1-2. Kotea ʼae ka tou vakaʼi ʼi te alatike ʼaeni?

FAKAKAUKAU’I age muʼa, ne’e ke fakaui hau fakamolimoli ki he tahi pea ʼe mole ke ma’u. Kotea ʼae ʼe ke logoʼi? Kua ke lotovaivai koa? ʼE fakaha mai ia Taaga Lea 13:12: “Ko te amanaki lelei ae nee mole hoko e fakatupu mahaki ki te loto.” Kae kapau ʼe fakamahino atu te tupuʼaga ʼo tau heʼeki ma’u tau fakamolimoli, ʼe faigafua leva kia koe tau katakiʼi ʼo talitali.

² ʼI te alatike ʼaeni, ʼe tou vakaʼi anai he ʼu pelesepeto Fakatohi-tapu ʼe tokoni mai ke tou hoko atu tatatou “talitali” ʼae kia Sehova. (Mik. 7:7, NWT) Pea ʼe tou talanoa anai kia aluʼaga ʼe lua ʼe tou nofo talitali ai ke fakahoko e Sehova, pea ʼe tou palalau leva ki te ʼu lelei ʼe ma’u anai e natou ʼae ʼe fa’a kataki.

3. Kotea te ako ʼe tou ma’u ia Taaga Lea 13:11?

³ ʼE fakamahino mai ia Taaga Lea 13:11, NWT, ia te tupuʼaga ʼae ke tou fa’a kataki. ʼE ui fenei: “Ko te koloa ʼae ʼe vave tona ma’u ʼe vave pe tona puli kae ko ʼae ʼe mamalie tona tanaki ʼe tuputupu anai.” Kotea te ako ʼe tou ma’u ʼi te vaega ʼaeni? ʼE poto ia ia ʼae ʼe fa’a kataki, he ’e ina fakahokohoko mamalie pe ʼana fakatuʼutu’u.

4. Kotea te ako ʼe tou maʼu ia Taaga Lea 4:18?

⁴ ʼE ui fenei ia Taaga Lea 4:18: “Ko te ala o te kau agatonu e hage ko te malama gigila, ae e asilisili gigila tona malama o kaku ki te lotomalie o te aho.” Ko te fakata ʼae ʼe fakaʼaogaʼi ʼi te vaega ʼaeni, ʼe ina fakamahino mai kia tatou ko Sehova ʼe ina fakaha mamalie tana fakatuʼutu’u ki tana hahai. Kae ʼe toe ʼaoga foki te vaega ʼaeni moʼo fakamahino te fa’ahiga tuputupu ʼo he Kilisitiano pea mo tana fakaovi  ʼae kia Sehova. Kapau ʼe tou tokogaʼi mo ma’uliʼi te ʼu tokoni Fakatohi-tapu pea mo ʼae ʼo te kautahi ʼe tou kofuʼi mamalie ai totatou ʼuhiga Kilisitiano pea mo iloʼi lelei age ia Sehova. Tou vakaʼi pe ne’e fakata feafea’i e Sesu te ʼu manatu ʼaia.

5. Ko te lea fakata fea ʼae neʼe fakaʼaogaʼi e Sesu ʼe ha mai ai ʼe ʼaoga he temi ki he tahi ke tuputupu ʼi te fa’ahi fakalaumalie?

⁵ Ne’e fakata e Sesu te logo ʼo te Puleʼaga ʼae ʼe tou fakamafola ki he tagata nunusi pulapula. Ko te pulapula ʼaia ʼi te loto ʼo te tagata ʼae ʼe fakamalotoloto ʼe homo. ʼO feafea’i? Ne’e ina ui fenei: “ ʼE homo mo hako te pulapula, ʼo mole ina iloʼi pe neʼe hoko feafeaʼi. ʼE foaki mamalie mai e te kele tona fua. ʼUluaki ʼe homo, ʼosi ʼaia pea fisi, pea fakaʼosi leva ʼe fua mai ʼo katoa.” (Mko. 4:27, 28) Kotea ʼae ne’e fia fakamahino e Sesu? Ne’e fakata e Sesu te tuputupu ʼa he tahi ʼe ina tali te logo lelei ʼo te Puleaga ki te pulapula ʼae ʼe tuputupu mamalie. ʼE natou tokogaʼi te fa’ahi ʼaia ʼi te kau ako Tohi-Tapu ʼae ʼe natou fakahoko he ʼu fetogi ʼi tonatou ma’uli ʼi tanatou fakaovi ʼae kia Sehova. (Efe. 4:22-24) ʼAua na’a galo ia tatou, ko Sehova ʼae ʼe ina fakatupu te pulapula.—1 Ko. 3:7.

6-7. Kotea te ako ʼe tou ma’u mai te fa’ahiga teuteu’i e Sehova te kele?

⁶ Ko Sehova ʼe fa’a kataki. ʼE ina fakahoko mamalie ʼana gaue ke ma’u e te hahaʼi ʼana lelei pea mo fakakololia’i tona huafa. Tou tokogaʼi tana teuteu’i mamalie te kele ma’a te tagata.

⁷ Tou vakaʼi pe ne’e feafea’i tana fakatupu te kele. ʼE fakaha ʼi te Tohi-Tapu ‘ne’e ina fuafua te kele,’ ‘fakatu’u ʼona fakatafito,’ pea ‘ina hili te maka ʼo te agele.’ (Sopo 38:5, 6) Ne’e ina sivisivi mamalie tana gaue. (Sen. 1:10, 12) Fakakaukau’i age mu’a, pe kotea ʼae neʼe logoʼi e te kau ʼaselo ʼi tanatou mamata ki te ha mamalie ʼo te ʼu me’a ʼae ne’e fakatupu e  te ʼAtua. Ne’e natou fiafia fuli. Ne’e natou ‘kalaga fakafiafia.’ (Sopo 38:7) Kotea te ako ʼe tou ma’u mai ai? ʼE lau’i afe ki te afe te temi ʼae ne’e fakaʼaogaʼi e Sehova ki te ʼu me’a ʼae ne’e ina fakatupu, pea ʼi tana ʼosi sivisivi ʼana gaue, ne’e ina ui leva: “Nee lelei tukupau.”—Sen. 1:31.

8. Kotea ʼae ka tou vakaʼi ʼi te lakaga ʼaeni?

⁸ ʼO hage ko te ʼu fakamahino ʼae ne’e tou vakaʼi, ʼe lahi te ʼu pelesepeto ʼi te Tohi-Tapu ʼe natou fakama’uhiga’i te fa’a kataki. Tou sivisivi ʼi te lakaga ʼaeni te ʼu aluʼaga ʼe lua ʼae ʼe ha mai ai ʼe tonu ke tou nofo teuteu ʼo talitali kia Sehova.

9. Talanoa ki he aluʼaga ʼe tonu anai ke tou talitali kia Sehova.

⁹ ʼI ʼihi temi, ʼe tonu ke tou talitali ke fakahoko e Sehova ʼatatou faikole. ʼE lagi ne’e kotou kole kia Sehova he malohi moʼo katakiʼi he fihifihia peʼe ko he tokoni moʼo tau’i ʼokotou vaivaiʼaga. ʼE hage koa kia koutou ʼe tuai te fakahoko e Sehova takotou faikole? Kotea te tupuʼaga ʼo te mole tali e Sehova ʼatatou faikole ʼi te temi pe ʼaia?

10. He koʼe ʼe tonu ke tou kataki ʼo talitali ke fakahoko e Sehova ʼatatou faikole?

¹⁰ ʼE fagono Sehova ki ʼatatou faikole. (Pes. 65:3) ʼE ha ʼi ʼatatou faikole tatatou tui. (Hep.11:6) ʼE toe fia iloʼi foki e Sehova pe ʼe tou fakatuʼutu’u malohi ke alu tahi totatou ma’uli mo te ʼu me’a ʼae ʼe tou faikole ki ai pea mo fai tona finegalo. (1 Soa. 3:22) Kapau ʼe tou faigaʼi ke tou fetogi he aga kua tou mahani ki ai kae ʼe mole lelei pe’e ko hotatou vaivaiʼaga, ʼe tou faiga malohi ke alu tahi tuʼuma’u totatou ma’uli mo ʼatatou faikole ʼo tou iloʼi ʼe ʼaoga ʼi ʼihi temi ke tou ma’u te fa’a kataki. ʼE hage ia ʼi te ʼu palalau ʼa Sesu, ʼe mole fakahoko e Sehova ʼatatou faikole fuli ʼi te temi pe ʼaia. Ne’e ina fakalotomalohi fenei tatou: “Kotou haga kole, pea ʼe foaki atu anai. Kotou haga kumi, pea ʼe kotou maʼu anai. Kotou haga tukituki, pea ʼe avahi atu anai. He ʼe ko ʼae ʼe ina haga kole ʼe foaki age anai, ko ʼae ʼe ina haga kumi ʼe ina maʼu anai pea ko ʼae ʼe ina haga tukituki ʼe avahi age anai.” (Mat. 7:7, 8) Kapau ʼe tou muli’i te ʼu tokoni ʼa Sesu mo faikole tuʼuma’u, ʼe tou tui papau ʼe fagono Sehova ki ʼatatou faikole pea ʼe ina fai anai he tali ki ai.—Kol. 4:2.

11. ʼE tokoni feafea’i mai ia Hepeleo 4:16 moka hage kia tatou ʼe mole tali fakavilivili e Sehova ʼatatou faikole?

¹¹ ʼE hage koa kia tatou ʼi ʼihi temi, ʼe tuai te tali ʼa Sehova ki ʼatatou faikole? Kapau koia, ʼaua na’a galo ia tatou tana fakapapau ʼae ʼe ina tali anai ʼatatou faikole “ ʼi tona temi totonu.” (Lau ia Hepeleo 4:16.) ʼE mole tou mamahi anai ʼi he temi kia Sehova, ʼuhi ne’e mole ina fakahoko fakavilivili he me’a ne’e tou kole ki ai. Ohage la, ko ʼihi kua loto natou ke pulihi ia te malama ʼaeni. Kua fualoa tanatou faikole ke hoko ia te finegalo ʼo te ʼAtua ʼo hage ko te fakaafe ʼae neʼe fai e Sesu ke tou faikole ki te koga ʼaia. (Mat. 6:10) Tou tokaga, na’a puli ai tatatou tui ʼuhi ko te mole hoko ʼo te fa’ahi ʼaia ʼi te temi ʼae ne’e tou ʼamanaki ki ai. (Hap. 2:3; Mat. 24:44) ʼE lelei age tatatou talitali pea mo hoko atu tatatou faikole ʼaki te tui. Ko te ʼaho fakaʼosi ʼe hoko anai ʼi tona temi totonu, he ne’e kua fakatuʼutu’u e Sehova te “ ʼaho pea mo te hola.” Pea ko tona temi totonu pe ʼaia ma’a tatou fuli.—Mat. 24:36; 2 Pet. 3:15.

12. Ko te tahi aluʼaga fea ʼe ʼahiʼahi’i ai totatou fa’a kataki?

 ¹² ʼE ʼaoga ke tou talitali ʼaki te faʼa kataki ke fakagata e Sehova te ʼu agakovi ʼe lolotoga hoko kia tatou. ʼI te malama ʼaeni, ʼe kaugamalie natou ʼe gaohi koviʼi ʼuhi ko tonatou agaaga, tonatou lanu peʼe ko tonatou fenua. Ko ʼihi leva ia ko tonatou ma’imoa ʼi ʼte faʼahi fakasino peʼe ko te fa’ahi ʼo te fakakaukau. Pea tokolahi ʼi te ʼu kaugana ʼa Sehova ʼe fakatagaʼi ʼuhi ko tanatou tui. Moka hoko kia tatou te ʼu aga heʼe faitotonu ʼaia, tou manatuʼi te ʼu palalau ʼaeni ʼa Sesu: “Ko ʼae ʼe kataki ʼo kaku ki te fakaʼosi, ʼe haofaki anai ia.” (Mat. 24:13) Koia, ʼe ke feafea’i anai mo kapau ʼe ke logo ki he tahi ʼi te kautahi ne’e ina fai he agahala ʼe mamafa? ʼI te temi ʼae kua fakaha ki te ʼu tagata ʼafeā, ʼe ke tuku anai koa ia ia kia natou? ʼE ke fa’a kataki anai koa ʼo talitali ke natou fakahoko tanatou gaue ʼae ne’e tuku age e Sehova? Tou vakaʼi pe kotea ʼe fai anai e te ʼu tagata ʼafeā moka agahala mamafa he tahi?

13. Kotea ʼae ʼe kole e Sehova ke fai e te ʼu tagata ʼafeā moka agahala mamafa he tahi?

¹³ Ka iloʼi e te ʼu tagata ʼafeā ne’e agahala mamafa he tahi ʼi te kokelekasio, ʼe natou faikole kia Sehova ke natou ma’u ia te “poto ʼae mai ʼoluga” ke natou iloʼi pe kotea tana manatu ʼo ʼuhiga mo te aluʼaga ʼae ne’e hoko. (Sakp. 3:17) ʼE natou tokoniʼi anai ia ia ʼae neʼe agahala ke toe ‘tafoki mai’ mai tana aga ʼae ʼe kovi. (Sakp. 5:19, 20) ʼE natou fai anai ia me’a fuli mo puipui te kokelekasio pea mo fakafimalieʼi ia natou ʼae ne’e mamahi. (2 Ko. 1:3, 4) Ka natou sivi he agahala mamafa, ʼe natou to’o anai he temi loaloaga mo fakasiosio lelei te ʼu fakamo’oni. ʼI tanatou ʼosi kumi te takitaki ʼa Sehova, ʼe natou foaki kia ia ʼae ne’e agahala, he ʼu tokoni Fakatohi-tapu pea mo akonakiʼi ia ia “i te faitotonu.” (Sel. 30:11) ʼE mole tuai anai tanatou gaueʼi te koga, kae ʼe mole natou to’o fakavilivili anai he tonu. Ka natou muliʼi lelei te ʼu fakatuʼutu’u ʼa Sehova, ʼe fua lelei ki te kokelekasio. ʼI ʼihi temi, logo la ne’e muli’i lelei e te ʼu tagata ʼafeā te ʼu tokoni ʼa Sehova, ʼe feala ke hoko atu te mamahi ʼo ia ʼae ne’e gaohi koviʼi. Kapau ko koe, kotea ʼae ʼe ke fai anai mo’o fakasiʼisiʼi tou mamahi?

14. Kotea te ako ʼe tou maʼu mai ia Sosefo?

 ¹⁴ Ne’e kua gaohi koviʼi koa koe e he tahi ʼi ʼou kaume’a ʼi he aluʼaga he’e faitotonu? ʼE ke ma’u anai ʼi te Tohi-Tapu he ʼu faʼifaʼitaki lelei ʼo he ʼu tagata mo he ʼu fafine ne’e natou talitali kia Sehova ke ina fakafimalieʼi natou. Tou palalau ʼo ʼuhiga mo Sosefo. Ne’e gaohi koviʼi ia ia e ʼona tehina. Ne’e mamahi kae ne’e mole lotokovi kia natou ʼuhi ko tanatou agakovi kia ia. Ne’e toe hoko atu pe tana tauhi lelei kia Sehova. Ne’e lahi ʼaupito te ʼu tapuakina ne’e foaki e Sehova kia Sosefo ʼuhi ko tana lotololomi pea mo tana fa’a kataki. (Sen. 39:21) ʼAki te temi, ne’e lotofakamolemole ia Sosefo ki ʼona tehina. Ne’e ina tokogaʼi te ʼu tapuakina ʼae ne’e foaki age e Sehova. (Sen. 45:5) ʼO hage ko Sosefo, ʼe fakafimalieʼi anai tatou mo kapau ʼe tou falala kia Sehova, te ʼAtua ʼo te faitotonu.—Pes. 7:18; 73:28.

15. Kotea ʼae ne’e tokoni ki te tuaga’ane ke ina katakiʼi tona gaohi koviʼi?

¹⁵ ʼE lagi mole hoko anai kia tatou he aluʼaga ʼo hage ko Sosefo, kae ʼe feala pe ke tou mamahi ʼi he aluʼaga ne’e mole kovi fau. Koia, kapau ʼe ʼi ai hotatou fihifihia mo he tehina pe’e ko he tahi ʼe mole tauhi kia Sehova, tou maʼuliʼi te ʼu pelesepeto Fakatohi-tapu. (Flp. 2:3, 4) Neʼe ʼi ai te tuaga’ane ne’e mamahi ki tona kaugā gaue he ne’e ina fatufatu’i ia ia ʼaki he ʼu loi. Ne’e mole ita te tuaga’ane ʼo ʼoho atu aipe ki ai ʼi te temi ʼaia. Ne’e ina fakakaukau’i te faʼifaʼitaki ʼo Sesu. ʼI te temi ʼae ne’e leakoviʼi ai ia ia e te hahaʼi, ne’e mole ina leakoviʼi ia natou. (1 Pet. 2:21, 23) Ne’e ina to’o ai te tonu ʼae ke ina tuku feiaʼi. Ki muli age, ne’e ma’u logo ʼe kovi te mahaki ʼo tona kaugā gaue. Ma’a te tuaga’ane, ko te ʼu palalau ʼae ne’e ina fai age, ne’e mole ina fakakaukau’i. Ne’e fiafia ʼi tana katakiʼi tona fatufatu’i ʼo ina logoʼi ai tona fimalie.

16. Kotea te manatu ia 1 Petelo 3:12 ʼe ina fakafimalieʼi anai tatou ʼi he aluʼaga heʼe faitotonu?

¹⁶ Kapau ʼe ke tau mo he aluʼaga heʼe faitotonu peʼe fakatupu mamahi, manatuʼi ʼe ovi Sehova kia natou ʼae ʼe “lotomamahi.” (Pes. 34:18, NWT) ʼE ʼofa ia koe, he ʼe ke ma’u te fa’a kataki pea ne’e ke tuku tau kavega kia te ia (Pes. 55:23) Ko ia te  Tui Fakamau ’o te kele katoa. Pea ’e mole he me’a ’e ugia kia ia. (Lau ia 1 Petelo 3:12.) Kapau ’e ke felave’i mo he ’u fihifihia ’e faigata’a tona fakatokatoka, ’e ke kataki anai koa ’o atalitali kia Sehova? Ko natou ʼae ʼe talitali kia Sehova ʼe natou ma’u anai he ʼu lelei heʼe gata.

17. ʼO mulimuli kia Esaia 30:18, kotea ʼae ʼe tou tui papau ki ai?

¹⁷ Kua ovi mai pe te tapuakinaʼi tatou e Sehova ʼaki tona Puleaga. ʼE ui fenei ia Esaia 30:18, NWT: “ ʼE haga fakatalitali anai ia Sehova ke ina fakaha atu tona ʼofa, pea ko ia, ʼe tuʼu ake anai moʼo fakaha atu tona manavaʼofa. Koteʼuhi ko Sehova ʼe ko he ʼAtua ʼo te faitotonu. Manuʼia ia natou fuli ʼae ʼe natou haga fakatalitali kia te ia.” Ko natou ʼae ʼe hoko atu tanatou talitali kia Sehova, ʼe natou tui papau ʼe natou ma’u anai he ʼu lelei ʼi te temi ʼaeni pea mo te ka haʼu.

18. ʼI te malama fo’ou, kotea te ʼu lelei ʼae ka foaki mai e Sehova?

¹⁸ ʼI te malama fo’ou, ko ʼatatou tu’ania pea mo te ʼu fihifihia ʼe pulihi anai. ʼO toe feia ki te ʼu aga he’e faitotonu pea mo te mamahi. (Fkha. 21:4) ʼE tou mahu anai ʼi te ʼu koloa ʼae ʼe aoga kia tatou. (Pes. 72:16; Esa. 54:13) ʼE taulekaleka anai te ma’uli.

19. ʼE lolotoga teuteu’i nei tatou e Sehova kitea?

¹⁹ ʼE lolotoga teuteu’i nei tatou e Sehova ki te ma’uli ʼae ka fakalogo anai ki tana takitaki. Ka tou liʼaki he aga he’e ʼaoga ʼe tou mahani ki ai, pea ʼe tou lava ma’uli he tahi age kalitate ʼe tou fakaovi ki ai. Koia, tou lototoʼa pea ʼe mole tou homuli. Ko te lelei tukupau, koia ʼae kei toe mai. ʼAki he ka ha’u taulekaleka feia, ʼe tou kataki ʼo talitali ke fakaʼosi e Sehovah tana gaue.