1. ʼE kaugamalie koa ia natou ʼae ʼe natou fia fakalahi age tanatou gaue kia Sehova?

 ʼE LAHI te ʼu gaue ʼe tonu ke tou fakahoko kae kua ovi mai te fakaʼosi. (Mat. 24:14; Luka 10:2; 1 Pet. 5:2) ʼE tou fia gaue kia Sehova ʼo lahi age ʼi ʼatatou ʼu fealagia. Tokolahi ia natou ʼe natou fia fakalahi age tanatou minisitelio. Ko ʼihi ʼe natou fia liliu ʼo pionie. Ko ʼihi atu ʼe natou fia gaue ʼi te Petele peʼe ki te gaue laga fale. Pea tokolahi te ʼu tehina ʼe natou fia liliu ʼo faifekau fakaminisitelio peʼe tagata ʼafea. (1 Tim. 3:1, 8) ʼE mahino ia, ʼe fiafia ia Sehova ʼi tana sio ʼe fia tauhi age tana hahai.—Pes. 110:3; Esa. 6:8.

2. Kotea ʼe tou logoʼi mo kapau mole tou lava fakahoko fuli ʼatatou fakatuʼutuʼu fakalaumalie?

² Hili te temi loaloaga, ko ʼihi fakatu’utu’u ne’e mole feala ke tou fakahoko ʼi te tauhi ʼae kia Sehova ʼo tupu ai totatou lotovaivai. ʼE ʼi ai ʼihi atu ʼu gaue ʼi te kautahi ʼa Sehova mole kei feala ke tou fakahoko ʼuhi he ʼe kua tou matutu’a peʼe ko ʼihi atu aluʼaga. (Taag. 13:12) Ko te aluʼaga ʼaia ne’e hoko kia Melissa. * Ne’e fia gaue ʼi te Petele peʼe kau ki te Ako ʼo Te Kau Faifakamafola ʼo Te Pule’aga, ʼe ina ui fenei: “Kua fakalaka toku taʼu. Kia au ʼi te temi nei ko te ʼu gaue ʼaia kua hage pe ko he moemisi. ʼI ʼIhi temi, ʼe au logoʼi te lotovaivai.”

3. Kotea ʼe tonu ke tou fai ke tou ma’u niʼihi gaue?

³ Ko ʼihi tupulaga ʼe ʼaoga anai ke natou gaueʼi niʼihi kalitate ʼi mu’a ʼo te foaki age niʼihi atu gaue. ʼE feala ke natou ʼatamai, toʼo tonu lelei pea mo aga fakakaumea, kae ʼi te  tahi fa’ahi ʼe ʼaoga ke natou toe akoʼi, ke natou liliu ʼo fa’a kataki pea mo aga fakaʼapaʼapa. Kapau ʼe kotou faiga fakamalotoloto ke kotou gaueʼi niʼihi atu kalitate, pea ʼe feala anai ki te ʼu tehina ke natou foaki atu niʼihi atu gaue ʼi he temi ne’e mole kotou ʼamanaki ki ai. Tokogaʼi te faʼifaʼitaki ʼa Nick. ʼI tona taʼu 20, ne’e lotomamahi ʼi tona mole fakanofo ʼae ko he tehina faifekau fakaminisitelio. Ne’e ina ui fenei: “Ne’e au logoʼi, ʼe ʼi ai te me’a ʼe mole lelei ia au.” Kae ne’e mole tu’u ai tana ʼu faiga ʼi te kokelekasio mo te faifakamafola. ʼI te temi nei, kua kau ʼi te Komite ’o Te Filiale.

4. Kotea ka tou vakaʼi anai ʼi te alatike ʼaeni?

⁴ ʼE kotou lotovaivai ʼuhi ko he fakatuʼutu’u fakalaumalie ne’e mole feala ke kotou fakahoko? Kapau koia, fakaha kia Sehova ʼou tuʼania. (Pes. 37:5-7) Kotou kole ki he ʼu tehina kua faiva he ʼu tokoni ke lelei age takotou gaue ki te ʼAtua, pea mo faigaʼi ke kotou ma’uliʼi te ʼu tokoni ʼaia, ʼe fua lelei anai kia koutou. Ohage pe ko Melissa ne’e tou palalau ki ai ʼi mu’a atu, ʼe tou fia fai he ʼu gaue kia Sehova kae mole feala ke tou fai ʼi te temi nei. Kotea ka tou fai? ʼE feafeaʼi anai takotou taupau takotou fiafia? Mo’o tali ki te fehu’i ʼaia, ʼe tou vakaʼi anai ʼi te alatike ʼaeni, (1) ʼe tou ma’u ʼifea te fiafia, (2) ʼe hikihiki feafeaʼi anai totatou fiafia, (3) ko te ʼu faʼahiga fakatuʼutu’u fea ka tou fakahoko ke lahi age totatou fiafia.

5. Kotea te ʼu me’a ʼae ʼe tonu ke tou tokagaʼi ke tou ma’u ai te fiafia? (Ekelesiasi 6:9)

⁵ ʼE feala ke tou ma’u te fiafia ʼi te Tohi-Tapu ohage ko tona ui mai ia Ekelesiasi 6:9. (Lau.) Ko he tahi ʼe ina leleiʼia, ‘te ʼu me’a ʼae ʼe sio ki ai ʼe fiafia’ pe ia, ʼi te ʼu me’a ʼae kua ina ma’u. Ko he tahi ʼe ina tuku tona loto ke taki e tanaʼ u holi, ʼe fakaʼamu tuʼuma’u ki he me’a mole feala ke ina ma’u. Koia, kotea te ako ma’a tatou? Ke tou ma’u te fiafia, tou tokagaʼi pe te ʼu me’a ʼae kua tou ma’u kae mole ko te ʼu me’a ʼae mole feala ke tou ma’u.

6. Kotea te lea fakatata ka tou vakaʼi anai? Pea kotea te ako ʼe tou ma’u mai ai?

⁶ ʼE tou fiafia mo’oni koa ʼi te ʼu me’a ʼae kua tou ʼosi ma’u? ʼE manatu te tokolahi ʼe mole feala koteʼuhi ʼe tou loto tuʼuma’u ki he ʼu koloa fo’ou. Koia, ʼe feala ke tou fiafia mo kapau ʼe tou fakaʼaogaʼi lelei te ʼu koloa ʼae kua tou ma’u. ʼO feafeaʼi? Ke tou mahino, tou vakaʼi te lea fakatata ʼa Sesu ʼo ʼuhiga mo te ʼu taleta ʼae tou ma’u ia Mateo 25:14-30. ʼE tou tokagaʼi anai pe ʼe feafeaʼi hatatou faʼahiga ma’u te fiafia ʼi te ʼu tapuakina ʼae kua tou ma’u ʼi te temi nei.

7. Fakamahino fakanounou mai te lea fakatata ʼa Sesu ʼo ʼuhiga mo te ʼu taleta.

⁷ ʼE talanoa te lea fakatata ki he tagata ʼe ʼamanaki faifolau. ʼI muʼa ʼo tana mavae, neʼe ina pauʼi tana ʼu kaugana ʼo ina foaki age kia natou takitokotahi he ʼu taleta ke natou gaueʼi. * ʼO mulimuli ki ʼonatou fealagia takitokotahi, ne’e foaki e te tagata taleta ʼe nima ki te kaugana, taleta ʼe lua ki te tahi atu, pea taleta ʼe tahi ki te tolu kaugana. Ko te ʼu kaugana ʼe lua neʼe nā fakaʼaoga lelei te ʼu taleta ʼae neʼe foaki age. Kae ko te tolu kaugana, neʼe mole ina fakaʼaogaʼi lelei te falā ʼae neʼe tuku age, ʼo tupu ai tona fakamavae e tona pule.

8. He koʼe neʼe feala ke fiafia te ʼuluaki kaugana ʼo te lea fakatata?

 ⁸ Ko te ʼuluaki kaugana neʼe ina logoʼi tona fiafia ʼi te foaki age e tona pule taleta ʼe nima. Neʼe ko he falā lahi, ʼo ha mai te falala ʼo te pule kia ia. Kae neʼe feafeaʼi te lua kaugana? ʼUhi ʼae, neʼe mole tatau te ʼu taleta ʼae neʼe foaki age ki ai, neʼe feala pe ke lotovaivai. Kotea ʼae neʼe ina logoʼi?

9. Kotea ʼae neʼe mole ui e Sesu ki te lua tagata kaugana? (Mateo 25:22, 23)

⁹ Lau ia Mateo 25:22, 23. Neʼe mole ui e Sesu ko te lua kaugana neʼe ita peʼe lotomamahi ʼuhi ʼae neʼe foaki age pe taleta ʼe lua. Pea neʼe mole ui e Sesu neʼe meo ʼo ina ui: ‘Ko te gata pe koa ʼaia ʼo te ʼu taleta neʼe foaki mai? Kapau ʼe manatu taku pule mole ko au he tagata faʼa gaue, ʼe lelei age pe taku tanu tana foʼi falā kae gaue pe au maʼaku kae mole maʼa ia.’

10. Neʼe fakaʼaogaʼi feafeaʼi e te lua kaugana tana ʼu taleta?

¹⁰ Ko te lua kaugana, neʼe hage pe ko te ʼuluaki kaugana, neʼe ina toʼo fakamalotoloto tana gaue, neʼe nā gaue kinakina ki tonā pule. Ko tona ʼu fua neʼe ina toe ma’u te ʼu taleta ʼe lua ʼo vikiʼi ai e tona pule mo foaki age ʼihi atu ʼu gaue.

11. ʼE feafeaʼi hatatou fakatuputupu totatou fiafia?

¹¹ ʼE toe feia pe, ʼe feala ke tuputupu totatou fiafia mo kapau ʼe tou fakahoko lelei te ʼu gaue ʼae neʼe tuku mai ke tou fai. Ohage la, “tokaga tafito” ki te gaue faifakamafola pea mo gaue fakamalotoloto ʼi te kokelekasio. (Gaue 18:5; Hep. 10:24, 25) Teuteu lelei te ʼu fono ke kotou foaki  he ʼu tali fakalotomalohi. Fakahoko lelei te ʼu kiʼi akonaki peʼe faipalalau ʼae ʼe tuku atu ke ke fai ʼi te ʼu fono ʼo te vahaʼa. Kapau ʼe kole atu he tahi gaue ʼi te kokelekasio, kotou agatonu ki ai. ʼAua naʼa kotou me’a noaʼi ʼo ui ko he puli temi te ʼu gaue ʼae neʼe foaki atu. (Taag. 22:29) Ka lahi age takotou manako ki takotou ʼu gaue fakalaumalie, ʼe kotou tuputupu ai mo toe lahi ai tokotou fiafia. (Kal. 6:4) ʼE faigafua anai takotou fakafiafia fakatahi mo he ʼu tehina neʼe foaki age he gaue neʼe kotou fakaʼamu ki ai.—Loma 12:15; Kal. 5:26.

12. Kotea ʼae neʼe fai e Melissa mo Nick ke lahi age tonā fiafia?

¹² ʼE kotou manatuʼi ia Melissa ʼae neʼe tou palalau ki ai ʼi mu’a atu, ne’e mole ina lava fakahoko tana ʼu fakatuʼutu’u, ne’e ina ui fenei: “Neʼe au faiga ke lelei age taku gaue pionie pea mo faigaʼi ia puleʼaki fuli ʼi te gaue faifakamafola. ʼAki taku fai ʼaia, neʼe lahi ai toku fiafia.” Neʼe tauʼi feafeaʼi ia Nick tana lotovaivai ʼuhi ʼae ko tana mole fakanofo ko he faifekau fakaminisitelio? “Ne’e au tokaga lelei pe au ki te ʼu gaue ʼae neʼe foaki mai, kau ki te faifakamafola pea mo fai he ʼu tali fakalotomalohi ʼi te ʼu fono. Neʼe au toe fai taku kole ki te gaue ʼi te Petele pea neʼe tali ʼi te ta’u ʼae neʼe hoa mai.”

13. Kotea anai ʼe hoko mo kapau ʼe kotou mama’ua ʼi te gaue ʼae ʼe kotou fakahoko nei? (Ekelesiasi 2:24)

¹³ ʼE feala koa ke toe foaki atu he tahi ʼu gaue ʼi te ka haʼu mo kapau ʼe kotou ma’uma’ua ʼi te ʼu gaue ʼae ʼe kotou fakahoko nei? Ohage pe ko te aluʼaga neʼe hoko kia Nick, ʼe feala ia. Kae ohage ko Melissa, ʼe feala ke lahi totatou fiafia ʼi te ʼu gaue ʼae ʼe tou fai ma’a Sehova. (Lau ia Ekelesiasi 2:24.) Tahi ʼae, ʼe lahi totatou fiafia ʼi tatatou iloʼi ʼae ʼe fiafia totatou Pule ia Sesu Kilisito.

14. Kotea ʼae ʼe lelei ke tou taʼofi ʼo ʼuhiga mo tatatou fakatuʼutu’u fakalaumalie?

¹⁴ ʼO ʼuhiga mo te ʼu gaue ʼae kua tou fakahoko nei ʼe fakaʼuhiga koa kua au feʼauga aipe? Kailoa. ʼE tonu anai ke tou fai he ʼu fakatu’utu’u ke tou liliu ʼo faiva ʼi te faifakamafola pea mo te faiako pea mo tokoni ki te ʼu tehina mo te ʼu tuaga’ane. ʼE fua lelei anai mo kapau ʼe tou tokaga fakapotopoto mo agavaivai ki ʼotatou tehina mo tuaga’ane kae mole kia tatou totonu pe.—Taag. 11:2; Gaue 20:35.

15. Kotea te ʼu fakatuʼutu’u ʼe feala ke tokoni atu ke lahi age tokotou fiafia?

¹⁵ Kotea ʼihi fakatuʼutu’u neʼe kotou fia fakahoko? Ke hoko te ʼu fakatuʼutu’u ʼaia, kotou kole kia Sehova ke tokoni atu. (Taag. 16:3; Sakp. 1:5) ʼO ʼuhiga mo te ʼu fakatuʼutu’u ʼae neʼe kua tou ʼosi talanoa ki ai ʼi te  ʼuluaki palakalafe, neʼe kua kotou faiga koa ke kotou fakahoko he fakatutu’u ʼe tahi ohage ko te gaue pionie, gaue ʼi te Petele peʼe ko te kau ki te laga fale? ʼE lagi kotou ma’u te fealagia ʼae ke kotou ako he tahi lea ke feala ai hakotou fakamafola te logo lelei ʼi he fenua matapule. Moʼo fakahoko ʼo te fakatuʼutu’u ʼaia, kotou vakaʼi te kapite 10 ʼo te tohi ʼaeni Te Kautahi ʼAe ʼe Ina Fai Te Finegalo ʼo Sehova pea mo palalau mo te ʼu tagata ʼafeā ʼo tokotou kokelekasio. * ʼI takotou gaueʼi te taʼi ʼu fakatuʼutu’uʼ aia, ʼe kotou  tuputupu ai anai ʼi te faʼahi fakalaumalie pea toe lahi age tokotou fiafia.

16. Kotea ʼe kotou fai anai mo kapau ʼe mole kotou lava fakahoko ʼakotou fakatuʼutu’u?

¹⁶ Ko te ʼu fakatuʼutu’u ʼae ka tou vakaʼi ʼi te alatike ʼaeni, kapau neʼe mole hoko, kotea ka kotou faigaʼi? Kotou ʼahiʼahiʼi ʼo fakakaukau’i he fakatuʼutu’u ʼe kotou fealagia. ʼE tou vakaʼi anai ʼi te ʼu palakalafe ʼae ʼe hoa mai.

17. Ka tou lau ia 1 Timoteo 4:13, 15, ʼe liliu feafeaʼi anai he tehina ʼo faiva ʼi te faiakonaki?

¹⁷ Lau ia 1 Timoteo 4:13, 15. Kapau ko koe ko he tehina kua papitema, faigaʼi ke ke gaue fakamalotoloto, tau lautohi pea mo tau faiakonaki. Kotea tona tupuʼaga? Kapau ʼe ke fakamalotoloto, ʼe ke liliu anai ʼo lautohi lelei, ʼo faiakonaki lelei, ʼo feala ai hau faitokoni kia natou ʼae ʼe fagono. Faigaʼi ke ke ako mo ke mulimuli ki te kalitate takitahi ʼae ʼe ma’u ʼi te kaupepa Fai Fakamalotoloto Tau Lautohi Pea Mo Tau Faiakonaki ʼo ke fai tuʼuma’u ʼi tou loto fale moka ke faiakonaki. Toe kumi tokoni ki te tehina lagolago mo faitokoni peʼe ko he ʼu tagata ʼafeā. * (1 Tim. 5:17) Mole gata ʼaki pe te ʼu tokoni ʼae ʼe tou ma’u ʼi te kaupepa kae ʼe toe ma’uhiga age te tokoni ʼae ʼe tou foaki kia natou ʼae ʼe fagono mai mo fakamalohiʼi tanatou tui pea mo uga natou ke natou ma’uliʼi te ʼu me’a ʼae ʼe natou ako. ʼI takotou fai ʼaia, ʼe lahi age anai takotou fiafia pea mo natou ʼae ʼe fagono mai.

18. Kotea ʼae ka tokoni mai kia tatou ke tou fakahoko lelei tatatou faifakamafola?

¹⁸ Ko tatou fuli ko tatatou gaue ko te  faifakamafola moʼo fai ni tisipulo. (Mat. 28:19, 20; Loma 10:14) ʼI te gaue ma’uhiga ʼaia, ʼe kotou fia liliu koa ko he tahi ʼe faiva ai? ʼI takotou ako te kaupepa Faiakonaki ʼe tokoni atu anai ke kotou fai he fakatuʼutu’u lelei ke kotou fakahoko te gaue. ʼE feala ke kotou ma’u he ʼu manatu ʼe ʼaoga ʼi te Kaupepa Ako Te Maʼuli Fakakilisitiano Mo Te Faifakamafola pea mo he ʼu faʼifaʼitaki ʼi te ʼu ʼata viteo ʼae ʼe fakaha ʼi te ʼu fono ʼo te vahaʼa. ʼAki te ʼu manatu ʼae tou ma’u ʼi te ʼu kaupepa, ʼe tou fili anai pe ʼe kotea ʼe tou leleiʼia age ke tou fakahoko ʼi te gaue. Kapau ʼe tou ma’uliʼi te ʼu tokoni ʼaia, ʼe tou liliu anai ʼo faiva ʼi te faifakamafola pea ʼe toe lahi age anai totatou fiafia.—2 Tim. 4:5.

19. ʼE kotou fakatuputupu feafea’i anai te ʼu kalitate Fakakilisitiano?

¹⁹ ʼAua naʼa galo kia koutou, ko te fakatuʼutu’u pe ʼe tahi ʼe ma’uhiga ke kotou fakahoko, ko te fakatuputupu he ʼu kalitate ʼe leleiʼia e te ʼAtua. (Kal. 5:22, 23; Kol. 3:12; 2 Pet. 1:5-8) ʼE kotou fakahoko feafeaʼi anai? ʼE lagi ʼe kotou fia fakamalohi age takotou tui. ʼE feala anai mo kapau ʼe kotou lau mo taʼofi te ʼu faʼifaʼitaki ʼae ʼe tu’u ʼi te ʼu alatike ʼo totatou ʼu tohi. Ohage la, ʼe kotou fiafia anai ʼi takotou sioʼi te ʼu ʼata viteo ʼo te Televisio JW ʼe fakaha ai pe neʼe feafeaʼi te tau’i e te ʼu tehina mo tuagaʼane ia tonatou ʼu fihifihia ʼaki tonatou tui. Kotou fakakaukau’i pe ʼe feafea’i takotou faʼifaʼitakiʼi ia tonatou tui ʼi tokotou maʼuli.

20. ʼE feafeaʼi tatatou fakatuputupu totatou fiafia pea mo fakasiʼisiʼi totatou lotovaivai?

²⁰ ʼE mahino ia ʼi te temi ʼaeni, ʼe tou gaue fuli ma’a Sehova, kae ʼe tou fakaʼamu ke toe lahi age ʼotatou ʼu fealagia moʼo fakahoko tana gaue. ʼE toe lahi age anai tatatou gaue ki te ʼAtua ʼi te malama foʼou. ʼI te temi ʼaeni, kapau ʼe tou fakahoko ia me’a fuli ʼe tou fealagia ʼe tuputupu anai totatou fiafia pea ʼe toe ma’uhiga age te fakakololiaʼi pea mo vikiʼi ia Sehova, “te ʼAtua fiafia.” (1 Tim. 1:11) Tou fakafetaʼi mo fiafia ʼi te ʼu gaue ʼae ʼe tou fakahoko.