ʼE Tuha Mo Nātou Ke Natou Maʼu Ia Te Puleʼaga

“ ʼE ko he fakamoʼoni ʼaia ʼo te fakamāu faitotonu ʼo te ʼAtua, ʼo ina fakaliliu koutou ke kotou tuha mo te puleʼaga ʼo te ʼAtua.”—2 TES. 1:5.

1, 2. Koteā ia te fakatuʼutuʼu ʼa te ʼAtua ʼo ʼuhiga mo te fakamāu, pea ko ai ʼaē kā ina fai anai ia te fakamāu ʼaia?

 ʼI TE teitei taʼu 50 ʼo totatou temi, neʼe nofo te ʼapositolo ko Paulo ʼi Ateni. ʼI tana hoha ʼo ʼuhiga mo te mafola ʼo te tauhi tamapua ʼaē neʼe sio kiai ʼi te kolo ʼaia, neʼe ina logoʼi ia te maʼua ʼaē ke ina fakamahino lelei kiā nātou ia te moʼoni. Neʼe ina fakaʼosi tana faiakonaki ʼaki te ʼu palalau neʼe tonu ke tokagaʼi e te hahaʼi pagani ʼaē neʼe natou fakalogo ki ai. Neʼe ina ʼui fēnei: “ ʼI te temi nei, ʼe . . . tala [e te ʼAtua] ki te hahaʼi ʼe tonu ke natou fakahemala fuli, ʼi te potu fuli pē. He neʼe ina fakakatofa he ʼaho ʼe tonu ke ina fakamāuʼi ai ia te kele kātoa ʼaki ia te faitotonu, ʼaki he tagata neʼe kua ina fakanofo, pea neʼe ina tuku te fakamoʼoni ki te hahaʼi fuapē ʼaki tona fakatuʼuake mai te mate.”—Gāue 17:30, 31.

² ʼE maʼuhiga ke tou fakakaukauʼi ʼo ʼuhiga mo te fakatuʼutuʼu ʼaē e Sehova he ʼaho ke ina fakamāuʼi ai te hahaʼi! ʼE fakahoko anai ia te fakamāu ʼaia e ia ʼaē neʼe mole fakahā mai e Paulo tona higoa ʼi tana faiakonaki ʼi Ateni, kae ʼe tou ʼiloʼi ʼe ko Sesu Kilisito ʼaē kua fakatuʼuake. Ko te fakamāu ʼaē kā fai anai e Sesu ʼe ko he fakamāu ki te maʼuli peʼe ki te mate.

 3. He koʼē neʼe fai e Sehova ia he fuakava mo Apalahamo, pea ko ai ʼaē ʼe ʼaoga tāfito moʼo fakahoko ia te fakatuʼutuʼu ʼa te ʼAtua?

³ ʼE fakahoko anai ia te ʼAho ʼo te Fakamāu ʼaia iā taʼu e 1 000. ʼI tona ʼuhiga Hau ʼo te Puleʼaga ʼo te ʼAtua, ʼe takitaki anai e Sesu ia te fakamāu ʼaia ʼi te huafa ʼo Sehova, kae ʼe mole ina fai tokotahi anai ia te gāue ʼaia. ʼE filifili e Sehova te tahi ʼu hahaʼi ʼi te mālamanei, ke natou kaugā hau mo Sesu pea mo fai fakamāu, ʼi te ʼaho ʼaia ʼaē ʼe loaloaga iā taʼu e afe. (Vakaʼi ia Luka 22:29, 30.) Kua hili kiai teitei taʼu e 4 000 ki muʼa atu, neʼe fakatuʼu e Sehova ia te tafitoʼaga ʼaē ʼe ʼaoga ki te ʼAho ʼaia ʼo te Fakamāu, ʼi te temi ʼaē neʼe ina fai ai te fuakava mo tana kaugana agatonu ko Apalahamo. (Lau ia Senesi 22:17, 18.) ʼE ʼasi mai neʼe kamata te fuakava ʼaia ʼi te taʼu 1943 ʼi muʼa ʼo totatou temi. ʼE mahino ia, neʼe mole feala kiā Apalahamo ke mahino kātoa ki te fua ʼo te fuakava ʼaia ki te mālamanei. Kae ko tātou, iā ʼaho nei, ʼe feala ke tou mahino ʼaki ia te fuakava ʼaia, ʼe ʼaoga tāfito te hako ʼo Apalahamo moʼo fakahoko ia te fakatuʼutuʼu ʼa te ʼAtua ʼaē ko te fakamāuʼi ʼo te hahaʼi.

4, 5. (a) Ko ai ia te koga tāfito ʼo te hako ʼo Apalahamo, pea koteā ʼaē neʼe ina ʼui ʼo ʼuhiga mo te Puleʼaga? (b) Ko te temi fea ʼaē neʼe hoki maʼu ai ia te ʼamanaki ke kau niʼihi ki te Puleʼaga?

⁴ Ko te koga tāfito ʼo te hako ʼo Apalahamo neʼe ko Sesu, ʼaē neʼe fakanofo ʼaki ia te laumālie māʼoniʼoni ʼi te taʼu 29 ʼo totatou temi pea neʼe liliu ai ko te Mēsia ʼaē neʼe fakapapauʼi mai, peʼe ko Kilisito. (Kal. 3:16) ʼI te ʼu taʼu e tolu vaelua ki muli  age, neʼe fakamafola e Sesu ia te logo lelei ʼo te Puleʼaga ki te puleʼaga Sutea. ʼI te ʼosi pilisoniʼi ʼo Soane Patita, neʼe fakahā e Sesu ʼe feala ki ʼihi hahaʼi ke natou kau ki te Puleʼaga, ʼi tana ʼui fēnei: “Talu mai iā ʼaho ʼo Soane Patita ʼo kaku mai ki te lakaga nei, ʼe ko te puleʼaga ʼo selō ʼaē ʼe laka fakamālohi kiai te tagata, pea ko nātou ʼaē ʼe laka fakamālohi ʼe natou maʼu.”—Mat. 11:12.

⁵ ʼI muʼa ʼo tana palalau ʼo ʼuhiga mo nātou ʼaē “ ʼe natou maʼu” ia te Puleʼaga ʼaē ʼi selō, neʼe ʼui fēnei e Sesu: “ ʼE au tala moʼoni atu kiā koutou: Ia nātou ʼaē neʼe tupu ʼi he ʼu fafine, neʼe heʼeki he tahi kua fakatupu ʼe lahi ake iā Soane Patita; kae ko ʼaē ʼe veliveli ʼi te puleʼaga ʼo selō ʼe lahi ake iā te ia.” (Mat. 11:11) He koʼē neʼe ina fai te ʼu palalau ʼaia? Koteʼuhi ko te ʼamanaki ʼaē ke natou kau ki te Puleʼaga, neʼe hoki maʼu e te hahaʼi agatonu ʼi te ʼaho ʼaē neʼe tufa ai ia te laumālie māʼoniʼoni ʼi te Penikositē ʼo te ʼaho 33 ʼo totatou temi. ʼI te temi ʼaia, neʼe kua mate ia Soane Patita.—Gāue 2:1-4.

Neʼe Tala Ko Te Hako ʼo Apalahamo Kua Faitotonu

6, 7. (a) Neʼe liliu feafeaʼi ia te hako ʼo Apalahamo “ohagē ko te ʼu fetuʼu ʼo te lagi”? (b) Koteā ia te tapuakina ʼaē neʼe maʼu e Apalahamo, pea koteā ia te tapuakina ʼe tatau mo ʼaē ʼe maʼu e tona hako?

⁶ Neʼe ʼui age kiā Apalahamo ʼe tuputupu anai tona hako pea ʼe liliu anai “ohagē ko te ʼu fetuʼu ʼo te lagi,” pea mo te ʼu fisiʼi ʼone ʼo te matātai. (Sen. 13:16; 22:17) Koia, ʼi te temi ʼo Apalahamo neʼe mole feala ki he tahi ke ina ʼiloʼi peʼe tokofia anai ia te hako ʼaia. Kae neʼe fakahā ki muli age te kaugamālie ʼo tona hako fakalaumālie. ʼO hilifaki kiā Sesu, neʼe natou toko 144 000.—Fakh. 7:4; 14:1.

⁷ ʼO ʼuhiga mo te tui ʼa Apalahamo, ʼe ʼui fēnei ʼi te Folafola ʼa te ʼAtua: “Neʼe tui [ia Apalahamo] kiā Sehova; pea neʼe lau ia te faʼahi ʼaia kiā ia ʼe ko he faitotonu.” (Sen. 15:5, 6) ʼE moʼoni, ʼe mole he tagata kua faitotonu ʼosi. (Sake 3:2) Kae ʼuhi ko te tui makehe ʼaē neʼe maʼu e Apalahamo, neʼe hagē ia neʼe kua faitotonu kiā mata ʼo Sehova pea neʼe ina fakahigoaʼi ia ia ko tona kaumeʼa. (Isa. 41:8) Ko nātou ʼaē ʼe kau ki te hako fakalaumālie ʼo Apalahamo, ʼo fakatahi mo Sesu, ʼe toe tala kua natou faitotonu, pea ʼe natou maʼu anai ia te ʼu tapuakina ʼe lahi age ʼi te ʼu tapuakina ʼaē neʼe maʼu e Apalahamo.

 8. Ko te ʼu tapuakina fea ʼaē ʼe feala ke maʼu e nātou ʼaē ʼe kau ki te hako ʼo Apalahamo?

⁸ ʼE tala kua faitotonu ia te kau Kilisitiano fakanofo heʼe natou tui ki te sākilifisio faitotogi ʼa Sesu. (Loma 3:24, 28) Kiā mata ʼo Sehova, kua natou ʼāteaina mai tanatou agahala pea ʼe feala ke fakanofo nātou ʼaki ia te laumālie māʼoniʼoni ke natou liliu ko te ʼu foha ʼo te ʼAtua, pea ke natou tautēhina mo Sesu Kilisito. (Soa. 1:12, 13) ʼE natou kau ki te fuakava foʼou pea ko nātou ʼe ko he puleʼaga foʼou, ia “te Iselaele ʼo te ʼAtua.” (Kal. 6:16; Luka 22:20) ʼE ko he toe pilivilēsio ʼaia ʼe natou maʼu! ʼAki te ʼu gāue ʼaia ʼaē ʼe fai e te ʼAtua maʼa nātou, ʼe mole ʼamanaki ia te kau Kilisitiano fakanofo ke natou māʼuʼuli ʼo heʼegata ʼi te kele. ʼE natou fakafisi ki te ʼamanaki ʼaia, ʼuhi ko te fiafia lahi ʼaē ke natou fakatahi mo Sesu lolotoga te ʼAho ʼo te Fakamāu pea mo kaugā hau mo ia ʼi selō.—Lau ia Loma 8:17.

9, 10. (a) Ko ʼanafea ʼaē neʼe ʼuluaki fakanofo ai ia te kau Kilisitiano ʼaki ia te laumālie māʼoniʼoni, pea koteā ia te ʼamanaki ʼaē neʼe natou maʼu? (b) Koteā ia te tokoni ʼaē neʼe foaki ki te kau Kilisitiano fakanofo?

⁹ ʼI te Penikositē ʼo te taʼu 33 ʼo totatou temi, neʼe foaki ki te kūtuga agatonu ia te faigamālie ʼaē ke natou kau kiā nātou ʼaē kā kaugā hau anai mo Sesu ʼi te ʼAho ʼo te Fakamāu. Ko te ʼu tisipulo ʼa Sesu ʼaē neʼe teitei toko 120, neʼe papitemaʼi nātou ʼaki ia te laumālie māʼoniʼoni ʼo natou liliu ai ko te ʼu ʼuluaki Kilisitiano fakanofo. Kae neʼe ko te kamataʼaga pē ʼaia maʼa nātou. ʼO kamata mai te ʼaho ʼaia, neʼe tonu ai ke natou fakahā tanatou nonofo agatonu kiā Sehova logolā ia te ʼu ʼahiʼahi fuli ʼaē neʼe fakahoko e Satana kiā nātou. Neʼe tonu ke natou nonofo agatonu ʼo aʼu ki te mate ke feala hanatou maʼu ia te pale ʼo te maʼuli ʼi selō.—Fakh. 2:10.

¹⁰ ʼO ʼuhiga mo te faʼahi ʼaia, neʼe fakaʼaogaʼi e Sehova tana Folafola pea mo te kōkelekāsio fakakilisitiano, moʼo foaki te ʼu tokoni pea mo te ʼu fakalotomālohi ʼaē neʼe ʼaoga ki te kau Kilisitiano fakanofo. Ohagē lā, neʼe faitohi ia te ʼapositolo ko Paulo ki te kau Kilisitiano fakanofo ʼi Tesalonika, ʼo ina ʼui fēnei: “Ohagē ko he tamai ki tana ʼu fānau, neʼe matou fakalotomālohiʼi tuʼumaʼu pē ia koutou takitokotahi, neʼe matou fakapelepeleʼi koutou pea mo matou fagonogono kiā koutou, koteʼuhi ke kotou haga haʼele ʼaki he aga ʼe tāu mo  te ʼAtua ʼaē ʼe ina pāui koutou ki tona puleʼaga pea mo tona kolōlia.”—1 Tes. 2:11, 12.

11. Koteā ia te ʼu fakamatala ʼaē neʼe loto e Sehova ke tohi maʼa “te Iselaele ʼo te ʼAtua”?

¹¹ Lolotoga taʼu e 60 tupu, hili te filifili ʼo te ʼu ʼuluaki Kilisitiano fakanofo, neʼe mahino kiā Sehova ʼe ʼaoga ke tohi ia te ʼu fakamatala ʼo ʼuhiga mo te minisitelio ʼa Sesu ʼi te kele pea mo te ʼu felōgoi ʼa Sehova mo te kau Kilisitiano fakanofo ʼo te ʼuluaki sēkulō pea mo tana fai tokoni kiā nātou. Koia neʼe hilifaki e Sehova te Koga Tohi-Tapu Fakakeleka ki te Koga Tohi-Tapu Fakahepeleo. Ko te Koga Tohi-Tapu Fakahepeleo neʼe ʼuluaki tohi maʼa te puleʼaga ʼo Iselaele ʼo te kakano, ʼi te temi ʼaē neʼe kei natou maʼu ai he ʼu felōgoi makehe mo te ʼAtua. Neʼe tohi tāfito ia te Koga Tohi-Tapu Fakakeleka maʼa “te Iselaele ʼo te ʼAtua,” ia nātou ʼaē neʼe fakanofo ko te ʼu tehina ʼo Kilisito pea ko te ʼu foha fakalaumālie ʼo te ʼAtua. ʼE mole fakaʼuhiga leva neʼe mole feala ki te hahaʼi ʼaē neʼe mole ko he ʼu Iselaele, ke natou maʼu ni ʼu lelei mai te ako ʼo te Koga Tohi-Tapu Fakahepeleo. ʼO toe fēia aipē, ko te kau Kilisitiano ʼaē ʼe mole fakanofo ʼaki ia te laumālie māʼoniʼoni, ʼe lahi te ʼu tapuakina ʼaē ʼe natou maʼu ʼi tanatou ako pea mo maʼuliʼi ia te ʼu tokoni ʼaē ʼe maʼu ʼi te Koga Tohi-Tapu Fakakeleka.—Lau ia 2 Timoteo 3:15-17.

12. Koteā ʼaē neʼe fakamanatuʼi age e Paulo ki te kau Kilisitiano fakanofo?

¹² Ko te kau Kilisitiano ʼo te ʼuluaki sēkulō, neʼe tala kua natou faitotonu pea mo fakanofo ʼaki ia te laumālie māʼoniʼoni, ke feala hanatou maʼu tofiʼa ʼi selō. Ko tonatou fakanofo ʼaia neʼe mole ina fakaliliu ke natou puleʼi tonatou ʼu tehina Kilisitiano fakanofo ʼaē neʼe kei māʼuʼuli ʼi te kele. Neʼe galoʼi e ʼihi Kilisitiano ʼo te ʼuluaki sēkulō ia te faʼahi ʼaia, pea neʼe natou faigaʼi ke fakamaʼuhigaʼi nātou ʼi te lotolotoiga ʼo tonatou ʼu tehina ʼi te kōkelekāsio. Ko te tupuʼaga lā ʼaia ʼo te lagaʼi e Paulo ia te ʼu fehuʼi ʼaenī: “ ʼE kua kotou mākokona koa lā? ʼE kua kotou koloaʼia koa lā? ʼE kua kotou kamata ʼafio koa lā kae mole matou kau ai? ʼE au fakaʼamu age ke kotou kamata ʼafio, ke feala ai mo mātou ke matou ʼafio mo koutou!” (1 Ko. 4:8) Koia ʼaē neʼe fakamanatuʼi ai e Paulo ki te kau fakanofo ʼo tona temi: “ ʼE mole matou pule ki takotou tui, kae ʼe matou kaugā gāue mo koutou ki takotou fakafiafia.”—2 Ko. 1:24.

ʼE Fakakātoa Te Kaugamālie ʼAē Neʼe Fakakikite

13. Neʼe hoko feafeaʼi ia te filifili ʼo te kau fakanofo ʼi te hili ʼo te taʼu 33 ʼo totatou temi?

¹³ Neʼe mole filifili ʼi te ʼuluaki sēkulō ia te kau Kilisitiano fakanofo fuli, ʼaē ʼe toko 144 000. Neʼe hoko atu te fakanofo ʼa ʼihi ʼi te temi ʼo te kau ʼapositolo pea neʼe mole hahaʼi leva nātou ʼaē neʼe fakanofo ʼi te ʼu sēkulō ki muli age. Kae neʼe hoko atu te faʼahi ʼaia ʼi te lolotoga ʼo te ʼu sēkulō ʼo aʼu mai ki totatou temi. (Mat. 28:20) Ki muli age, ʼi te ʼosi kamata ʼafio ʼa Sesu ʼi te taʼu 1914, neʼe hoko fakavilivili te ʼu ʼaluʼaga ʼo ʼuhiga mo te faʼahi ʼaia.

14, 15. Koteā ʼaē ʼe hoko ʼi totatou temi ʼo ʼuhiga mo te filifili ʼo te kau fakanofo?

¹⁴ ʼUluaki, neʼe fakamaʼa e Sesu te lagi ke mole kei ʼi ai he tahi ʼe fakafeagai ki te pule ʼa te ʼAtua. (Lau ia Fakahā 12:10, 12.) Pea neʼe tokaga leva ki te tānaki ʼo te toe ʼo nātou ʼaē kā kau ki tona Puleʼaga, moʼo fakakātoa ia te toko 144 000. ʼI te vaelua ʼo te ʼu taʼu 1930, neʼe ʼasi ai neʼe kua vave fakaʼosi ia te gāue ʼaia pea tokolahi ʼo nātou ʼaē neʼe natou tali ia te gāue fai fakamafola neʼe mole natou fia ʼolo ki selō. Neʼe mole fakamoʼoni e te laumālie ko nātou ʼe ko he ʼu foha ʼo te ʼAtua. (Vakaʼi ia Loma 8:16.) Kae neʼe natou fakahā ʼe natou kau ki te “tahi ʼu ovi,” ʼaē ʼe natou maʼu te ʼamanaki ke natou māʼuʼuli ʼo heʼegata ʼi te palatiso ʼi te kele. (Soa. 10:16) Koia, hili te taʼu 1935, ko te koga tāfito  ʼaē neʼe fai ʼi te gāue fai fakamafola, neʼe ko te tānaki ʼo “te toe hahaʼi tokolahi,” ʼaē neʼe sio ki ai ia te ʼapositolo ko Soane ʼi te meʼa ʼaē neʼe hā age kiā ia, te toe hahaʼi ʼaia ʼaē kā hao anai ʼi “te mamahi lahi.”—Fakh. 7:9, 10, 14.

¹⁵ Kae, talu mai te ʼu taʼu 1930, neʼe filifili he ʼu hahaʼi tokosiʼi ke natou māʼuʼuli ʼi selō. Koteā tona tupuʼaga? ʼI ʼihi ʼu ʼaluʼaga, neʼe feala ke natou fetogi ʼihi hahaʼi neʼe filifili ʼi muʼa atu kae neʼe mole natou nonofo agatonu. (Vakaʼi ia Fakahā 3:16.) Neʼe palalau ia Paulo ʼo ʼuhiga mo ʼihi tehina mo tuagaʼane neʼe natou liʼaki ia te moʼoni. (Filp. 3:17-19) Ko ai ʼaē kā filifili anai e Sehova moʼo fetogi ia nātou ʼaia? Ko te faʼahi ʼaia ʼe fakalogo kiā ia. Kae ʼe lagi feala ke ina filifili he ʼu hahaʼi neʼe kua natou fakahā tanatou agatonu, ohagē ko te ʼu tisipulo ʼaē neʼe palalau ki ai ia Sesu ʼi tana fakatuʼu ia te Fakamanatu ʼo tana mate, kae mole ko he ʼu hahaʼi ʼe foʼofoʼou mai. a—Luka 22:28.

16. ʼO ʼuhiga mo te kau fakanofo, he koʼē ʼe tou loto fakafetaʼi, pea koteā ʼaē ʼe tou tui papau kiai?

¹⁶ Kae ʼe ʼasi mai, ʼe mole ko nātou fuli ʼaē neʼe filifili ke natou māʼuʼuli ʼi selō talu mai te ʼu taʼu 1930 kua natou fetogi ia nātou ʼaē neʼe mole nonofo agatonu. ʼE mahino ia, neʼe tokaga ia Sehova ke ʼi ai anai he kau Kilisitiano fakanofo iā tātou lolotoga te ʼu ʼaho fakaʼosi ʼo te tuʼu ʼaenī ʼo aʼu ki te fakaʼauha ʼo “Papiloni Lahi.” b (Fakh. 17:5) Pea ʼe feala ke tou falala ko te toko 144 000 ʼe fakakātoa anai ʼi te temi ʼaē kua fakakatofa e Sehova pea mo natou hau fuli anai ki muli age ʼi te Puleʼaga. ʼE feala hatatou tui ki te Folafola fakapolofetā, ʼaē ko te toe hahaʼi tokolahi ʼaē ʼe tuputupu, ʼe haga nonofo agatonu anai, ʼi tonatou ʼuhiga kūtuga. Mole tuai pea ʼe natou ‘hao anai ʼi te mamahi lahi’ ʼaē kā hoko ki te mālamanei ʼa Satana pea mo natou hū fakafiafia anai ki te mālama foʼou ʼa te ʼAtua.

Kua ʼAmanaki Ke Kātoa Ia Te Puleʼaga ʼo Te ʼAtua ʼi Selō!

17. ʼOhagē ko tona ʼui iā 1 Tesalonika 4:15-17 pea mo Fakahā 6:9-11, koteā ʼaē neʼe hoko ki te kau Kilisitiano fakanofo ʼaē neʼe mamate agatonu?

¹⁷ Talu mai te taʼu 33 ʼo totatou temi, ko te ʼu lauʼi hogofulu afe kau Kilisitiano fakanofo neʼe natou fakahā he tui mālohi pea mo natou kātaki agatonu ʼo aʼu ki te mate. Ko nātou ʼaia kua natou tuha ke natou maʼu ia te Puleʼaga pea kua fakapale nātou, ʼi te lagi kamata ʼo te ʼu ʼuluaki ʼaho ʼo te ʼi henī ʼa Kilisito.—Lau ia 1 Tesalonika 4:15-17; Fakahā 6:9-11.

18. (a) Koteā ʼaē ʼe falala kiai ia te kau fakanofo ʼaē ʼe kei māʼuʼuli ʼi te kele? (b) Koteā te manatu ʼa te tahi ʼu ovi ʼo ʼuhiga mo tonatou ʼu tehina fakanofo?

¹⁸ Ko te kau fakanofo ʼaē ʼe kei māʼuʼuli ʼi te kele, ʼe natou falala kātoa, kapau ʼe natou nonofo agatonu, pea mole tuai pea natou maʼu anai ia te fakapale ʼo tanatou māʼuʼuli agatonu. Ko te ʼu lauʼi miliona tahi ʼu ovi, ʼi tanatou sisio ki te tui ʼo tonatou ʼu tehina fakanofo, ʼe natou manatu tahi mo te ʼu palalau ʼa te ʼapositolo ko Paulo, ʼaē neʼe ina ʼui fēnei ʼo ʼuhiga mo te ʼu tehina fakanofo ʼo Tesalonika: “ ʼE matou fiameʼameʼa ʼo ʼuhiga mo koutou ʼi te lotolotoiga ʼo te kōkelekāsio ʼa te ʼAtua ʼuhi ko takotou faʼa kātaki pea mo takotou tui ʼi te ʼu fakataga ʼaē ʼe fai kiā koutou pea mo te ʼu mamahi fuli ʼaē ʼe kotou kātakiʼi. ʼE ko he fakamoʼoni ʼaia ʼo te fakamāu faitotonu ʼo te ʼAtua, ʼo ina fakaliliu koutou ke kotou tuha mo te puleʼaga ʼo te ʼAtua, ʼaia ʼe tupu ai takotou mamahi moʼoni.” (2 Tes. 1:3-5) ʼI he temi pē anai kā mate ai ia te fakanofo fakamuli ʼaē ʼe kei maʼuli ʼi te kele, ʼe kātoa ai anai ia te puleʼaga ʼo te ʼAtua ʼaē ʼi selō. ʼE ko he toe fakafiafia lahi anai ʼaē kā hoko ʼi selō pea ʼi te kele!

[ʼU nota]

ʼE Feala Koa Hakotou Fakamahino?

• Koteā ʼaē neʼe fakahā e te ʼAtua kiā Apalahamo ʼe ʼi ai tona pikipikiga mo te ʼAho ʼo te Fakamāu?

• He koʼē neʼe tala ko Apalahamo ʼe faitotonu?

• Ko nātou ʼo te hako ʼo Apalahamo, ʼaē ʼe tala ʼe natou faitotonu, ʼe natou maʼu anai teā?

• Koteā ʼaē ʼe falala kiai ia te kau Kilisitiano fuli?

[ʼU fehuʼi ʼo te ako]

[Paki ʼo te pasina 23]

ʼI te Penikositē ʼo te taʼu 33 ʼo totatou temi, neʼe kamata filifili e Sehova ia te lua koga ʼo te hako ʼo Apalahamo