1-2. Ia Pesalemo 34:8, NWT, ʼe tou iloʼi feafea’i te agalelei ʼa Sehova?

KOTOU fakakaukau’i age mu’a, ʼe ui atu ke kotou kai ki he me’a kai ne’e he’eki kotou lave ki ai ʼi mu’a atu. ʼE lahi te ʼu ako ʼe kotou ma’u ʼaki te sio, te mamanu, tona fa’ahiga teuteu’i pe’e ko te ʼu manatu ʼa ʼihi atu. Kae ʼe hoki kotou kai pe anai ki ai, pea ʼe kotou iloʼi ai leva pe ’e kotou lelei’ia.

² ʼE lahi age te ʼu ako ʼe tou ma’u ʼo ʼuhiga mo te agalelei ʼa Sehova ʼi tatatou lau te Tohi-Tapu, ʼatatou tohi pea mo fagono ki te ʼu fakamatala ʼa ’ihi ne’e ma’u tapuakina mai ia ia. Kae ʼe hoki tou mahino mo’oni anai ki te agalelei ʼa Sehova ʼi tatatou “’ahi’ahi” e tatou totonu ʼona lelei. (Lau ia Pesalemo 34:8, NWT. *) Ohage la, kua tou fakatu’utu’u ke tou kau ki he fa’ahiga gaue temi katoa, kae ke hoko tatatou fakatu’utu’u, ʼe ma’ua ke tou fakafaigafua totatou ma’uli. ʼE lagi ne’e kua tuʼa lahi tatatou lau te fakapapau ʼae ne’e fai e Sesu ʼi tana ui ʼae kapau ʼe tou ʼuluaki fakamu’amu’a te Puleaga ʼo te ʼAtua, ʼe foaki mai anai e Sehova te ʼu me’a ʼae ʼe ʼaoga tafito kia tatou. Kae ne’e he’eki tou fakahoko te faʼahi aia. (Mat. 6:33) Kae ʼaki te tui ki te fakapapau ʼa Sesu, ʼe tou fakaveliveli ai ʼotatou maʼua, tatatou gaue fakamalama, kae tou haga fakalelei ki tatatou faifakamafola. Ka tou fai feia, ʼe mahino ia, ʼe foaki mai anai e Sehova te ʼu meʼa ʼae ʼe ʼaoga kia tatou. ʼE tou “ ʼahiʼahi” ai te agalelei ʼa Sehova.

3. Ia Pesalemo 16:1, 2, ko ai ʼae ʼe ina ma’u te agalelei ʼa Sehova?

³ ʼE ‘agalelei Sehova ki te hahaʼi fuli, o kau ai mo natou ʼae ʼe mole natou iloʼi ia ia. (Pes. 145:9; Mat. 5:45) Kae kia natou ʼae ʼe ʼofa kia Sehova mo kaugana ki ai ʼaki tonatou ma’uli katoa, ʼe lahi te ʼu tapuakina ʼe natou ma’u mai ia ia. (Lau Pesalemo  16:1, 2.) Tou taʼofi he ʼu fa’ahiga fai ʼe tou tali ai te agalelei ʼa Sehova.

4. ʼE fakaha feafea’i e Sehova tana agalelei kia natou ʼae ʼe fakaovi age?

⁴ Ka tou ma’uli’i te ʼu me’a ʼae ʼe tou ako mai ia Sehova, ʼe tou logoʼi ʼona fua ʼi totatou ma’uli. ʼI te temi ʼae ne’e tou ako ai ke tou ilo ia ia pea mo ʼofa ki ai, ne’e tokoni mai ke tou tau’i te ʼu manatu pea mo te ’u gaue kovi ʼae ne’e tupu ai tatatou mama’o mai ia ia. (Kol. 1:21) ʼI te temi ʼae ne’e tou foaki ai totatou ma’uli kia Sehova pea tou papitema, ne’e toe lahi age tatatou logoʼi tana agalelei, he ne’e tou ma’u ai he leʼo ʼo loto ʼe lelei pea tou liliu ko hona kaumeʼa.—1 Pet. 3:21.

5. ʼE tou logoʼi feafea’i te agalelei ʼa Sehova ʼi tatatou faifakamafola?

⁵ ʼE hoko atu tatatou logoʼi te agalelei ʼa Sehova ʼi tatatou kau ki te faifakamafola. ʼE kotou umiuminoa koa? Tokolahi ʼi te ʼu hahaʼi ʼa Sehova ʼe natou aga feia. ʼE lagi ia mu’a ʼo takotou liliu ko he Fakamo’oni ʼa Sehova, ne’e mole kotou ʼamanaki ʼe kotou tukituki anai ki he matapa ʼo he tahi ʼe mole kotou iloʼi mo vaevae mo ia he logo Fakatohi-tapu. Kae ia aho nei, ʼe kotou fakahoko tu’uma’u. Pea ʼaki te tokoni ʼa Sehova, kua kotou lelei’ia te faifakamafola. Ne’e lahi te ʼu aluʼaga ne’e kotou logoʼi ai te lagolago ʼa Sehova. Ne’e tokoni atu Sehova ke mole ke ita ki he tahi ʼe fakafeagai atu. Ne’e toe tokoni atu ke kotou manatuʼi te vaega ʼae ʼe kotou fakaʼaogaʼi anai ki he tahi ʼe kotou felogoi. Pea ne’e ina foaki atu te malohi ke kotou hoko atu, ʼi takotou felaveʼi mo he haha’i ʼe fakaʼaoʼaoganoa ʼi te telituale.—Sel. 20:7-9.

6. ʼE ha feafea’i te agalelei ʼa Sehova ʼi te akoako ʼae ʼe ina foaki mai?

⁶ Ne’e toe fakaha mai e Sehova tana agalelei ʼi tana ako’i tatou ki te faifakamafola. (Soa. 6:45) ʼI tatatou fono ʼo te vaha’a, ʼe tou fagono ki he ʼu faʼifaʼitaki ne’e lelei tona teuteu’i, pea ʼe fakalotomalohi’i tatou ke tou fakaʼaogaʼi ʼi te faifakamafola. Ne’e lagi tou tu’ania ʼi te kamata, he ’e mata foʼou kia tatou, kae ʼi tatatou fakahoko, ʼe tou tokogaʼi te tali lelei e te haha’i ʼo te telitulae te fa’ahiga fai ʼaia. ʼE toe fakamalohi’i tatou ʼi te ʼu fono mo te ʼu fakatahi lalahi, ke tou kau ki he fa’ahiga faifakamafola ne’e mole feala ke tou kau ki ai ʼi mu’a atu. ʼE ʼaoga anai ke tou mavae mai te ʼu aluʼaga ne’e tou fimalie ʼi ai, kae ʼe tapuakiʼi anai e Sehova. Tou fakasiosio lelei te ʼu tapuakina ʼe tou ma’u ʼi tatatou foaki kia Sehova te gataʼaga ʼo te u me’a lelei ʼe tou ma’u. Pea tou vakaʼi pe ’e tou lava fakalahi feafea’i tatatou faifakamafola.

7. Ko te tapuakina fea ʼae ka tou ma’u ʼi tatatou fakalahi tatatou faifakamafola?

⁷ ʼE tou fakaovi lahi age kia Sehova. Tou vakaʼi te faʼifaʼitaki ʼa te tagata ʼafeā ko Samuel, * ʼe gaue fakatahi mo tona ʼohoana ʼi Colombie. Ne’e fiafia te taumatu’a ʼi tanā pionie ʼi tanā kokelekasio, kae ne’e nā fia fakalahi age tanā faifakamafola ʼo gaue ki he kokelekasio ne’e ʼaoga ki ai he tokoni. ʼI tanā fia fakamu’amu’a te Puleage ne’e ʼaoga ke nā fai he ʼu sakilifisio. Neʼe ui fenei e Samuel: “Ne’e ma ma’uli’i ia Mateo 6:33 pea mo fakagata te ʼu fakatau ʼae ʼe mole hona ʼaoga. Ko te aluʼaga leva ʼae ne’e faigata’a, ko tamā mavae ʼi toma ʼapi. Ne’e feʼauga pe te kiʼi ʼapi ʼaia maʼa maua, he ne’e mole kei ma huʼi he meʼa.” ʼI te koga me’a ʼae ne’e ʼave naua ki ai, ne’e tokagaʼi e te taumatu’a neʼe nā lava maʼuʼuli pe mo te kiʼi foʼi fala ʼae neʼe nā maʼu. ʼE ui fenei e Samuel: “Ne’e ma  sio ki te tokoni ʼa Sehova pea mo tana tali ʼamā faikole. Ne’e ma iloʼi ʼe fiafia ia Sehova ʼo ʼuhiga mo maua pea neʼe ma toe logoʼi foki tona ʼofa. Ko he aluʼaga ia neʼe heʼeki ma logoʼi ʼi mu’a atu.” Kua feala koa ke kotou fakalahi age takotou faifakamafola? Kapau koia, ʼe kotou fakaovi anai kia Sehova pea ʼe tokaga anai kia koutou.—Pes. 18:26.

8. Kotea ʼae ʼe kotou taʼofi mai te ʼu tala manatu ʼa Ivan pea mo Viktoria?

⁸ ʼE tou ma’u te fiafia ʼi tatatou gaue. Kotou tokagaʼi te ʼu tala manatu ʼa Ivan mo Viktoria, ko he taumatua ʼe pionie ʼi Kirghizstan. Ne’e nā maʼuli fakafeʼauga ke feala hanā kau ki he gaue pe ʼe nā ʼaoga ki ai, ʼo kau ki ai mo te u fakatu’utu’u ki te laga fale. E ui fenei e Ivan: “Ki te ʼu gaue ʼae ne’e ma kau ki ai, ne’e ma foaki toma malohi katoa. Tatau aipe pe ne’e ma gaʼegaʼe ʼi te fakaʼosi ʼo te ʼaho, kae ne’e ma ma’u ai he manatu ʼe fimalie pea mo fiafia, he ne’e ma fakaʼaogaʼi toma malohi ma’a te gaue ʼo te Puleʼaga. Ne’e toe lahi age toma fiafia ʼi te ʼu fakakaume’a pea mo te ʼu suvenia fakalotomafana ʼae ne’e ma ma’u mai ai.”—Mko. 10:29, 30.

9. Kotea ʼae ne’e fai e te tuagaʼane mo’o fakalahi age tana faifakamafola?

⁹ Tatau aipe pe ’e tou tau mo he ʼu aluʼaga ʼe faigata’a, ʼe tou ma’u te fiafia ʼi te ʼu gaue ʼa Sehova. Ohage la ko Mirreh, ko he vitua kua vaivai mai Afelika ʼUesite, ne’e ina fakagata tana gaue fakatoketa kae kamata faifakamafola ʼi te ʼu ʼapi. Neʼe faigataʼa kia Mirreh tana haʼele he neʼe kau ʼi te mahaki ʼae ko te ʼola hui, koia neʼe ina fai pe he hola ʼe tahi ʼi te faifakamafola. Kae ʼe lahi age tona temi gaue ʼi te failaupapa. ʼE lahi ʼana ʼa’ahi pea mo ʼana ako Tohi-Tapu, pea felogoi mo ʼihi ia natou ʼaki te telefoni. Kotea te tupuʼaga ʼo te fai e Mirreh te fa’ahi ʼaia? ʼE ina ui fenei: “Kua au ʼofa kia Sehova mo Kilisito Sesu ʼaki toku loto katoa. Pea ʼe au faikole tu’uma’u ke tokoni mai ia Sehova ke au fai ia me’a fuli pe ʼe au lavaʼi ki taku tauhi kia te ia.”—Mat. 22:36, 37.

10. Ia 1 Petelo 5:10, kotea ʼae ʼe ma’u e ihi ʼi tanatou fakalahi tonatou faifakamafola?

¹⁰ ʼE fakakatoa e Sehova tatatou akoako. Ne’e fakatui ki ai ia Kenny ne’e pionie ʼi te motu ʼo Maurice. ʼI tana ma’u te mo’oni, ne’e mavae ʼi te univelesite, ne’e papitema pea pionie katoa. Ne’e ina ui fenei: “E au faigaʼi ke au ma’uliʼi te ʼu palalau ʼo te polofeta ko Esaia, ʼae ne’e ina ui fenei: ‘Koeni au, ke ke fekau au.’ ” (Esa. 6:8) Ne’e gaue ia Kenny ki te ʼu laga fale pea ne’e toe tokoni ki te fakaliliu ʼo te ʼu tohi Fakatohi-tapu ki tana lea. Ne’e ui fenei e Kenny: “ ʼAki te ʼu akoako ʼae ne’e au ma’u, ne’e au faiva ʼi te fakahoko ʼaku gaue. Kae ne’e mole gata ai he ne’e au toe iloʼi ai foki ʼoku tuʼakoi pea mo te ’u kalitate ʼae ʼe tonu ke au gaue’i ke au fakahoko lelei ai te ʼu gaue ʼi te tauhi kia Sehova. (Lau ia 1 Petelo 5:10.) He koʼe ʼe mole kotou fakakaukau’i tokotou aluʼaga, pea mo vakaʼi pe ’e kotou ʼateaina ke kotou ma’u he tahi age akoako mai ia Sehova?

11. Kotea ʼae ne’e fai e te ʼu tuaga’ane ʼo Kolea Saute ke natou kau ki te faifakamafola? (Vakaʼi te pāki ʼo te takafi.)

¹¹ ʼE toe fakahoko te akoako ʼaia ki te kau Fakamo’oni ʼae kua faiva ʼi tanatou fia kau ki he ʼu fa’ahiga fai ʼe fo’ou. ʼI te lolotoga ʼo te taʼi mahaki COVID-19, ko te ʼu tagata ʼafeā ʼo te kokelekasio ʼi Kolea Saute ne’e natou tohi fenei: “Ko ihi ne’e natou manatu ʼe mole feala anai ke natou kau ki te faifakamafola ʼuhi ko te ʼu mahaki ʼae kua tau mo natou. Kae kua feala leva tanatou kau ki ai ia ʼaho nei ʼuhi ko te Neti. Ne’e ako e te ʼu tuaga’ane ʼe toko tolu kua ta’u 80 te fakaʼaogaʼi ʼo te Neti. ʼI te temi nei, kua natou faifakamafola ʼi te Neti teitei pe ʼi te ʼaho fuli.” (Pes. 92:15, 16) ʼE kotou fia fakalahi  koa takotou faifakamafola pea mo ʼahiʼahi te agalelei ʼa Sehova? ʼE ʼi ai te ʼu aluʼaga ʼe feala ke kotou fai moʼo fakahoko ʼakotou fakatu’utu’u.

12. Kotea ʼae ne’e fakapapau e Sehova kia natou ʼae ʼe falala kia te ia?

¹² Kotou falala kia Sehova. ʼE fakapapau mai e Sehova, ʼe ina tapuaki’i anai tatou moka ʼe tou falala pea mo foaki age ki ai te me’a ʼae ʼe tou lavaʼi. (Mala. 3:10) Pea ko te aluʼaga ʼaia ne’e hoko ki te tuaga’ane ʼi Colombie ko Fabiola. Ne’e fia pionie katoa ʼi te ʼosi pe ʼo tana papitema. Kae ne’e tonu ke gaue moʼo tokoni ki tona famili. Koia, ʼi tana to’o leva tana letelete, ne’e faikole malohi kia Sehova ke tokoni age ki ai. Ne’e ina ui fenei: “Ne’e vave pe te li ʼo toku letelete, he ne’e mahina katoa pe taku talitali. Ne’e au pumaʼuli ʼosi.” Hili ki ai mahina ʼe lua, ne’e ina toʼo leva te selevisi pionie. Kua ta’u 70 ʼi te temi nei, pea kua ta’u 20 tana pionie. ʼI te lolotoga ʼo te ʼu ta’u ʼaia, ne’e tokoni ki te toko 8 ke natou papitema. ʼE ina ui fenei: “Logo pe la, ʼe au gaʼegaʼe ʼi ʼihi temi, kaeʼ e tokoni mai ia Sehova ʼi te ʼaho fuli ke au muliʼi taku polokalama.”

13-14. Ko te ʼu faʼifaʼitaki fea ʼe feala ke tokoni atu ke kotou falala kia Sehova pea mo fakahoko ʼakotou fakatu’utu’u?

¹³ Kotou faʼifaʼitakiʼi ia natou ʼae ne’e falala kia Sehova. ʼE tou ma’u ʼi te Tohi-Tapu he ʼu faʼifaʼitaki ʼo ni hahaʼi ne’e natou gaue malohi ʼi te tauhi kia Sehova. ʼE ʼi ai ʼihi ʼi te ʼu faʼifaʼitaki ne’e natou ʼuluaki fakaha tanatou tui ʼi mu’a ʼo hanatou ma’u he ʼu  tapuakina makehe mai ia Sehova. Ohage la, ko Apalahamo ne’e tapuakiʼi e Sehova ʼi te temi pe ʼae ne’e mavae ai ʼi tona ʼapi “ne’e mole ina iloʼi te koga me’a ʼae ka alu ki ai.” (Hep. 11:8) Ne’e hoki ʼosi tana fetauʼaki mo te ʼaselo, pea ma’u e Sakopo te tapuakina makehe. (Sen. 32:24-30) ʼI te ʼamanaki hu ʼa te hahaʼi ʼo Iselaele ki te Kele ʼo Te Fakapapau, ne’e hoki tutu’u te kau pelepitelo ʼi te Vai Tafe ʼo Solotane pea hoki feala ki te kau Iselaele ke natou fakalaka he ne’e mamaha ai te vai.—Sos. 3:14-16.

¹⁴ ʼE toe feala ke kotou ma’u he ʼu faʼifaʼitaki mai te kau Fakamo’oni ʼo te temi nei ne’e natou falala kia Sehova pea neʼe natou lava fakahoko ʼanatou fakatu’utu’u. Ohage la, ko te tehina ko Payton pea mo tona hoa ko Diana, ne’e nā lelei’ia te lau ʼo te ʼu alatike ʼaeni “Ne’e Natou Foaki Ia Natou ʼAki Te Loto Lelei.” * ʼE fakamatala ai e ni tehina mo tu’aga’ane tanatou fakalahi tanatou gaue ma’a Sehova. ʼE ui fenei e Payton: “ ʼI tamā lau ʼanatou faʼifaʼitaki, neʼe hage kia ma’ua ʼe ma sio ki he tahi ʼe kai ki he me’a kai lelei. Pea ʼi te hoko atu ʼo tamā lautohi, kua ma fia ‘ ʼahi’ahi pea mo vakaʼi te agalelei ʼa Sehova.’ ” Ki muli age, ne’e mavae leva ia Payton pea mo tona ohoana ʼo gaue ʼi he koga me’a ’e aoga ki ai he kau faifakamafola. Neʼe kua kotou lau koa te ʼu alatike ʼaia? Pea ne’e kua kotou sio’i koa te ʼu ʼata viteo Faifakamafola ʼi Te ʼu Koga Meʼa Mamaʼo: ʼOsitalalia pea Faifakamafola ʼi Te ʼu Koga Meʼa Mamaʼo: Irlande ʼae kua ta ʼi te jw.org? Ko te ʼu ʼata viteo ʼaia ʼe feala ke tokoni atu ke kotou ma’u he ʼu puleʼaki mo’o fakalahi takotou faifakamafola.

15. He koʼe ʼe tonu ke tou filifili he ʼu fakatahi ʼe lelei?

¹⁵ Kotou filifili te ʼu fakatahi ʼae ʼe lelei. ʼE tou ʼua kai anai ki he pa me’a kai fo’ou, ʼi tatatou fakatahi tu’uma’u mo natou ʼae ʼe natou lelei’ia. ʼE toe feia moka ʼe tou fakatahi mo natou ʼae ʼe natou fai ni fakakatuʼutuʼu ke natou fakahoko te ʼu gaue ʼa Sehova, ʼe tou lotomalohi anai ʼo kumi he ʼu fealagia ke tou fakalahi ai ʼatatou gaue ʼae ki te ʼAtua. Ko te taumatu’a ko Kent mo Veronica ne’e nā fakamo’oni ki ai. ʼE ui fenei e Kent: “Ko ʼamā kaume’a pea mo toma famili ne’e natou fakalotomalohi’i maua ki he tahi age ʼu gaue fo’ou. Ne’e ma mahino ai, ka tou fakatahi mo natou ʼae ʼe natou kumi mu’a te Puleaga ʼo te ʼAtua, ʼe mole tou tuʼania ʼi te fakahoko ʼo he tahi ʼu gaue.” Ko Kent mo Veronica ʼe nā pionie makehe ʼi te temi nei ʼi Serbie.

16. He koʼe ʼe maʼuhiga ke tou fai he ʼu sakilifisio?

¹⁶ Kotou fai he ʼu sakilifisio ma’a Sehova. ʼE mole ʼaoga leva ke tou fakafisi ki he ma’uli fimalie ke lelei’ia tatou e Sehova. (Ekl. 5:19, 20) Neʼe talanoa Sesu ʼi tana lea fakatata ki he tagata neʼe gaue kinakina ʼo tanaki hona ʼu koloa kae neʼe ina meʼa noaʼi te ʼAtua. Koia kapau ʼe tou filifili ke mole tou fai ni sakilifisio maʼa Sehova, ʼe tou hage pe ko te tagata ʼaia ʼi te lea fakatata ʼa Sesu. (Lau ia Luka 12:16-21.) Ko te tehina ko Christian ʼe ma’uli ʼi Falani, ne’e ina ui fenei: “Ne’e mole au foaki kia Sehova mo toku famili ia toku temi pea mo toku malohi.” Ko ia pea mo tona ohoana ne’e nā fai te tonu ʼae ke nā pionie. Kae ke hoko te fakatu’utu’u ʼaia, ne’e tonu ke nā mavae ʼi ʼana gaue fakamalama pea mo maʼuli fakafeʼauga. Koia neʼe nā faimenasi pea neʼe nā fiafia ʼi te meʼa pe ʼae ʼe nā maʼu logo la ʼe mole lahi ke feafeaʼi. Ne’e ʼi ai koa he ʼaoga ʼo te ʼu sakilifisio ʼaia? ʼE ui fenei e Christian: “Kua lahi age tamā fiafia ʼi te faifakamafola he ʼe ma sisio ʼe ako e tamā kau ako pea mo ʼa’ahi ke natou iloʼi ia Sehova.”

17. Kotea neʼe tokoni ki te tuagaʼane ke ina ʼahiʼahi he faʼahiga fai foʼou ʼi tana faifakamafola?

 ¹⁷ Kotou nofo teuteu ki te ʼu fa’ahiga gaue fo’ou pe. (Gaue 17:16, 17; 20:20, 21) Ko Shirley ’e pionie ʼi Amelika, ne’e ina fetogi tana fa’ahiga faifakamafola lolotoga te taʼi mahaki COVID-19. ʼI te kamata, ne’e mole fia faifakamafola ʼaki te telefoni. Neʼe haʼu te tehina taupau ʼo te siliko ʼo ʼaʼahi natou, pea neʼe ina akoako natou ki te faʼahiga faifakamafola ʼaia. Hili tana kau ki te ako ʼaia, ne’e faifakamafola tuʼumaʼu leva ʼaki te telefoni. ʼE ina ui fenei: “ ʼI te kamata ne’e au mataku, kae ʼi te lakaga nei ʼe au fiafia ʼosi. ʼE hahaʼi age natou ʼae ʼe tou ma’u ʼi te telefoni ʼi tatatou faifakamafola ʼi te ʼu ʼapi.”

18. Kotea ʼae ʼe tokoni mai ke tou tau’i te ʼu faigata’aʼia?

¹⁸ Kotou fai hakotou fakatu’utu’u pea kotou fakahoko. Ka tou felaveʼi mo he ʼu faigata’aʼia, ʼe tou faikole fakamalotoloto ke tou fakaʼaogaʼi totatou ʼu fealagia fakakaukau ke tou ma’u ai he ʼu puleʼaki. (Taag. 3:21) Ko Sonia ʼe pionie katoa ʼi te kiʼi kutuga ʼe palalau ʼi te lea Romani ʼi Eulopa. ʼE ina ui fenei: “ ʼE au lelei’ia taku tohi taku ʼu fakatu’utu’u ʼo tuku ki he fa’ahi ʼe au sio ki ai. ʼI toku laupapa, ʼe au fai he pāki ʼo he ʼu ala kehekehe ʼe lua. Ka au to’o he tonu, ʼe au sioʼi te ʼu ala ʼaia ʼe lua pea mo fakakaukau’i pe ko te tonu fea ka tokoni mai ke au lava fakahoko taku fakatuʼutuʼu.” ʼE taupau tu’uma’u pe e Sonia he manatu ʼe lelei ʼo ʼuhiga mo te ʼu faigataʼa’ia ʼae ʼe tonu ke ina tauʼi. ʼE ina ui fenei: “Neʼe tonu ke au filifili pe ʼe au fakaʼuhiga te ʼu fetogi ʼaia ohage ko he kaupa ʼe ina taʼofi taku fakahoko taku fakatuʼutuʼu peʼe ohage ko he ʼaleso ʼe tokoni mai ke au lava fakahoko.”

19. Kotea ʼe tou fakatonutonu ke tou fakahoko?

¹⁹ ʼE lahi te ʼu aluʼaga ʼe tapuaki’i ai tatou e Sehova. ʼE feala ke tou fakaha ʼe tou lelei’ia tana ʼu tapuakina ʼo tou fai ia me’a fuli mo’o viki’i ia ia. (Hep. 13:15) ʼE lahi te ʼu faʼahiga gaue ʼe feala ke tou fai ʼi te tauhi kia Sehova. Pea ʼe mahino ia, ʼe tapuakinaʼi lahi tatou e Sehova. ʼI te ʼaho fuli, tou kumi te ʼu fealagia ʼae ke tou ‘ ʼahi’ahi pea mo vakaʼi te agalelei ʼa Sehova.’ ʼE tou hage anai ko Sesu, ʼae ne’e ina ui fenei: “Ko taku meʼa kai ʼe ko te fai ʼo te finegalo ʼo ia ʼae neʼe ina fekauʼi mai au pea mo fakaʼosi tana gaue.”—Soa. 4:34.