he temi neʼe ina fakahigoaʼi ko tana “i henī.” (Mateo 24:37) Ko te ʼi henī ʼaia ʼe pipiki tāfito ki te fakatuʼu ʼo te Puleʼaga Fakamēsia. Koteā koa ia te ʼi henī ʼaia? Tou vakaʼi age muʼa te ʼu moʼoni e fā ʼe fakahā ʼi te Tohi-Tapu ʼo ʼuhiga mo te ʼi henī ʼa Kilisito.

1. ʼE kamata anai ia te ʼi henī ʼa Kilisito, hili he temi fualoa ki tona ʼosi mate. Neʼe fai e Sesu ia te lea fakatātā neʼe ina fakatatau ai ia ia totonu ki he tagata “neʼe ʼalu ki he fenua mamaʼo ke tuku [age] kiā te ia te pule fakahau,” peʼe “ke foaki age kiā te ia he puleʼaga.” (Luka 19:12, nota ʼi te lalo pāsina) Neʼe hoko feafeaʼi ia te lea fakapolofetā ʼaia? Neʼe mate ia Sesu pea neʼe fakatuʼuake, pea neʼe ʼalu ki te “fenua mamaʼo,” ʼaē ko te lagi. Ohagē ko tona fakakikite e Sesu ʼi te tahi lea fakatātā, ko tana liliu fakahau mai ʼe hoko anai ‘ ʼi te ʼosi ʼo he temi loaloaga.’—Mateo 25:19.

Hili te ʼu taʼu ki te hake ʼa Sesu ki te lagi, neʼe ʼui fēnei e te ʼapositolo ko Paulo: “Ko te tagata ʼaia [ia Sesu] neʼe ina momoli ʼo talu ai te sākilifisio e tahi ki te ʼu agahala pea kua heka ʼi te toʼomataʼu ʼo te ʼAtua, ʼo talitali ai ʼo kaku ki te tānaki ʼo tona ʼu fili ohagē hona hilihiliʼaga vaʼe.” (Hepeleo 10:12, 13) Hili ki te hake ʼa Sesu ki te lagi, neʼe hoko mai kiai ia te temi loaloaga. Neʼe fakaʼosi ia te temi ʼaia ʼi te temi ʼaē neʼe fakanofo ai e Sehova ʼAtua ia tona ʼAlo ko te Hau ʼo te Puleʼaga Fakamēsia ʼaē neʼe kua fualoa ia tona fakapapauʼi mai. Neʼe hoko ʼi te temi ʼaē neʼe kamata ai ia te ʼi henī ʼa Kilisito. ʼE sio anai koa te hahaʼi ki te meʼa fakaofoofo ʼaia?

2. Ko te ʼi henī ʼe fakapulipuli. Tou manatuʼi, neʼe talanoa ia Sesu ʼo ʼuhiga mo te fakaʼiloga ʼo tana ʼi henī. (Mateo 24:3) Kanapau lā neʼe sio te hahaʼi ki tana ʼi henī, koteā anai ia te ʼaoga ʼo he fakaʼiloga? Tou toʼo he faʼifaʼitaki: Kotou fakakaukauʼi age muʼa ʼe kotou folau ki he faʼahi heʼe kotou fia sisio ki te moana. ʼE lagi kotou sisio ʼi te ala ki he ʼu fakaʼiloga ʼe natou takitaki ia takotou ʼolo ʼaia, kae ʼi takotou kua aʼu atu ki te mataʼone, ʼo kotou tuʼu ʼi te kauvai ʼo sio ki te toe moana ʼaia, ʼe kotou fakaʼamu anai koa ke kotou sisio ki he pano mo he fakaʼiloga ʼe ina hinoʼi atu ko te “Moana” ʼaia? Kailoa ia! Koteā te ʼaoga ʼo he fakaʼiloga ki he meʼa ʼe feala pē hakotou sio kiai?

Neʼe fakahā e Sesu ia te agaaga ʼo te fakaʼiloga ʼo tana ʼi henī, ʼe mole ko he meʼa ʼe feala ke sio mata kiai te hahaʼi, kae ko he fakaʼiloga moʼo tokoni kiā nātou ke natou mahino ki te meʼa ʼaē kā hoko anai ʼi te lagi. Koia, neʼe ʼui fēnei e Sesu: “Ko te puleʼaga ʼo te ʼAtua ʼe mole haʼu ia ohagē ko he meʼa ʼe feala ke mamata kiai te hahaʼi.” (Luka 17:20) Pea ʼe fakahā feafeaʼi e te fakaʼiloga ki te hahaʼi ʼo te kele kua kamata ia te ʼi henī ʼa Kilisito?

3. ʼE fakaʼiloga anai ia te ʼi henī ʼa Sesu ʼaki he temi ʼo te ʼu maveuveu lahi ʼi te kele. Neʼe ʼui e Sesu ko tana ʼi henī ʼi tona tuʼulaga Hau ʼi te lagi ʼe fakaʼiloga anai ʼi te kele ʼaki te ʼu tau, te ʼu hoge,  te ʼu mafuike, te ʼu taʼi mahaki, pea mo te manukiʼi ʼo te lao. (Mateo 24:7-12; Luka 21:10, 11) Koteā ʼaē kā tupu ai ia te ʼu ʼaluʼaga fakamataku ʼaia? ʼE fakamahino mai ʼi te Tohi-Tapu, ko Satana “te pule ʼo te mālama ʼaenī,” ʼe nofo mo tona ʼita lahi heʼe ina ʼiloʼi kua nounou tona temi, talu mai te temi ʼaē neʼe kamata ai ia te ʼi henī ʼa Kilisito ʼi tona tuʼulaga Hau. (Soane 12:31; Fakahā 12:9, 12) Neʼe hā lelei ʼi totatou temi ia te ʼita lahi ʼaia ʼa Satana pea mo te ʼi henī ʼa Kilisito. Ko te hahaʼi fai hisitolia neʼe natou fakamoʼoni talu mai te taʼu 1914 neʼe ko he temi maʼuhiga neʼe hā ai ʼi te mālamanei kātoa te ʼu meʼa faikehe.

ʼE lagi hagē mai te ʼu meʼa fuli ʼaia ko he ʼu logo ʼe mole lelei, kae ʼe hala te manatu ʼaia. Ko te fakaʼuhiga ʼo te ʼu logo ʼaia, ʼe ko te Puleʼaga Fakamēsia kua ʼafio nei ʼi te lagi. Kua vave pē anai te pule ʼa te puleʼaga ʼaia kiā meʼa fuli ʼi te kele. ʼE mahino feafeaʼi anai te hahaʼi ʼo ʼuhiga mo te Puleʼaga ʼaia ke feala ai hanatou tali tana pule pea mo natou fakalogo ki tana takitaki?

4. ʼE fakaʼiloga ia te ʼi henī ʼa Sesu ʼaki he fai fakamafola ʼi te mālamanei kātoa. Neʼe ʼui e Sesu ko tana ʼi henī ʼe hagē anai ko “te ʼu ʼaho ʼaē ʼo Noe.” a (Mateo 24:37-39) Neʼe mole gata pē ia te gāue ʼa Noe ʼi tana faʼu ia te ʼaleka kae ‘neʼe ina toe fakamafola ia te faitotonu.’ (2 Petelo 2:5) Neʼe fakatokaga e Noe ki te hahaʼi ia te ʼamanaki hoko mai ʼo te tautea ʼa te ʼAtua ki te kele. Neʼe ʼui e Sesu ko tana ʼu tisipulo ʼaē ʼi te kele ʼe natou fai anai ia te gāue fēia lolotoga tana ʼi henī. Neʼe ina fakakikite fēnei: ‘Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he fakamoʼoni ʼaia ki te ʼu puleʼaga kātoa; pea hoko mai ai leva te fakaʼosi.’—Mateo 24:14.

Ohagē ko te ʼu manatu neʼe kua tou talanoa kiai ʼi te ʼalatike kua ʼosi, ʼe fakaʼauha anai e te Puleʼaga ʼo te ʼAtua ia te ʼu puleʼaga fuli ʼo te mālamanei. ʼAki te fai fakamafola, ʼe fakatokaga ki te hahaʼi ko te puleʼaga ʼaia ʼe ʼi selō kua vave pē tana fakahoko tana gāue pea ʼe ina foaki ki te hahaʼi fuli ia te faigamālie ke natou hao mai te fakaʼauha ʼaē kā ʼamanaki hoko mai pea ke natou fakalogo ki te takitaki ʼa te Puleʼaga ʼaia. Koia ʼe malaga ai ia te fehuʼi maʼuhiga ʼaenī: ʼE feafeaʼi anai hakotou tali ki te faʼahi ʼaia?

Ko Te Puleʼaga ʼo Te ʼAtua, ʼe Ko He Logo Lelei Anai Koa Kiā Koutou?

Ko te logo ʼaē neʼe fakamafola e Sesu neʼe ko he falalaʼaga neʼe mole hona fakatatau. ʼI te ʼosi ʼo te talagataʼa ʼaē ʼi Eteni kua hili nei kiai te ʼu taʼu e lauʼi afe, neʼe fakatuʼutuʼu e Sehova ʼAtua ke ina fakatuʼu ia he puleʼaga ʼe ina fakatokatoka anai te ʼu fihifihia, ʼo toe tokoni ki te hahaʼi agatonu ke natou maʼu ia te meʼa ʼaē neʼe fakatuʼutuʼu kiai ia te ʼAtua ʼo ʼuhiga mo nātou talu mai te kamataʼaga, ia te maʼuli heʼegata ʼi he palatiso ʼi te kele. Koteā lā he tahi meʼa ʼe lelei age ke tou mahino kiai, gata pē ki tatatou mahino ko te puleʼaga ʼaia ʼaē neʼe fakapapauʼi mai talu mai fualoa kua ʼafio nei ʼi te lagi? ʼE mole ko he puleʼaga ʼe fakalākilua kae ʼe maʼuli moʼoni ia!

Ko te Hau ʼaē neʼe fakanofo e te ʼAtua kua ʼafio nei ia ʼi te lotolotoiga ʼo tona ʼu fili. (Pesalemo 110:2) ʼI te mālama kākā ʼaenī pea mo mamaʼo mai te ʼAtua, ʼe fakahoko e te Mēsia ia te finegalo ʼo tana Tamai, ʼo ina kumi te hahaʼi fuli ʼaē ʼe natou fia ʼiloʼi pe ko ai ia te ʼAtua moʼoni pea mo natou tauhi kiā te ia “ ʼaki te laumālie pea mo te moʼoni.” (Soane 4:24) ʼE feala ki te hahaʼi ʼo te ʼu lanu kehekehe, pea mo te taʼitupu fuli, pea mo te hahaʼi fuli ke natou maʼu ʼaki te takitaki ʼo te Puleʼaga ʼo te ʼAtua ia te falala ʼo he maʼuli heʼegata. (Gāue 10:34, 35) ʼE matou fakalotomālohiʼi atu koutou, ke kotou filifili ia te faigamālie ʼaia ʼe foaki atu. Kotou ako ʼi te temi nei ia te Puleʼaga ʼaia ʼo te ʼAtua, ke feala hakotou māʼuʼuli ʼo fakalogo ki tana takitaki faitotonu ʼo heʼegata!—1 Soane 2:17.

[Nota]